183. ரோஜமல்லவத்து²

301. அத² கோ² ப⁴க³வா ஆபணே யதா²பி⁴ரந்தம் விஹரித்வா யேன குஸினாரா தேன சாரிகம் பக்காமி மஹதா பி⁴க்கு²ஸங்கே⁴ன ஸத்³தி⁴ம் அட்³ட⁴தேலஸேஹி பி⁴க்கு²ஸதேஹி. அஸ்ஸோஸும் கோ² கோஸினாரகா மல்லா – ‘‘ப⁴க³வா கிர குஸினாரம் ஆக³ச்ச²தி மஹதா பி⁴க்கு²ஸங்கே⁴ன ஸத்³தி⁴ம் அட்³ட⁴தேலஸேஹி பி⁴க்கு²ஸதேஹீ’’தி. தே ஸங்க³ரம் [ஸங்கரம் (க.)] அகம்ஸு – ‘‘யோ ப⁴க³வதோ பச்சுக்³க³மனம் ந கரிஸ்ஸதி, பஞ்சஸதானிஸ்ஸ த³ண்டோ³’’தி. தேன கோ² பன ஸமயேன ரோஜோ மல்லோ ஆயஸ்மதோ ஆனந்த³ஸ்ஸ ஸஹாயோ ஹோதி. அத² கோ² ப⁴க³வா அனுபுப்³பே³ன சாரிகம் சரமானோ யேன குஸினாரா தத³வஸரி. அத² கோ² கோஸினாரகா மல்லா ப⁴க³வதோ பச்சுக்³க³மனம் அகம்ஸு. அத² கோ² ரோஜோ மல்லோ ப⁴க³வதோ பச்சுக்³க³மனம் கரித்வா யேனாயஸ்மா ஆனந்தோ³ தேனுபஸங்கமி, உபஸங்கமித்வா ஆயஸ்மந்தம் ஆனந்த³ம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தம் கோ² ரோஜம் மல்லம் ஆயஸ்மா ஆனந்தோ³ ஏதத³வோச – ‘‘உளாரம் கோ² தே இத³ம், ஆவுஸோ ரோஜ, யம் த்வம் ப⁴க³வதோ பச்சுக்³க³மனம் அகாஸீ’’தி. ‘‘நாஹம், ப⁴ந்தே ஆனந்த³, ப³ஹுகதோ பு³த்³தே⁴ வா த⁴ம்மே வா ஸங்கே⁴ வா; அபி ச ஞாதீஹி ஸங்க³ரோ கதோ – ‘யோ ப⁴க³வதோ பச்சுக்³க³மனம் ந கரிஸ்ஸதி, பஞ்சஸதானிஸ்ஸ த³ண்டோ³’’’தி; ஸோ கோ² அஹம், ப⁴ந்தே ஆனந்த³, ஞாதீனம் த³ண்ட³ப⁴யா ஏவாஹம் ப⁴க³வதோ பச்சுக்³க³மனம் அகாஸிந்தி. அத² கோ² ஆயஸ்மா ஆனந்தோ³ அனத்தமனோ அஹோஸி’ கத²ஞ்ஹி நாம ரோஜோ மல்லோ ஏவம் வக்க²தீ’தி? அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘அயம், ப⁴ந்தே, ரோஜோ மல்லோ அபி⁴ஞ்ஞாதோ ஞாதமனுஸ்ஸோ. மஹத்தி²கோ கோ² பன ஏவரூபானம் ஞாதமனுஸ்ஸானம் இமஸ்மிம் த⁴ம்மவினயே பஸாதோ³. ஸாது⁴, ப⁴ந்தே, ப⁴க³வா ததா² கரோது, யதா² ரோஜோ மல்லோ இமஸ்மிம் த⁴ம்மவினயே பஸீதே³ய்யா’’தி. ‘‘ந கோ² தம், ஆனந்த³, து³க்கரம் ததா²க³தேன, யதா² ரோஜோ மல்லோ இமஸ்மிம் த⁴ம்மவினயே பஸீதே³ய்யா’’தி.

அத² கோ² ப⁴க³வா ரோஜம் மல்லம் மேத்தேன சித்தேன ப²ரித்வா உட்டா²யாஸனா விஹாரம் பாவிஸி. அத² கோ² ரோஜோ மல்லோ ப⁴க³வதோ மேத்தேன சித்தேன பு²ட்டோ², ஸேய்யதா²பி நாம கா³விம் தருணவச்சோ², ஏவமேவ, விஹாரேன விஹாரம் பரிவேணேன பரிவேணம் உபஸங்கமித்வா பி⁴க்கூ² புச்ச²தி – ‘‘கஹம் நு கோ², ப⁴ந்தே, ஏதரஹி ஸோ ப⁴க³வா விஹரதி அரஹம் ஸம்மாஸம்பு³த்³தோ⁴, த³ஸ்ஸனகாமா ஹி மயம் தம் ப⁴க³வந்தம் அரஹந்தம் ஸம்மாஸம்பு³த்³த⁴’’ந்தி. ‘‘ஏஸாவுஸோ ரோஜ, விஹாரோ ஸம்வுதத்³வாரோ, தேன அப்பஸத்³தோ³ உபஸங்கமித்வா அதரமானோ ஆளிந்த³ம் பவிஸித்வா உக்காஸித்வா அக்³க³ளம் ஆகோடேஹி, விவரிஸ்ஸதி தே ப⁴க³வா த்³வார’’ந்தி. அத² கோ² ரோஜோ மல்லோ யேன ஸோ விஹாரோ ஸம்வுதத்³வாரோ, தேன அப்பஸத்³தோ³ உபஸங்கமித்வா அதரமானோ ஆளிந்த³ம் பவிஸித்வா உக்காஸித்வா அக்³க³ளம் ஆகோடேஸி. விவரி ப⁴க³வா த்³வாரம். அத² கோ² ரோஜோ மல்லோ விஹாரம் பவிஸித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னஸ்ஸ கோ² ரோஜஸ்ஸ மல்லஸ்ஸ ப⁴க³வா அனுபுப்³பி³ம் கத²ம் கதே²ஸி, ஸேய்யதி²த³ம் – தா³னகத²ம்…பே… அபரப்பச்சயோ ஸத்து²ஸாஸனே ப⁴க³வந்தம் ஏதத³வோச – ‘‘ஸாது⁴, ப⁴ந்தே, அய்யா மமஞ்ஞேவ படிக்³க³ண்ஹேய்யும் சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரம், நோ அஞ்ஞேஸ’’ந்தி. ‘‘யேஸம் கோ², ரோஜ, ஸேக்கே²ன ஞாணேன ஸேக்கே²ன த³ஸ்ஸனேன த⁴ம்மோ தி³ட்டோ² ஸேய்யதா²பி தயா, தேஸம்பி ஏவம் ஹோதி – ‘அஹோ நூன அய்யா அம்ஹாகஞ்ஞேவ படிக்³க³ண்ஹேய்யும் சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரம், நோ அஞ்ஞேஸ’ந்தி. தேன ஹி, ரோஜ, தவ சேவ படிக்³க³ஹிஸ்ஸந்தி அஞ்ஞேஸஞ்சா’’தி.

