87. பாரிஸுத்³தி⁴தா³னகதா²

164. அத² கோ² ப⁴க³வா பி⁴க்கூ² ஆமந்தேஸி – ‘‘ஸன்னிபதத², பி⁴க்க²வே, ஸங்கோ⁴ உபோஸத²ம் கரிஸ்ஸதீ’’தி. ஏவம் வுத்தே அஞ்ஞதரோ பி⁴க்கு² ப⁴க³வந்தம் ஏதத³வோச – ‘‘அத்தி², ப⁴ந்தே, பி⁴க்கு² கி³லானோ, ஸோ அனாக³தோ’’தி. அனுஜானாமி, பி⁴க்க²வே, கி³லானேன பி⁴க்கு²னா பாரிஸுத்³தி⁴ம் தா³தும். ஏவஞ்ச பன, பி⁴க்க²வே, தா³தப்³பா³ – தேன கி³லானேன பி⁴க்கு²னா ஏகம் பி⁴க்கு²ம் உபஸங்கமித்வா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘பாரிஸுத்³தி⁴ம் த³ம்மி, பாரிஸுத்³தி⁴ம் மே ஹர, பாரிஸுத்³தி⁴ம் மே ஆரோசேஹீ’’தி. காயேன விஞ்ஞாபேதி, வாசாய விஞ்ஞாபேதி, காயேன வாசாய விஞ்ஞாபேதி, தி³ன்னா ஹோதி பாரிஸுத்³தி⁴. ந காயேன விஞ்ஞாபேதி, ந வாசாய விஞ்ஞாபேதி, ந காயேன வாசாய விஞ்ஞாபேதி, ந தி³ன்னா ஹோதி பாரிஸுத்³தி⁴. ஏவஞ்சேதம் லபே⁴த², இச்சேதம் குஸலம். நோ சே லபே⁴த², ஸோ, பி⁴க்க²வே, கி³லானோ பி⁴க்கு² மஞ்சேன வா பீடே²ன வா ஸங்க⁴மஜ்ஜே² ஆனேத்வா உபோஸதோ² காதப்³போ³. ஸசே, பி⁴க்க²வே, கி³லானுபட்டா²கானம் பி⁴க்கூ²னம் ஏவம் ஹோதி – ‘‘ஸசே கோ² மயம் கி³லானம் டா²னா சாவேஸ்ஸாம, ஆபா³தோ⁴ வா அபி⁴வட்³டி⁴ஸ்ஸதி காலம்கிரியா வா ப⁴விஸ்ஸதீ’’தி, ந, பி⁴க்க²வே, கி³லானோ பி⁴க்கு² டா²னா சாவேதப்³போ³. ஸங்கே⁴ன தத்த² க³ந்த்வா உபோஸதோ² காதப்³போ³. ந த்வேவ வக்³கே³ன ஸங்கே⁴ன உபோஸதோ² காதப்³போ³. கரேய்ய சே, ஆபத்தி து³க்கடஸ்ஸ.

பாரிஸுத்³தி⁴ஹாரகோ சே, பி⁴க்க²வே, தி³ன்னாய பாரிஸுத்³தி⁴யா தத்தே²வ பக்கமதி, அஞ்ஞஸ்ஸ தா³தப்³பா³ பாரிஸுத்³தி⁴. பாரிஸுத்³தி⁴ஹாரகோ சே, பி⁴க்க²வே, தி³ன்னாய பாரிஸுத்³தி⁴யா தத்தே²வ விப்³ப⁴மதி,…பே… காலம் கரோதி – ஸாமணேரோ படிஜானாதி – ஸிக்க²ம் பச்சக்கா²தகோ படிஜானாதி – அந்திமவத்து²ம் அஜ்ஜா²பன்னகோ படிஜானாதி – உம்மத்தகோ படிஜானாதி – கி²த்தசித்தோ படிஜானாதி – வேத³னாட்டோ படிஜானாதி – ஆபத்தியா அத³ஸ்ஸனே உக்கி²த்தகோ படிஜானாதி – ஆபத்தியா அப்படிகம்மே உக்கி²த்தகோ படிஜானாதி – பாபிகாய தி³ட்டி²யா அப்படினிஸ்ஸக்³கே³ உக்கி²த்தகோ படிஜானாதி – பண்ட³கோ படிஜானாதி – தே²ய்யஸம்வாஸகோ படிஜானாதி – தித்தி²யபக்கந்தகோ படிஜானாதி – திரச்சா²னக³தோ படிஜானாதி – மாதுகா⁴தகோ படிஜானாதி – பிதுகா⁴தகோ படிஜானாதி – அரஹந்தகா⁴தகோ படிஜானாதி – பி⁴க்கு²னிதூ³ஸகோ படிஜானாதி – ஸங்க⁴பே⁴த³கோ படிஜானாதி – லோஹிதுப்பாத³கோ படிஜானாதி – உப⁴தோப்³யஞ்ஜனகோ படிஜானாதி, அஞ்ஞஸ்ஸ தா³தப்³பா³ பாரிஸுத்³தி⁴.

பாரிஸுத்³தி⁴ஹாரகோ சே, பி⁴க்க²வே, தி³ன்னாய பாரிஸுத்³தி⁴யா அந்தராமக்³கே³ பக்கமதி, அனாஹடா ஹோதி பாரிஸுத்³தி⁴. பாரிஸுத்³தி⁴ஹாரகோ சே, பி⁴க்க²வே, தி³ன்னாய பாரிஸுத்³தி⁴யா அந்தராமக்³கே³ விப்³ப⁴மதி,…பே… உப⁴தோப்³யஞ்ஜனகோ படிஜானாதி, அனாஹடா ஹோதி பாரிஸுத்³தி⁴.

பாரிஸுத்³தி⁴ஹாரகோ சே, பி⁴க்க²வே, தி³ன்னாய பாரிஸுத்³தி⁴யா ஸங்க⁴ப்பத்தோ பக்கமதி, ஆஹடா ஹோதி பாரிஸுத்³தி⁴. பாரிஸுத்³தி⁴ஹாரகோ சே, பி⁴க்க²வே, தி³ன்னாய பாரிஸுத்³தி⁴யா ஸங்க⁴ப்பத்தோ விப்³ப⁴மதி,…பே… உப⁴தோப்³யஞ்ஜனகோ படிஜானாதி, ஆஹடா ஹோதி பாரிஸுத்³தி⁴.

பாரிஸுத்³தி⁴ஹாரகோ சே, பி⁴க்க²வே, தி³ன்னாய பாரிஸுத்³தி⁴யா ஸங்க⁴ப்பத்தோ ஸுத்தோ ந ஆரோசேதி, பமத்தோ ந ஆரோசேதி, ஸமாபன்னோ ந ஆரோசேதி, ஆஹடா ஹோதி பாரிஸுத்³தி⁴. பாரிஸுத்³தி⁴ஹாரகஸ்ஸ அனாபத்தி.

பாரிஸுத்³தி⁴ஹாரகோ சே, பி⁴க்க²வே, தி³ன்னாய பாரிஸுத்³தி⁴யா ஸங்க⁴ப்பத்தோ ஸஞ்சிச்ச ந ஆரோசேதி, ஆஹடா ஹோதி பாரிஸுத்³தி⁴. பாரிஸுத்³தி⁴ஹாரகஸ்ஸ ஆபத்தி து³க்கடஸ்ஸாதி.