94. ஸபா⁴கா³பத்திபடிகம்மவிதி⁴

171. தேன கோ² பன ஸமயேன அஞ்ஞதரஸ்மிம் ஆவாஸே தத³ஹுபோஸதே² ஸப்³போ³ ஸங்கோ⁴ ஸபா⁴க³ம் ஆபத்திம் ஆபன்னோ ஹோதி. அத² கோ² தேஸம் பி⁴க்கூ²னம் ஏதத³ஹோஸி – ‘‘ப⁴க³வதா பஞ்ஞத்தம் ‘ந ஸபா⁴கா³ ஆபத்தி தே³ஸேதப்³பா³, ந ஸபா⁴கா³ ஆபத்தி படிக்³க³ஹேதப்³பா³’தி. அயஞ்ச ஸப்³போ³ ஸங்கோ⁴ ஸபா⁴க³ம் ஆபத்திம் ஆபன்னோ. கத²ம் நு கோ² அம்ஹேஹி படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸும்.

இத⁴ பன, பி⁴க்க²வே, அஞ்ஞதரஸ்மிம் ஆவாஸே தத³ஹுபோஸதே² ஸப்³போ³ ஸங்கோ⁴ ஸபா⁴க³ம் ஆபத்திம் ஆபன்னோ ஹோதி. தேஹி, பி⁴க்க²வே, பி⁴க்கூ²ஹி ஏகோ பி⁴க்கு² ஸாமந்தா ஆவாஸா ஸஜ்ஜுகம் பாஹேதப்³போ³ – க³ச்சா²வுஸோ, தம் ஆபத்திம் படிகரித்வா ஆக³ச்ச²; மயம் தே ஸந்திகே ஆபத்திம் படிகரிஸ்ஸாமாதி. ஏவஞ்சேதம் லபே⁴த², இச்சேதம் குஸலம். நோ சே லபே⁴த², ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயம் ஸப்³போ³ ஸங்கோ⁴ ஸபா⁴க³ம் ஆபத்திம் ஆபன்னோ. யதா³ அஞ்ஞம் பி⁴க்கு²ம் ஸுத்³த⁴ம் அனாபத்திகம் பஸ்ஸிஸ்ஸதி, ததா³ தஸ்ஸ ஸந்திகே தம் ஆபத்திம் படிகரிஸ்ஸதீ’’தி வத்வா உபோஸதோ² காதப்³போ³, பாதிமோக்க²ம் உத்³தி³ஸிதப்³ப³ம், ந த்வேவ தப்பச்சயா உபோஸத²ஸ்ஸ அந்தராயோ காதப்³போ³.

இத⁴ பன, பி⁴க்க²வே, அஞ்ஞதரஸ்மிம் ஆவாஸே தத³ஹுபோஸதே² ஸப்³போ³ ஸங்கோ⁴ ஸபா⁴கா³ய ஆபத்தியா வேமதிகோ ஹோதி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயம் ஸப்³போ³ ஸங்கோ⁴ ஸபா⁴கா³ய ஆபத்தியா வேமதிகோ. யதா³ நிப்³பே³மதிகோ ப⁴விஸ்ஸதி, ததா³ தம் ஆபத்திம் படிகரிஸ்ஸதீ’’தி வத்வா உபோஸதோ² காதப்³போ³, பாதிமோக்க²ம் உத்³தி³ஸிதப்³ப³ம்; ந த்வேவ தப்பச்சயா உபோஸத²ஸ்ஸ அந்தராயோ காதப்³போ³.

இத⁴ பன, பி⁴க்க²வே, அஞ்ஞதரஸ்மிம் ஆவாஸே வஸ்ஸூபக³தோ ஸங்கோ⁴ ஸபா⁴க³ம் ஆபத்திம் ஆபன்னோ ஹோதி. தேஹி, பி⁴க்க²வே, பி⁴க்கூ²ஹி ஏகோ பி⁴க்கு² ஸாமந்தா ஆவாஸா ஸஜ்ஜுகம் பாஹேதப்³போ³ – க³ச்சா²வுஸோ, தம் ஆபத்திம் படிகரித்வா ஆக³ச்ச²; மயம் தே ஸந்திகே தம் ஆபத்திம் படிகரிஸ்ஸாமாதி. ஏவஞ்சேதம் லபே⁴த², இச்சேதம் குஸலம். நோ சே லபே⁴த², ஏகோ பி⁴க்கு² ஸத்தாஹகாலிகம் பாஹேதப்³போ³ – க³ச்சா²வுஸோ, தம் ஆபத்திம் படிகரித்வா ஆக³ச்ச²; மயம் தே ஸந்திகே தம் ஆபத்திம் படிகரிஸ்ஸாமாதி.

