93. ஆபத்திஆவிகரணவிதி⁴

170. தேன கோ² பன ஸமயேன அஞ்ஞதரோ பி⁴க்கு² பாதிமோக்கே² உத்³தி³ஸ்ஸமானே ஆபத்திம் ஸரதி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தம் ‘ந ஸாபத்திகேன உபோஸதோ² காதப்³போ³’தி. அஹஞ்சம்ஹி ஆபத்திம் ஆபன்னோ. கத²ம் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸும்.

இத⁴ பன, பி⁴க்க²வே, பி⁴க்கு² பாதிமோக்கே² உத்³தி³ஸ்ஸமானே ஆபத்திம் ஸரதி. தேன, பி⁴க்க²வே, பி⁴க்கு²னா ஸாமந்தோ பி⁴க்கு² ஏவமஸ்ஸ வசனீயோ – ‘‘அஹம், ஆவுஸோ, இத்த²ன்னாமம் ஆபத்திம் ஆபன்னோ. இதோ வுட்ட²ஹித்வா தம் ஆபத்திம் படிகரிஸ்ஸாமீ’’தி வத்வா உபோஸதோ² காதப்³போ³, பாதிமோக்க²ம் ஸோதப்³ப³ம், ந த்வேவ தப்பச்சயா உபோஸத²ஸ்ஸ அந்தராயோ காதப்³போ³.

இத⁴ பன, பி⁴க்க²வே, பி⁴க்கு² பாதிமோக்கே² உத்³தி³ஸ்ஸமானே ஆபத்தியா வேமதிகோ ஹோதி. தேன, பி⁴க்க²வே, பி⁴க்கு²னா ஸாமந்தோ பி⁴க்கு² ஏவமஸ்ஸ வசனீயோ – ‘‘அஹம், ஆவுஸோ, இத்த²ன்னாமாய ஆபத்தியா வேமதிகோ. யதா³ நிப்³பே³மதிகோ ப⁴விஸ்ஸாமி, ததா³ தம் ஆபத்திம் படிகரிஸ்ஸாமீ’’தி வத்வா உபோஸதோ² காதப்³போ³, பாதிமோக்க²ம் ஸோதப்³ப³ம்; ந த்வேவ தப்பச்சயா உபோஸத²ஸ்ஸ அந்தராயோ காதப்³போ³தி.