156. கி³ஹிவிகதானுஞ்ஞாதாதி³

256. தேன கோ² பன ஸமயேன மனுஸ்ஸானம் மஞ்சம்பி பீட²ம்பி சம்மோனத்³தா⁴னி ஹோந்தி, சம்மவினத்³தா⁴னி. பி⁴க்கூ² குக்குச்சாயந்தா நாபி⁴னிஸீத³ந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கி³ஹிவிகதம் அபி⁴னிஸீதி³தும், ந த்வேவ அபி⁴னிபஜ்ஜிதுந்தி.

தேன கோ² பன ஸமயேன விஹாரா சம்மவத்³தே⁴ஹி ஓகு³ம்பி²யந்தி [ஓகு³ம்பி⁴யந்தி (க.)]. பி⁴க்கூ² குக்குச்சாயந்தா நாபி⁴னிஸீத³ந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ப³ந்த⁴னமத்தம் அபி⁴னிஸீதி³துந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² ஸஉபாஹனா கா³மம் பவிஸந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘ஸேய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஸஉபாஹனேன கா³மோ பவிஸிதப்³போ³. யோ பவிஸேய்ய, ஆபத்தி து³க்கடஸ்ஸாதி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி, ந ஸக்கோதி வினா உபாஹனேன கா³மம் பவிஸிதும். ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கி³லானேன பி⁴க்கு²னா ஸஉபாஹனேன கா³மம் பவிஸிதுந்தி.

கி³ஹிவிகதானுஞ்ஞாதாதி³ நிட்டி²தா.