தேன கோ² பன ஸமயேன அஞ்ஞதரஸ்மிம் ஆவாஸே ஸப்³போ³ ஸங்கோ⁴ ஸபா⁴க³ம் ஆபத்திம் ஆபன்னோ ஹோதி. ஸோ ந ஜானாதி தஸ்ஸா ஆபத்தியா நாமகோ³த்தம். தத்த² அஞ்ஞோ பி⁴க்கு² ஆக³ச்ச²தி ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ ப்³யத்தோ மேதா⁴வீ லஜ்ஜீ குக்குச்சகோ ஸிக்கா²காமோ. தமேனம் அஞ்ஞதரோ பி⁴க்கு² யேன ஸோ பி⁴க்கு² தேனுபஸங்கமி, உபஸங்கமித்வா தம் பி⁴க்கு²ம் ஏதத³வோச – ‘‘யோ நு கோ², ஆவுஸோ, ஏவஞ்சேவஞ்ச கரோதி, கிம் நாம ஸோ ஆபத்திம் ஆபஜ்ஜதீ’’தி? ஸோ ஏவமாஹ – ‘‘யோ கோ², ஆவுஸோ, ஏவஞ்சேவஞ்ச கரோதி, இமம் நாம ஸோ ஆபத்திம் ஆபஜ்ஜதி. இமம் நாம த்வம், ஆவுஸோ, ஆபத்திம் ஆபன்னோ; படிகரோஹி தம் ஆபத்தி’’ந்தி. ஸோ ஏவமாஹ – ‘‘ந கோ² அஹம், ஆவுஸோ, ஏகோவ இமம் ஆபத்திம் ஆபன்னோ; அயம் ஸப்³போ³ ஸங்கோ⁴ இமம் ஆபத்திம் ஆபன்னோ’’தி. ஸோ ஏவமாஹ – ‘‘கிம் தே, ஆவுஸோ, கரிஸ்ஸதி பரோ ஆபன்னோ வா அனாபன்னோ வா. இங்க⁴, த்வம், ஆவுஸோ, ஸகாய ஆபத்தியா வுட்டா²ஹீ’’தி. அத² கோ² ஸோ பி⁴க்கு² தஸ்ஸ பி⁴க்கு²னோ வசனேன தம் ஆபத்திம் படிகரித்வா யேன தே பி⁴க்கூ² தேனுபஸங்கமி, உபஸங்கமித்வா தே பி⁴க்கூ² ஏதத³வோச – ‘‘யோ கிர, ஆவுஸோ, ஏவஞ்சேவஞ்ச கரோதி, இமம் நாம ஸோ ஆபத்திம் ஆபஜ்ஜதி. இமம் நாம தும்ஹே, ஆவுஸோ, ஆபத்திம் ஆபன்னா; படிகரோத² தம் ஆபத்தி’’ந்தி. அத² கோ² தே பி⁴க்கூ² ந இச்சி²ம்ஸு தஸ்ஸ பி⁴க்கு²னோ வசனேன தம் ஆபத்திம் படிகாதும். ப⁴க³வதோ ஏதமத்த²ம் ஆரோசேஸும்.

இத⁴ பன, பி⁴க்க²வே, அஞ்ஞதரஸ்மிம் ஆவாஸே ஸப்³போ³ ஸங்கோ⁴ ஸபா⁴க³ம் ஆபத்திம் ஆபன்னோ ஹோதி. ஸோ ந ஜானாதி தஸ்ஸா ஆபத்தியா நாமகோ³த்தம். தத்த² அஞ்ஞோ பி⁴க்கு² ஆக³ச்ச²தி ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ ப்³யத்தோ மேதா⁴வீ லஜ்ஜீ குக்குச்சகோ ஸிக்கா²காமோ. தமேனம் அஞ்ஞதரோ பி⁴க்கு² யேன ஸோ பி⁴க்கு² தேனுபஸங்கமி, உபஸங்கமித்வா தம் பி⁴க்கு²ம் ஏவம் வதே³தி – ‘‘யோ நு கோ², ஆவுஸோ, ஏவஞ்சேவஞ்ச கரோதி, கிம் நாம ஸோ ஆபத்திம் ஆபஜ்ஜதீ’’தி? ஸோ ஏவம் வதே³தி – ‘‘யோ கோ², ஆவுஸோ, ஏவஞ்சேவஞ்ச கரோதி, இமம் நாம ஸோ ஆபத்திம் ஆபஜ்ஜதி. இமம் நாம த்வம், ஆவுஸோ, ஆபத்திம் ஆபன்னோ; படிகரோஹி தம் ஆபத்தி’’ந்தி. ஸோ ஏவம் வதே³தி – ‘‘ந கோ² அஹம், ஆவுஸோ, ஏகோவ இமம் ஆபத்திம் ஆபன்னோ. அயம் ஸப்³போ³ ஸங்கோ⁴ இமம் ஆபத்திம் ஆபன்னோ’’தி. ஸோ ஏவம் வதே³தி – ‘‘கிம் தே, ஆவுஸோ, கரிஸ்ஸதி பரோ ஆபன்னோ வா அனாபன்னோ வா. இங்க⁴, த்வம், ஆவுஸோ, ஸகாய ஆபத்தியா வுட்டா²ஹீ’’தி. ஸோ சே, பி⁴க்க²வே, பி⁴க்கு² தஸ்ஸ பி⁴க்கு²னோ வசனேன தம் ஆபத்திம் படிகரித்வா யேன தே பி⁴க்கூ² தேனுபஸங்கமி, உபஸங்கமித்வா தே பி⁴க்கூ² ஏவம் வதே³தி – ‘‘யோ கிர, ஆவுஸோ, ஏவஞ்சேவஞ்ச கரோதி இமம் நாம ஸோ ஆபத்திம் ஆபஜ்ஜதி, இமம் நாம தும்ஹே ஆவுஸோ ஆபத்திம் ஆபன்னா, படிகரோத² தம் ஆபத்தி’’ந்தி. தே சே, பி⁴க்க²வே, பி⁴க்கூ² தஸ்ஸ பி⁴க்கு²னோ வசனேன தம் ஆபத்திம் படிகரேய்யும், இச்சேதம் குஸலம். நோ சே படிகரேய்யும், ந தே, பி⁴க்க²வே, பி⁴க்கூ² தேன பி⁴க்கு²னா அகாமா வசனீயாதி.

சோத³னாவத்து²பா⁴ணவாரோ நிட்டி²தோ து³தியோ.