141. பவாரணாட²பனம்

235. தேன கோ² பன ஸமயேன ச²ப்³ப³க்³கி³யா பி⁴க்கூ² ஸாபத்திகா பவாரேந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஸாபத்திகேன பவாரேதப்³ப³ம். யோ பவாரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, யோ ஸாபத்திகோ பவாரேதி, தஸ்ஸ ஓகாஸம் காராபேத்வா ஆபத்தியா சோதே³துந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² ஓகாஸம் காராபியமானா ந இச்ச²ந்தி ஓகாஸம் காதும். ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஓகாஸம் அகரோந்தஸ்ஸ பவாரணம் ட²பேதும். ஏவஞ்ச பன, பி⁴க்க²வே, ட²பேதப்³பா³. தத³ஹு பவாரணாய சாதுத்³த³ஸே வா பன்னரஸே வா தஸ்மிம் புக்³க³லே ஸம்முகீ²பூ⁴தே ஸங்க⁴மஜ்ஜே² உதா³ஹரிதப்³ப³ம் – ‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ புக்³க³லோ ஸாபத்திகோ. தஸ்ஸ பவாரணம் ட²பேமி. ந தஸ்மிம் ஸம்முகீ²பூ⁴தே பவாரேதப்³ப³’’ந்தி. ட²பிதா ஹோதி பவாரணாதி.

தேன கோ² பன ஸமயேன ச²ப்³ப³க்³கி³யா பி⁴க்கூ² – புரம்ஹாகம் பேஸலா பி⁴க்கூ² பவாரணம் ட²பேந்தீதி – படிகச்சேவ ஸுத்³தா⁴னம் பி⁴க்கூ²னம் அனாபத்திகானம் அவத்து²ஸ்மிம் அகாரணே பவாரணம் ட²பேந்தி, பவாரிதானம்பி பவாரணம் ட²பேந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஸுத்³தா⁴னம் பி⁴க்கூ²னம் அனாபத்திகானம் அவத்து²ஸ்மிம் அகாரணே பவாரணா ட²பேதப்³பா³. யோ ட²பேய்ய, ஆபத்தி து³க்கடஸ்ஸ. ந, பி⁴க்க²வே, பவாரிதானம்பி பவாரணா ட²பேதப்³பா³. யோ ட²பேய்ய, ஆபத்தி து³க்கடஸ்ஸ.

236. ஏவம் கோ², பி⁴க்க²வே, ட²பிதா ஹோதி பவாரணா, ஏவம் அட்ட²பிதா. கத²ஞ்ச, பி⁴க்க²வே, அட்ட²பிதா ஹோதி பவாரணா? தேவாசிகாய சே, பி⁴க்க²வே, பவாரணாய பா⁴ஸிதாய லபிதாய பரியோஸிதாய பவாரணம் ட²பேதி, அட்ட²பிதா ஹோதி பவாரணா. த்³வேவாசிகாய சே, பி⁴க்க²வே,… ஏகவாசிகாய சே, பி⁴க்க²வே,… ஸமானவஸ்ஸிகாய சே, பி⁴க்க²வே, பவாரணாய பா⁴ஸிதாய லபிதாய பரியோஸிதாய பவாரணம் ட²பேதி, அட்ட²பிதா ஹோதி பவாரணா. ஏவம் கோ², பி⁴க்க²வே, அட்ட²பிதா ஹோதி பவாரணா.

கத²ஞ்ச, பி⁴க்க²வே, ட²பிதா ஹோதி பவாரணா? தேவாசிகாய, சே, பி⁴க்க²வே, பவாரணாய பா⁴ஸிதாய லபிதாய அபரியோஸிதாய பவாரணம் ட²பேதி, ட²பிதா ஹோதி பவாரணா. த்³வேவாசிகாய சே, பி⁴க்க²வே,… ஏகவாசிகாய சே, பி⁴க்க²வே,… ஸமானவஸ்ஸிகாய சே, பி⁴க்க²வே, பவாரணாய பா⁴ஸிதாய லபிதாய அபரியோஸிதாய பவாரணம் ட²பேதி, ட²பிதா ஹோதி பவாரணா. ஏவம் கோ², பி⁴க்க²வே, ட²பிதா ஹோதி பவாரணா.

