154. உச்சாஸயனமஹாஸயனபடிக்கே²போ

254. தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாஸயனமஹாஸயனானி தா⁴ரேந்தி, ஸேய்யதி²த³ம் – ஆஸந்தி³ம், பல்லங்கம், கோ³னகம், சித்தகம், படிகம், படலிகம், தூலிகம், விகதிகம், உத்³த⁴லோமிம் [உந்த³லோமிம் (க.), உத்³த³லோமிம் (க.)], ஏகந்தலோமிம், கட்டிஸ்ஸம், கோஸேய்யம், குத்தகம், ஹத்த²த்த²ரம், அஸ்ஸத்த²ரம், ரத²த்த²ரம், அஜினபவேணிம், கத³லிமிக³பவரபச்சத்த²ரணம், ஸஉத்தரச்ச²த³ம், உப⁴தோலோஹிதகூபதா⁴னந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ‘‘ஸேய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, உச்சாஸயனமஹாஸயனானி தா⁴ரேதப்³பா³னி, ஸேய்யதி²த³ம் – ஆஸந்தி³, பல்லங்கோ, கோ³னகோ, சித்தகோ, படிகா, படலிகா, தூலிகா, விகதிகா, உத்³த⁴லோமி, ஏகந்தலோமி, கட்டிஸ்ஸம், கோஸேய்யம், குத்தகம், ஹத்த²த்த²ரம், அஸ்ஸத்த²ரம், ரத²த்த²ரம், அஜினபவேணி, கத³லிமிக³பவரபச்சத்த²ரணம், ஸஉத்தரச்ச²த³ம், உப⁴தோலோஹிதகூபதா⁴னம். யோ தா⁴ரேய்ய, ஆபத்தி து³க்கடஸ்ஸாதி.

உச்சாஸயனமஹாஸயனபடிக்கே²போ நிட்டி²தோ.