161. மூலாதி³பே⁴ஸஜ்ஜகதா²

263. தேன கோ² பன ஸமயேன கி³லானானம் பி⁴க்கூ²னம் மூலேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, மூலானி பே⁴ஸஜ்ஜானி – ஹலித்³தி³ம், ஸிங்கி³வேரம், வசம், வசத்த²ம் [வசத்த²ம் (ஸீ. ஸ்யா.)], அதிவிஸம், கடுகரோஹிணிம், உஸீரம், ப⁴த்³த³முத்தகம், யானி வா பனஞ்ஞானிபி அத்தி² மூலானி பே⁴ஸஜ்ஜானி, நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தி, தானி – படிக்³க³ஹேத்வா யாவஜீவம் பரிஹரிதும்; ஸதி பச்சயே பரிபு⁴ஞ்ஜிதும். அஸதி பச்சயே பரிபு⁴ஞ்ஜந்தஸ்ஸ ஆபத்தி து³க்கடஸ்ஸாதி.

தேன கோ² பன ஸமயேன கி³லானானம் பி⁴க்கூ²னம் மூலேஹி பே⁴ஸஜ்ஜேஹி பிட்டே²ஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, நிஸத³ம் நிஸத³போதகந்தி.

தேன கோ² பன ஸமயேன கி³லானானம் பி⁴க்கூ²னம் கஸாவேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கஸாவானி [கஸாவபே⁴ஸஜ்ஜானி (க.)] பே⁴ஸஜ்ஜானி – நிம்ப³கஸாவம், குடஜகஸாவம், படோலகஸாவம், ப²க்³க³வகஸாவம், நத்தமாலகஸாவம், யானி வா பனஞ்ஞானிபி அத்தி² கஸாவானி பே⁴ஸஜ்ஜானி நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தி, தானி – படிக்³க³ஹேத்வா யாவஜீவம் பரிஹரிதும்; ஸதி பச்சயே பரிபு⁴ஞ்ஜிதும். அஸதி பச்சயே பரிபு⁴ஞ்ஜந்தஸ்ஸ ஆபத்தி து³க்கடஸ்ஸாதி.

தேன கோ² பன ஸமயேன கி³லானானம் பி⁴க்கூ²னம் பண்ணேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பண்ணானி பே⁴ஸஜ்ஜானி – நிம்ப³பண்ணம், குடஜபண்ணம், படோலபண்ணம், ஸுலஸிபண்ணம், கப்பாஸபண்ணம், யானி வா பனஞ்ஞானிபி அத்தி² பண்ணானி பே⁴ஸஜ்ஜானி, நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தி…பே….

தேன கோ² பன ஸமயேன கி³லானானம் பி⁴க்கூ²னம் ப²லேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ப²லானி பே⁴ஸஜ்ஜானி – பி³லங்க³ம், பிப்பலிம், மரிசம், ஹரீதகம், விபீ⁴தகம், ஆமலகம், கோ³ட்ட²ப²லம் [கோ³ட²ப²லம் (ஸ்யா.), கோட்ட²ப²லம் (க.)], யானி வா பனஞ்ஞானிபி அத்தி² ப²லானி பே⁴ஸஜ்ஜானி, நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தி…பே….

தேன கோ² பன ஸமயேன கி³லானானம் பி⁴க்கூ²னம் ஜதூஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஜதூனி பே⁴ஸஜ்ஜானி – ஹிங்கு³ம், ஹிங்கு³ஜதும், ஹிங்கு³ஸிபாடிகம், தகம், தகபத்திம், தகபண்ணிம், ஸஜ்ஜுலஸம், யானி வா பனஞ்ஞானிபி அத்தி² ஜதூனி பே⁴ஸஜ்ஜானி, நேவ கா²த³னீயே கா²த³னீயத்த²ம் ப²ரந்தி…பே….

