163. கு³ளாதி³அனுஜானனா

272. அத² கோ² ப⁴க³வா ஸாவத்தி²யம் யதா²பி⁴ரந்தம் விஹரித்வா யேன ராஜக³ஹம் தேன சாரிகம் பக்காமி. அத்³த³ஸா கோ² ஆயஸ்மா கங்கா²ரேவதோ அந்தராமக்³கே³ கு³ளகரணம், ஓக்கமித்வா கு³ளே பிட்ட²ம்பி சா²ரிகம்பி பக்கி²பந்தே, தி³ஸ்வான ‘‘அகப்பியோ கு³ளோ ஸாமிஸோ, ந கப்பதி கு³ளோ விகாலே பரிபு⁴ஞ்ஜிது’’ந்தி குக்குச்சாயந்தோ ஸபரிஸோ கு³ளம் ந பரிபு⁴ஞ்ஜதி. யேபிஸ்ஸ ஸோதப்³ப³ம் மஞ்ஞந்தி, தேபி கு³ளம் ந பரிபு⁴ஞ்ஜந்தி. ப⁴க³வதோ ஏதமத்த²ம் ஆரோசேஸும். கிமத்தா²ய [கிமத்தி²யா (க.)], பி⁴க்க²வே, கு³ளே பிட்ட²ம்பி சா²ரிகம்பி பக்கி²பந்தீதி? த²த்³த⁴த்தா²ய [ப³ந்த⁴னத்தா²ய (ஸீ. ஸ்யா.)] ப⁴க³வாதி. ஸசே, பி⁴க்க²வே, த²த்³த⁴த்தா²ய கு³ளே பிட்ட²ம்பி சா²ரிகம்பி பக்கி²பந்தி, ஸோ ச கு³ளோத்வேவ ஸங்க²ம் க³ச்ச²தி. அனுஜானாமி, பி⁴க்க²வே, யதா²ஸுக²ம் கு³ளம் பரிபு⁴ஞ்ஜிதுந்தி.

அத்³த³ஸா கோ² ஆயஸ்மா கங்கா²ரேவதோ அந்தராமக்³கே³ வச்சே முக்³க³ம் ஜாதம், பஸ்ஸித்வா ‘‘அகப்பியா முக்³கா³; பக்காபி முக்³கா³ ஜாயந்தீதி’’ குக்குச்சாயந்தோ ஸபரிஸோ முக்³க³ம் ந பரிபு⁴ஞ்ஜதி. யேபிஸ்ஸ ஸோதப்³ப³ம் மஞ்ஞந்தி, தேபி முக்³க³ம் ந பரிபு⁴ஞ்ஜந்தி. ப⁴க³வதோ ஏதமத்த²ம் ஆரோசேஸும். ஸசே [ஸசேபி (?)], பி⁴க்க²வே, பக்காபி முக்³கா³ ஜாயந்தி, அனுஜானாமி, பி⁴க்க²வே, யதா²ஸுக²ம் முக்³க³ம் பரிபு⁴ஞ்ஜிதுந்தி.

273. தேன கோ² பன ஸமயேன அஞ்ஞதரஸ்ஸ பி⁴க்கு²னோ உத³ரவாதாபா³தோ⁴ ஹோதி. ஸோ லோணஸோவீரகம் அபாயி. தஸ்ஸ ஸோ உத³ரவாதாபா³தோ⁴ படிப்பஸ்ஸம்பி⁴. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கி³லானஸ்ஸ லோணஸோவீரகம்; அகி³லானஸ்ஸ உத³கஸம்பி⁴ன்னம் பானபரிபோ⁴கே³ன பரிபு⁴ஞ்ஜிதுந்தி.

கு³ளாதி³அனுஜானனா நிட்டி²தா.