148. தி³கு³ணாதி³உபாஹனபடிக்கே²போ

245. அத² கோ² ப⁴க³வா பி⁴க்கூ² ஆமந்தேஸி – ‘‘ஏவம் கோ², பி⁴க்க²வே, குலபுத்தா அஞ்ஞம் ப்³யாகரோந்தி, அத்தோ² ச வுத்தோ, அத்தா ச அனுபனீதோ. அத² ச, பனிதே⁴கச்சே மோக⁴புரிஸா ஹஸமானகம், மஞ்ஞே, அஞ்ஞம் ப்³யாகரோந்தி, தே பச்சா² விகா⁴தம் ஆபஜ்ஜந்தீ’’தி. அத² கோ² ப⁴க³வா ஆயஸ்மந்தம் ஸோணம் ஆமந்தேஸி – ‘‘த்வம் கோ²ஸி, ஸோண, ஸுகு²மாலோ. அனுஜானாமி தே, ஸோண, ஏகபலாஸிகம் உபாஹன’’ந்தி. ‘‘அஹம் கோ², ப⁴ந்தே, அஸீதிஸகடவாஹே ஹிரஞ்ஞம் ஓஹாய அகா³ரஸ்மா அனகா³ரியம் பப்³ப³ஜிதோ, ஸத்தஹத்தி²கஞ்ச அனீகம். அதா²ஹம் ப⁴ந்தே ஏகபலாஸிகம் சே உபாஹனம் பரிஹரிஸ்ஸாமி, தஸ்ஸ மே ப⁴விஸ்ஸந்தி வத்தாரோ ‘ஸோணோ கோளிவிஸோ அஸீதிஸகடவாஹே ஹிரஞ்ஞம் ஓஹாய அகா³ரஸ்மா அனகா³ரியம் பப்³ப³ஜிதோ, ஸத்தஹத்தி²கஞ்ச அனீகம். ஸோ தா³னாயம் ஏகபலாஸிகாஸு உபாஹனாஸு ஸத்தோ’தி. ஸசே ப⁴க³வா பி⁴க்கு²ஸங்க⁴ஸ்ஸ அனுஜானிஸ்ஸதி அஹம்பி பரிபு⁴ஞ்ஜிஸ்ஸாமி; நோ சே ப⁴க³வா பி⁴க்கு²ஸங்க⁴ஸ்ஸ அனுஜானிஸ்ஸதி, அஹம்பி ந பரிபு⁴ஞ்ஜிஸ்ஸாமீ’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஏகபலாஸிகம் உபாஹனம். ந, பி⁴க்க²வே, தி³கு³ணா உபாஹனா தா⁴ரேதப்³பா³. ந திகு³ணா உபாஹனா தா⁴ரேதப்³பா³. ந கு³ணங்கு³ணூபாஹனா [க³ணங்க³ணூபாஹனா (ப³ஹூஸு)] தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸா’’தி.

தி³கு³ணாதி³உபாஹனபடிக்கே²போ நிட்டி²தோ.