(౧౯) ౪. అరఞ్ఞవగ్గో

౧. ఆరఞ్ఞికసుత్తం

౧౮౧. ‘‘పఞ్చిమే, భిక్ఖవే, ఆరఞ్ఞికా [ఆరఞ్ఞతా (సబ్బత్థ) పరి. ౪౪౩ పస్సితబ్బం]. కతమే పఞ్చ? మన్దత్తా మోమూహత్తా ఆరఞ్ఞికో హోతి, పాపిచ్ఛో ఇచ్ఛాపకతో ఆరఞ్ఞికో హోతి, ఉమ్మాదా చిత్తక్ఖేపా ఆరఞ్ఞికో హోతి, వణ్ణితం బుద్ధేహి బుద్ధసావకేహీతి ఆరఞ్ఞికో హోతి, అప్పిచ్ఛతంయేవ నిస్సాయ సన్తుట్ఠింయేవ నిస్సాయ సల్లేఖంయేవ నిస్సాయ పవివేకంయేవ నిస్సాయ ఇదమత్థితంయేవ [ఇదమట్ఠితంయేవ (సీ. పీ.)] నిస్సాయ ఆరఞ్ఞికో హోతి. ఇమే ఖో, భిక్ఖవే, పఞ్చ ఆరఞ్ఞికా. ఇమేసం ఖో, భిక్ఖవే, పఞ్చన్నం ఆరఞ్ఞికానం య్వాయం ఆరఞ్ఞికో అప్పిచ్ఛతంయేవ నిస్సాయ సన్తుట్ఠింయేవ నిస్సాయ సల్లేఖంయేవ నిస్సాయ పవివేకంయేవ నిస్సాయ ఇదమత్థితంయేవ నిస్సాయ ఆరఞ్ఞికో హోతి, అయం ఇమేసం పఞ్చన్నం ఆరఞ్ఞికానం అగ్గో చ సేట్ఠో చ మోక్ఖో [పామోక్ఖో (అ. ని. ౪.౯౫; ౧౦.౯౧)] చ ఉత్తమో చ పవరో చ.

‘‘సేయ్యథాపి, భిక్ఖవే, గవా ఖీరం, ఖీరమ్హా దధి, దధిమ్హా నవనీతం, నవనీతమ్హా సప్పి, సప్పిమ్హా సప్పిమణ్డో, సప్పిమణ్డో [సప్పిమ్హా సప్పిమణ్డో (క.) సం. ని. ౩.౬౬౨] తత్థ అగ్గమక్ఖాయతి; ఏవమేవం ఖో, భిక్ఖవే, ఇమేసం పఞ్చన్నం ఆరఞ్ఞికానం య్వాయం ఆరఞ్ఞికో అప్పిచ్ఛతంయేవ నిస్సాయ సన్తుట్ఠింయేవ నిస్సాయ సల్లేఖంయేవ నిస్సాయ పవివేకంయేవ నిస్సాయ ఇదమత్థితంయేవ నిస్సాయ ఆరఞ్ఞికో హోతి, అయం ఇమేసం పఞ్చన్నం ఆరఞ్ఞికానం అగ్గో చ సేట్ఠో చ మోక్ఖో చ ఉత్తమో చ పవరో చా’’తి. పఠమం.

౨. చీవరసుత్తం

౧౮౨. ‘‘పఞ్చిమే, భిక్ఖవే, పంసుకూలికా. కతమే పఞ్చ? మన్దత్తా మోమూహత్తా పంసుకూలికో హోతి…పే… ఇదమత్థితంయేవ నిస్సాయ పంసుకూలికో హోతి. ఇమే ఖో, భిక్ఖవే, పఞ్చ పంసుకూలికా’’తి. దుతియం.

౩. రుక్ఖమూలికసుత్తం

౧౮౩. ‘‘పఞ్చిమే, భిక్ఖవే, రుక్ఖమూలికా. కతమే పఞ్చ? మన్దత్తా మోమూహత్తా రుక్ఖమూలికో హోతి…పే… ఇదమత్థితంయేవ నిస్సాయ రుక్ఖమూలికో హోతి. ఇమే ఖో, భిక్ఖవే, పఞ్చ రుక్ఖమూలికా’’తి. తతియం.

