౧౦. రత్తిదివససుత్తం

౮౪. ‘‘ఛహి, భిక్ఖవే, ధమ్మేహి సమన్నాగతస్స భిక్ఖునో యా రత్తి వా దివసో వా ఆగచ్ఛతి హానియేవ పాటికఙ్ఖా కుసలేసు ధమ్మేసు, నో వుద్ధి. కతమేహి ఛహి? ఇధ, భిక్ఖవే, భిక్ఖు మహిచ్ఛో హోతి, విఘాతవా, అసన్తుట్ఠో, ఇతరీతరచీవరపిణ్డపాతసేనాసనగిలానప్పచ్చయభేసజ్జపరిక్ఖారేన, అస్సద్ధో హోతి, దుస్సీలో హోతి, కుసీతో హోతి, ముట్ఠస్సతి హోతి, దుప్పఞ్ఞో హోతి. ఇమేహి ఖో, భిక్ఖవే, ఛహి ధమ్మేహి సమన్నాగతస్స భిక్ఖునో యా రత్తి వా దివసో వా ఆగచ్ఛతి హానియేవ పాటికఙ్ఖా కుసలేసు ధమ్మేసు, నో వుద్ధి.

‘‘ఛహి, భిక్ఖవే, ధమ్మేహి సమన్నాగతస్స భిక్ఖునో యా రత్తి వా దివసో వా ఆగచ్ఛతి వుద్ధియేవ పాటికఙ్ఖా కుసలేసు ధమ్మేసు, నో పరిహాని. కతమేహి ఛహి? ఇధ, భిక్ఖవే, భిక్ఖు న మహిచ్ఛో హోతి, అవిఘాతవా, సన్తుట్ఠో, ఇతరీతరచీవరపిణ్డపాతసేనాసనగిలానప్పచ్చయభేసజ్జపరిక్ఖారేన, సద్ధో హోతి, సీలవా హోతి, ఆరద్ధవీరియో హోతి, సతిమా హోతి, పఞ్ఞవా హోతి. ఇమేహి ఖో, భిక్ఖవే, ఛహి ధమ్మేహి సమన్నాగతస్స భిక్ఖునో యా రత్తి వా దివసో వా ఆగచ్ఛతి వుద్ధియేవ పాటికఙ్ఖా, కుసలేసు ధమ్మేసు నో పరిహానీ’’తి. దసమం.

అరహత్తవగ్గో అట్ఠమో. [తతియో (స్యా. క.)]