౨. అపరిహానియసుత్తం

౨౨. ‘‘ఛయిమే, భిక్ఖవే, అపరిహానియే ధమ్మే దేసేస్సామి, తం సుణాథ…పే… కతమే చ, భిక్ఖవే, ఛ అపరిహానియా ధమ్మా? న కమ్మారామతా, న భస్సారామతా, న నిద్దారామతా, న సఙ్గణికారామతా, సోవచస్సతా, కల్యాణమిత్తతా – ఇమే ఖో, భిక్ఖవే, ఛ అపరిహానియా ధమ్మా.

‘‘యే హి కేచి, భిక్ఖవే, అతీతమద్ధానం న పరిహాయింసు కుసలేహి ధమ్మేహి, సబ్బేతే ఇమేహేవ ఛహి ధమ్మేహి న పరిహాయింసు కుసలేహి ధమ్మేహి. యేపి హి కేచి, భిక్ఖవే, అనాగతమద్ధానం న పరిహాయిస్సన్తి కుసలేహి ధమ్మేహి, సబ్బేతే ఇమేహేవ ఛహి ధమ్మేహి న పరిహాయిస్సన్తి కుసలేహి ధమ్మేహి. యేపి హి కేచి, భిక్ఖవే, ఏతరహి న పరిహాయన్తి కుసలేహి ధమ్మేహి, సబ్బేతే ఇమేహేవ ఛహి ధమ్మేహి న పరిహాయన్తి కుసలేహి ధమ్మేహీ’’తి. దుతియం.