164. அந்தோவுட்டா²தி³படிக்கே²பகதா²

274. அத² கோ² ப⁴க³வா அனுபுப்³பே³ன சாரிகம் சரமானோ யேன ராஜக³ஹம் தத³வஸரி. தத்ர ஸுத³ம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ப⁴க³வதோ உத³ரவாதாபா³தோ⁴ ஹோதி. அத² கோ² ஆயஸ்மா ஆனந்தோ³ – ‘புப்³பே³பி ப⁴க³வதோ உத³ரவாதாபா³தோ⁴ தேகடுலயாகு³யா பா²ஸு ஹோதீ’தி – ஸாமம் திலம்பி, தண்டு³லம்பி, முக்³க³ம்பி விஞ்ஞாபேத்வா, அந்தோ வாஸேத்வா, அந்தோ ஸாமம் பசித்வா ப⁴க³வதோ உபனாமேஸி – ‘‘பிவது ப⁴க³வா தேகடுலயாகு³’’ந்தி. ஜானந்தாபி ததா²க³தா புச்ச²ந்தி, ஜானந்தாபி ந புச்ச²ந்தி; காலம் விதி³த்வா புச்ச²ந்தி, காலம் விதி³த்வா ந புச்ச²ந்தி; அத்த²ஸம்ஹிதம் ததா²க³தா புச்ச²ந்தி, நோ அனத்த²ஸம்ஹிதம். அனத்த²ஸம்ஹிதே ஸேதுகா⁴தோ ததா²க³தானம். த்³வீஹி ஆகாரேஹி பு³த்³தா⁴ ப⁴க³வந்தோ பி⁴க்கூ² படிபுச்ச²ந்தி – த⁴ம்மம் வா தே³ஸேஸ்ஸாம, ஸாவகானம் வா ஸிக்கா²பத³ம் பஞ்ஞபேஸ்ஸாமாதி. அத² கோ² ப⁴க³வா ஆயஸ்மந்தம் ஆனந்த³ம் ஆமந்தேஸி – ‘‘குதாயம், ஆனந்த³, யாகூ³’’தி? அத² கோ² ஆயஸ்மா ஆனந்தோ³ ப⁴க³வதோ ஏதமத்த²ம் ஆரோசேஸி. விக³ரஹி பு³த்³தோ⁴ ப⁴க³வா – ‘அனனுச்ச²விகம், ஆனந்த³, அனனுலோமிகம், அப்பதிரூபம், அஸ்ஸாமணகம், அகப்பியம், அகரணீயம். கத²ஞ்ஹி நாம த்வம், ஆனந்த³, ஏவரூபாய பா³ஹுல்லாய சேதேஸ்ஸஸி. யத³பி, ஆனந்த³, அந்தோ வுட்ட²ம் [வுத்த²ம் (ஸீ. ஸ்யா. க.)] தத³பி அகப்பியம்; யத³பி அந்தோ பக்கம் தத³பி அகப்பியம்; யத³பி ஸாமம் பக்கம், தத³பி அகப்பியம். நேதம், ஆனந்த³, அப்பஸன்னானம் வா பஸாதா³ய…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, அந்தோ வுட்ட²ம், அந்தோ பக்கம், ஸாமம் பக்கம் பரிபு⁴ஞ்ஜிதப்³ப³ம். யோ பரிபு⁴ஞ்ஜேய, ஆபத்தி து³க்கடஸ்ஸ. அந்தோ சே, பி⁴க்க²வே, வுட்ட²ம், அந்தோ பக்கம், ஸாமம் பக்கம் தஞ்சே பரிபு⁴ஞ்ஜேய்ய, ஆபத்தி திண்ணம் து³க்கடானம். அந்தோ சே, பி⁴க்க²வே, வுட்ட²ம், அந்தோ பக்கம், அஞ்ஞேஹி பக்கம், தஞ்சே பரிபு⁴ஞ்ஜேய்ய, ஆபத்தி த்³வின்னம் து³க்கடானம். அந்தோ சே, பி⁴க்க²வே, வுட்ட²ம், ப³ஹி பக்கம், ஸாமம் பக்கம், தஞ்சே பரிபு⁴ஞ்ஜேய்ய, ஆபத்தி த்³வின்னம் து³க்கடானம். ப³ஹி சே, பி⁴க்க²வே, வுட்ட²ம், அந்தோ பக்கம், ஸாமம் பக்கம், தஞ்சே பரிபு⁴ஞ்ஜேய்ய, ஆபத்தி த்³வின்னம் து³க்கடானம். அந்தோ சே, பி⁴க்க²வே, வுட்ட²ம், ப³ஹி பக்கம், அஞ்ஞேஹி பக்கம், தஞ்சே பரிபு⁴ஞ்ஜேய்ய, ஆபத்தி து³க்கடஸ்ஸ. ப³ஹி சே, பி⁴க்க²வே, வுட்ட²ம், அந்தோ பக்கம், அஞ்ஞேஹி பக்கம், தஞ்சே பரிபு⁴ஞ்ஜேய்ய, ஆபத்தி து³க்கடஸ்ஸ. ப³ஹி சே, பி⁴க்க²வே, வுட்ட²ம், ப³ஹி பக்கம், ஸாமம் பக்கம், தஞ்சே பரிபு⁴ஞ்ஜேய்ய, ஆபத்தி து³க்கடஸ்ஸ. ப³ஹி சே, பி⁴க்க²வே, வுட்ட²ம், ப³ஹி பக்கம், அஞ்ஞேஹி பக்கம், தஞ்சே பரிபு⁴ஞ்ஜேய்ய, அனாபத்தீ’’’தி.

தேன கோ² பன ஸமயேன பி⁴க்கூ² ‘‘ப⁴க³வதா ஸாமம்பாகோ படிக்கி²த்தோ’’தி புன பாகே குக்குச்சாயந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, புன பாகம் பசிதுந்தி.

தேன கோ² பன ஸமயேன ராஜக³ஹம் து³ப்³பி⁴க்க²ம் ஹோதி. மனுஸ்ஸா லோணம்பி, தேலம்பி, தண்டு³லம்பி, கா²த³னீயம்பி ஆராமம் ஆஹரந்தி. தானி பி⁴க்கூ² ப³ஹி வாஸேந்தி; உக்கபிண்ட³காபி கா²த³ந்தி, சோராபி ஹரந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அந்தோ வாஸேதுந்தி. அந்தோ வாஸேத்வா ப³ஹி பாசேந்தி. த³மகா பரிவாரேந்தி. பி⁴க்கூ² அவிஸ்ஸட்டா² பரிபு⁴ஞ்ஜந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அந்தோ பசிதுந்தி. து³ப்³பி⁴க்கே² கப்பியகாரகா ப³ஹுதரம் ஹரந்தி, அப்பதரம் பி⁴க்கூ²னம் தே³ந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸாமம் பசிதும். அனுஜானாமி, பி⁴க்க²வே, அந்தோ வுட்ட²ம், அந்தோ பக்கம், ஸாமம் பக்கந்தி.

அந்தோவுட்டா²தி³படிக்கே²பகதா² நிட்டி²தா.