౪. సోసానికసుత్తం

౧౮౪. ‘‘పఞ్చిమే, భిక్ఖవే, సోసానికా. కతమే పఞ్చ? మన్దత్తా మోమూహత్తా సోసానికో హోతి…పే… ఇదమత్థితంయేవ నిస్సాయ సోసానికో హోతి. ఇమే ఖో, భిక్ఖవే, పఞ్చ సోసానికా’’తి. చతుత్థం.

౫. అబ్భోకాసికసుత్తం

౧౮౫. ‘‘పఞ్చిమే, భిక్ఖవే, అబ్భోకాసికా…పే…. పఞ్చమం.

౬. నేసజ్జికసుత్తం

౧౮౬. ‘‘పఞ్చిమే, భిక్ఖవే, నేసజ్జికా…పే…. ఛట్ఠం.

౭. యథాసన్థతికసుత్తం

౧౮౭. ‘‘పఞ్చిమే, భిక్ఖవే, యథాసన్థతికా…పే…. సత్తమం.

౮. ఏకాసనికసుత్తం

౧౮౮. ‘‘పఞ్చిమే, భిక్ఖవే, ఏకాసనికా…పే…. అట్ఠమం.

౯. ఖలుపచ్ఛాభత్తికసుత్తం

౧౮౯. ‘‘పఞ్చిమే, భిక్ఖవే, ఖలుపచ్ఛాభత్తికా…పే…. నవమం.

౧౦. పత్తపిణ్డికసుత్తం

౧౯౦. ‘‘పఞ్చిమే, భిక్ఖవే, పత్తపిణ్డికా. కతమే పఞ్చ? మన్దత్తా మోమూహత్తా పత్తపిణ్డికో హోతి, పాపిచ్ఛో ఇచ్ఛాపకతో పత్తపిణ్డికో హోతి, ఉమ్మాదా చిత్తక్ఖేపా పత్తపిణ్డికో హోతి, ‘వణ్ణితం బుద్ధేహి బుద్ధసావకేహీ’తి పత్తపిణ్డికో హోతి, అప్పిచ్ఛతంయేవ నిస్సాయ సన్తుట్ఠింయేవ నిస్సాయ సల్లేఖంయేవ నిస్సాయ పవివేకంయేవ నిస్సాయ ఇదమత్థితంయేవ నిస్సాయ పత్తపిణ్డికో హోతి. ఇమే ఖో, భిక్ఖవే, పఞ్చ పత్తపిణ్డికా. ఇమేసం ఖో, భిక్ఖవే, పఞ్చన్నం పత్తపిణ్డికానం య్వాయం పత్తపిణ్డికో అప్పిచ్ఛతంయేవ నిస్సాయ సన్తుట్ఠింయేవ నిస్సాయ సల్లేఖంయేవ నిస్సాయ పవివేకంయేవ నిస్సాయ ఇదమత్థితంయేవ నిస్సాయ పత్తపిణ్డికో హోతి, అయం ఇమేసం పఞ్చన్నం పత్తపిణ్డికానం అగ్గో చ సేట్ఠో చ మోక్ఖో చ ఉత్తమో చ పవరో చ.

‘‘సేయ్యథాపి, భిక్ఖవే, గవా ఖీరం, ఖీరమ్హా దధి, దధిమ్హా నవనీతం, నవనీతమ్హా సప్పి, సప్పిమ్హా సప్పిమణ్డో, సప్పిమణ్డో తత్థ అగ్గమక్ఖాయతి; ఏవమేవం ఖో, భిక్ఖవే, ఇమేసం పఞ్చన్నం పత్తపిణ్డికానం య్వాయం పత్తపిణ్డికో అప్పిచ్ఛతంయేవ నిస్సాయ సన్తుట్ఠింయేవ నిస్సాయ సల్లేఖంయేవ నిస్సాయ పవివేకంయేవ నిస్సాయ ఇదమత్థితంయేవ నిస్సాయ పత్తపిణ్డికో హోతి, అయం ఇమేసం పఞ్చన్నం పత్తపిణ్డికానం అగ్గో చ సేట్ఠో చ మోక్ఖో చ ఉత్తమో చ పవరో చా’’తి. దసమం.

అరఞ్ఞవగ్గో చతుత్థో.