152. கட்ட²பாது³காதி³படிக்கே²போ

250. தேன கோ² பன ஸமயேன ச²ப்³ப³க்³கி³யா பி⁴க்கூ² ரத்தியா பச்சூஸஸமயம் பச்சுட்டா²ய கட்ட²பாது³காயோ அபி⁴ருஹித்வா அஜ்ஜோ²காஸே சங்கமந்தி, உச்சாஸத்³தா³ மஹாஸத்³தா³ க²டக²டஸத்³தா³, அனேகவிஹிதம் திரச்சா²னகத²ம் கதே²ந்தா, ஸேய்யதி²த³ம் [இமா திரச்சா²னகதா²யோ பாசி. 508; தீ³. நி. 1.7; ம. நி. 2.223; ஸம். நி. 5.1080; அ. நி. 10.69 ஆத³யோ] – ராஜகத²ம், சோரகத²ம், மஹாமத்தகத²ம், ஸேனாகத²ம், ப⁴யகத²ம், யுத்³த⁴கத²ம், அன்னகத²ம், பானகத²ம், வத்த²கத²ம், ஸயனகத²ம், மாலாகத²ம், க³ந்த⁴கத²ம், ஞாதிகத²ம், யானகத²ம், கா³மகத²ம், நிக³மகத²ம், நக³ரகத²ம், ஜனபத³கத²ம், இத்தி²கத²ம் [இத்தி²கத²ம் புரிஸகத²ம் (க.)], ஸூரகத²ம், விஸிகா²கத²ம், கும்ப⁴ட்டா²னகத²ம், புப்³ப³பேதகத²ம், நானத்தகத²ம், லோகக்கா²யிகம், ஸமுத்³த³க்கா²யிகம், இதிப⁴வாப⁴வகத²ம் இதி வா; கீடகம்பி அக்கமித்வா மாரேந்தி, பி⁴க்கூ²பி ஸமாதி⁴ம்ஹா சாவேந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ரத்தியா பச்சூஸஸமயம் பச்சுட்டா²ய கட்ட²பாது³காயோ அபி⁴ருஹித்வா அஜ்ஜோ²காஸே சங்கமிஸ்ஸந்தி, உச்சாஸத்³தா³ மஹாஸத்³தா³ க²டக²டஸத்³தா³ அனேகவிஹிதம் திரச்சா²னகத²ம் கதே²ந்தா, ஸேய்யதி²த³ம் – ராஜகத²ம், சோரகத²ம்…பே… இதிப⁴வாப⁴வகத²ம் இதி வா, கீடகம்பி அக்கமித்வா மாரேஸ்ஸந்தி, பி⁴க்கூ²பி ஸமாதி⁴ம்ஹா சாவேஸ்ஸந்தீ’’தி. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கூ² ரத்தியா பச்சூஸஸமயம் பச்சுட்டா²ய கட்ட²பாது³காயோ அபி⁴ருஹித்வா அஜ்ஜோ²காஸே சங்கமந்தி, உச்சாஸத்³தா³ மஹாஸத்³தா³ க²டக²டஸத்³தா³, அனேகவிஹிதம் திரச்சா²னகத²ம் கதே²ந்தா, ஸேய்யதி²த³ம், – ராஜகத²ம், சோரகத²ம்…பே… இதிப⁴வாப⁴வகத²ம் இதி வா, கீடகம்பி அக்கமித்வா மாரேந்தி, பி⁴க்கூ²பி ஸமாதி⁴ம்ஹா சாவேந்தீ’’தி? ‘‘ஸச்சம், ப⁴க³வா’’தி…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, கட்ட²பாது³கா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸா’’தி.

