160. பஞ்சபே⁴ஸஜ்ஜகதா²

260. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கூ²னம் ஸாரதி³கேன ஆபா³தே⁴ன பு²ட்டா²னம் யாகு³பி பீதா உக்³க³ச்ச²தி, ப⁴த்தம்பி பு⁴த்தம் உக்³க³ச்ச²தி. தே தேன கிஸா ஹோந்தி, லூகா², து³ப்³ப³ண்ணா, உப்பண்டு³ப்பண்டு³கஜாதா, த⁴மனிஸந்த²தக³த்தா. அத்³த³ஸா கோ² ப⁴க³வா தே பி⁴க்கூ² கிஸே லூகே² து³ப்³ப³ண்ணே உப்பண்டு³ப்பண்டு³கஜாதே த⁴மனிஸந்த²தக³த்தே, தி³ஸ்வான ஆயஸ்மந்தம் ஆனந்த³ம் ஆமந்தேஸி – ‘‘கிம் நு கோ², ஆனந்த³, ஏதரஹி பி⁴க்கூ² கிஸா, லூகா², து³ப்³ப³ண்ணா, உப்பண்டு³ப்பண்டு³கஜாதா, த⁴மனிஸந்த²தக³த்தா’’தி? ‘‘ஏதரஹி, ப⁴ந்தே, பி⁴க்கூ²னம் ஸாரதி³கேன ஆபா³தே⁴ன பு²ட்டா²னம் யாகு³பி பீதா உக்³க³ச்ச²தி, ப⁴த்தம்பி பு⁴த்தம் உக்³க³ச்ச²தி. தே தேன கிஸா ஹோந்தி, லூகா², து³ப்³ப³ண்ணா, உப்பண்டு³ப்பண்டு³கஜாதா, த⁴மனிஸந்த²தக³த்தா’’தி. அத² கோ² ப⁴க³வதோ ரஹோக³தஸ்ஸ படிஸல்லீனஸ்ஸ ஏவம் சேதஸோ பரிவிதக்கோ உத³பாதி³ – ‘‘ஏதரஹி கோ² பி⁴க்கூ²னம் ஸாரதி³கேன ஆபா³தே⁴ன பு²ட்டா²னம் யாகு³பி பீதா உக்³க³ச்ச²தி, ப⁴த்தம்பி பு⁴த்தம் உக்³க³ச்ச²தி. தே தேன கிஸா ஹோந்தி, லூகா², து³ப்³ப³ண்ணா, உப்பண்டு³ப்பண்டு³கஜாதா, த⁴மனிஸந்த²தக³த்தா. கிம் நு கோ² அஹம் பி⁴க்கூ²னம் பே⁴ஸஜ்ஜம் அனுஜானேய்யம், யம் பே⁴ஸஜ்ஜஞ்சேவ அஸ்ஸ பே⁴ஸஜ்ஜஸம்மதஞ்ச லோகஸ்ஸ, ஆஹாரத்த²ஞ்ச ப²ரேய்ய, ந ச ஓளாரிகோ ஆஹாரோ பஞ்ஞாயேய்யா’’தி? அத² கோ² ப⁴க³வதோ ஏதத³ஹோஸி – ‘‘இமானி கோ² பஞ்ச பே⁴ஸஜ்ஜானி, ஸேய்யதி²த³ம் – ஸப்பி, நவனீதம், தேலம், மது⁴, பா²ணிதம்; பே⁴ஸஜ்ஜானி சேவ பே⁴ஸஜ்ஜஸம்மதானி ச லோகஸ்ஸ, ஆஹாரத்த²ஞ்ச ப²ரந்தி, ந ச ஓளாரிகோ ஆஹாரோ பஞ்ஞாயதி. யம்னூனாஹம் பி⁴க்கூ²னம் இமானி பஞ்ச பே⁴ஸஜ்ஜானி அனுஜானேய்யம், காலே படிக்³க³ஹேத்வா காலே பரிபு⁴ஞ்ஜிது’’ந்தி. அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘இத⁴ மய்ஹம், பி⁴க்க²வே, ரஹோக³தஸ்ஸ படிஸல்லீனஸ்ஸ ஏவம் சேதஸோ பரிவிதக்கோ உத³பாதி³ – ‘ஏதரஹி கோ² பி⁴க்கூ²னம் ஸாரதி³கேன ஆபா³தே⁴ன பு²ட்டா²னம் யாகு³பி பீதா உக்³க³ச்ச²தி, ப⁴த்தம்பி பு⁴த்தம் உக்³க³ச்ச²தி. தே தேன கிஸா ஹோந்தி, லூகா², து³ப்³ப³ண்ணா, உப்பண்டு³ப்பண்டு³கஜாதா, த⁴மனிஸந்த²தக³த்தா. கிம் நு கோ² அஹம் பி⁴க்கூ²னம் பே⁴ஸஜ்ஜம் அனுஜானேய்யம், யம் பே⁴ஸஜ்ஜஞ்சேவ அஸ்ஸ பே⁴ஸஜ்ஜஸம்மதஞ்ச லோகஸ்ஸ, ஆஹாரத்த²ஞ்ச ப²ரேய்ய, ந ச ஓளாரிகோ ஆஹாரோ பஞ்ஞாயேய்யா’தி. தஸ்ஸ மய்ஹம், பி⁴க்க²வே, ஏதத³ஹோஸி ‘இமானி கோ² பஞ்ச பே⁴ஸஜ்ஜானி, ஸேய்யதி²த³ம் – ஸப்பி, நவனீதம், தேலம், மது⁴, பா²ணிதம்; பே⁴ஸஜ்ஜானி சேவ பே⁴ஸஜ்ஜஸம்மதானி ச லோகஸ்ஸ, ஆஹாரத்த²ஞ்ச ப²ரந்தி, ந ச ஓளாரிகோ ஆஹாரோ பஞ்ஞாயதி. யம்னூனாஹம் பி⁴க்கூ²னம் இமானி பஞ்ச பே⁴ஸஜ்ஜானி அனுஜானேய்யம், காலே படிக்³க³ஹேத்வா காலே பரிபு⁴ஞ்ஜிது’ந்தி. அனுஜானாமி, பி⁴க்க²வே, தானி பஞ்ச பே⁴ஸஜ்ஜானி காலே படிக்³க³ஹேத்வா காலே பரிபு⁴ஞ்ஜிது’’ந்தி.

