౭. నప్పియసుత్తం

౮౭. తత్ర ఖో భగవా కాలఙ్కతం భిక్ఖుం [కలన్దకం భిక్ఖుం (సీ.), కాళకభిక్ఖుం (స్యా.)] ఆరబ్భ భిక్ఖూ ఆమన్తేసి – ‘‘భిక్ఖవో’’తి. ‘‘భదన్తే’’తి తే భిక్ఖూ భగవతో పచ్చస్సోసుం. భగవా ఏతదవోచ –

‘‘ఇధ, భిక్ఖవే, భిక్ఖు అధికరణికో హోతి, అధికరణసమథస్స న వణ్ణవాదీ. యమ్పి, భిక్ఖవే, భిక్ఖు అధికరణికో హోతి అధికరణసమథస్స న వణ్ణవాదీ, అయమ్పి ధమ్మో న పియతాయ న గరుతాయ న భావనాయ న సామఞ్ఞాయ న ఏకీభావాయ సంవత్తతి.

‘‘పున చపరం, భిక్ఖవే, భిక్ఖు న సిక్ఖాకామో హోతి, సిక్ఖాసమాదానస్స [సిక్ఖాకామస్స (క.)] న వణ్ణవాదీ. యమ్పి, భిక్ఖవే, భిక్ఖు న సిక్ఖాకామో హోతి సిక్ఖాసమాదానస్స న వణ్ణవాదీ, అయమ్పి ధమ్మో న పియతాయ న గరుతాయ న భావనాయ న సామఞ్ఞాయ న ఏకీభావాయ సంవత్తతి.

‘‘పున చపరం, భిక్ఖవే, భిక్ఖు పాపిచ్ఛో హోతి, ఇచ్ఛావినయస్స న వణ్ణవాదీ. యమ్పి, భిక్ఖవే, భిక్ఖు పాపిచ్ఛో హోతి ఇచ్ఛావినయస్స న వణ్ణవాదీ, అయమ్పి ధమ్మో న పియతాయ న గరుతాయ న భావనాయ న సామఞ్ఞాయ న ఏకీభావాయ సంవత్తతి.

‘‘పున చపరం, భిక్ఖవే, భిక్ఖు కోధనో హోతి, కోధవినయస్స న వణ్ణవాదీ. యమ్పి, భిక్ఖవే, భిక్ఖు కోధనో హోతి కోధవినయస్స న వణ్ణవాదీ, అయమ్పి ధమ్మో న పియతాయ న గరుతాయ న భావనాయ న సామఞ్ఞాయ న ఏకీభావాయ సంవత్తతి.

‘‘పున చపరం, భిక్ఖవే, భిక్ఖు మక్ఖీ హోతి, మక్ఖవినయస్స న వణ్ణవాదీ. యమ్పి, భిక్ఖవే, భిక్ఖు మక్ఖీ హోతి మక్ఖవినయస్స న వణ్ణవాదీ, అయమ్పి ధమ్మో న పియతాయ న గరుతాయ న భావనాయ న సామఞ్ఞాయ న ఏకీభావాయ సంవత్తతి.

‘‘పున చపరం, భిక్ఖవే, భిక్ఖు సఠో హోతి, సాఠేయ్యవినయస్స న వణ్ణవాదీ. యమ్పి, భిక్ఖవే, భిక్ఖు సఠో హోతి సాఠేయ్యవినయస్స న వణ్ణవాదీ, అయమ్పి ధమ్మో న పియతాయ న గరుతాయ న భావనాయ న సామఞ్ఞాయ న ఏకీభావాయ సంవత్తతి.

‘‘పున చపరం, భిక్ఖవే, భిక్ఖు మాయావీ హోతి, మాయావినయస్స న వణ్ణవాదీ. యమ్పి, భిక్ఖవే, భిక్ఖు మాయావీ హోతి మాయావినయస్స న వణ్ణవాదీ, అయమ్పి ధమ్మో న పియతాయ న గరుతాయ న భావనాయ న సామఞ్ఞాయ న ఏకీభావాయ సంవత్తతి.