அத² கோ² ப⁴க³வா ராஜக³ஹே யதா²பி⁴ரந்தம் விஹரித்வா யேன பா³ராணஸீ தேன சாரிகம் பக்காமி. அனுபுப்³பே³ன சாரிகம் சரமானோ யேன பா³ராணஸீ தத³வஸரி. தத்ர ஸுத³ம் ப⁴க³வா பா³ராணஸியம் விஹரதி இஸிபதனே மிக³தா³யே. தேன கோ² பன ஸமயேன ச²ப்³ப³க்³கி³யா பி⁴க்கூ² – ப⁴க³வதா கட்ட²பாது³கா படிக்கி²த்தாதி – தாலதருணே சே²தா³பேத்வா தாலபத்தபாது³காயோ தா⁴ரேந்தி; தானி தாலதருணானி சி²ன்னானி மிலாயந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா தாலதருணே சே²தா³பேத்வா தாலபத்தபாது³காயோ தா⁴ரேஸ்ஸந்தி; தானி தாலதருணானி சி²ன்னானி மிலாயந்தி; ஏகிந்த்³ரியம் ஸமணா ஸக்யபுத்தியா ஜீவம் விஹேடே²ந்தீ’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கூ² தாலதருணே சே²தா³பேத்வா தாலபத்தபாது³காயோ தா⁴ரேந்தி; தானி தாலதருணானி சி²ன்னானி மிலாயந்தீ’’தி? ஸச்சம் ப⁴க³வாதி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா தாலதருணே சே²தா³பேத்வா தாலபத்தபாது³காயோ தா⁴ரேஸ்ஸந்தி; தானி தாலதருணானி சி²ன்னானி மிலாயந்தி. ஜீவஸஞ்ஞினோ ஹி, பி⁴க்க²வே, மனுஸ்ஸா ருக்க²ஸ்மிம். நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, தாலபத்தபாது³கா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² ‘ப⁴க³வதா தாலபத்தபாது³கா படிக்கி²த்தா’தி வேளுதருணே சே²தா³பேத்வா வேளுபத்தபாது³காயோ தா⁴ரேந்தி. தானி வேளுதருணானி சி²ன்னானி மிலாயந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா வேளுதருணே சே²தா³பேத்வா வேளுபத்தபாது³காயோ தா⁴ரேஸ்ஸந்தி. தானி வேளுதருணானி சி²ன்னானி மிலாயந்தி. ஏகிந்த்³ரியம் ஸமணா ஸக்யபுத்தியா ஜீவம் விஹேடே²ந்தீ’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ஜீவஸஞ்ஞினோ ஹி, பி⁴க்க²வே, மனுஸ்ஸா ருக்க²ஸ்மிம்…பே… ந, பி⁴க்க²வே, வேளுபத்தபாது³கா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸாதி.

251. அத² கோ² ப⁴க³வா பா³ராணஸியம் யதா²பி⁴ரந்தம் விஹரித்வா யேன ப⁴த்³தி³யம் தேன சாரிகம் பக்காமி. அனுபுப்³பே³ன சாரிகம் சரமானோ யேன ப⁴த்³தி³யம் தத³வஸரி. தத்ர ஸுத³ம் ப⁴க³வா ப⁴த்³தி³யே விஹரதி ஜாதியா வனே. தேன கோ² பன ஸமயேன ப⁴த்³தி³யா பி⁴க்கூ² அனேகவிஹிதம் பாது³கமண்ட³னானுயோக³மனுயுத்தா விஹரந்தி, திணபாது³கம் கரோந்திபி காராபேந்திபி, முஞ்ஜபாது³கம் கரோந்திபி காராபேந்திபி, பப்³ப³ஜபாது³கம் கரோந்திபி காராபேந்திபி, ஹிந்தாலபாது³கம் கரோந்திபி காராபேந்திபி, கமலபாது³கம் கரோந்திபி காராபேந்திபி, கம்ப³லபாது³கம் கரோந்திபி காராபேந்திபி, ரிஞ்சந்தி உத்³தே³ஸம் பரிபுச்ச²ம் அதி⁴ஸீலம் அதி⁴சித்தம் அதி⁴பஞ்ஞம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ப⁴த்³தி³யா பி⁴க்கூ² அனேகவிஹிதம் பாது³கமண்ட³னானுயோக³மனுயுத்தா விஹரிஸ்ஸந்தி, திணபாது³கம் கரிஸ்ஸந்திபி காராபேஸ்ஸந்திபி, முஞ்ஜபாது³கம் கரிஸ்ஸந்திபி காராபேஸ்ஸந்திபி, பப்³ப³ஜபாது³கம் கரிஸ்ஸந்திபி காராபேஸ்ஸந்திபி, ஹிந்தாலபாது³கம் கரிஸ்ஸந்திபி காராபேஸ்ஸந்திபி, கமலபாது³கம் கரிஸ்ஸந்திபி காராபேஸ்ஸந்திபி, கம்ப³லபாது³கம் கரிஸ்ஸந்திபி காராபேஸ்ஸந்திபி, ரிஞ்சிஸ்ஸந்தி உத்³தே³ஸம் பரிபுச்ச²ம் அதி⁴ஸீலம் அதி⁴சித்தம் அதி⁴பஞ்ஞ’’ந்தி. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, ப⁴த்³தி³யா பி⁴க்கூ² அனேகவிஹிதம் பாது³கமண்ட³னானுயோக³மனுயுத்தா விஹரந்தி, திணபாது³கம் கரோந்திபி காராபேந்திபி…பே… ரிஞ்சந்தி உத்³தே³ஸம் பரிபுச்ச²ம் அதி⁴ஸீலம் அதி⁴சித்தம் அதி⁴பஞ்ஞ’’ந்தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம தே, பி⁴க்க²வே, மோக⁴புரிஸா அனேகவிஹிதம் பாது³கமண்ட³னானுயோக³மனுயுத்தா விஹரிஸ்ஸந்தி, திணபாது³கம் கரிஸ்ஸந்திபி காராபேஸ்ஸந்திபி…பே… ரிஞ்சிஸ்ஸந்தி உத்³தே³ஸம் பரிபுச்ச²ம் அதி⁴ஸீலம் அதி⁴சித்தம் அதி⁴பஞ்ஞம். நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, திணபாது³கா தா⁴ரேதப்³பா³, ந முஞ்ஜபாது³கா தா⁴ரேதப்³பா³, ந பப்³ப³ஜபாது³கா தா⁴ரேதப்³பா³, ந ஹிந்தாலபாது³கா தா⁴ரேதப்³பா³, ந கமலபாது³கா தா⁴ரேதப்³பா³, ந கம்ப³லபாது³கா தா⁴ரேதப்³பா³, ந ஸோவண்ணமயா பாது³கா தா⁴ரேதப்³பா³, ந ரூபியமயா பாது³கா தா⁴ரேதப்³பா³, ந மணிமயா பாது³கா தா⁴ரேதப்³பா³, ந வேளுரியமயா பாது³கா தா⁴ரேதப்³பா³, ந ப²லிகமயா பாது³கா தா⁴ரேதப்³பா³, ந கம்ஸமயா பாது³கா தா⁴ரேதப்³பா³, ந காசமயா பாது³கா தா⁴ரேதப்³பா³, ந திபுமயா பாது³கா தா⁴ரேதப்³பா³, ந ஸீஸமயா பாது³கா தா⁴ரேதப்³பா³, ந தம்ப³லோஹமயா பாது³கா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸ. ந ச, பி⁴க்க²வே, காசி ஸங்கமனியா பாது³கா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, திஸ்ஸோ பாது³கா து⁴வட்டா²னியா அஸங்கமனியாயோ – வச்சபாது³கம், பஸ்ஸாவபாது³கம், ஆசமனபாது³க’’ந்தி.

