౯. సచ్ఛికరణీయసుత్తం

౧౮౯. ‘‘చత్తారోమే, భిక్ఖవే, సచ్ఛికరణీయా ధమ్మా. కతమే చత్తారో? అత్థి, భిక్ఖవే, ధమ్మా కాయేన సచ్ఛికరణీయా; అత్థి, భిక్ఖవే, ధమ్మా సతియా సచ్ఛికరణీయా; అత్థి, భిక్ఖవే, ధమ్మా చక్ఖునా సచ్ఛికరణీయా; అత్థి, భిక్ఖవే, ధమ్మా పఞ్ఞాయ సచ్ఛికరణీయా. కతమే చ, భిక్ఖవే, ధమ్మా కాయేన సచ్ఛికరణీయా? అట్ఠ విమోక్ఖా, భిక్ఖవే, కాయేన సచ్ఛికరణీయా.

‘‘కతమే చ, భిక్ఖవే, ధమ్మా సతియా సచ్ఛికరణీయా? పుబ్బేనివాసో, భిక్ఖవే, సతియా సచ్ఛికరణీయో.

‘‘కతమే చ, భిక్ఖవే, ధమ్మా చక్ఖునా సచ్ఛికరణీయా? సత్తానం చుతూపపాతో, భిక్ఖవే, చక్ఖునా సచ్ఛికరణీయో.

‘‘కతమే చ, భిక్ఖవే, ధమ్మా పఞ్ఞాయ సచ్ఛికరణీయా? ఆసవానం ఖయో, భిక్ఖవే, పఞ్ఞాయ సచ్ఛికరణీయో. ఇమే ఖో, భిక్ఖవే, చత్తారో సచ్ఛికరణీయా ధమ్మా’’తి. నవమం.