தேன கோ² பன ஸமயேன கி³லானானம் பி⁴க்கூ²னம் லோணேஹி பே⁴ஸஜ்ஜேஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, லோணானி பே⁴ஸஜ்ஜானி – ஸாமுத்³த³ம், காளலோணம், ஸிந்த⁴வம், உப்³பி⁴த³ம் [உப்³பி⁴ரம் (க.)], பி³லம் [பி³ளாலம் (ஸீ.)], யானி வா பனஞ்ஞானிபி அத்தி² லோணானி பே⁴ஸஜ்ஜானி, நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தி, தானி – படிக்³க³ஹேத்வா யாவஜீவம் பரிஹரிதும்; ஸதி பச்சயே பரிபு⁴ஞ்ஜிதும். அஸதி பச்சயே பரிபு⁴ஞ்ஜந்தஸ்ஸ ஆபத்தி து³க்கடஸ்ஸாதி.

264. தேன கோ² பன ஸமயேன ஆயஸ்மதோ ஆனந்த³ஸ்ஸ உபஜ்ஜா²யஸ்ஸ ஆயஸ்மதோ பே³லட்ட²ஸீஸஸ்ஸ து²ல்லகச்சா²பா³தோ⁴ ஹோதி. தஸ்ஸ லஸிகாய சீவரானி காயே லக்³க³ந்தி, தானி பி⁴க்கூ² உத³கேன தேமேத்வா தேமேத்வா அபகட்³ட⁴ந்தி. அத்³த³ஸா கோ² ப⁴க³வா ஸேனாஸனசாரிகம் ஆஹிண்ட³ந்தோ தே பி⁴க்கூ² தானி சீவரானி உத³கேன தேமேத்வா தேமேத்வா அபகட்³ட⁴ந்தே, தி³ஸ்வான யேன தே பி⁴க்கூ² தேனுபஸங்கமி, உபஸங்கமித்வா தே பி⁴க்கூ² ஏதத³வோச – ‘‘கிம் இமஸ்ஸ, பி⁴க்க²வே, பி⁴க்கு²னோ ஆபா³தோ⁴’’தி? ‘‘இமஸ்ஸ, ப⁴ந்தே, ஆயஸ்மதோ து²ல்லகச்சா²பா³தோ⁴, லஸிகாய சீவரானி காயே லக்³க³ந்தி, தானி மயம் உத³கேன தேமேத்வா தேமேத்வா அபகட்³டா⁴மா’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, யஸ்ஸ கண்டு³ வா, பிளகா வா, அஸ்ஸாவோ வா, து²ல்லகச்சு² வா ஆபா³தோ⁴, காயோ வா து³க்³க³ந்தோ⁴, சுண்ணானி பே⁴ஸஜ்ஜானி; அகி³லானஸ்ஸ ச²கணம் மத்திகம் ரஜனனிப்பக்கம். அனுஜானாமி, பி⁴க்க²வே, உது³க்க²லம் முஸல’’ந்தி.

தேன கோ² பன ஸமயேன கி³லானானம் பி⁴க்கூ²னம் சுண்ணேஹி பே⁴ஸஜ்ஜேஹி சாலிதேஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, சுண்ணசாலினிந்தி. ஸண்ஹேஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, து³ஸ்ஸசாலினிந்தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ அமனுஸ்ஸிகாபா³தோ⁴ ஹோதி. தம் ஆசரியுபஜ்ஜா²யா உபட்ட²ஹந்தா நாஸக்கி²ம்ஸு அரோக³ம் காதும். ஸோ ஸூகரஸூனம் க³ந்த்வா ஆமகமம்ஸம் கா²தி³, ஆமகலோஹிதம் பிவி. தஸ்ஸ ஸோ அமனுஸ்ஸிகாபா³தோ⁴ படிப்பஸ்ஸம்பி⁴. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அமனுஸ்ஸிகாபா³தே⁴ ஆமகமம்ஸம் ஆமகலோஹிதந்தி.