237. இத⁴ பன, பி⁴க்க²வே, தத³ஹு பவாரணாய பி⁴க்கு² பி⁴க்கு²ஸ்ஸ பவாரணம் ட²பேதி. தம் சே பி⁴க்கு²ம் அஞ்ஞே பி⁴க்கூ² ஜானந்தி, ‘‘அயம் கோ² ஆயஸ்மா அபரிஸுத்³த⁴காயஸமாசாரோ, அபரிஸுத்³த⁴வசீஸமாசாரோ, அபரிஸுத்³தா⁴ஜீவோ, பா³லோ, அப்³யத்தோ, ந படிப³லோ அனுயுஞ்ஜீயமானோ அனுயோக³ம் தா³து’’ந்தி, ‘அலம், பி⁴க்கு², மா ப⁴ண்ட³னம், மா கலஹம், மா விக்³க³ஹம், மா விவாத³’ந்தி ஓமத்³தி³த்வா ஸங்கே⁴ன பவாரேதப்³ப³ம்.

இத⁴ பன, பி⁴க்க²வே, தத³ஹு பவாரணாய பி⁴க்கு² பி⁴க்கு²ஸ்ஸ பவாரணம் ட²பேதி. தம் சே பி⁴க்கு²ம் அஞ்ஞே பி⁴க்கூ² ஜானந்தி, ‘‘அயம் கோ² ஆயஸ்மா பரிஸுத்³த⁴காயஸமாசாரோ, அபரிஸுத்³த⁴வசீஸமாசாரோ, அபரிஸுத்³தா⁴ஜீவோ, பா³லோ, அப்³யத்தோ, ந படிப³லோ அனுயுஞ்ஜீயமானோ அனுயோக³ம் தா³து’’ந்தி, ‘அலம், பி⁴க்கு², மா ப⁴ண்ட³னம், மா கலஹம், மா விக்³க³ஹம், மா விவாத³’ந்தி ஓமத்³தி³த்வா ஸங்கே⁴ன பவாரேதப்³ப³ம்.

இத⁴ பன, பி⁴க்க²வே, தத³ஹு பவாரணாய பி⁴க்கு² பி⁴க்கு²ஸ்ஸ பவாரணம் ட²பேதி. தம் சே பி⁴க்கு²ம் அஞ்ஞே பி⁴க்கூ² ஜானந்தி, ‘‘அயம் கோ² ஆயஸ்மா பரிஸுத்³த⁴காயஸமாசாரோ, பரிஸுத்³த⁴வசீஸமாசாரோ, அபரிஸுத்³தா⁴ஜீவோ, பா³லோ, அப்³யத்தோ, ந படிப³லோ அனுயுஞ்ஜீயமானோ அனுயோக³ம் தா³து’’ந்தி, ‘அலம், பி⁴க்கு², மா ப⁴ண்ட³னம், மா கலஹம், மா விக்³க³ஹம், மா விவாத³’ந்தி ஓமத்³தி³த்வா ஸங்கே⁴ன பவாரேதப்³ப³ம்.

இத⁴ பன, பி⁴க்க²வே, தத³ஹு பவாரணாய பி⁴க்கு² பி⁴க்கு²ஸ்ஸ பவாரணம் ட²பேதி. தம் சே பி⁴க்கு²ம் அஞ்ஞே பி⁴க்கூ² ஜானந்தி, ‘‘அயம் கோ² ஆயஸ்மா பரிஸுத்³த⁴காயஸமாசாரோ, பரிஸுத்³த⁴வசீஸமாசாரோ, பரிஸுத்³தா⁴ஜீவோ, பா³லோ, அப்³யத்தோ, ந படிப³லோ அனுயுஞ்ஜீயமானோ அனுயோக³ம் தா³து’’ந்தி, ‘அலம், பி⁴க்கு², மா ப⁴ண்ட³னம், மா கலஹம், மா விக்³க³ஹம், மா விவாத³’ந்தி ஓமத்³தி³த்வா ஸங்கே⁴ன பவாரேதப்³ப³ம்.

