120. அபா²ஸுகவிஹாரோ

209. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா ஸந்தி³ட்டா² ஸம்ப⁴த்தா பி⁴க்கூ² கோஸலேஸு ஜனபதே³ அஞ்ஞதரஸ்மிம் ஆவாஸே வஸ்ஸம் உபக³ச்சி²ம்ஸு. அத² கோ² தேஸம் பி⁴க்கூ²னம் ஏதத³ஹோஸி – ‘‘கேன நு கோ² மயம் உபாயேன ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸேய்யாம, ந ச பிண்ட³கேன கிலமேய்யாமா’’தி. அத² கோ² தேஸம் பி⁴க்கூ²னம் ஏதத³ஹோஸி – ‘‘ஸசே கோ² மயம் அஞ்ஞமஞ்ஞம் நேவ ஆலபேய்யாம ந ஸல்லபேய்யாம – யோ பட²மம் கா³மதோ பிண்டா³ய படிக்கமேய்ய ஸோ ஆஸனம் பஞ்ஞபேய்ய, பாதோ³த³கம் பாத³பீட²ம் பாத³கத²லிகம் உபனிக்கி²பேய்ய, அவக்காரபாதிம் தோ⁴வித்வா உபட்டா²பேய்ய, பானீயம் பரிபோ⁴ஜனீயம் உபட்டா²பேய்ய; யோ பச்சா² கா³மதோ பிண்டா³ய படிக்கமேய்ய, ஸசஸ்ஸ பு⁴த்தாவஸேஸோ, ஸசே ஆகங்கே²ய்ய பு⁴ஞ்ஜேய்ய, நோ சே ஆகங்கே²ய்ய அப்பஹரிதே வா ச²ட்³டே³ய்ய, அப்பாணகே வா உத³கே ஓபிலாபேய்ய; ஸோ ஆஸனம் உத்³த⁴ரேய்ய, பாதோ³த³கம் பாத³பீட²ம் பாத³கத²லிகம் படிஸாமேய்ய, அவக்காரபாதிம் தோ⁴வித்வா படிஸாமேய்ய, பானீயம் பரிபோ⁴ஜனீயம் படிஸாமேய்ய, ப⁴த்தக்³க³ம் ஸம்மஜ்ஜேய்ய; யோ பஸ்ஸேய்ய பானீயக⁴டம் வா பரிபோ⁴ஜனீயக⁴டம் வா வச்சக⁴டம் வா ரித்தம் துச்ச²ம் ஸோ உபட்டா²பேய்ய; ஸசஸ்ஸ ஹோதி அவிஸய்ஹம், ஹத்த²விகாரேன து³தியம் ஆமந்தேத்வா ஹத்த²விலங்க⁴கேன உபட்டா²பேய்ய; ந த்வேவ தப்பச்சயா வாசம் பி⁴ந்தே³ய்ய – ஏவம் கோ² மயம் ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸேய்யாம, ந ச பிண்ட³கேன கிலமேய்யாமா’’தி. அத² கோ² தே பி⁴க்கூ² அஞ்ஞமஞ்ஞம் நேவ ஆலபிம்ஸு, ந ஸல்லபிம்ஸு. யோ பட²மம் கா³மதோ பிண்டா³ய படிக்கமதி, ஸோ ஆஸனம் பஞ்ஞபேதி, பாதோ³த³கம் பாத³பீட²ம் பாத³கத²லிகம் உபனிக்கி²பதி, அவக்காரபாதிம் தோ⁴வித்வா உபட்டா²பேதி, பானீயம் பரிபோ⁴ஜனீயம் உபட்டா²பேதி. யோ பச்சா² கா³மதோ பிண்டா³ய படிக்கமதி, ஸசே ஹோதி பு⁴த்தாவஸேஸோ, ஸசே ஆகங்க²தி பு⁴ஞ்ஜதி, நோ சே ஆகங்க²தி அப்பஹரிதே வா ச²ட்³டே³தி, அப்பாணகே வா உத³கே ஓபிலாபேதி; ஸோ ஆஸனம் உத்³த⁴ரதி, பாதோ³த³கம் பாத³பீட²ம் பாத³கத²லிகம் படிஸாமேதி, அவக்காரபாதிம் தோ⁴வித்வா படிஸாமேதி, பானீயம் பரிபோ⁴ஜனீயம் படிஸாமேதி, ப⁴த்தக்³க³ம் ஸம்மஜ்ஜதி. யோ பஸ்ஸதி பானீயக⁴டம் வா பரிபோ⁴ஜனீயக⁴டம் வா வச்சக⁴டம் வா ரித்தம் துச்ச²ம் ஸோ உபட்டா²பேதி. ஸசஸ்ஸ ஹோதி அவிஸய்ஹம், ஹத்த²விகாரேன து³தியம் ஆமந்தேத்வா ஹத்த²விலங்க⁴கேன உபட்டா²பேதி, ந த்வேவ தப்பச்சயா வாசம் பி⁴ந்த³தி.

