136. நானாஸம்வாஸகாதீ³ஹி பவாரணா

230. இத⁴ பன, பி⁴க்க²வே, ஆக³ந்துகா பி⁴க்கூ² பஸ்ஸந்தி ஆவாஸிகே பி⁴க்கூ² நானாஸம்வாஸகே. தே ஸமானஸம்வாஸகதி³ட்டி²ம் படிலப⁴ந்தி, ஸமானஸம்வாஸகதி³ட்டி²ம் படிலபி⁴த்வா ந புச்ச²ந்தி, அபுச்சி²த்வா ஏகதோ பவாரேந்தி. அனாபத்தி. தே புச்ச²ந்தி, புச்சி²த்வா நாபி⁴விதரந்தி, அனபி⁴விதரித்வா ஏகதோ பவாரேந்தி. ஆபத்தி து³க்கடஸ்ஸ. தே புச்ச²ந்தி, புச்சி²த்வா நாபி⁴விதரந்தி, அனபி⁴விதரித்வா பாடேக்கம் பவாரேந்தி. அனாபத்தி.

இத⁴ பன, பி⁴க்க²வே, ஆக³ந்துகா பி⁴க்கூ² பஸ்ஸந்தி ஆவாஸிகே பி⁴க்கூ² ஸமானஸம்வாஸகே. தே நானாஸம்வாஸகதி³ட்டி²ம் படிலப⁴ந்தி, நானாஸம்வாஸகதி³ட்டி²ம் படிலபி⁴த்வா ந புச்ச²ந்தி, அபுச்சி²த்வா ஏகதோ பவாரேந்தி. ஆபத்தி து³க்கடஸ்ஸ. தே புச்ச²ந்தி, புச்சி²த்வா அபி⁴விதரந்தி, அபி⁴விதரித்வா பாடேக்கம் பவாரேந்தி. ஆபத்தி து³க்கடஸ்ஸ. தே புச்ச²ந்தி, புச்சி²த்வா அபி⁴விதரந்தி, அபி⁴விதரித்வா ஏகதோ பவாரேந்தி. அனாபத்தி.

இத⁴ பன, பி⁴க்க²வே, ஆவாஸிகா பி⁴க்கூ² பஸ்ஸந்தி ஆக³ந்துகே பி⁴க்கூ² நானாஸம்வாஸகே. தே ஸமானஸம்வாஸகதி³ட்டி²ம் படிலப⁴ந்தி, ஸமானஸம்வாஸகதி³ட்டி²ம் படிலபி⁴த்வா ந புச்ச²ந்தி, அபுச்சி²த்வா ஏகதோ பவாரேந்தி. அனாபத்தி. தே புச்ச²ந்தி, புச்சி²த்வா நாபி⁴விதரந்தி, அனபி⁴விதரித்வா ஏகதோ பவாரேந்தி. ஆபத்தி து³க்கடஸ்ஸ. தே புச்ச²ந்தி, புச்சி²த்வா நாபி⁴விதரந்தி, அனபி⁴விதரித்வா பாடேக்கம் பவாரேந்தி. அனாபத்தி.

இத⁴ பன, பி⁴க்க²வே, ஆவாஸிகா பி⁴க்கூ² பஸ்ஸந்தி ஆக³ந்துகே பி⁴க்கூ² ஸமானஸம்வாஸகே. தே நானாஸம்வாஸகதி³ட்டி²ம் படிலப⁴ந்தி, நானாஸம்வாஸகதி³ட்டி²ம் படிலபி⁴த்வா ந புச்ச²ந்தி, அபுச்சி²த்வா ஏகதோ பவாரேந்தி. ஆபத்தி து³க்கடஸ்ஸ. தே புச்ச²ந்தி, புச்சி²த்வா அபி⁴விதரந்தி, அபி⁴விதரித்வா பாடேக்கம் பவாரேந்தி. ஆபத்தி து³க்கடஸ்ஸ. தே புச்ச²ந்தி, புச்சி²த்வா அபி⁴விதரந்தி, அபி⁴விதரித்வா ஏகதோ பவாரேந்தி. அனாபத்தி.

நானாஸம்வாஸகாதீ³ஹி பவாரணா நிட்டி²தா.