౬. అధిమానసుత్తం

౮౬. ఏకం సమయం ఆయస్మా మహాకస్సపో రాజగహే విహరతి వేళువనే కలన్దకనివాపే. తత్ర ఖో ఆయస్మా మహాకస్సపో భిక్ఖూ ఆమన్తేసి – ‘‘ఆవుసో భిక్ఖవే’’తి. ‘‘ఆవుసో’’తి ఖో తే భిక్ఖూ ఆయస్మతో మహాకస్సపస్స పచ్చస్సోసుం. ఆయస్మా మహాకస్సపో ఏతదవోచ –

‘‘ఇధావుసో, భిక్ఖు అఞ్ఞం బ్యాకరోతి – ‘ఖీణా జాతి, వుసితం బ్రహ్మచరియం, కతం కరణీయం, నాపరం ఇత్థత్తాయాతి పజానామీ’తి. తమేనం తథాగతో వా తథాగతసావకో వా ఝాయీ సమాపత్తికుసలో పరచిత్తకుసలో పరచిత్తపరియాయకుసలో సమనుయుఞ్జతి సమనుగ్గాహతి సమనుభాసతి. సో తథాగతేన వా తథాగతసావకేన వా ఝాయినా సమాపత్తికుసలేన పరచిత్తకుసలేన పరచిత్తపరియాయకుసలేన సమనుయుఞ్జియమానో సమనుగ్గాహియమానో సమనుభాసియమానో ఇరీణం ఆపజ్జతి విచినం ఆపజ్జతి అనయం ఆపజ్జతి బ్యసనం ఆపజ్జతి అనయబ్యసనం ఆపజ్జతి.

‘‘తమేనం తథాగతో వా తథాగతసావకో వా ఝాయీ సమాపత్తికుసలో పరచిత్తకుసలో పరచిత్తపరియాయకుసలో ఏవం చేతసా చేతో పరిచ్చ మనసి కరోతి – ‘కిం ను ఖో అయమాయస్మా అఞ్ఞం బ్యాకరోతి – ఖీణా జాతి, వుసితం బ్రహ్మచరియం, కతం కరణీయం, నాపరం ఇత్థత్తాయాతి పజానామీ’తి.

‘‘తమేనం తథాగతో వా తథాగతసావకో వా ఝాయీ సమాపత్తికుసలో పరచిత్తకుసలో పరచిత్తపరియాయకుసలో ఏవం చేతసా చేతో పరిచ్చ పజానాతి –

‘అధిమానికో ఖో అయమాయస్మా అధిమానసచ్చో, అప్పత్తే పత్తసఞ్ఞీ, అకతే కతసఞ్ఞీ, అనధిగతే అధిగతసఞ్ఞీ. అధిమానేన అఞ్ఞం బ్యాకరోతి – ఖీణా జాతి, వుసితం బ్రహ్మచరియం, కతం కరణీయం, నాపరం ఇత్థత్తాయాతి పజానామీ’తి.

‘‘తమేనం తథాగతో వా తథాగతసావకో వా ఝాయీ సమాపత్తికుసలో పరచిత్తకుసలో పరచిత్తపరియాయకుసలో ఏవం చేతసా చేతో పరిచ్చ మనసి కరోతి – ‘కిం ను ఖో అయమాయస్మా నిస్సాయ అధిమానికో అధిమానసచ్చో, అప్పత్తే పత్తసఞ్ఞీ, అకతే కతసఞ్ఞీ, అనధిగతే అధిగతసఞ్ఞీ. అధిమానేన అఞ్ఞం బ్యాకరోతి – ఖీణా జాతి, వుసితం బ్రహ్మచరియం, కతం కరణీయం, నాపరం ఇత్థత్తాయాతి పజానామీ’తి.