இத⁴ பன, பி⁴க்க²வே, தத³ஹு பவாரணாய பி⁴க்கு² பி⁴க்கு²ஸ்ஸ பவாரணம் ட²பேதி. தம் சே பி⁴க்கு²ம் அஞ்ஞே பி⁴க்கூ² ஜானந்தி, ‘‘அயம் கோ² ஆயஸ்மா பரிஸுத்³த⁴காயஸமாசாரோ, பரிஸுத்³த⁴வசீஸமாசாரோ, பரிஸுத்³தா⁴ஜீவோ, பண்டி³தோ, ப்³யத்தோ, படிப³லோ அனுயுஞ்ஜீயமானோ அனுயோக³ம் தா³து’’ந்தி, ஸோ ஏவமஸ்ஸ வசனீயோ, ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ பவாரணம் ட²பேஸி, கிம்ஹி நம் ட²பேஸி, ஸீலவிபத்தியா வா ட²பேஸி, ஆசாரவிபத்தியா வா ட²பேஸி, தி³ட்டி²விபத்தியா வா ட²பேஸீ’’தி? ஸோ சே ஏவம் வதே³ய்ய – ‘‘ஸீலவிபத்தியா வா ட²பேமி, ஆசாரவிபத்தியா வா ட²பேமி, தி³ட்டி²விபத்தியா வா ட²பேமீ’’தி, ஸோ ஏவமஸ்ஸ வசனீயோ – ‘‘ஜானாஸி பனாயஸ்மா ஸீலவிபத்திம், ஜானாஸி ஆசாரவிபத்திம், ஜானாஸி தி³ட்டி²விபத்தி’’ந்தி? ஸோ சே ஏவம் வதே³ய்ய – ‘‘ஜானாமி கோ² அஹம், ஆவுஸோ, ஸீலவிபத்திம், ஜானாமி ஆசாரவிபத்திம், ஜானாமி தி³ட்டி²விபத்தி’’ந்தி, ஸோ ஏவமஸ்ஸ வசனீயோ – ‘‘கதமா பனாவுஸோ, ஸீலவிபத்தி, கதமா ஆசாரவிபத்தி, கதமா தி³ட்டி²விபத்தீ’’தி? ஸோ சே ஏவம் வதே³ய்ய – ‘‘சத்தாரி பாராஜிகானி, தேரஸ ஸங்கா⁴தி³ஸேஸா, அயம் ஸீலவிபத்தி; து²ல்லச்சயம், பாசித்தியம், பாடிதே³ஸனீயம், து³க்கடம், து³ப்³பா⁴ஸிதம், அயம் ஆசாரவிபத்தி; மிச்சா²தி³ட்டி², அந்தக்³கா³ஹிகாதி³ட்டி², அயம் தி³ட்டி²விபத்தீ’’தி, ஸோ ஏவமஸ்ஸ வசனீயோ – ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ பவாரணம் ட²பேஸி, தி³ட்டே²ன வா ட²பேஸி, ஸுதேன வா ட²பேஸி, பரிஸங்காய வா ட²பேஸீ’’தி? ஸோ சே ஏவம் வதே³ய்ய – ‘‘தி³ட்டே²ன வா ட²பேமி, ஸுதேன வா ட²பேமி, பரிஸங்காய வா ட²பேமீ’’தி, ஸோ ஏவமஸ்ஸ வசனீயோ – ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ தி³ட்டே²ன பவாரணம் ட²பேஸி, கிம் தே தி³ட்ட²ம், கிந்தி தே தி³ட்ட²ம், கதா³ தே தி³ட்ட²ம், கத்த² தே