ஆசிண்ணம் கோ² பனேதம் வஸ்ஸம்வுட்டா²னம் பி⁴க்கூ²னம் ப⁴க³வந்தம் த³ஸ்ஸனாய உபஸங்கமிதும். அத² கோ² தே பி⁴க்கூ² வஸ்ஸம்வுட்டா² தேமாஸச்சயேன ஸேனாஸனம் ஸம்ஸாமேத்வா பத்தசீவரமாதா³ய யேன ஸாவத்தி² தேன பக்கமிம்ஸு. அனுபுப்³பே³ன யேன ஸாவத்தி² ஜேதவனம் அனாத²பிண்டி³கஸ்ஸ ஆராமோ யேன ப⁴க³வா தேனுபஸங்கமிம்ஸு, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஆசிண்ணம் கோ² பனேதம் பு³த்³தா⁴னம் ப⁴க³வந்தானம் ஆக³ந்துகேஹி பி⁴க்கூ²ஹி ஸத்³தி⁴ம் படிஸம்மோதி³தும். அத² கோ² ப⁴க³வா தே பி⁴க்கூ² ஏதத³வோச – ‘‘கச்சி, பி⁴க்க²வே, க²மனீயம், கச்சி யாபனீயம், கச்சி ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸித்த², ந ச பிண்ட³கேன கிலமித்தா²’’தி? ‘‘க²மனீயம் ப⁴க³வா, யாபனீயம் ப⁴க³வா. ஸமக்³கா³ ச மயம், ப⁴ந்தே, ஸம்மோத³மானா அவிவத³மானா பா²ஸுகம் வஸ்ஸம் வஸிம்ஹா, ந ச பிண்ட³கேன கிலமிம்ஹா’’தி. ஜானந்தாபி ததா²க³தா புச்ச²ந்தி, ஜானந்தாபி ந புச்ச²ந்தி. காலம் விதி³த்வா புச்ச²ந்தி, காலம் விதி³த்வா ந புச்ச²ந்தி. அத்த²ஸம்ஹிதம் ததா²க³தா புச்ச²ந்தி, நோ அனத்த²ஸம்ஹிதம். அனத்த²ஸம்ஹிதே ஸேதுகா⁴தோ ததா²க³தானம். த்³வீஹாகாரேஹி பு³த்³தா⁴ ப⁴க³வந்தோ பி⁴க்கூ² படிபுச்ச²ந்தி – த⁴ம்மம் வா தே³ஸேஸ்ஸாம, ஸாவகானம் வா ஸிக்கா²பத³ம் பஞ்ஞபேஸ்ஸாமாதி. அத² கோ² ப⁴க³வா தே பி⁴க்கூ² ஏதத³வோச – ‘‘யதா²கத²ம் பன தும்ஹே, பி⁴க்க²வே, ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸித்த², ந ச பிண்ட³கேன கிலமித்தா²’’தி.

