౪. హిమవన్తసుత్తం

౨౪. ‘‘ఛహి, భిక్ఖవే, ధమ్మేహి సమన్నాగతో భిక్ఖు హిమవన్తం పబ్బతరాజం పదాలేయ్య, కో పన వాదో ఛవాయ అవిజ్జాయ! కతమేహి ఛహి? ఇధ, భిక్ఖవే, భిక్ఖు సమాధిస్స సమాపత్తికుసలో హోతి, సమాధిస్స ఠితికుసలో హోతి, సమాధిస్స వుట్ఠానకుసలో హోతి, సమాధిస్స కల్లితకుసలో [కల్లతాకుసలో (స్యా. కం. క.) సం. ని. ౩.౬౬౫ పస్సితబ్బం] హోతి, సమాధిస్స గోచరకుసలో హోతి, సమాధిస్స అభినీహారకుసలో హోతి. ఇమేహి ఖో, భిక్ఖవే, ఛహి ధమ్మేహి సమన్నాగతో భిక్ఖు హిమవన్తం పబ్బతరాజం పదాలేయ్య, కో పన వాదో ఛవాయ అవిజ్జాయా’’తి! చతుత్థం.