252. அத² கோ² ப⁴க³வா ப⁴த்³தி³யே யதா²பி⁴ரந்தம் விஹரித்வா யேன ஸாவத்தி² தேன சாரிகம் பக்காமி. அனுபுப்³பே³ன சாரிகம் சரமானோ யேன ஸாவத்தி² தத³வஸரி. தத்ர ஸுத³ம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² அசிரவதியா நதி³யா கா³வீனம் தரந்தீனம் விஸாணேஸுபி க³ண்ஹந்தி, கண்ணேஸுபி க³ண்ஹந்தி, கீ³வாயபி க³ண்ஹந்தி, சே²ப்பாபி க³ண்ஹந்தி, பிட்டி²ம்பி அபி⁴ருஹந்தி, ரத்தசித்தாபி அங்க³ஜாதம் சு²பந்தி, வச்ச²தரிம்பி ஓகா³ஹேத்வா மாரேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா கா³வீனம் தரந்தீனம் விஸாணேஸுபி க³ஹேஸ்ஸந்தி…பே… ஸேய்யதா²பி கி³ஹீ காமபோ⁴கி³னோ’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ஸச்சம் கிர, பி⁴க்க²வே,…பே… ஸச்சம் ப⁴க³வாதி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, கா³வீனம் விஸாணேஸு க³ஹேதப்³ப³ம், ந கண்ணேஸு க³ஹேதப்³ப³ம், ந கீ³வாய க³ஹேதப்³ப³ம், ந சே²ப்பாய க³ஹேதப்³ப³ம், ந பிட்டி² அபி⁴ருஹிதப்³பா³. யோ அபி⁴ருஹேய்ய, ஆபத்தி து³க்கடஸ்ஸ. ந ச, பி⁴க்க²வே, ரத்தசித்தேன அங்க³ஜாதம் சு²பிதப்³ப³ம். யோ சு²பேய்ய, ஆபத்தி து²ல்லச்சயஸ்ஸ. ந வச்ச²தரீ மாரேதப்³பா³. யோ மாரேய்ய, யதா²த⁴ம்மோ காரேதப்³போ³’’தி.

கட்ட²பாது³காதி³படிக்கே²போ நிட்டி²தோ.