149. ஸப்³ப³னீலிகாதி³படிக்கே²போ

246. தேன கோ² பன ஸமயேன ச²ப்³ப³க்³கி³யா பி⁴க்கூ² ஸப்³ப³னீலிகா உபாஹனாயோ தா⁴ரேந்தி…பே… ஸப்³ப³பீதிகா உபாஹனாயோ தா⁴ரேந்தி… ஸப்³ப³லோஹிதிகா உபாஹனாயோ தா⁴ரேந்தி… ஸப்³ப³மஞ்ஜிட்டி²கா [ஸப்³ப³மஞ்ஜேட்டி²கா (க.)] உபாஹனாயோ தா⁴ரேந்தி … ஸப்³ப³கண்ஹா உபாஹனாயோ தா⁴ரேந்தி… ஸப்³ப³மஹாரங்க³ரத்தா உபாஹனாயோ தா⁴ரேந்தி… ஸப்³ப³மஹானாமரத்தா உபாஹனாயோ தா⁴ரேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி, ‘‘ஸேய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஸப்³ப³னீலிகா உபாஹனா தா⁴ரேதப்³பா³…பே… ந ஸப்³ப³பீதிகா உபாஹனா தா⁴ரேதப்³பா³, ந ஸப்³ப³லோஹிதிகா உபாஹனா தா⁴ரேதப்³பா³, ந ஸப்³ப³மஞ்ஜிட்டி²கா உபாஹனா தா⁴ரேதப்³பா³, ந ஸப்³ப³கண்ஹா உபாஹனா தா⁴ரேதப்³பா³, ந ஸப்³ப³மஹாரங்க³ரத்தா உபாஹனா தா⁴ரேதப்³பா³, ந ஸப்³ப³மஹானாமரத்தா உபாஹனா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸாதி.

தேன கோ² பன ஸமயேன ச²ப்³ப³க்³கி³யா பி⁴க்கூ² நீலகவத்³தி⁴கா [வட்டிகா (ஸீ.)] உபாஹனாயோ தா⁴ரேந்தி, பீதகவத்³தி⁴கா உபாஹனாயோ தா⁴ரேந்தி, லோஹிதகவத்³தி⁴கா உபாஹனாயோ தா⁴ரேந்தி, மஞ்ஜிட்டி²கவத்³தி⁴கா உபாஹனாயோ தா⁴ரேந்தி, கண்ஹவத்³தி⁴கா உபாஹனாயோ தா⁴ரேந்தி, மஹாரங்க³ரத்தவத்³தி⁴கா உபாஹனாயோ தா⁴ரேந்தி, மஹானாமரத்தவத்³தி⁴கா உபாஹனாயோ தா⁴ரேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி, ‘‘ஸேய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, நீலகவத்³தி⁴கா உபாஹனா தா⁴ரேதப்³பா³…பே… ந பீதகவத்³தி⁴கா உபாஹனா தா⁴ரேதப்³பா³, ந லோஹிதகவத்³தி⁴கா உபாஹனா தா⁴ரேதப்³பா³, ந மஞ்ஜிட்டி²கவத்³தி⁴கா உபாஹனா தா⁴ரேதப்³பா³, ந கண்ஹவத்³தி⁴கா உபாஹனா தா⁴ரேதப்³பா³, ந மஹாரங்க³ரத்தவத்³தி⁴கா உபாஹனா தா⁴ரேதப்³பா³, ந மஹானாமரத்தவத்³தி⁴கா உபாஹனா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸாதி.

