౪. యస్సందిసంసుత్తం

౧౩౪. ‘‘పఞ్చహి, భిక్ఖవే, అఙ్గేహి సమన్నాగతో రాజా ఖత్తియో ముద్ధావసిత్తో యస్సం యస్సం దిసాయం విహరతి, సకస్మింయేవ విజితే విహరతి.

‘‘కతమేహి పఞ్చహి? ఇధ, భిక్ఖవే, రాజా ఖత్తియో ముద్ధావసిత్తో ఉభతో సుజాతో హోతి మాతితో చ పితితో చ, సంసుద్ధగహణికో, యావ సత్తమా పితామహయుగా అక్ఖిత్తో అనుపక్కుట్ఠో జాతివాదేన; అడ్ఢో హోతి మహద్ధనో మహాభోగో పరిపుణ్ణకోసకోట్ఠాగారో; బలవా ఖో పన హోతి చతురఙ్గినియా సేనాయ సమన్నాగతో అస్సవాయ ఓవాదపటికరాయ; పరిణాయకో ఖో పనస్స హోతి పణ్డితో వియత్తో మేధావీ పటిబలో అతీతానాగతపచ్చుప్పన్నే అత్థే చిన్తేతుం; తస్సిమే చత్తారో ధమ్మా యసం పరిపాచేన్తి. సో ఇమినా యసపఞ్చమేన [యసేన పఞ్చమేన (క.), పఞ్చమేన (సీ.)] ధమ్మేన సమన్నాగతో యస్సం యస్సం దిసాయం విహరతి, సకస్మింయేవ విజితే విహరతి. తం కిస్స హేతు? ఏవఞ్హేతం, భిక్ఖవే, హోతి విజితావీనం.

‘‘ఏవమేవం ఖో, భిక్ఖవే, పఞ్చహి ధమ్మేహి సమన్నాగతో భిక్ఖు యస్సం యస్సం దిసాయం విహరతి, విముత్తచిత్తోవ [విముత్తచిత్తో (సీ. పీ.), విముత్తచిత్తో చ (క.)] విహరతి. కతమేహి పఞ్చహి? ఇధ, భిక్ఖవే, భిక్ఖు సీలవా హోతి, పాతిమోక్ఖసంవరసంవుతో విహరతి ఆచారగోచరసమ్పన్నో అణుమత్తేసు వజ్జేసు భయదస్సావీ, సమాదాయ సిక్ఖతి సిక్ఖాపదేసు – రాజావ ఖత్తియో ముద్ధావసిత్తో జాతిసమ్పన్నో; బహుస్సుతో హోతి సుతధరో సుతసన్నిచయో, యే తే ధమ్మా ఆదికల్యాణా మజ్ఝేకల్యాణా పరియోసానకల్యాణా సాత్థం సబ్యఞ్జనం కేవలపరిపుణ్ణం పరిసుద్ధం బ్రహ్మచరియం అభివదన్తి, తథారూపాస్స ధమ్మా బహుస్సుతా హోన్తి ధాతా వచసా పరిచితా మనసానుపేక్ఖితా దిట్ఠియా సుప్పటివిద్ధా – రాజావ ఖత్తియో ముద్ధావసిత్తో అడ్ఢో మహద్ధనో మహాభోగో పరిపుణ్ణకోసకోట్ఠాగారో; ఆరద్ధవీరియో విహరతి అకుసలానం ధమ్మానం పహానాయ కుసలానం ధమ్మానం ఉపసమ్పదాయ థామవా దళ్హపరక్కమో అనిక్ఖిత్తధురో కుసలేసు ధమ్మేసు – రాజావ ఖత్తియో ముద్ధావసిత్తో బలసమ్పన్నో; పఞ్ఞవా హోతి ఉదయత్థగామినియా పఞ్ఞాయ సమన్నాగతో అరియాయ నిబ్బేధికాయ సమ్మా దుక్ఖక్ఖయగామినియా – రాజావ ఖత్తియో ముద్ధావసిత్తో పరిణాయకసమ్పన్నో; తస్సిమే చత్తారో ధమ్మా విముత్తిం పరిపాచేన్తి. సో ఇమినా విముత్తిపఞ్చమేన ధమ్మేన సమన్నాగతో యస్సం యస్సం దిసాయం విహరతి విముత్తచిత్తోవ విహరతి. తం కిస్స హేతు? ఏవఞ్హేతం, భిక్ఖవే, హోతి విముత్తచిత్తాన’’న్తి. చతుత్థం.