‘‘పున చపరం, భిక్ఖవే, భిక్ఖు ధమ్మానం న నిసామకజాతికో హోతి, ధమ్మనిసన్తియా న వణ్ణవాదీ. యమ్పి, భిక్ఖవే, భిక్ఖు ధమ్మానం న నిసామకజాతికో హోతి ధమ్మనిసన్తియా న వణ్ణవాదీ, అయమ్పి ధమ్మో న పియతాయ న గరుతాయ న భావనాయ న సామఞ్ఞాయ న ఏకీభావాయ సంవత్తతి.

‘‘పున చపరం, భిక్ఖవే, భిక్ఖు న పటిసల్లీనో హోతి, పటిసల్లానస్స న వణ్ణవాదీ. యమ్పి, భిక్ఖవే, భిక్ఖు న పటిసల్లీనో హోతి పటిసల్లానస్స న వణ్ణవాదీ, అయమ్పి ధమ్మో న పియతాయ న గరుతాయ న భావనాయ న సామఞ్ఞాయ న ఏకీభావాయ సంవత్తతి.

‘‘పున చపరం, భిక్ఖవే, భిక్ఖు సబ్రహ్మచారీనం న పటిసన్థారకో [పటిసన్ధారకో (క.)] హోతి, పటిసన్థారకస్స న వణ్ణవాదీ. యమ్పి, భిక్ఖవే, భిక్ఖు సబ్రహ్మచారీనం న పటిసన్థారకో హోతి పటిసన్థారకస్స న వణ్ణవాదీ, అయమ్పి ధమ్మో న పియతాయ న గరుతాయ న భావనాయ న సామఞ్ఞాయ న ఏకీభావాయ సంవత్తతి.

‘‘ఏవరూపస్స, భిక్ఖవే, భిక్ఖునో కిఞ్చాపి ఏవం ఇచ్ఛా ఉప్పజ్జేయ్య – ‘అహో వత మం సబ్రహ్మచారీ సక్కరేయ్యుం గరుం కరేయ్యుం [గరుకరేయ్యుం (సీ. స్యా.)] మానేయ్యుం పూజేయ్యు’న్తి, అథ ఖో నం సబ్రహ్మచారీ న చేవ సక్కరోన్తి న గరుం కరోన్తి [గరుకరోన్తి (సీ. స్యా.)] న మానేన్తి న పూజేన్తి. తం కిస్స హేతు? తథాహిస్స, భిక్ఖవే, విఞ్ఞూ సబ్రహ్మచారీ తే పాపకే అకుసలే ధమ్మే అప్పహీనే సమనుపస్సన్తి.

‘‘సేయ్యథాపి, భిక్ఖవే, అస్సఖళుఙ్కస్స కిఞ్చాపి ఏవం ఇచ్ఛా ఉప్పజ్జేయ్య – ‘అహో వత మం మనుస్సా ఆజానీయట్ఠానే ఠపేయ్యుం, ఆజానీయభోజనఞ్చ భోజేయ్యుం, ఆజానీయపరిమజ్జనఞ్చ పరిమజ్జేయ్యు’న్తి, అథ ఖో నం మనుస్సా న చేవ ఆజానీయట్ఠానే ఠపేన్తి న చ ఆజానీయభోజనం భోజేన్తి న చ ఆజానీయపరిమజ్జనం పరిమజ్జన్తి. తం కిస్స హేతు? తథాహిస్స, భిక్ఖవే, విఞ్ఞూ మనుస్సా తాని సాఠేయ్యాని కూటేయ్యాని జిమ్హేయ్యాని వఙ్కేయ్యాని అప్పహీనాని సమనుపస్సన్తి. ఏవమేవం ఖో, భిక్ఖవే, ఏవరూపస్స భిక్ఖునో కిఞ్చాపి ఏవం ఇచ్ఛా ఉప్పజ్జేయ్య – ‘అహో వత మం సబ్రహ్మచారీ సక్కరేయ్యుం గరుం కరేయ్యుం మానేయ్యుం పూజేయ్యు’న్తి, అథ ఖో నం సబ్రహ్మచారీ న చేవ సక్కరోన్తి న గరుం కరోన్తి న మానేన్తి న పూజేన్తి. తం కిస్స హేతు? తథాహిస్స, భిక్ఖవే, విఞ్ఞూ సబ్రహ్మచారీ తే పాపకే అకుసలే ధమ్మే అప్పహీనే సమనుపస్సన్తి.