தி³ட்ட²ம், பாராஜிகம் அஜ்ஜா²பஜ்ஜந்தோ தி³ட்டோ², ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ², து²ல்லச்சயம்… பாசித்தியம்… பாடிதே³ஸனீயம்… து³க்கடம்… து³ப்³பா⁴ஸிதம் அஜ்ஜா²பஜ்ஜந்தோ தி³ட்டோ², கத்த² ச த்வம் அஹோஸி, கத்த² சாயம் பி⁴க்கு² அஹோஸி, கிஞ்ச த்வம் கரோஸி, கிஞ்சாயம் பி⁴க்கு² கரோதீ’’தி? ஸோ சே ஏவம் வதே³ய்ய – ‘‘ந கோ² அஹம், ஆவுஸோ, இமஸ்ஸ பி⁴க்கு²னோ தி³ட்டே²ன பவாரணம் ட²பேமி, அபிச ஸுதேன பவாரணம் ட²பேமீ’’தி, ஸோ ஏவமஸ்ஸ வசனீயோ – ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ ஸுதேன பவாரணம் ட²பேஸி, கிம் தே ஸுதம், கிந்தி தே ஸுதம், கதா³ தே ஸுதம், கத்த² தே ஸுதம், பாராஜிகம் அஜ்ஜா²பன்னோதி ஸுதம், ஸங்கா⁴தி³ஸேஸம் அஜ்ஜா²பன்னோதி ஸுதம், து²ல்லச்சயம்… பாசித்தியம்… பாடிதே³ஸனீயம்… து³க்கடம்… து³ப்³பா⁴ஸிதம் அஜ்ஜா²பன்னோதி ஸுதம், பி⁴க்கு²ஸ்ஸ ஸுதம், பி⁴க்கு²னியா ஸுதம், ஸிக்க²மானாய ஸுதம், ஸாமணேரஸ்ஸ ஸுதம், ஸாமணேரியா ஸுதம், உபாஸகஸ்ஸ ஸுதம், உபாஸிகாய ஸுதம், ராஜூனம் ஸுதம், ராஜமஹாமத்தானம் ஸுதம், தித்தி²யானம் ஸுதம், தித்தி²யஸாவகானம் ஸுத’’ந்தி? ஸோ சே ஏவம் வதே³ய்ய – ‘‘ந கோ² அஹம், ஆவுஸோ, இமஸ்ஸ பி⁴க்கு²னோ ஸுதேன பவாரணம் ட²பேமி, அபிச பரிஸங்காய பவாரணம் ட²பேமீ’’தி, ஸோ ஏவமஸ்ஸ வசனீயோ – ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ பரிஸங்காய பவாரணம் ட²பேஸி, கிம் பரிஸங்கஸி, கிந்தி பரிஸங்கஸி, கதா³ பரிஸங்கஸி, கத்த² பரிஸங்கஸி, பாராஜிகம் அஜ்ஜா²பன்னோதி பரிஸங்கஸி, ஸங்கா⁴தி³ஸேஸம் அஜ்ஜா²பன்னோதி பரிஸங்கஸி, து²ல்லச்சயம்… பாசித்தியம்… பாடிதே³ஸனீயம்… து³க்கடம்… து³ப்³பா⁴ஸிதம் அஜ்ஜா²பன்னோதி பரிஸங்கஸி, பி⁴க்கு²ஸ்ஸ ஸுத்வா பரிஸங்கஸி, பி⁴க்கு²னியா ஸுத்வா பரிஸங்கஸி, ஸிக்க²மானாய ஸுத்வா பரிஸங்கஸி, ஸாமணேரஸ்ஸ ஸுத்வா