302. தேன கோ² பன ஸமயேன குஸினாராயம் பணீதானம் ப⁴த்தானம் ப⁴த்தபடிபாடி அட்டி²தா ஹோதி. அத² கோ² ரோஜஸ்ஸ மல்லஸ்ஸ படிபாடிம் அலப⁴ந்தஸ்ஸ ஏதத³ஹோஸி – ‘‘யம்னூனாஹம் ப⁴த்தக்³க³ம் ஓலோகேய்யம், யம் ப⁴த்தக்³கே³ நாஸ்ஸ, தம் படியாதே³ய்ய’’ந்தி. அத² கோ² ரோஜோ மல்லோ ப⁴த்தக்³க³ம் ஓலோகேந்தோ த்³வே நாத்³த³ஸ – டா³கஞ்ச பிட்ட²கா²த³னீயஞ்ச. அத² கோ² ரோஜோ மல்லோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தம் ஆனந்த³ம் ஏதத³வோச – ‘‘இத⁴ மே, ப⁴ந்தே ஆனந்த³, படிபாடிம் அலப⁴ந்தஸ்ஸ ஏதத³ஹோஸி – ‘யம்னூனாஹம் ப⁴த்தக்³க³ம் ஓலோகேய்யம், யம் ப⁴த்தக்³கே³ நாஸ்ஸ, தம் படியாதே³ய்ய’ந்தி. ஸோ கோ² அஹம், ப⁴ந்தே ஆனந்த³, ப⁴த்தக்³க³ம் ஓலோகேந்தோ த்³வே நாத்³த³ஸம் – டா³கஞ்ச பிட்ட²கா²த³னீயஞ்ச. ஸசாஹம், ப⁴ந்தே ஆனந்த³, படியாதே³ய்யம் டா³கஞ்ச பிட்ட²கா²த³னீயஞ்ச, படிக்³க³ண்ஹேய்ய மே ப⁴க³வா’’தி? ‘‘தேன ஹி, ரோஜ, ப⁴க³வந்தம் படிபுச்சி²ஸ்ஸாமீ’’தி. அத² கோ² ஆயஸ்மா ஆனந்தோ³ ப⁴க³வதோ ஏதமத்த²ம் ஆரோசேஸி. ‘‘தேன ஹானந்த³, படியாதே³தூ’’தி. ‘‘தேன ஹி, ரோஜ, படியாதே³ஹீ’’தி. அத² கோ² ரோஜோ மல்லோ தஸ்ஸா ரத்தியா அச்சயேன பஹூதம் டா³கஞ்ச பிட்ட²கா²த³னீயஞ்ச படியாதா³பேத்வா ப⁴க³வதோ உபனாமேஸி ‘‘படிக்³க³ண்ஹாது மே, ப⁴ந்தே, ப⁴க³வா டா³கஞ்ச பிட்ட²கா²த³னீயஞ்சா’’தி. ‘‘தேன ஹி, ரோஜ, பி⁴க்கூ²னம் தே³ஹீ’’தி. அத² கோ² ரோஜோ மல்லோ பி⁴க்கூ²னம் தே³தி. பி⁴க்கூ² குக்குச்சாயந்தா ந படிக்³க³ண்ஹந்தி. ‘‘படிக்³க³ண்ஹத², பி⁴க்க²வே, பரிபு⁴ஞ்ஜதா²’’தி. அத² கோ² ரோஜோ மல்லோ பு³த்³த⁴ப்பமுக²ம் பி⁴க்கு²ஸங்க⁴ம் பஹூதேஹி டா³கேஹி ச பிட்ட²கா²த³னீயேஹி ச ஸஹத்தா² ஸந்தப்பேத்வா ஸம்பவாரேத்வா ப⁴க³வந்தம் தோ⁴தஹத்த²ம் ஓனீதபத்தபாணிம் ஏகமந்தம் நிஸீதி³. ஏகமந்தம் நிஸின்னம் கோ² ரோஜம் மல்லம் ப⁴க³வா த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா உட்டா²யாஸனா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஸப்³ப³ஞ்ச டா³கம் ஸப்³ப³ஞ்ச பிட்ட²கா²த³னீய’’ந்தி.

ரோஜமல்லவத்து² நிட்டி²தம்.