౮. థేరసుత్తం

౯౮. ‘‘దసహి, భిక్ఖవే, ధమ్మేహి సమన్నాగతో థేరో భిక్ఖు యస్సం యస్సం దిసాయం విహరతి, ఫాసుయేవ విహరతి. కతమేహి దసహి? థేరో హోతి రత్తఞ్ఞూ చిరపబ్బజితో, సీలవా హోతి …పే… సమాదాయ సిక్ఖతి సిక్ఖాపదేసు, బహుస్సుతో హోతి…పే… దిట్ఠియా సుప్పటివిద్ధో, ఉభయాని ఖో పనస్స పాతిమోక్ఖాని విత్థారేన స్వాగతాని హోన్తి సువిభత్తాని సుప్పవత్తీని సువినిచ్ఛితాని సుత్తసో అనుబ్యఞ్జనసో, అధికరణసముప్పాదవూపసమకుసలో హోతి, ధమ్మకామో హోతి పియసముదాహారో అభిధమ్మే అభివినయే ఉళారపామోజ్జో, సన్తుట్ఠో హోతి ఇతరీతరచీవరపిణ్డపాతసేనాసనగిలానప్పచ్చయభేసజ్జపరిక్ఖారేన, పాసాదికో హోతి అభిక్కన్తపటిక్కన్తే [అభిక్కన్తపటిక్కన్తో (క.)] సుసంవుతో అన్తరఘరే నిసజ్జాయ, చతున్నం ఝానానం ఆభిచేతసికానం దిట్ఠధమ్మసుఖవిహారానం నికామలాభీ హోతి అకిచ్ఛలాభీ అకసిరలాభీ, ఆసవానఞ్చ ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరతి. ఇమేహి ఖో, భిక్ఖవే, దసహి ధమ్మేహి సమన్నాగతో థేరో భిక్ఖు యస్సం యస్సం దిసాయం విహరతి, ఫాసుయేవ విహరతీ’’తి. అట్ఠమం.