இத⁴ மயம், ப⁴ந்தே, ஸம்ப³ஹுலா ஸந்தி³ட்டா² ஸம்ப⁴த்தா பி⁴க்கூ² கோஸலேஸு ஜனபதே³ அஞ்ஞதரஸ்மிம் ஆவாஸே வஸ்ஸம் உபக³ச்சி²ம்ஹா. தேஸம் நோ, ப⁴ந்தே, அம்ஹாகம் ஏதத³ஹோஸி – ‘‘கேன நு கோ² மயம் உபாயேன ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸேய்யாம, ந ச பிண்ட³கேன கிலமேய்யாமா’’தி. தேஸம் நோ, ப⁴ந்தே, அம்ஹாகம் ஏதத³ஹோஸி – ‘‘ஸசே கோ² மயம் அஞ்ஞமஞ்ஞம் நேவ ஆலபேய்யாம ந ஸல்லபேய்யாம – யோ பட²மம் கா³மதோ பிண்டா³ய படிக்கமேய்ய ஸோ ஆஸனம் பஞ்ஞபேய்ய, பாதோ³த³கம் பாத³பீட²ம் பாத³கத²லிகம் உபனிக்கி²பேய்ய, அவக்காரபாதிம் தோ⁴வித்வா உபட்டா²பேய்ய, பானீயம் பரிபோ⁴ஜனீயம் உபட்டா²பேய்ய; யோ பச்சா² கா³மதோ பிண்டா³ய படிக்கமேய்ய, ஸசஸ்ஸ பு⁴த்தாவஸேஸோ, ஸசே ஆகங்கே²ய்ய பு⁴ஞ்ஜேய்ய, நோ சே ஆகங்கே²ய்ய அப்பஹரிதே வா ச²ட்³டே³ய்ய, அப்பாணகே வா உத³கே ஓபிலாபேய்ய; ஸோ ஆஸனம் உத்³த⁴ரேய்ய, பாதோ³த³கம் பாத³பீட²ம் பாத³கத²லிகம் படிஸாமேய்ய, அவக்காரபாதிம் தோ⁴வித்வா படிஸாமேய்ய, பானீயம் பரிபோ⁴ஜனீயம் படிஸாமேய்ய, ப⁴த்தக்³க³ம் ஸம்மஜ்ஜேய்ய; யோ பஸ்ஸேய்ய பானீயக⁴டம் வா பரிபோ⁴ஜனீயக⁴டம் வா வச்சக⁴டம் வா ரித்தம் துச்ச²ம் ஸோ உபட்டா²பேய்ய; ஸசஸ்ஸ ஹோதி அவிஸய்ஹம், ஹத்த²விகாரேன து³தியம் ஆமந்தேத்வா ஹத்த²விலங்க⁴கேன உபட்டா²பேய்ய; ந த்வேவ தப்பச்சயா வாசம் பி⁴ந்தே³ய்ய – ஏவம் கோ² மயம் ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸேய்யாம, ந ச பிண்ட³கேன கிலமேய்யாமா’’தி. அத² கோ² மயம், ப⁴ந்தே, அஞ்ஞமஞ்ஞம் நேவ ஆலபிம்ஹா ந ஸல்லவிம்ஹா. யோ பட²மம் கா³மதோ பிண்டா³ய படிக்கமதி ஸோ ஆஸனம் பஞ்ஞபேதி, பாதோ³த³கம் பாத³பீட²ம் பாத³கத²லிகம் உபனிக்கி²பதி, அவக்காரபாதிம் தோ⁴வித்வா உபட்டா²பேதி, பானீயம் பரிபோ⁴ஜனீயம் உபட்டா²பேதி. யோ பச்சா² கா³மதோ பிண்டா³ய படிக்கமதி, ஸசே ஹோதி பு⁴த்தாவஸேஸோ, ஸசே ஆகங்க²தி பு⁴ஞ்ஜதி, நோ சே ஆகங்க²தி அப்பஹரிதே வா ச²ட்³டே³தி, அப்பாணகே வா உத³கே ஓபிலாபேதி, ஸோ ஆஸனம் உத்³த⁴ரதி, பாதோ³த³கம் பாத³பீட²ம் பாத³கத²லிகம் படிஸாமேதி, அவக்காரபாதிம் தோ⁴வித்வா படிஸாமேதி, பானீயம் பரிபோ⁴ஜனீயம் படிஸாமேதி, ப⁴த்தக்³க³ம் ஸம்மஜ்ஜதி. யோ பஸ்ஸதி பானீயக⁴டம் வா பரிபோ⁴ஜனீயக⁴டம் வா வச்சக⁴டம் வா ரித்தம் துச்ச²ம் ஸோ உபட்டா²பேதி. ஸசஸ்ஸ ஹோதி அவிஸய்ஹம், ஹத்த²விகாரேன து³தியம் ஆமந்தேத்வா ஹத்த²விலங்க⁴கேன உபட்டா²பேதி, ந த்வேவ தப்பச்சயா வாசம் பி⁴ந்த³தி. ஏவம் கோ² மயம், ப⁴ந்தே, ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸிம்ஹா, ந ச பிண்ட³கேன கிலமிம்ஹாதி.

அத² கோ² ப⁴க³வா பி⁴க்கூ² ஆமந்தேஸி – ‘‘அபா²ஸுஞ்ஞேவ [அபா²ஸுகஞ்ஞேவ (ஸீ.)] கிரமே [கிரிமே (க.)], பி⁴க்க²வே, மோக⁴புரிஸா வுட்டா² [வுத்தா² (க.)] ஸமானா பா²ஸும்ஹா [பா²ஸுகம்ஹா (ஸீ.)] வுட்டா²தி படிஜானந்தி. பஸுஸம்வாஸஞ்ஞேவ கிரமே, பி⁴க்க²வே, மோக⁴புரிஸா வுட்டா² ஸமானா பா²ஸும்ஹா வுட்டா²தி படிஜானந்தி. ஏளகஸம்வாஸஞ்ஞேவ கிரமே, பி⁴க்க²வே, மோக⁴புரிஸா வுட்டா² ஸமானா பா²ஸும்ஹா வுட்டா²தி படிஜானந்தி. ஸபத்தஸம்வாஸஞ்ஞேவ கிரமே, பி⁴க்க²வே, மோக⁴புரிஸா வுட்டா² ஸமானா பா²ஸும்ஹா வுட்டா²தி படிஜானந்தி. கத²ஞ்ஹி நாமிமே, பி⁴க்க²வே, மோக⁴புரிஸா மூக³ப்³ப³தம் தித்தி²யஸமாதா³னம் ஸமாதி³யிஸ்ஸ’’ந்தி. நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி – ந, பி⁴க்க²வே, மூக³ப்³ப³தம் தித்தி²யஸமாதா³னம் ஸமாதி³யிதப்³ப³ம். யோ ஸமாதி³யேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, வஸ்ஸம்வுட்டா²னம் பி⁴க்கூ²னம் தீஹி டா²னேஹி பவாரேதும் – தி³ட்டே²ன வா ஸுதேன வா பரிஸங்காய வா. ஸா வோ ப⁴விஸ்ஸதி அஞ்ஞமஞ்ஞானுலோமதா ஆபத்திவுட்டா²னதா வினயபுரேக்கா²ரதா. ஏவஞ்ச பன, பி⁴க்க²வே, பவாரேதப்³ப³ம். ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

