౭. సప్పురిసదానసుత్తం

౩౭. ‘‘అట్ఠిమాని, భిక్ఖవే, సప్పురిసదానాని. కతమాని అట్ఠ? సుచిం దేతి, పణీతం దేతి, కాలేన దేతి, కప్పియం దేతి, విచేయ్య దేతి, అభిణ్హం దేతి, దదం చిత్తం పసాదేతి, దత్వా అత్తమనో హోతి. ఇమాని ఖో, భిక్ఖవే, అట్ఠ సప్పురిసదానానీ’’తి.

‘‘సుచిం పణీతం కాలేన, కప్పియం పానభోజనం;

అభిణ్హం దదాతి దానం, సుఖేత్తేసు [సుఖేత్తే (సీ. పీ.)] బ్రహ్మచారిసు.

‘‘నేవ [న చ (సీ. పీ.)] విప్పటిసారిస్స, చజిత్వా ఆమిసం బహుం;

ఏవం దిన్నాని దానాని, వణ్ణయన్తి విపస్సినో.

‘‘ఏవం యజిత్వా మేధావీ, సద్ధో ముత్తేన చేతసా;

అబ్యాబజ్ఝం [అబ్యాపజ్ఝం (క.) అ. ని. ౪.౪౦; ౬.౩౭] సుఖం లోకం, పణ్డితో ఉపపజ్జతీ’’తి. సత్తమం;