தேன கோ² பன ஸமயேன ச²ப்³ப³க்³கி³யா பி⁴க்கூ² க²ல்லகப³த்³தா⁴ […ப³ந்தா⁴ (க.)] உபாஹனாயோ தா⁴ரேந்தி…பே… புடப³த்³தா⁴ உபாஹனாயோ தா⁴ரேந்தி, பாலிகு³ண்டி²மா உபாஹனாயோ தா⁴ரேந்தி, தூலபுண்ணிகா உபாஹனாயோ தா⁴ரேந்தி, தித்திரபத்திகா உபாஹனாயோ தா⁴ரேந்தி, மேண்ட³விஸாணவத்³தி⁴கா உபாஹனாயோ தா⁴ரேந்தி, அஜவிஸாணவத்³தி⁴கா உபாஹனாயோ தா⁴ரேந்தி, விச்சி²காளிகா உபாஹனாயோ தா⁴ரேந்தி, மோரபிஞ்ச² [மோரபிஞ்ஜ (ஸீ. ஸ்யா.)] பரிஸிப்³பி³தா உபாஹனாயோ தா⁴ரேந்தி, சித்ரா உபாஹனாயோ தா⁴ரேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி, ‘‘ஸேய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, க²ல்லகப³த்³தா⁴ உபாஹனா தா⁴ரேதப்³பா³…பே… ந புடப³த்³தா⁴ உபாஹனா தா⁴ரேதப்³பா³, ந பாலிகு³ண்டி²மா உபாஹனா தா⁴ரேதப்³பா³, ந தூலபுண்ணிகா உபாஹனா தா⁴ரேதப்³பா³, ந தித்திரபத்திகா உபாஹனா தா⁴ரேதப்³பா³, ந மேண்ட³விஸாணவத்³தி⁴கா உபாஹனா தா⁴ரேதப்³பா³, ந அஜவிஸாணவத்³தி⁴கா உபாஹனா தா⁴ரேதப்³பா³, ந விச்சி²காளிகா உபாஹனா தா⁴ரேதப்³பா³, ந மோரபிஞ்ச²பரிஸிப்³பி³தா உபாஹனா தா⁴ரேதப்³பா³, ந சித்ரா உபாஹனா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸாதி.

தேன கோ² பன ஸமயேன ச²ப்³ப³க்³கி³யா பி⁴க்கூ² ஸீஹசம்மபரிக்க²டா உபாஹனாயோ தா⁴ரேந்தி…பே… ப்³யக்³க⁴சம்மபரிக்க²டா உபாஹனாயோ தா⁴ரேந்தி, தீ³பிசம்மபரிக்க²டா உபாஹனாயோ தா⁴ரேந்தி, அஜினசம்மபரிக்க²டா உபாஹனாயோ தா⁴ரேந்தி, உத்³த³சம்மபரிக்க²டா உபாஹனாயோ தா⁴ரேந்தி, மஜ்ஜாரசம்மபரிக்க²டா உபாஹனாயோ தா⁴ரேந்தி, காளகசம்மபரிக்க²டா உபாஹனாயோ தா⁴ரேந்தி, லுவகசம்மபரிக்க²டா [உலூகசம்மபரிக்க²டா (யோஜனா)] உபாஹனாயோ தா⁴ரேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி, ‘‘ஸேய்யதா²பி கி³ஹீ காமபோ⁴கி³னோ’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஸீஹசம்மபரிக்க²டா உபாஹனா தா⁴ரேதப்³பா³…பே… ந ப்³யக்³க⁴சம்மபரிக்க²டா உபாஹனா தா⁴ரேதப்³பா³, ந தீ³பிசம்மபரிக்க²டா உபாஹனா தா⁴ரேதப்³பா³, ந அஜினசம்மபரிக்க²டா உபாஹனா தா⁴ரேதப்³பா³, ந உத்³த³சம்மபரிக்க²டா உபாஹனா தா⁴ரேதப்³பா³, ந மஜ்ஜாரசம்மபரிக்க²டா உபாஹனா தா⁴ரேதப்³பா³, ந காளகசம்மபரிக்க²டா உபாஹனா தா⁴ரேதப்³பா³, ந லுவகசம்மபரிக்க²டா உபாஹனா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸாதி.

ஸப்³ப³னீலிகாதி³படிக்கே²போ நிட்டி²தோ.