210. ‘‘ஸுணாது மே, ப⁴ந்தே, ஸங்கோ⁴. அஜ்ஜ பவாரணா. யதி³ ஸங்க⁴ஸ்ஸ பத்தகல்லம், ஸங்கோ⁴ பவாரேய்யா’’தி.

தே²ரேன பி⁴க்கு²னா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘ஸங்க⁴ம், ஆவுஸோ, பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தோ அனுகம்பம் உபாதா³ய. பஸ்ஸந்தோ படிகரிஸ்ஸாமி. து³தியம்பி, ஆவுஸோ, ஸங்க⁴ம் பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தோ அனுகம்பம் உபாதா³ய. பஸ்ஸந்தோ படிகரிஸ்ஸாமி. ததியம்பி, ஆவுஸோ, ஸங்க⁴ம் பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தோ அனுகம்பம் உபாதா³ய. பஸ்ஸந்தோ படிகரிஸ்ஸாமீ’’தி.

நவகேன பி⁴க்கு²னா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘ஸங்க⁴ம், ப⁴ந்தே, பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தோ அனுகம்பம் உபாதா³ய. பஸ்ஸந்தோ படிகரிஸ்ஸாமி. து³தியம்பி, ப⁴ந்தே, ஸங்க⁴ம்…பே… ததியம்பி, ப⁴ந்தே, ஸங்க⁴ம் பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தோ அனுகம்பம் உபாதா³ய. பஸ்ஸந்தோ படிகரிஸ்ஸாமீ’’தி.

211. தேன கோ² பன ஸமயேன ச²ப்³ப³க்³கி³யா பி⁴க்கூ² தே²ரேஸு பி⁴க்கூ²ஸு உக்குடிகம் நிஸின்னேஸு பவாரயமானேஸு ஆஸனேஸு அச்ச²ந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² தே²ரேஸு பி⁴க்கூ²ஸு உக்குடிகம் நிஸின்னேஸு பவாரயமானேஸு ஆஸனேஸு அச்சி²ஸ்ஸந்தீ’’தி. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கூ² தே²ரேஸு பி⁴க்கூ²ஸு உக்குடிகம் நிஸின்னேஸு பவாரயமானேஸு ஆஸனேஸு அச்ச²ந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… ‘‘கத²ஞ்ஹி நாம தே, பி⁴க்க²வே, மோக⁴புரிஸா தே²ரேஸு பி⁴க்கூ²ஸு உக்குடிகம் நிஸின்னேஸு பவாரயமானேஸு ஆஸனேஸு அச்சி²ஸ்ஸ’’ந்தி. நேதம், பி⁴க்க²வே, அப்பஸன்னானம் வா பஸாதா³ய, பஸன்னானம் வா பி⁴ய்யோபா⁴வாய…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, தே²ரேஸு பி⁴க்கூ²ஸு உக்குடிகம் நிஸின்னேஸு பவாரயமானேஸு ஆஸனேஸு அச்சி²தப்³ப³ம். யோ அச்சே²ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஸப்³பே³ஹேவ உக்குடிகம் நிஸின்னேஹி பவாரேது’’ந்தி.

தேன கோ² பன ஸமயேன அஞ்ஞதரோ தே²ரோ ஜராது³ப்³ப³லோ யாவ ஸப்³பே³ பவாரேந்தீதி [யாவ ஸப்³பே³ பவாரேந்தி (ஸ்யா.)] உக்குடிகம் நிஸின்னோ ஆக³மயமானோ முச்சி²தோ பபதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தத³மந்தரா உக்குடிகம் நிஸீதி³தும் யாவ பவாரேதி, பவாரேத்வா ஆஸனே நிஸீதி³துந்தி.

அபா²ஸுகவிஹாரோ நிட்டி²தோ.