‘‘తమేనం తథాగతో వా తథాగతసావకో వా ఝాయీ సమాపత్తికుసలో పరచిత్తకుసలో పరచిత్తపరియాయకుసలో ఏవం చేతసా చేతో పరిచ్చ పజానాతి –

‘బహుస్సుతో ఖో పన అయమాయస్మా సుతధరో సుతసన్నిచయో, యే తే ధమ్మా ఆదికల్యాణా మజ్ఝేకల్యాణా పరియోసానకల్యాణా సాత్థం సబ్యఞ్జనం కేవలపరిపుణ్ణం పరిసుద్ధం బ్రహ్మచరియం అభివదన్తి, తథారూపాస్స ధమ్మా బహుస్సుతా హోన్తి ధాతా వచసా పరిచితా మనసానుపేక్ఖితా దిట్ఠియా సుప్పటివిద్ధా. తస్మా అయమాయస్మా అధిమానికో అధిమానసచ్చో, అప్పత్తే పత్తసఞ్ఞీ, అకతే కతసఞ్ఞీ, అనధిగతే అధిగతసఞ్ఞీ. అధిమానేన అఞ్ఞం బ్యాకరోతి – ఖీణా జాతి, వుసితం బ్రహ్మచరియం, కతం కరణీయం, నాపరం ఇత్థత్తాయాతి పజానామీ’తి.

‘‘తమేనం తథాగతో వా తథాగతసావకో వా ఝాయీ సమాపత్తికుసలో పరచిత్తకుసలో పరచిత్తపరియాయకుసలో ఏవం చేతసా చేతో పరిచ్చ పజానాతి –

‘అభిజ్ఝాలు ఖో పన అయమాయస్మా; అభిజ్ఝాపరియుట్ఠితేన చేతసా బహులం విహరతి. అభిజ్ఝాపరియుట్ఠానం ఖో పన తథాగతప్పవేదితే ధమ్మవినయే పరిహానమేతం.

‘బ్యాపన్నో ఖో పన అయమాయస్మా; బ్యాపాదపరియుట్ఠితేన చేతసా బహులం విహరతి. బ్యాపాదపరియుట్ఠానం ఖో పన తథాగతప్పవేదితే ధమ్మవినయే పరిహానమేతం.

‘థినమిద్ధో ఖో పన అయమాయస్మా; థినమిద్ధపరియుట్ఠితేన చేతసా బహులం విహరతి. థినమిద్ధపరియుట్ఠానం ఖో పన తథాగతప్పవేదితే ధమ్మవినయే పరిహానమేతం.

‘ఉద్ధతో ఖో పన అయమాయస్మా; ఉద్ధచ్చపరియుట్ఠితేన చేతసా బహులం విహరతి. ఉద్ధచ్చపరియుట్ఠానం ఖో పన తథాగతప్పవేదితే ధమ్మవినయే పరిహానమేతం.

‘విచికిచ్ఛో ఖో పన అయమాయస్మా; విచికిచ్ఛాపరియుట్ఠితేన చేతసా బహులం విహరతి. విచికిచ్ఛాపరియుట్ఠానం ఖో పన తథాగతప్పవేదితే ధమ్మవినయే పరిహానమేతం.

‘కమ్మారామో ఖో పన అయమాయస్మా కమ్మరతో కమ్మారామతం అనుయుత్తో. కమ్మారామతా ఖో పన తథాగతప్పవేదితే ధమ్మవినయే పరిహానమేతం.

‘భస్సారామో ఖో పన అయమాయస్మా భస్సరతో భస్సారామతం అనుయుత్తో. భస్సారామతా ఖో పన తథాగతప్పవేదితే ధమ్మవినయే పరిహానమేతం.

‘నిద్దారామో ఖో పన అయమాయస్మా నిద్దారతో నిద్దారామతం అనుయుత్తో. నిద్దారామతా ఖో పన తథాగతప్పవేదితే ధమ్మవినయే పరిహానమేతం.

‘సఙ్గణికారామో ఖో పన అయమాయస్మా సఙ్గణికరతో సఙ్గణికారామతం అనుయుత్తో. సఙ్గణికారామతా ఖో పన తథాగతప్పవేదితే ధమ్మవినయే పరిహానమేతం.

‘సతి ఖో పన అయమాయస్మా ఉత్తరి కరణీయే ఓరమత్తకేన విసేసాధిగమేన అన్తరా వోసానం ఆపన్నో. అన్తరా వోసానగమనం ఖో పన తథాగతప్పవేదితే ధమ్మవినయే పరిహానమేతం’.

‘‘సో వతావుసో, భిక్ఖు ‘ఇమే దస ధమ్మే అప్పహాయ ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జిస్సతీ’తి నేతం ఠానం విజ్జతి. సో వతావుసో, భిక్ఖు ‘ఇమే దస ధమ్మే పహాయ ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జిస్సతీ’తి ఠానమేతం విజ్జతీ’’తి. ఛట్ఠం.