261. தேன கோ² பன ஸமயேன பி⁴க்கூ² தானி பஞ்ச பே⁴ஸஜ்ஜானி காலே படிக்³க³ஹேத்வா காலே பரிபு⁴ஞ்ஜந்தி. தேஸம் யானிபி தானி பாகதிகானி லூகா²னி போ⁴ஜனானி தானிபி நச்சா²தே³ந்தி, பகே³வ ஸேனேஸிதானி [ஸேனேஸிகானி (ஸீ. ஸ்யா.), ஸேனேஹிகானி (யோஜனா)]. தே தேன சேவ ஸாரதி³கேன ஆபா³தே⁴ன பு²ட்டா², இமினா ச ப⁴த்தாச்சா²த³கேன [ப⁴த்தாச்ச²ன்னகேன (க.)], தது³ப⁴யேன பி⁴ய்யோஸோமத்தாய கிஸா ஹோந்தி, லூகா², து³ப்³ப³ண்ணா, உப்பண்டு³ப்பண்டு³கஜாதா, த⁴மனிஸந்த²தக³த்தா. அத்³த³ஸா கோ² ப⁴க³வா தே பி⁴க்கூ² பி⁴ய்யோஸோமத்தாய கிஸே லூகே² து³ப்³ப³ண்ணே உப்பண்டு³ப்பண்டு³கஜாதே த⁴மனிஸந்த²தக³த்தே, தி³ஸ்வான ஆயஸ்மந்தம் ஆனந்த³ம் ஆமந்தேஸி – ‘‘கிம் நு கோ², ஆனந்த³, ஏதரஹி பி⁴க்கூ² பி⁴ய்யோஸோமத்தாய கிஸா, லூகா², து³ப்³ப³ண்ணா, உப்பண்டு³ப்பண்டு³கஜாதா, த⁴மனிஸந்த²தக³த்தா’’தி? ‘‘ஏதரஹி, ப⁴ந்தே, பி⁴க்கூ² தானி ச பஞ்ச பே⁴ஸஜ்ஜானி காலே படிக்³க³ஹேத்வா காலே பரிபு⁴ஞ்ஜந்தி. தேஸம் யானிபி தானி பாகதிகானி லூகா²னி போ⁴ஜனானி தானிபி நச்சா²தே³ந்தி, பகே³வ ஸேனேஸிகானி. தே தேன சேவ ஸாரதி³கேன ஆபா³தே⁴ன பு²ட்டா², இமினா ச ப⁴த்தாச்சா²த³கேன, தது³ப⁴யேன பி⁴ய்யோஸோமத்தாய கிஸா, லூகா², து³ப்³ப³ண்ணா, உப்பண்டு³ப்பண்டு³கஜாதா, த⁴மனிஸந்த²தக³த்தா’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, தானி பஞ்ச பே⁴ஸஜ்ஜானி படிக்³க³ஹேத்வா காலேபி விகாலேபி பரிபு⁴ஞ்ஜிது’’ந்தி.

262. தேன கோ² பன ஸமயேன கி³லானானம் பி⁴க்கூ²னம் வஸேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, வஸானி பே⁴ஸஜ்ஜானி – அச்ச²வஸம், மச்ச²வஸம், ஸுஸுகாவஸம், ஸூகரவஸம், க³த்³ரப⁴வஸம் – காலே படிக்³க³ஹிதம் காலே நிப்பக்கம் [நிபக்கம் (க.)] காலே ஸம்ஸட்ட²ம் தேலபரிபோ⁴கே³ன பரிபு⁴ஞ்ஜிதும். விகாலே சே, பி⁴க்க²வே, படிக்³க³ஹிதம் விகாலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி திண்ணம் து³க்கடானம். காலே சே, பி⁴க்க²வே, படிக்³க³ஹிதம் விகாலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி த்³வின்னம் து³க்கடானம். காலே சே, பி⁴க்க²வே, படிக்³க³ஹிதம் காலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி து³க்கடஸ்ஸ. காலே சே, பி⁴க்க²வே, படிக்³க³ஹிதம் காலே நிப்பக்கம் காலே ஸம்ஸட்ட²ம், தம் சே பரிபு⁴ஞ்ஜேய்ய, அனாபத்தீதி.

பஞ்சபே⁴ஸஜ்ஜகதா² நிட்டி²தா.