184. வுட்³ட⁴பப்³ப³ஜிதவத்து²

303. அத² கோ² ப⁴க³வா குஸினாராயம் யதா²பி⁴ரந்தம் விஹரித்வா யேன ஆதுமா தேன சாரிகம் பக்காமி மஹதா பி⁴க்கு²ஸங்கே⁴ன ஸத்³தி⁴ம் அட்³ட⁴தேலஸேஹி பி⁴க்கு²ஸதேஹி. தேன கோ² பன ஸமயேன அஞ்ஞதரோ வுட்³ட⁴பப்³ப³ஜிதோ ஆதுமாயம் படிவஸதி நஹாபிதபுப்³போ³. தஸ்ஸ த்³வே தா³ரகா ஹோந்தி, மஞ்ஜுகா படிபா⁴னேய்யகா, த³க்கா² பரியோதா³தஸிப்பா ஸகே ஆசரியகே நஹாபிதகம்மே. அஸ்ஸோஸி கோ² ஸோ வுட்³ட⁴பப்³ப³ஜிதோ – ‘‘ப⁴க³வா கிர ஆதுமம் ஆக³ச்ச²தி மஹதா பி⁴க்கு²ஸங்கே⁴ன ஸத்³தி⁴ம் அட்³ட⁴தேலஸேஹி பி⁴க்கு²ஸதேஹீ’’தி. அத² கோ² ஸோ வுட்³ட⁴பப்³ப³ஜிதோ தே தா³ரகே ஏதத³வோச – ‘‘ப⁴க³வா கிர, தாதா, ஆதுமம் ஆக³ச்ச²தி மஹதா பி⁴க்கு²ஸங்கே⁴ன ஸத்³தி⁴ம் அட்³ட⁴தேலஸேஹி பி⁴க்கு²ஸதேஹி. க³ச்ச²த² தும்ஹே, தாதா, கு²ரப⁴ண்ட³ம் ஆதா³ய நாளியாவாபகேன அனுக⁴ரகம் அனுக⁴ரகம் ஆஹிண்ட³த², லோணம்பி, தேலம்பி, தண்டு³லம்பி, கா²த³னீயம்பி ஸம்ஹரத², ப⁴க³வதோ ஆக³தஸ்ஸ யாகு³பானம் கரிஸ்ஸாமா’’தி. ‘‘ஏவம், தாதா’’தி கோ² தே தா³ரகா தஸ்ஸ வுட்³ட⁴பப்³ப³ஜிதஸ்ஸ படிஸ்ஸுணித்வா கு²ரப⁴ண்ட³ம் ஆதா³ய நாளியாவாபகேன அனுக⁴ரகம் அனுக⁴ரகம் ஆஹிண்ட³ந்தி, லோணம்பி, தேலம்பி, தண்டு³லம்பி, கா²த³னீயம்பி ஸம்ஹரந்தா. மனுஸ்ஸா தே தா³ரகே மஞ்ஜுகே படிபா⁴னேய்யகே பஸ்ஸித்வா யேபி ந காராபேதுகாமா தேபி காராபேந்தி, காராபேத்வாபி ப³ஹும் தே³ந்தி. அத² கோ² தே தா³ரகா ப³ஹும் லோணம்பி, தேலம்பி, தண்டு³லம்பி, கா²த³னீயம்பி ஸம்ஹரிம்ஸு.

அத² கோ² ப⁴க³வா அனுபுப்³பே³ன சாரிகம் சரமானோ யேன ஆதுமா தத³வஸரி. தத்ர ஸுத³ம் ப⁴க³வா ஆதுமாயம் விஹரதி பு⁴ஸாகா³ரே. அத² கோ² ஸோ வுட்³ட⁴பப்³ப³ஜிதோ தஸ்ஸா ரத்தியா அச்சயேன பஹூதம் யாகு³ம் படியாதா³பேத்வா ப⁴க³வதோ உபனாமேஸி – ‘‘படிக்³க³ண்ஹாது மே, ப⁴ந்தே, ப⁴க³வா யாகு³’’ந்தி. ஜானந்தாபி ததா²க³தா புச்ச²ந்தி…பே… ஸாவகானம் வா ஸிக்கா²பத³ம் பஞ்ஞபேஸ்ஸாமாதி. அத² கோ² ப⁴க³வா தம் வுட்³ட⁴பப்³ப³ஜிதம் ஏதத³வோச – ‘‘குதாயம், பி⁴க்கு² யாகூ³’’தி? அத² கோ² ஸோ வுட்³ட⁴பப்³ப³ஜிதோ ப⁴க³வதோ ஏதமத்த²ம் ஆரோசேஸி. விக³ரஹி பு³த்³தோ⁴ ப⁴க³வா, ‘‘அனனுச்ச²விகம், மோக⁴புரிஸ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், மோக⁴புரிஸ, பப்³ப³ஜிதோ அகப்பியே ஸமாத³பேஸ்ஸஸி [ஸமாத³பேஸி (க.)]. நேதம், மோக⁴புரிஸ, அப்பஸன்னானம் வா பஸாதா³ய…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி ‘ந, பி⁴க்க²வே, பப்³ப³ஜிதேன அகப்பியே ஸமாத³பேதப்³ப³ம், யோ ஸமாத³பேய்ய, ஆபத்தி து³க்கடஸ்ஸ. ந ச, பி⁴க்க²வே, நஹாபிதபுப்³பே³ன கு²ரப⁴ண்ட³ம் பரிஹரிதப்³ப³ம். யோ பரிஹரேய்ய, ஆபத்தி து³க்கடஸ்ஸா’’’தி.

அத² கோ² ப⁴க³வா ஆதுமாயம் யதா²பி⁴ரந்தம் விஹரித்வா யேன ஸாவத்தி² தேன சாரிகம் பக்காமி. அனுபுப்³பே³ன சாரிகம் சரமானோ யேன ஸாவத்தி² தத³வஸரி. தத்ர ஸுத³ம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸாவத்தி²யம் ப³ஹும் ப²லகா²த³னீயம் உப்பன்னம் ஹோதி. அத² கோ² பி⁴க்கூ²னம் ஏதத³ஹோஸி – ‘‘கிம் நு கோ² ப⁴க³வதா ப²லகா²த³னீயம் அனுஞ்ஞாதம், கிம் அனனுஞ்ஞாத’’ந்தி? ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஸப்³ப³ம் ப²லகா²த³னீய’’ந்தி.

304. தேன கோ² பன ஸமயேன ஸங்கி⁴கானி பீ³ஜானி புக்³க³லிகாய பூ⁴மியா ரோபியந்தி, புக்³க³லிகானி பீ³ஜானி ஸங்கி⁴காய பூ⁴மியா ரோபியந்தி. ப⁴க³வதோ ஏதமத்த²ம் ஆரோசேஸும். ஸங்கி⁴கானி, பி⁴க்க²வே, பீ³ஜானி புக்³க³லிகாய பூ⁴மியா ரோபிதானி பா⁴க³ம் த³த்வா பரிபு⁴ஞ்ஜிதப்³பா³னி. புக்³க³லிகானி பீ³ஜானி ஸங்கி⁴காய பூ⁴மியா ரோபிதானி பா⁴க³ம் த³த்வா பரிபு⁴ஞ்ஜிதப்³பா³னீதி.

வுட்³ட⁴பப்³ப³ஜிதவத்து² நிட்டி²தம்.