121. பவாரணாபே⁴தா³

212. அத² கோ² பி⁴க்கூ²னம் ஏதத³ஹோஸி – ‘‘கதி நு கோ² பவாரணா’’தி? ப⁴க³வதோ ஏதமத்த²ம் ஆரோசேஸும். த்³வேமா, பி⁴க்க²வே, பவாரணா – சாதுத்³த³ஸிகா ச பன்னரஸிகா ச. இமா கோ², பி⁴க்க²வே, த்³வே பவாரணாதி.

அத² கோ² பி⁴க்கூ²னம் ஏதத³ஹோஸி – ‘‘கதி நு கோ² பவாரணகம்மானீ’’தி? [பவாரணாகம்மானீதி (ஸ்யா.)] ப⁴க³வதோ ஏதமத்த²ம் ஆரோசேஸும். சத்தாரிமானி, பி⁴க்க²வே, பவாரணகம்மானி – அத⁴ம்மேன வக்³க³ம் பவாரணகம்மம், அத⁴ம்மேன ஸமக்³க³ம் பவாரணகம்மம், த⁴ம்மேன வக்³க³ம் பவாரணகம்மம், த⁴ம்மேன ஸமக்³க³ம் பவாரணகம்மம். தத்ர, பி⁴க்க²வே, யதி³த³ம் அத⁴ம்மேன வக்³க³ம் பவாரணகம்மம், ந, பி⁴க்க²வே, ஏவரூபம் பவாரணகம்மம் காதப்³ப³ம்; ந ச மயா ஏவரூபம் பவாரணகம்மம் அனுஞ்ஞாதம். தத்ர, பி⁴க்க²வே, யதி³த³ம் அத⁴ம்மேன ஸமக்³க³ம் பவாரணகம்மம், ந, பி⁴க்க²வே, ஏவரூபம் பவாரணகம்மம் காதப்³ப³ம்; ந ச மயா ஏவரூபம் பவாரணகம்மம் அனுஞ்ஞாதம். தத்ர, பி⁴க்க²வே, யதி³த³ம் த⁴ம்மேன வக்³க³ம் பவாரணகம்மம், ந, பி⁴க்க²வே, ஏவரூபம் பவாரணகம்மம் காதப்³ப³ம்; ந ச மயா ஏவரூபம் பவாரணகம்மம் அனுஞ்ஞாதம். தத்ர, பி⁴க்க²வே, யதி³த³ம் த⁴ம்மேன ஸமக்³க³ம் பவாரணகம்மம், ஏவரூபம், பி⁴க்க²வே, பவாரணகம்மம் காதப்³ப³ம்; ஏவரூபஞ்ச மயா பவாரணகம்மம் அனுஞ்ஞாதம். தஸ்மாதிஹ, பி⁴க்க²வே, ஏவரூபம் பவாரணகம்மம் கரிஸ்ஸாம யதி³த³ம் த⁴ம்மேன ஸமக்³க³ந்தி, ஏவஞ்ஹி வோ, பி⁴க்க²வே, ஸிக்கி²தப்³ப³ந்தி.

பவாரணாபே⁴தா³ நிட்டி²தா.