౭. రోగసుత్తం

౧౫౭. ‘‘ద్వేమే, భిక్ఖవే, రోగా. కతమే ద్వే? కాయికో చ రోగో చేతసికో చ రోగో. దిస్సన్తి, భిక్ఖవే, సత్తా కాయికేన రోగేన ఏకమ్పి వస్సం ఆరోగ్యం పటిజానమానా, ద్వేపి వస్సాని ఆరోగ్యం పటిజానమానా, తీణిపి వస్సాని ఆరోగ్యం పటిజానమానా, చత్తారిపి వస్సాని ఆరోగ్యం పటిజానమానా, పఞ్చపి వస్సాని ఆరోగ్యం పటిజానమానా, దసపి వస్సాని ఆరోగ్యం పటిజానమానా, వీసతిపి వస్సాని ఆరోగ్యం పటిజానమానా, తింసమ్పి వస్సాని ఆరోగ్యం పటిజానమానా, చత్తారీసమ్పి వస్సాని ఆరోగ్యం పటిజానమానా, పఞ్ఞాసమ్పి వస్సాని ఆరోగ్యం పటిజానమానా, వస్ససతమ్పి, భియ్యోపి ఆరోగ్యం పటిజానమానా. తే, భిక్ఖవే, సత్తా సుదుల్లభా [దుల్లభా (సీ. స్యా. కం. పీ.)] లోకస్మిం యే చేతసికేన రోగేన ముహుత్తమ్పి ఆరోగ్యం పటిజానన్తి, అఞ్ఞత్ర ఖీణాసవేహి.

‘‘చత్తారోమే, భిక్ఖవే, పబ్బజితస్స రోగా. కతమే చత్తారో? ఇధ, భిక్ఖవే, భిక్ఖు మహిచ్ఛో హోతి విఘాతవా అసన్తుట్ఠో ఇతరీతరచీవరపిణ్డపాతసేనాసనగిలానప్పచ్చయభేసజ్జపరిక్ఖారేన. సో మహిచ్ఛో సమానో విఘాతవా అసన్తుట్ఠో ఇతరీతరచీవరపిణ్డపాతసేనాసనగిలానప్పచ్చయభేసజ్జపరిక్ఖారేన పాపికం ఇచ్ఛం పణిదహతి అనవఞ్ఞప్పటిలాభాయ లాభసక్కారసిలోకప్పటిలాభాయ. సో ఉట్ఠహతి ఘటతి వాయమతి అనవఞ్ఞప్పటిలాభాయ లాభసక్కారసిలోకప్పటిలాభాయ. సో సఙ్ఖాయ కులాని ఉపసఙ్కమతి, సఙ్ఖాయ నిసీదతి, సఙ్ఖాయ ధమ్మం భాసతి, సఙ్ఖాయ ఉచ్చారపస్సావం సన్ధారేతి. ఇమే ఖో, భిక్ఖవే, చత్తారో పబ్బజితస్స రోగా.

‘‘తస్మాతిహ, భిక్ఖవే, ఏవం సిక్ఖితబ్బం – ‘న మహిచ్ఛా భవిస్సామ విఘాతవన్తో అసన్తుట్ఠా ఇతరీతరచీవరపిణ్డపాతసేనాసనగిలానప్పచ్చయభేసజ్జపరిక్ఖారేన, న పాపికం ఇచ్ఛం పణిదహిస్సామ అనవఞ్ఞప్పటిలాభాయ లాభసక్కారసిలోకప్పటిలాభాయ, న ఉట్ఠహిస్సామ న ఘటేస్సామ న వాయమిస్సామ అనవఞ్ఞప్పటిలాభాయ లాభసక్కారసిలోకప్పటిలాభాయ, ఖమా భవిస్సామ సీతస్స ఉణ్హస్స జిఘచ్ఛాయ పిపాసాయ డంసమకసవాతాతపసరీసపసమ్ఫస్సానం దురుత్తానం దురాగతానం వచనపథానం, ఉప్పన్నానం సారీరికానం వేదనానం దుక్ఖానం తిబ్బానం ఖరానం కటుకానం అసాతానం అమనాపానం పాణహరానం అధివాసకజాతికా భవిస్సామా’తి. ఏవఞ్హి వో, భిక్ఖవే, సిక్ఖితబ్బ’’న్తి. సత్తమం.