‘‘ఇధ పన, భిక్ఖవే, భిక్ఖు న అధికరణికో హోతి, అధికరణసమథస్స వణ్ణవాదీ. యమ్పి, భిక్ఖవే, భిక్ఖు న అధికరణికో హోతి అధికరణసమథస్స వణ్ణవాదీ, అయమ్పి ధమ్మో పియతాయ గరుతాయ భావనాయ సామఞ్ఞాయ ఏకీభావాయ సంవత్తతి.

‘‘పున చపరం, భిక్ఖవే, భిక్ఖు సిక్ఖాకామో హోతి, సిక్ఖాసమాదానస్స వణ్ణవాదీ. యమ్పి, భిక్ఖవే, భిక్ఖు సిక్ఖాకామో హోతి సిక్ఖాసమాదానస్స వణ్ణవాదీ, అయమ్పి ధమ్మో పియతాయ గరుతాయ భావనాయ సామఞ్ఞాయ ఏకీభావాయ సంవత్తతి.

‘‘పున చపరం, భిక్ఖవే, భిక్ఖు అప్పిచ్ఛో హోతి, ఇచ్ఛావినయస్స వణ్ణవాదీ. యమ్పి, భిక్ఖవే, భిక్ఖు అప్పిచ్ఛో హోతి ఇచ్ఛావినయస్స వణ్ణవాదీ, అయమ్పి ధమ్మో…పే… ఏకీభావాయ సంవత్తతి.

‘‘పున చపరం, భిక్ఖవే, భిక్ఖు అక్కోధనో హోతి, కోధవినయస్స వణ్ణవాదీ. యమ్పి, భిక్ఖవే, భిక్ఖు అక్కోధనో హోతి కోధవినయస్స వణ్ణవాదీ, అయమ్పి ధమ్మో…పే… ఏకీభావాయ సంవత్తతి.

‘‘పున చపరం, భిక్ఖవే, భిక్ఖు అమక్ఖీ హోతి, మక్ఖవినయస్స వణ్ణవాదీ. యమ్పి, భిక్ఖవే, భిక్ఖు అమక్ఖీ హోతి మక్ఖవినయస్స వణ్ణవాదీ, అయమ్పి ధమ్మో…పే… ఏకీభావాయ సంవత్తతి.

‘‘పున చపరం, భిక్ఖవే, భిక్ఖు అసఠో హోతి, సాఠేయ్యవినయస్స వణ్ణవాదీ. యమ్పి, భిక్ఖవే, భిక్ఖు అసఠో హోతి సాఠేయ్యవినయస్స వణ్ణవాదీ, అయమ్పి ధమ్మో…పే… ఏకీభావాయ సంవత్తతి.

‘‘పున చపరం, భిక్ఖవే, భిక్ఖు అమాయావీ హోతి, మాయావినయస్స వణ్ణవాదీ. యమ్పి, భిక్ఖవే, భిక్ఖు అమాయావీ హోతి మాయావినయస్స వణ్ణవాదీ, అయమ్పి ధమ్మో…పే… ఏకీభావాయ సంవత్తతి.

