౫. పఠమపత్థనాసుత్తం

౧౩౫. ‘‘పఞ్చహి, భిక్ఖవే, అఙ్గేహి సమన్నాగతో రఞ్ఞో ఖత్తియస్స ముద్ధావసిత్తస్స జేట్ఠో పుత్తో రజ్జం పత్థేతి. కతమేహి పఞ్చహి? ఇధ, భిక్ఖవే, రఞ్ఞో ఖత్తియస్స ముద్ధావసిత్తస్స జేట్ఠో పుత్తో ఉభతో సుజాతో హోతి మాతితో చ పితితో చ, సంసుద్ధగహణికో, యావ సత్తమా పితామహయుగా అక్ఖిత్తో అనుపక్కుట్ఠో జాతివాదేన; అభిరూపో హోతి దస్సనీయో పాసాదికో పరమాయ వణ్ణపోక్ఖరతాయ సమన్నాగతో; మాతాపితూనం పియో హోతి మనాపో; నేగమజానపదస్స పియో హోతి మనాపో; యాని తాని రఞ్ఞం ఖత్తియానం ముద్ధావసిత్తానం సిప్పట్ఠానాని హత్థిస్మిం వా అస్సస్మిం వా రథస్మిం వా ధనుస్మిం వా థరుస్మిం వా తత్థ సిక్ఖితో హోతి అనవయో.

‘‘తస్స ఏవం హోతి – ‘అహం ఖోమ్హి ఉభతో సుజాతో మాతితో చ పితితో చ, సంసుద్ధగహణికో, యావ సత్తమా పితామహయుగా అక్ఖిత్తో అనుపక్కుట్ఠో జాతివాదేన. కస్మాహం రజ్జం న పత్థేయ్యం! అహం ఖోమ్హి అభిరూపో దస్సనీయో పాసాదికో పరమాయ వణ్ణపోక్ఖరతాయ సమన్నాగతో. కస్మాహం రజ్జం న పత్థేయ్యం! అహం ఖోమ్హి మాతాపితూనం పియో మనాపో. కస్మాహం రజ్జం న పత్థేయ్యం! అహం ఖోమ్హి నేగమజానపదస్స పియో మనాపో. కస్మాహం రజ్జం న పత్థేయ్యం! అహం ఖోమ్హి యాని తాని రఞ్ఞం ఖత్తియానం ముద్ధావసిత్తానం సిప్పట్ఠానాని హత్థిస్మిం వా అస్సస్మిం వా రథస్మిం వా ధనుస్మిం వా థరుస్మిం వా, తత్థ [తత్థమ్హి (సీ.), తత్థపి (క.)] సిక్ఖితో అనవయో. కస్మాహం రజ్జం న పత్థేయ్య’న్తి! ఇమేహి ఖో, భిక్ఖవే, పఞ్చహి అఙ్గేహి సమన్నాగతో రఞ్ఞో ఖత్తియస్స ముద్ధావసిత్తస్స జేట్ఠో పుత్తో రజ్జం పత్థేతి.

‘‘ఏవమేవం ఖో, భిక్ఖవే, పఞ్చహి ధమ్మేహి సమన్నాగతో భిక్ఖు ఆసవానం ఖయం పత్థేతి. కతమేహి పఞ్చహి? ఇధ, భిక్ఖవే, భిక్ఖు సద్ధో హోతి, సద్దహతి తథాగతస్స బోధిం – ‘ఇతిపి సో భగవా అరహం సమ్మాసమ్బుద్ధో విజ్జాచరణసమ్పన్నో సుగతో లోకవిదూ అనుత్తరో పురిసదమ్మసారథి సత్థా దేవమనుస్సానం బుద్ధో భగవా’తి. అప్పాబాధో హోతి అప్పాతఙ్కో, సమవేపాకినియా గహణియా సమన్నాగతో నాతిసీతాయ నాచ్చుణ్హాయ మజ్ఝిమాయ పధానక్ఖమాయ; అసఠో హోతి అమాయావీ, యథాభూతం అత్తానం ఆవికత్తా సత్థరి వా విఞ్ఞూసు వా సబ్రహ్మచారీసు; ఆరద్ధవీరియో విహరతి అకుసలానం ధమ్మానం పహానాయ, కుసలానం ధమ్మానం ఉపసమ్పదాయ, థామవా దళ్హపరక్కమో అనిక్ఖిత్తధురో కుసలేసు ధమ్మేసు; పఞ్ఞవా హోతి ఉదయత్థగామినియా పఞ్ఞాయ సమన్నాగతో అరియాయ నిబ్బేధికాయ సమ్మా దుక్ఖక్ఖయగామినియా.

‘‘తస్స ఏవం హోతి – ‘అహం ఖోమ్హి సద్ధో, సద్దహామి తథాగతస్స బోధిం – ఇతిపి సో భగవా అరహం సమ్మాసమ్బుద్ధో…పే… సత్థా దేవమనుస్సానం బుద్ధో భగవా’తి. ‘కస్మాహం ఆసవానం ఖయం న పత్థేయ్యం! అహం ఖోమ్హి అప్పాబాధో అప్పాతఙ్కో సమవేపాకినియా గహణియా సమన్నాగతో నాతిసీతాయ నాచ్చుణ్హాయ మజ్ఝిమాయ పధానక్ఖమాయ. కస్మాహం ఆసవానం ఖయం న పత్థేయ్యం! అహం ఖోమ్హి అసఠో అమాయావీ యథాభూతం అత్తానం ఆవికత్తా సత్థరి వా విఞ్ఞూసు వా సబ్రహ్మచారీసు. కస్మాహం ఆసవానం ఖయం న పత్థేయ్యం! అహం ఖోమ్హి ఆరద్ధవీరియో విహరామి అకుసలానం ధమ్మానం పహానాయ, కుసలానం ధమ్మానం ఉపసమ్పదాయ, థామవా దళ్హపరక్కమో అనిక్ఖిత్తధురో కుసలేసు ధమ్మేసు. కస్మాహం ఆసవానం ఖయం న పత్థేయ్యం! అహం ఖోమ్హి పఞ్ఞవా ఉదయత్థగామినియా పఞ్ఞాయ సమన్నాగతో అరియాయ నిబ్బేధికాయ సమ్మా దుక్ఖక్ఖయగామినియా. కస్మాహం ఆసవానం ఖయం న పత్థేయ్య’న్తి! ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు ఆసవానం ఖయం పత్థేతీ’’తి. పఞ్చమం.