౬. కప్పసుత్తం

౧౫౬. ‘‘చత్తారిమాని, భిక్ఖవే, కప్పస్స అసఙ్ఖ్యేయ్యాని. కతమాని చత్తారి? యదా, భిక్ఖవే, కప్పో సంవట్టతి, తం న సుకరం సఙ్ఖాతుం – ఏత్తకాని వస్సానీతి వా, ఏత్తకాని వస్ససతానీతి వా, ఏత్తకాని వస్ససహస్సానీతి వా, ఏత్తకాని వస్ససతసహస్సానీతి వా.

‘‘యదా, భిక్ఖవే, కప్పో సంవట్టో తిట్ఠతి, తం న సుకరం సఙ్ఖాతుం – ఏత్తకాని వస్సానీతి వా, ఏత్తకాని వస్ససతానీతి వా, ఏత్తకాని వస్ససహస్సానీతి వా, ఏత్తకాని వస్ససతసహస్సానీతి వా.

‘‘యదా, భిక్ఖవే, కప్పో వివట్టతి, తం న సుకరం సఙ్ఖాతుం – ఏత్తకాని వస్సానీతి వా, ఏత్తకాని వస్ససతానీతి వా, ఏత్తకాని వస్ససహస్సానీతి వా, ఏత్తకాని వస్ససతసహస్సానీతి వా.

‘‘యదా, భిక్ఖవే, కప్పో వివట్టో తిట్ఠతి, తం న సుకరం సఙ్ఖాతుం – ఏత్తకాని వస్సానీతి వా, ఏత్తకాని వస్ససతానీతి వా, ఏత్తకాని వస్ససహస్సానీతి వా, ఏత్తకాని వస్ససతసహస్సానీతి వా. ఇమాని ఖో, భిక్ఖవే, చత్తారి కప్పస్స అసఙ్ఖ్యేయ్యానీ’’తి. ఛట్ఠం.