౨. పాటిభోగసుత్తం

౧౮౨. [కథా. ౬౨౪] ‘‘చతున్నం, భిక్ఖవే, ధమ్మానం నత్థి కోచి పాటిభోగో – సమణో వా బ్రాహ్మణో వా దేవో వా మారో వా బ్రహ్మా వా కోచి వా లోకస్మిం.

‘‘కతమేసం చతున్నం? ‘జరాధమ్మం మా జీరీ’తి నత్థి కోచి పాటిభోగో – సమణో వా బ్రాహ్మణో వా దేవో వా మారో వా బ్రహ్మా వా కోచి వా లోకస్మిం; ‘బ్యాధిధమ్మం మా బ్యాధియీ’తి నత్థి కోచి పాటిభోగో – సమణో వా బ్రాహ్మణో వా దేవో వా మారో వా బ్రహ్మా వా కోచి వా లోకస్మిం; ‘మరణధమ్మం మా మీయీ’తి నత్థి కోచి పాటిభోగో – సమణో వా బ్రాహ్మణో వా దేవో వా మారో వా బ్రహ్మా వా కోచి వా లోకస్మిం; ‘యాని ఖో పన తాని పుబ్బే అత్తనా కతాని పాపకాని కమ్మాని సంకిలేసికాని పోనోభవికాని సదరాని దుక్ఖవిపాకాని ఆయతిం జాతిజరామరణికాని, తేసం విపాకో మా నిబ్బత్తీ’తి నత్థి కోచి పాటిభోగో – సమణో వా బ్రాహ్మణో వా దేవో వా మారో వా బ్రహ్మా వా కోచి వా లోకస్మిం.

‘‘ఇమేసం ఖో, భిక్ఖవే, చతున్నం ధమ్మానం నత్థి కోచి పాటిభోగో – సమణో వా బ్రాహ్మణో వా దేవో వా మారో వా బ్రహ్మా వా కోచి వా లోకస్మి’’న్తి. దుతియం.