265. தேன கோ² பன ஸமயேன அஞ்ஞதரஸ்ஸ பி⁴க்கு²னோ சக்கு²ரோகா³பா³தோ⁴ ஹோதி. தம் பி⁴க்கூ² பரிக்³க³ஹேத்வா உச்சாரம்பி பஸ்ஸாவம்பி நிக்கா²மேந்தி. அத்³த³ஸா கோ² ப⁴க³வா ஸேனாஸனசாரிகம் ஆஹிண்ட³ந்தோ தே பி⁴க்கூ² தம் பி⁴க்கு²ம் பரிக்³க³ஹேத்வா உச்சாரம்பி பஸ்ஸாவம்பி நிக்கா²மேந்தே, தி³ஸ்வான யேன தே பி⁴க்கூ² தேனுபஸங்கமி, உபஸங்கமித்வா தே பி⁴க்கூ² ஏதத³வோச – ‘‘கிம் இமஸ்ஸ, பி⁴க்க²வே, பி⁴க்கு²னோ ஆபா³தோ⁴’’தி? ‘‘இமஸ்ஸ, ப⁴ந்தே, ஆயஸ்மதோ சக்கு²ரோகா³பா³தோ⁴. இமம் மயம் பரிக்³க³ஹேத்வா உச்சாரம்பி பஸ்ஸாவம்பி நிக்கா²மேமா’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, அஞ்ஜனம் – காளஞ்ஜனம், ரஸஞ்ஜனம், ஸோதஞ்ஜனம், கே³ருகம், கபல்ல’’ந்தி. அஞ்ஜனூபபிஸனேஹி அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, சந்த³னம், தக³ரம், காளானுஸாரியம், தாலீஸம், ப⁴த்³த³முத்தகந்தி. தேன கோ² பன ஸமயேன பி⁴க்கூ² பிட்டா²னி அஞ்ஜனானி சருகேஸுபி [தா²லகேஸுபி (ஸீ. ஸ்யா.)] ஸராவகேஸுபி நிக்கி²பந்தி; திணசுண்ணேஹிபி பம்ஸுகேஹிபி ஓகிரியந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அஞ்ஜனிந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசா அஞ்ஜனியோ தா⁴ரேந்தி – ஸோவண்ணமயம், ரூபியமயம். மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘ஸேய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, உச்சாவசா அஞ்ஜனீ தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயம், த³ந்தமயம், விஸாணமயம், நளமயம், வேளுமயம், கட்ட²மயம், ஜதுமயம், ப²லமயம், லோஹமயம், ஸங்க²னாபி⁴மயந்தி.

தேன கோ² பன ஸமயேன அஞ்ஜனியோ அபாருதா ஹோந்தி, திணசுண்ணேஹிபி பம்ஸுகேஹிபி ஓகிரியந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அபிதா⁴னந்தி. அபிதா⁴னம் நிபததி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸுத்தகேன ப³ந்தி⁴த்வா அஞ்ஜனியா ப³ந்தி⁴துந்தி. அஞ்ஜனீ ப²லதி [நிபததி (க.)]. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸுத்தகேன ஸிப்³பே³துந்தி.

தேன கோ² பன ஸமயேன பி⁴க்கூ² அங்கு³லியா அஞ்ஜந்தி, அக்கீ²னி து³க்கா²னி ஹோந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அஞ்ஜனிஸலாகந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசா அஞ்ஜனிஸலாகாயோ தா⁴ரேந்தி – ஸோவண்ணமயம் ரூபியமயம். மனுஸ்ஸா உஜ்ஜா²யந்தி கி²ய்யந்தி விபாசேந்தி, ‘‘ஸேய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, உச்சாவசா அஞ்ஜனிஸலாகா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயம்…பே… ஸங்க²னாபி⁴மயந்தி.

தேன கோ² பன ஸமயேன அஞ்ஜனிஸலாகா பூ⁴மியம் பதிதா ப²ருஸா ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸலாகடா²னியந்தி [ஸலாகோதா⁴னியந்தி (ஸீ. ஸ்யா.)].

தேன கோ² பன ஸமயேன பி⁴க்கூ² அஞ்ஜனிம்பி அஞ்ஜனிஸலாகம்பி ஹத்தே²ன பரிஹரந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அஞ்ஜனித்த²விகந்தி. அம்ஸப³த்³த⁴கோ ந ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அம்ஸப³த்³த⁴கம் ப³ந்த⁴னஸுத்தகந்தி.

266. தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ ஸீஸாபி⁴தாபோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, முத்³த⁴னி தேலகந்தி. நக்க²மனியோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, நத்து²கம்மந்தி. நத்து² க³லதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, நத்து²கரணிந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசா நத்து²கரணியோ தா⁴ரேந்தி – ஸோவண்ணமயம் ரூபியமயம். மனுஸ்ஸா உஜ்ஜா²யந்தி கி²ய்யந்தி விபாசேந்தி, ‘‘ஸேய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, உச்சாவசா நத்து²கரணீ தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயம்…பே… ஸங்க²னாபி⁴மயந்தி. நத்து²ம் விஸமம் ஆஸிஞ்சந்தி [நத்து² விஸமம் ஆஸிஞ்சியதி (ஸீ. ஸ்யா.)]. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, யமகனத்து²கரணிந்தி. நக்க²மனியோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தூ⁴மம் பாதுந்தி. தஞ்ஞேவ வட்டிம் ஆலிம்பேத்வா பிவந்தி, கண்டோ² த³ஹதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தூ⁴மனேத்தந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசானி தூ⁴மனேத்தானி தா⁴ரேந்தி – ஸோவண்ணமயம் ரூபியமயம். மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, உச்சாவசானி தூ⁴மனேத்தானி தா⁴ரேதப்³பா³னி. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயம்…பே… ஸங்க²னாபி⁴மயந்தி.

தேன கோ² பன ஸமயேன தூ⁴மனேத்தானி அபாருதானி ஹோந்தி, பாணகா பவிஸந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அபிதா⁴னந்தி.

தேன கோ² பன ஸமயேன பி⁴க்கூ² தூ⁴மனேத்தானி ஹத்தே²ன பரிஹரந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தூ⁴மனேத்தத²விகந்தி. ஏகதோ க⁴ம்ஸியந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, யமகத²விகந்தி. அம்ஸப³த்³த⁴கோ ந ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அம்ஸப³த்³த⁴கம் ப³ந்த⁴னஸுத்தகந்தி.

267. தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ வாதாபா³தோ⁴ ஹோதி. வேஜ்ஜா ஏவமாஹம்ஸு – ‘‘தேலம் பசிதப்³ப³’’ந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தேலபாகந்தி. தஸ்மிம் கோ² பன தேலபாகே மஜ்ஜம் பக்கி²பிதப்³ப³ம் ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தேலபாகே மஜ்ஜம் பக்கி²பிதுந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² அதிபக்கி²த்தமஜ்ஜானி [அதிகி²த்தமஜ்ஜானி (க.)] தேலானி பசந்தி, தானி பிவித்வா மஜ்ஜந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, அதிபக்கி²த்தமஜ்ஜம் தேலம் பாதப்³ப³ம். யோ பிவேய்ய, யதா²த⁴ம்மோ காரேதப்³போ³. அனுஜானாமி, பி⁴க்க²வே, யஸ்மிம் தேலபாகே மஜ்ஜஸ்ஸ ந வண்ணோ ந க³ந்தோ⁴ ந ரஸோ பஞ்ஞாயதி, ஏவரூபம் மஜ்ஜபக்கி²த்தம் தேலம் பாதுந்தி.

தேன கோ² பன ஸமயேன பி⁴க்கூ²னம் ப³ஹும் அதிபக்கி²த்தமஜ்ஜம் தேலம் பக்கம் ஹோதி. அத² கோ² பி⁴க்கூ²னம் ஏதத³ஹோஸி – ‘‘கத²ம் நு கோ² அதிபக்கி²த்தமஜ்ஜே தேலே படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அப்³ப⁴ஞ்ஜனம் அதி⁴ட்டா²துந்தி.

தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ ப³ஹுதரம் தேலம் பக்கம் ஹோதி, தேலபா⁴ஜனம் ந விஜ்ஜதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தீணி தும்பா³னி – லோஹதும்ப³ம், கட்ட²தும்ப³ம், ப²லதும்ப³ந்தி.

தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ அங்க³வாதோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸேத³கம்மந்தி. நக்க²மனியோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸம்பா⁴ரஸேத³ந்தி. நக்க²மனியோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, மஹாஸேத³ந்தி. நக்க²மனியோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ப⁴ங்கோ³த³கந்தி. நக்க²மனியோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, உத³ககோட்ட²கந்தி.

தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ பப்³ப³வாதோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, லோஹிதம் மோசேதுந்தி. நக்க²மனியோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, லோஹிதம் மோசேத்வா விஸாணேன கா³ஹேதுந்தி [க³ஹேதுந்தி (ஸீ. ஸ்யா.)].

