151. அஜ்ஜா²ராமே உபாஹனபடிக்கே²போ

248. தேன கோ² பன ஸமயேன ப⁴க³வா அஜ்ஜோ²காஸே அனுபாஹனோ சங்கமதி. ஸத்தா² அனுபாஹனோ சங்கமதீதி, தே²ராபி பி⁴க்கூ² அனுபாஹனா சங்கமந்தி. ச²ப்³ப³க்³கி³யா பி⁴க்கூ², ஸத்த²ரி அனுபாஹனே சங்கமமானே, தே²ரேஸுபி பி⁴க்கூ²ஸு அனுபாஹனேஸு சங்கமமானேஸு, ஸஉபாஹனா சங்கமந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ², ஸத்த²ரி அனுபாஹனே சங்கமமானே, தே²ரேஸுபி பி⁴க்கூ²ஸு அனுபாஹனேஸு சங்கமமானேஸு, ஸஉபாஹனா சங்கமிஸ்ஸந்தீ’’தி. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கூ², ஸத்த²ரி அனுபாஹனே சங்கமமானே, தே²ரேஸுபி பி⁴க்கூ²ஸு அனுபாஹனேஸு சங்கமமானேஸு, ஸஉபாஹனா சங்கமந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம தே, பி⁴க்க²வே, மோக⁴புரிஸா, ஸத்த²ரி அனுபாஹனே சங்கமமானே, தே²ரேஸுபி பி⁴க்கூ²ஸு அனுபாஹனேஸு சங்கமமானேஸு, ஸஉபாஹனா சங்கமிஸ்ஸந்தி. இமே ஹி நாம, பி⁴க்க²வே, கி³ஹீ ஓதா³தவத்த²வஸனகா அபி⁴ஜீவனிகஸ்ஸ ஸிப்பஸ்ஸ காரணா ஆசரியேஸு ஸகா³ரவா ஸப்பதிஸ்ஸா ஸபா⁴க³வுத்திகா விஹரிஸ்ஸந்தி. இத⁴ கோ² தம், பி⁴க்க²வே, ஸோபே⁴த², யம் தும்ஹே ஏவம் ஸ்வாக்கா²தே த⁴ம்மவினயே பப்³ப³ஜிதா ஸமானா ஆசரியேஸு ஆசரியமத்தேஸு உபஜ்ஜா²யேஸு உபஜ்ஜா²யமத்தேஸு அகா³ரவா அப்பதிஸ்ஸா அஸபா⁴க³வுத்திகா [ஸகா³ரவா ஸக்³க³திஸ்ஸா ஸபா⁴க³வுத்திகா (க.)] விஹரேய்யாத². நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, ஆசரியேஸு ஆசரியமத்தேஸு உபஜ்ஜா²யேஸு உபஜ்ஜா²யமத்தேஸு அனுபாஹனேஸு சங்கமமானேஸு ஸஉபாஹனேன சங்கமிதப்³ப³ம். யோ சங்கமேய்ய, ஆபத்தி து³க்கடஸ்ஸ. ந ச, பி⁴க்க²வே, அஜ்ஜா²ராமே உபாஹனா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸா’’தி.

249. தேன கோ² பன ஸமயேன அஞ்ஞதரஸ்ஸ பி⁴க்கு²னோ பாத³கி²லாபா³தோ⁴ ஹோதி. தம் பி⁴க்கூ² பரிக்³க³ஹேத்வா உச்சாரம்பி பஸ்ஸாவம்பி நிக்கா²மேந்தி. அத்³த³ஸா கோ² ப⁴க³வா ஸேனாஸனசாரிகம் ஆஹிண்ட³ந்தோ தே பி⁴க்கூ² தம் பி⁴க்கு²ம் பரிக்³க³ஹேத்வா உச்சாரம்பி பஸ்ஸாவம்பி நிக்கா²மேந்தே, தி³ஸ்வான யேன தே பி⁴க்கூ² தேனுபஸங்கமி, உபஸங்கமித்வா தே பி⁴க்கூ² ஏதத³வோச – ‘‘கிம் இமஸ்ஸ, பி⁴க்க²வே, பி⁴க்கு²னோ ஆபா³தோ⁴’’தி? ‘‘இமஸ்ஸ, ப⁴ந்தே, ஆயஸ்மதோ பாத³கி²லாபா³தோ⁴; இமம் மயம் பரிக்³க³ஹேத்வா உச்சாரம்பி பஸ்ஸாவம்பி நிக்கா²மேமா’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, யஸ்ஸ பாதா³ வா து³க்கா², பாதா³ வா ப²லிதா, பாத³கி²லோ வா ஆபா³தோ⁴ [பாத³கி²லாபா³தோ⁴ வா (ஸ்யா.)] உபாஹனம் தா⁴ரேது’’ந்தி.

தேன கோ² பன ஸமயேன பி⁴க்கூ² அதோ⁴தேஹி பாதே³ஹி மஞ்சம்பி பீட²ம்பி அபி⁴ருஹந்தி; சீவரம்பி ஸேனாஸனம்பி து³ஸ்ஸதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ‘இதா³னி மஞ்சம் வா பீட²ம் வா அபி⁴ருஹிஸ்ஸாமீ’’தி உபாஹனம் தா⁴ரேதுந்தி.

தேன கோ² பன ஸமயேன பி⁴க்கூ² ரத்தியா உபோஸத²க்³க³ம்பி ஸன்னிஸஜ்ஜம்பி க³ச்ச²ந்தா அந்த⁴காரே கா²ணும்பி கண்டகம்பி அக்கமந்தி; பாதா³ து³க்கா² ஹோந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அஜ்ஜா²ராமே உபாஹனம் தா⁴ரேதும், உக்கம், பதீ³பம், கத்தரத³ண்ட³ந்தி.

அஜ்ஜா²ராமே உபாஹனபடிக்கே²போ நிட்டி²தோ.