౧౦. పత్తపిణ్డికసుత్తం

౧౯౦. ‘‘పఞ్చిమే, భిక్ఖవే, పత్తపిణ్డికా. కతమే పఞ్చ? మన్దత్తా మోమూహత్తా పత్తపిణ్డికో హోతి, పాపిచ్ఛో ఇచ్ఛాపకతో పత్తపిణ్డికో హోతి, ఉమ్మాదా చిత్తక్ఖేపా పత్తపిణ్డికో హోతి, ‘వణ్ణితం బుద్ధేహి బుద్ధసావకేహీ’తి పత్తపిణ్డికో హోతి, అప్పిచ్ఛతంయేవ నిస్సాయ సన్తుట్ఠింయేవ నిస్సాయ సల్లేఖంయేవ నిస్సాయ పవివేకంయేవ నిస్సాయ ఇదమత్థితంయేవ నిస్సాయ పత్తపిణ్డికో హోతి. ఇమే ఖో, భిక్ఖవే, పఞ్చ పత్తపిణ్డికా. ఇమేసం ఖో, భిక్ఖవే, పఞ్చన్నం పత్తపిణ్డికానం య్వాయం పత్తపిణ్డికో అప్పిచ్ఛతంయేవ నిస్సాయ సన్తుట్ఠింయేవ నిస్సాయ సల్లేఖంయేవ నిస్సాయ పవివేకంయేవ నిస్సాయ ఇదమత్థితంయేవ నిస్సాయ పత్తపిణ్డికో హోతి, అయం ఇమేసం పఞ్చన్నం పత్తపిణ్డికానం అగ్గో చ సేట్ఠో చ మోక్ఖో చ ఉత్తమో చ పవరో చ.

‘‘సేయ్యథాపి, భిక్ఖవే, గవా ఖీరం, ఖీరమ్హా దధి, దధిమ్హా నవనీతం, నవనీతమ్హా సప్పి, సప్పిమ్హా సప్పిమణ్డో, సప్పిమణ్డో తత్థ అగ్గమక్ఖాయతి; ఏవమేవం ఖో, భిక్ఖవే, ఇమేసం పఞ్చన్నం పత్తపిణ్డికానం య్వాయం పత్తపిణ్డికో అప్పిచ్ఛతంయేవ నిస్సాయ సన్తుట్ఠింయేవ నిస్సాయ సల్లేఖంయేవ నిస్సాయ పవివేకంయేవ నిస్సాయ ఇదమత్థితంయేవ నిస్సాయ పత్తపిణ్డికో హోతి, అయం ఇమేసం పఞ్చన్నం పత్తపిణ్డికానం అగ్గో చ సేట్ఠో చ మోక్ఖో చ ఉత్తమో చ పవరో చా’’తి. దసమం.

అరఞ్ఞవగ్గో చతుత్థో.