பரிஸங்கஸி, ஸாமணேரியா ஸுத்வா பரிஸங்கஸி, உபாஸகஸ்ஸ ஸுத்வா பரிஸங்கஸி, உபாஸிகாய ஸுத்வா பரிஸங்கஸி, ராஜூனம் ஸுத்வா பரிஸங்கஸி, ராஜமஹாமத்தானம் ஸுத்வா பரிஸங்கஸி, தித்தி²யானம் ஸுத்வா பரிஸங்கஸி, தித்தி²யஸாவகானம் ஸுத்வா பரிஸங்கஸீ’’தி? ஸோ சே ஏவம் வதே³ய்ய – ‘‘ந கோ² அஹம், ஆவுஸோ, இமஸ்ஸ பி⁴க்கு²னோ பரிஸங்காய பவாரணம் ட²பேமி, அபி ச அஹம்பி ந ஜானாமி கேன பனாஹம் இமஸ்ஸ பி⁴க்கு²னோ பவாரணம் ட²பேமீ’’தி. ஸோ சே, பி⁴க்க²வே, சோத³கோ பி⁴க்கு² அனுயோகே³ன விஞ்ஞூனம் ஸப்³ரஹ்மசாரீனம் சித்தம் ந ஆராதே⁴தி, அனனுவாதோ³ சுதி³தோ பி⁴க்கூ²தி அலம் வசனாய. ஸோ சே, பி⁴க்க²வே, சோத³கோ பி⁴க்கு² அனுயோகே³ன விஞ்ஞூனம் ஸப்³ரஹ்மசாரீனம் சித்தம் ஆராதே⁴தி, ஸானுவாதோ³ சுதி³தோ பி⁴க்கூ²தி அலம் வசனாய. ஸோ சே, பி⁴க்க²வே, சோத³கோ பி⁴க்கு² அமூலகேன பாராஜிகேன அனுத்³த⁴ம்ஸிதம் படிஜானாதி, ஸங்கா⁴தி³ஸேஸம் ஆரோபேத்வா ஸங்கே⁴ன பவாரேதப்³ப³ம். ஸோ சே, பி⁴க்க²வே, சோத³கோ பி⁴க்கு² அமூலகேன ஸங்கா⁴தி³ஸேஸேன அனுத்³த⁴ம்ஸிதம் படிஜானாதி, யதா²த⁴ம்மம் காராபேத்வா ஸங்கே⁴ன பவாரேதப்³ப³ம். ஸோ சே, பி⁴க்க²வே, சோத³கோ, பி⁴க்கு² அமூலகேன து²ல்லச்சயேன… பாசித்தியேன… பாடிதே³ஸனீயேன… து³க்கடேன… து³ப்³பா⁴ஸிதேன அனுத்³த⁴ம்ஸிதம் படிஜானாதி, யதா²த⁴ம்மம் காராபேத்வா ஸங்கே⁴ன பவாரேதப்³ப³ம். ஸோ சே, பி⁴க்க²வே, சுதி³தோ பி⁴க்கு² பாராஜிகம் அஜ்ஜா²பன்னோதி படிஜானாதி, நாஸேத்வா ஸங்கே⁴ன பவாரேதப்³ப³ம். ஸோ சே, பி⁴க்க²வே, சுதி³தோ பி⁴க்கு² ஸங்கா⁴தி³ஸேஸம் அஜ்ஜா²பன்னோதி படிஜானாதி, ஸங்கா⁴தி³ஸேஸம் ஆரோபேத்வா ஸங்கே⁴ன பவாரேதப்³ப³ம். ஸோ சே, பி⁴க்க²வே, சுதி³தோ பி⁴க்கு² து²ல்லச்சயம்… பாசித்தியம்… பாடிதே³ஸனீயம்… து³க்கடம்… து³ப்³பா⁴ஸிதம் அஜ்ஜா²பன்னோதி படிஜானாதி, யதா²த⁴ம்மம் காராபேத்வா ஸங்கே⁴ன பவாரேதப்³ப³ம்.

பவாரணாட²பனம் நிட்டி²தம்.