135. லிங்கா³தி³த³ஸ்ஸனம்

229. இத⁴ பன, பி⁴க்க²வே, ஆக³ந்துகா பி⁴க்கூ² பஸ்ஸந்தி ஆவாஸிகானம் பி⁴க்கூ²னம் ஆவாஸிகாகாரம், ஆவாஸிகலிங்க³ம், ஆவாஸிகனிமித்தம், ஆவாஸிகுத்³தே³ஸம், ஸுப்பஞ்ஞத்தம் மஞ்சபீட²ம் பி⁴ஸிபி³ப்³போ³ஹனம், பானீயம் பரிபோ⁴ஜனீயம் ஸபட்டி²தம், பரிவேணம் ஸுஸம்மட்ட²ம்; பஸ்ஸித்வா வேமதிகா ஹோந்தி – ‘‘அத்தி² நு கோ² ஆவாஸிகா பி⁴க்கூ², நத்தி² நு கோ²’’தி. தே வேமதிகா ந விசினந்தி, அவிசினித்வா பவாரேந்தி. ஆபத்தி து³க்கடஸ்ஸ…பே… தே வேமதிகா விசினந்தி, விசினித்வா ந பஸ்ஸந்தி, அபஸ்ஸித்வா பவாரேந்தி. அனாபத்தி. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா ஏகதோ பவாரேந்தி. அனாபத்தி. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா பாடேக்கம் பவாரேந்தி. ஆபத்தி து³க்கடஸ்ஸ. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா – ‘‘நஸ்ஸந்தேதே, வினஸ்ஸந்தேதே, கோ தேஹி அத்தோ²’’தி – பே⁴த³புரேக்கா²ரா பவாரேந்தி. ஆபத்தி து²ல்லச்சயஸ்ஸ.

இத⁴ பன, பி⁴க்க²வே, ஆக³ந்துகா பி⁴க்கூ² ஸுணந்தி ஆவாஸிகானம் பி⁴க்கூ²னம் ஆவாஸிகாகாரம், ஆவாஸிகலிங்க³ம், ஆவாஸிகனிமித்தம், ஆவாஸிகுத்³தே³ஸம், சங்கமந்தானம் பத³ஸத்³த³ம், ஸஜ்ஜா²யஸத்³த³ம், உக்காஸிதஸத்³த³ம், கி²பிதஸத்³த³ம்; ஸுத்வா வேமதிகா ஹோந்தி – ‘‘அத்தி² நு கோ² ஆவாஸிகா பி⁴க்கூ², நத்தி² நு கோ²’’தி. தே வேமதிகா ந விசினந்தி, அவிசினித்வா பவாரேந்தி. ஆபத்தி து³க்கடஸ்ஸ. தே வேமதிகா விசினந்தி, விசினித்வா ந பஸ்ஸந்தி, அபஸ்ஸித்வா பவாரேந்தி. அனாபத்தி. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா ஏகதோ பவாரேந்தி. அனாபத்தி. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா பாடேக்கம் பவாரேந்தி. ஆபத்தி து³க்கடஸ்ஸ. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா ‘‘நஸ்ஸந்தேதே, வினஸ்ஸந்தேதே, கோ தேஹி அத்தோ²’’தி பே⁴த³புரேக்கா²ரா பவாரேந்தி. ஆபத்தி து²ல்லச்சயஸ்ஸ.

இத⁴ பன, பி⁴க்க²வே, ஆவாஸிகா பி⁴க்கூ² பஸ்ஸந்தி ஆக³ந்துகானம் பி⁴க்கூ²னம் ஆக³ந்துகாகாரம், ஆக³ந்துகலிங்க³ம், ஆக³ந்துகனிமித்தம், ஆக³ந்துகுத்³தே³ஸம், அஞ்ஞாதகம் பத்தம், அஞ்ஞாதகம் சீவரம், அஞ்ஞாதகம் நிஸீத³னம், பாதா³னம் தோ⁴தம், உத³கனிஸ்ஸேகம்; பஸ்ஸித்வா வேமதிகா ஹோந்தி – ‘‘அத்தி² நு கோ² ஆக³ந்துகா பி⁴க்கூ², நத்தி² நு கோ²’’தி. தே வேமதிகா ந விசினந்தி, அவிசினித்வா பவாரேந்தி. ஆபத்தி து³க்கடஸ்ஸ. தே வேமதிகா விசினந்தி, விசினித்வா ந பஸ்ஸந்தி, அபஸ்ஸித்வா பவாரேந்தி. அனாபத்தி. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா ஏகதோ பவாரேந்தி. அனாபத்தி. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா பாடேக்கம் பவாரேந்தி. ஆபத்தி து³க்கடஸ்ஸ. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா – நஸ்ஸந்தேதே, வினஸ்ஸந்தேதே, கோ தேஹி அத்தோ²தி – பே⁴த³புரேக்கா²ரா பவாரேந்தி. ஆபத்தி து²ல்லச்சயஸ்ஸ.

இத⁴ பன, பி⁴க்க²வே, ஆவாஸிகா பி⁴க்கூ² ஸுணந்தி ஆக³ந்துகானம் பி⁴க்கூ²னம் ஆக³ந்துகாகாரம்,

ஆக³ந்துகலிங்க³ம், ஆக³ந்துகனிமித்தம், ஆக³ந்துகுத்³தே³ஸம், ஆக³ச்ச²ந்தானம் பத³ஸத்³த³ம், உபாஹனபப்போ²டனஸத்³த³ம், உக்காஸிதஸத்³த³ம், கி²பிதஸத்³த³ம்; ஸுத்வா வேமதிகா ஹோந்தி – ‘‘அத்தி² நு கோ² ஆக³ந்துகா பி⁴க்கூ², நத்தி² நு கோ²’’தி. தே வேமதிகா ந விசினந்தி, அவிசினித்வா பவாரேந்தி. ஆபத்தி து³க்கடஸ்ஸ. தே வேமதிகா விசினந்தி, விசினித்வா ந பஸ்ஸந்தி, அபஸ்ஸித்வா பவாரேந்தி. அனாபத்தி. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா ஏகதோ பவாரேந்தி. அனாபத்தி. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா பாடேக்கம் பவாரேந்தி. ஆபத்தி து³க்கடஸ்ஸ. தே வேமதிகா விசினந்தி, விசினித்வா பஸ்ஸந்தி, பஸ்ஸித்வா – நஸ்ஸந்தேதே, வினஸ்ஸந்தேதே, கோ தேஹி அத்தோ²தி – பே⁴த³புரேக்கா²ரா பவாரேந்தி. ஆபத்தி து²ல்லச்சயஸ்ஸ.

லிங்கா³தி³த³ஸ்ஸனம் நிட்டி²தம்.