150. ஓமுக்ககு³ணங்கு³ணூபாஹனானுஜானனா

247. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய ராஜக³ஹம் பிண்டா³ய பாவிஸி, அஞ்ஞதரேன பி⁴க்கு²னா பச்சா²ஸமணேன. அத² கோ² ஸோ பி⁴க்கு² க²ஞ்ஜமானோ ப⁴க³வந்தம் பிட்டி²தோ பிட்டி²தோ அனுப³ந்தி⁴. அத்³த³ஸா கோ² அஞ்ஞதரோ உபாஸகோ கு³ணங்கு³ணூபாஹனா ஆரோஹித்வா ப⁴க³வந்தம் தூ³ரதோவ ஆக³ச்ச²ந்தம்; தி³ஸ்வா உபாஹனா ஆரோஹித்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா யேன ஸோ பி⁴க்கு² தேனுபஸங்கமி; உபஸங்கமித்வா தம் பி⁴க்கு²ம் அபி⁴வாதே³த்வா ஏதத³வோச – ‘‘கிஸ்ஸ, ப⁴ந்தே, அய்யோ க²ஞ்ஜதீ’’தி? ‘‘பாதா³ மே, ஆவுஸோ, ப²லிதா’’தி [பா²லிதாதி (க.)]. ‘‘ஹந்த³, ப⁴ந்தே, உபாஹனாயோ’’தி. ‘‘அலம், ஆவுஸோ, படிக்கி²த்தா ப⁴க³வதா கு³ணங்கு³ணூபாஹனா’’தி. ‘‘க³ண்ஹாஹேதா, பி⁴க்கு², உபாஹனாயோ’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஓமுக்கம் கு³ணங்கு³ணூபாஹனம். ந, பி⁴க்க²வே, நவா கு³ணங்கு³ணூபாஹனா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸா’’தி.

ஓமுக்ககு³ணங்கு³ணூபாஹனானுஜானனா நிட்டி²தா.