தேன கோ² பன ஸமயேன ஆயஸ்மதோ பிலிந்த³வச்ச²ஸ்ஸ பாதா³ ப²லிதா [பா²லிதா (க.)] ஹோந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பாத³ப்³ப⁴ஞ்ஜனந்தி. நக்க²மனியோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பஜ்ஜம் அபி⁴ஸங்க²ரிதுந்தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ க³ண்டா³பா³தோ⁴ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸத்த²கம்மந்தி. கஸாவோத³கேன அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கஸாவோத³கந்தி. திலகக்கேன அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, திலகக்கந்தி. கப³ளிகாய அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கப³ளிகந்தி. வணப³ந்த⁴னசோளேன அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, வணப³ந்த⁴னசோளந்தி. வணோ கண்டு³வதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸாஸபகுட்டேன [ஸாஸபகுட்³டே³ன (ஸீ. ஸ்யா.)] போ²ஸிதுந்தி. வணோ கிலிஜ்ஜித்த². ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தூ⁴மம் காதுந்தி. வட்³ட⁴மம்ஸம் வுட்டா²தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, லோணஸக்க²ரிகாய சி²ந்தி³துந்தி. வணோ ந ருஹதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, வணதேலந்தி. தேலம் க³லதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, விகாஸிகம் ஸப்³ப³ம் வணபடிகம்மந்தி.

268. தேன கோ² பன ஸமயேன அஞ்ஞதரோ பி⁴க்கு² அஹினா த³ட்டோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, சத்தாரி மஹாவிகடானி தா³தும் – கூ³த²ம், முத்தம், சா²ரிகம், மத்திகந்தி. அத² கோ² பி⁴க்கூ²னம் ஏதத³ஹோஸி – ‘‘அப்படிக்³க³ஹிதானி நு கோ² உதா³ஹு படிக்³க³ஹேதப்³பா³னீ’’தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸதி கப்பியகாரகே படிக்³க³ஹாபேதும், அஸதி கப்பியகாரகே ஸாமம் க³ஹேத்வா பரிபு⁴ஞ்ஜிதுந்தி.

தேன கோ² பன ஸமயேன அஞ்ஞதரேன பி⁴க்கு²னா விஸம் பீதம் ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி பி⁴க்க²வே கூ³த²ம் பாயேதுந்தி. அத² கோ² பி⁴க்கூ²னம் ஏதத³ஹோஸி – ‘‘அப்படிக்³க³ஹிதம் நு கோ² உதா³ஹு படிக்³க³ஹேதப்³போ³’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, யம் கரோந்தோ படிக்³க³ண்ஹாதி, ஸ்வேவ படிக்³க³ஹோ கதோ, ந புன [கதோ பன (?)] படிக்³க³ஹேதப்³போ³தி.

269. தேன கோ² பன ஸமயேன அஞ்ஞதரஸ்ஸ பி⁴க்கு²னோ க⁴ரதி³ன்னகாபா³தோ⁴ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸீதாலோளிம் பாயேதுந்தி.

தேன கோ² பன ஸமயேன அஞ்ஞதரோ பி⁴க்கு² து³ட்ட²க³ஹணிகோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஆமிஸகா²ரம் பாயேதுந்தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ பண்டு³ரோகா³பா³தோ⁴ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, முத்தஹரீதகம் பாயேதுந்தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ ச²விதோ³ஸாபா³தோ⁴ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, க³ந்தா⁴லேபம் காதுந்தி.

தேன கோ² பன ஸமயேன அஞ்ஞதரோ பி⁴க்கு² அபி⁴ஸன்னகாயோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, விரேசனம் பாதுந்தி. அச்ச²கஞ்ஜியா அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அச்ச²கஞ்ஜிந்தி. அகடயூஸேன அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அகடயூஸந்தி. கடாகடேன அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கடாகடந்தி. படிச்சா²த³னீயேன அத்தோ² ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, படிச்சா²த³னீயந்தி.

மூலாதி³பே⁴ஸஜ்ஜகதா² நிட்டி²தா.