౩. భయసుత్తం

౨౩. ‘‘‘భయ’న్తి, భిక్ఖవే, కామానమేతం అధివచనం; ‘దుక్ఖ’న్తి, భిక్ఖవే, కామానమేతం అధివచనం; ‘రోగో’తి, భిక్ఖవే, కామానమేతం అధివచనం; ‘గణ్డో’తి, భిక్ఖవే, కామానమేతం అధివచనం; ‘సఙ్గో’తి, భిక్ఖవే, కామానమేతం అధివచనం; ‘పఙ్కో’తి, భిక్ఖవే, కామానమేతం అధివచనం.

‘‘కస్మా చ, భిక్ఖవే, ‘భయ’న్తి కామానమేతం అధివచనం? కామరాగరత్తాయం, భిక్ఖవే, ఛన్దరాగవినిబద్ధో దిట్ఠధమ్మికాపి భయా న పరిముచ్చతి, సమ్పరాయికాపి భయా న పరిముచ్చతి, తస్మా ‘భయ’న్తి కామానమేతం అధివచనం. కస్మా చ, భిక్ఖవే, దుక్ఖన్తి…పే… రోగోతి… గణ్డోతి… సఙ్గోతి… పఙ్కోతి కామానమేతం అధివచనం? కామరాగరత్తాయం, భిక్ఖవే, ఛన్దరాగవినిబద్ధో దిట్ఠధమ్మికాపి పఙ్కా న పరిముచ్చతి, సమ్పరాయికాపి పఙ్కా న పరిముచ్చతి, తస్మా ‘పఙ్కో’తి కామానమేతం అధివచన’’న్తి.

‘‘భయం దుక్ఖం రోగో గణ్డో, సఙ్గో పఙ్కో చ ఉభయం;

ఏతే కామా పవుచ్చన్తి, యత్థ సత్తో పుథుజ్జనో.

‘‘ఉపాదానే భయం దిస్వా, జాతిమరణసమ్భవే;

అనుపాదా విముచ్చన్తి, జాతిమరణసఙ్ఖయే.

‘‘తే ఖేమప్పత్తా సుఖినో, దిట్ఠధమ్మాభినిబ్బుతా;

సబ్బవేరభయాతీతా [సబ్బే వేరభయాతీతా (స్యా.)], సబ్బదుక్ఖం ఉపచ్చగు’’న్తి. తతియం;