153. யானாதி³படிக்கே²போ

253. தேன கோ² பன ஸமயேன ச²ப்³ப³க்³கி³யா பி⁴க்கூ² யானேன யாயந்தி, இத்தி²யுத்தேனபி புரிஸந்தரேன, புரிஸயுத்தேனபி இத்த²ந்தரேன. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘ஸேய்யதா²பி க³ங்கா³மஹியாயா’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, யானேன யாயிதப்³ப³ம். யோ யாயேய்ய, ஆபத்தி து³க்கடஸ்ஸாதி. தேன கோ² பன ஸமயேன அஞ்ஞதரோ பி⁴க்கு² கோஸலேஸு ஜனபதே³ ஸாவத்தி²ம் க³ச்ச²ந்தோ ப⁴க³வந்தம் த³ஸ்ஸனாய அந்தராமக்³கே³ கி³லானோ ஹோதி. அத² கோ² ஸோ பி⁴க்கு² மக்³கா³ ஓக்கம்ம அஞ்ஞதரஸ்மிம் ருக்க²மூலே நிஸீதி³. மனுஸ்ஸா தம் பி⁴க்கு²ம் தி³ஸ்வா ஏதத³வோசும் – ‘‘கஹம், ப⁴ந்தே, அய்யோ க³மிஸ்ஸதீ’’தி? ‘‘ஸாவத்தி²ம் கோ² அஹம், ஆவுஸோ, க³மிஸ்ஸாமி ப⁴க³வந்தம் த³ஸ்ஸனாயா’’தி. ‘‘ஏஹி, ப⁴ந்தே, க³மிஸ்ஸாமா’’தி. ‘‘நாஹம், ஆவுஸோ, ஸக்கோமி, கி³லானோம்ஹீ’’தி. ‘‘ஏஹி, ப⁴ந்தே, யானம் அபி⁴ருஹா’’தி. ‘‘அலம், ஆவுஸோ, படிக்கி²த்தம் ப⁴க³வதா யான’’ந்தி குக்குச்சாயந்தோ யானம் நாபி⁴ருஹி. அத² கோ² ஸோ பி⁴க்கு² ஸாவத்தி²ம் க³ந்த்வா பி⁴க்கூ²னம் ஏதமத்த²ம் ஆரோசேஸி. பி⁴க்கூ² ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கி³லானஸ்ஸ யானந்தி. அத² கோ² பி⁴க்கூ²னம் ஏதத³ஹோஸி – ‘‘இத்தி²யுத்தம் நு கோ² புரிஸயுத்தம் நு கோ²’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, புரிஸயுத்தம் ஹத்த²வட்டகந்தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ யானுக்³கா⁴தேன பா³ள்ஹதரம் அபா²ஸு அஹோஸி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸிவிகம் பாடங்கிந்தி.

யானாதி³படிக்கே²போ நிட்டி²தோ.