‘‘పున చపరం, భిక్ఖవే, భిక్ఖు ధమ్మానం నిసామకజాతికో హోతి, ధమ్మనిసన్తియా వణ్ణవాదీ. యమ్పి, భిక్ఖవే, భిక్ఖు ధమ్మానం నిసామకజాతికో హోతి ధమ్మనిసన్తియా వణ్ణవాదీ, అయమ్పి ధమ్మో…పే… ఏకీభావాయ సంవత్తతి.

‘‘పున చపరం, భిక్ఖవే, భిక్ఖు పటిసల్లీనో హోతి, పటిసల్లానస్స వణ్ణవాదీ. యమ్పి, భిక్ఖవే, భిక్ఖు పటిసల్లీనో హోతి పటిసల్లానస్స వణ్ణవాదీ, అయమ్పి ధమ్మో…పే… ఏకీభావాయ సంవత్తతి.

‘‘పున చపరం, భిక్ఖవే, భిక్ఖు సబ్రహ్మచారీనం పటిసన్థారకో హోతి, పటిసన్థారకస్స వణ్ణవాదీ. యమ్పి, భిక్ఖవే, భిక్ఖు సబ్రహ్మచారీనం పటిసన్థారకో హోతి పటిసన్థారకస్స వణ్ణవాదీ, అయమ్పి ధమ్మో పియతాయ గరుతాయ భావనాయ సామఞ్ఞాయ ఏకీభావాయ సంవత్తతి.

‘‘ఏవరూపస్స, భిక్ఖవే, భిక్ఖునో కిఞ్చాపి న ఏవం ఇచ్ఛా ఉప్పజ్జేయ్య – ‘అహో వత మం సబ్రహ్మచారీ సక్కరేయ్యుం గరుం కరేయ్యుం మానేయ్యుం పూజేయ్యు’న్తి, అథ ఖో నం సబ్రహ్మచారీ సక్కరోన్తి గరుం కరోన్తి మానేన్తి పూజేన్తి. తం కిస్స హేతు? తథాహిస్స, భిక్ఖవే, విఞ్ఞూ సబ్రహ్మచారీ తే పాపకే అకుసలే ధమ్మే పహీనే సమనుపస్సన్తి.

‘‘సేయ్యథాపి, భిక్ఖవే, భద్దస్స అస్సాజానీయస్స కిఞ్చాపి న ఏవం ఇచ్ఛా ఉప్పజ్జేయ్య – ‘అహో వత మం మనుస్సా ఆజానీయట్ఠానే ఠపేయ్యుం, ఆజానీయభోజనఞ్చ భోజేయ్యుం, ఆజానీయపరిమజ్జనఞ్చ పరిమజ్జేయ్యు’న్తి, అథ ఖో నం మనుస్సా ఆజానీయట్ఠానే చ ఠపేన్తి ఆజానీయభోజనఞ్చ భోజేన్తి ఆజానీయపరిమజ్జనఞ్చ పరిమజ్జన్తి. తం కిస్స హేతు? తథాహిస్స, భిక్ఖవే, విఞ్ఞూ మనుస్సా తాని సాఠేయ్యాని కూటేయ్యాని జిమ్హేయ్యాని వఙ్కేయ్యాని పహీనాని సమనుపస్సన్తి.

‘‘ఏవమేవం ఖో, భిక్ఖవే, ఏవరూపస్స భిక్ఖునో కిఞ్చాపి న ఏవం ఇచ్ఛా ఉప్పజ్జేయ్య – ‘అహో వత మం సబ్రహ్మచారీ సక్కరేయ్యుం గరుం కరేయ్యుం మానేయ్యుం పూజేయ్యు’న్తి, అథ ఖో నం సబ్రహ్మచారీ సక్కరోన్తి గరుం కరోన్తి మానేన్తి పూజేన్తి. తం కిస్స హేతు? తథాహిస్స, భిక్ఖవే, విఞ్ఞూ సబ్రహ్మచారీ తే పాపకే అకుసలే ధమ్మే పహీనే సమనుపస్సన్తీ’’తి. సత్తమం.