155. ஸப்³ப³சம்மபடிக்கே²போ

255. தேன கோ² பன ஸமயேன ச²ப்³ப³க்³கி³யா பி⁴க்கூ² – ப⁴க³வதா உச்சாஸயனமஹாஸயனானி படிக்கி²த்தானீதி – மஹாசம்மானி தா⁴ரேந்தி, ஸீஹசம்மம் ப்³யக்³க⁴சம்மம் தீ³பிசம்மம். தானி மஞ்சப்பமாணேனபி சி²ன்னானி ஹோந்தி, பீட²ப்பமாணேனபி சி²ன்னானி ஹோந்தி, அந்தோபி மஞ்சே பஞ்ஞத்தானி ஹோந்தி, ப³ஹிபி மஞ்சே பஞ்ஞத்தானி ஹோந்தி, அந்தோபி பீடே² பஞ்ஞத்தானி ஹோந்தி, ப³ஹிபி பீடே² பஞ்ஞத்தானி ஹோந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ‘‘ஸேய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, மஹாசம்மானி தா⁴ரேதப்³பா³னி, ஸீஹசம்மம் ப்³யக்³க⁴சம்மம் தீ³பிசம்மம். யோ தா⁴ரேய்ய, ஆபத்தி து³க்கடஸ்ஸாதி.

தேன கோ² பன ஸமயேன ச²ப்³ப³க்³கி³யா பி⁴க்கூ² – ப⁴க³வதா மஹாசம்மானி படிக்கி²த்தானீதி – கோ³சம்மானி தா⁴ரேந்தி. தானி மஞ்சப்பமாணேனபி சி²ன்னானி ஹோந்தி, பீட²ப்பமாணேனபி சி²ன்னானி ஹோந்தி, அந்தோபி மஞ்சே பஞ்ஞத்தானி ஹோந்தி, ப³ஹிபி மஞ்சே பஞ்ஞத்தானி ஹோந்தி, அந்தோபி பீடே² பஞ்ஞத்தானி ஹோந்தி, ப³ஹிபி பீடே² பஞ்ஞத்தானி ஹோந்தி. அஞ்ஞதரோபி பாபபி⁴க்கு² அஞ்ஞதரஸ்ஸ பாபுபாஸகஸ்ஸ குலூபகோ ஹோதி. அத² கோ² ஸோ பாபபி⁴க்கு² புப்³ப³ண்ஹஸமயம் நிவாஸேத்வா பத்தசீவரமாதா³ய யேன தஸ்ஸ பாபுபாஸகஸ்ஸ நிவேஸனம் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³. அத² கோ² ஸோ பாபுபாஸகோ யேன ஸோ பாபபி⁴க்கு² தேனுபஸங்கமி, உபஸங்கமித்வா தம் பாபபி⁴க்கு²ம் அபி⁴வாதே³த்வா ஏகமந்தம் நிஸீதி³. தேன கோ² பன ஸமயேன தஸ்ஸ பாபுபாஸகஸ்ஸ வச்ச²கோ ஹோதி தருணகோ அபி⁴ரூபோ த³ஸ்ஸனீயோ பாஸாதி³கோ சித்ரோ, ஸேய்யதா²பி தீ³பிச்சா²போ. அத² கோ² ஸோ பாபபி⁴க்கு² தம் வச்ச²கம் ஸக்கச்சம் உபனிஜ்ஜா²யதி. அத² கோ² ஸோ பாபுபாஸகோ தம் பாபபி⁴க்கு²ம் ஏதத³வோச – ‘‘கிஸ்ஸ, ப⁴ந்தே, அய்யோ இமம் வச்ச²கம் ஸக்கச்சம் உபனிஜ்ஜா²யதீ’’தி? ‘‘அத்தோ² மே, ஆவுஸோ, இமஸ்ஸ வச்ச²கஸ்ஸ சம்மேனா’’தி. அத² கோ² ஸோ பாபுபாஸகோ தம் வச்ச²கம் வதி⁴த்வா சம்மம் விது⁴னித்வா தஸ்ஸ பாபபி⁴க்கு²னோ பாதா³ஸி. அத² கோ² ஸோ பாபபி⁴க்கு² தம் சம்மம் ஸங்கா⁴டியா படிச்சா²தே³த்வா அக³மாஸி. அத² கோ² ஸா கா³வீ வச்ச²கி³த்³தி⁴னீ தம் பாபபி⁴க்கு²ம் பிட்டி²தோ பிட்டி²தோ அனுப³ந்தி⁴. பி⁴க்கூ² ஏவமாஹம்ஸு – ‘‘கிஸ்ஸ த்யாயம், ஆவுஸோ, கா³வீ பிட்டி²தோ பிட்டி²தோ அனுப³ந்தீ⁴’’தி? ‘‘அஹம்பி கோ², ஆவுஸோ, ந ஜானாமி கேன [கேனசி (க.)] ம்யாயம் கா³வீ பிட்டி²தோ பிட்டி²தோ அனுப³ந்தீ⁴’’தி. தேன கோ² பன ஸமயேன தஸ்ஸ பாபபி⁴க்கு²னோ ஸங்கா⁴டி லோஹிதேன மக்கி²தா ஹோதி. பி⁴க்கூ² ஏவமாஹம்ஸு – ‘‘அயம் பன தே, ஆவுஸோ, ஸங்கா⁴டி கிம் கதா’’தி? அத² கோ² ஸோ பாபபி⁴க்கு² பி⁴க்கூ²னம் ஏதமத்த²ம் ஆரோசேஸி. ‘‘கிம் பன த்வம், ஆவுஸோ, பாணாதிபாதே ஸமாத³பேஸீ’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா² தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு² பாணாதிபாதே ஸமாத³பேஸ்ஸதி, நனு ப⁴க³வதா அனேகபரியாயேன பாணாதிபாதோ க³ரஹிதோ, பாணாதிபாதா வேரமணீ பஸத்தா²’’தி. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்.

அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா தம் பாபபி⁴க்கு²ம் படிபுச்சி² – ‘‘ஸச்சம் கிர த்வம், பி⁴க்கு², பாணாதிபாதே ஸமாத³பேஸீ’’தி? ஸச்சம் ப⁴க³வாதி…பே… கத²ஞ்ஹி நாம த்வம், மோக⁴புரிஸ, பாணாதிபாதே ஸமாத³பேஸ்ஸஸி, நனு மயா, மோக⁴புரிஸ, அனேகபரியாயேன பாணாதிபாதோ க³ரஹிதோ, பாணாதிபாதா வேரமணீ பஸத்தா². நேதம், மோக⁴புரிஸ, அப்பஸன்னானம் வா பஸாதா³ய…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, பாணாதிபாதே ஸமாத³பேதப்³ப³ம். யோ ஸமாத³பேய்ய, யதா²த⁴ம்மோ காரேதப்³போ³. ந, பி⁴க்க²வே, கோ³சம்மம் தா⁴ரேதப்³ப³ம். யோ தா⁴ரேய்ய, ஆபத்தி து³க்கடஸ்ஸ. ந ச, பி⁴க்க²வே, கிஞ்சி சம்மம் தா⁴ரேதப்³ப³ம். யோ தா⁴ரேய்ய, ஆபத்தி து³க்கடஸ்ஸா’’தி.

ஸப்³ப³சம்மபடிக்கே²போ நிட்டி²தோ.