88. ச²ந்த³தா³னகதா²

165. அத² கோ² ப⁴க³வா பி⁴க்கூ² ஆமந்தேஸி – ‘‘ஸன்னிபதத², பி⁴க்க²வே, ஸங்கோ⁴ கம்மம் கரிஸ்ஸதீ’’தி. ஏவம் வுத்தே அஞ்ஞதரோ பி⁴க்கு² ப⁴க³வந்தம் ஏதத³வோச – ‘‘அத்தி², ப⁴ந்தே, பி⁴க்கு² கி³லானோ, ஸோ அனாக³தோ’’தி. அனுஜானாமி, பி⁴க்க²வே, கி³லானேன பி⁴க்கு²னா ச²ந்த³ம் தா³தும். ஏவஞ்ச பன, பி⁴க்க²வே, தா³தப்³போ³. தேன கி³லானேன பி⁴க்கு²னா ஏகம் பி⁴க்கு²ம் உபஸங்கமித்வா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘ச²ந்த³ம் த³ம்மி, ச²ந்த³ம் மே ஹர, ச²ந்த³ம் மே ஆரோசேஹீ’’தி. காயேன விஞ்ஞாபேதி, வாசாய விஞ்ஞாபேதி, காயேன வாசாய விஞ்ஞாபேதி, தி³ன்னோ ஹோதி ச²ந்தோ³. ந காயேன விஞ்ஞாபேதி, ந வாசாய விஞ்ஞாபேதி, ந காயேன வாசாய விஞ்ஞாபேதி, ந தி³ன்னோ ஹோதி ச²ந்தோ³. ஏவஞ்சேதம் லபே⁴த², இச்சேதம் குஸலம். நோ சே லபே⁴த², ஸோ, பி⁴க்க²வே, கி³லானோ பி⁴க்கு² மஞ்சேன வா பீடே²ன வா ஸங்க⁴மஜ்ஜே² ஆனேத்வா கம்மம் காதப்³ப³ம். ஸசே, பி⁴க்க²வே, கி³லானுபட்டா²கானம் பி⁴க்கூ²னம் ஏவம் ஹோதி – ‘‘ஸசே கோ² மயம் கி³லானம் டா²னா சாவேஸ்ஸாம, ஆபா³தோ⁴ வா அபி⁴வட்³டி⁴ஸ்ஸதி காலம்கிரியா வா ப⁴விஸ்ஸதீ’’தி, ந, பி⁴க்க²வே, கி³லானோ பி⁴க்கு² டா²னா சாவேதப்³போ³. ஸங்கே⁴ன தத்த² க³ந்த்வா கம்மம் காதப்³ப³ம். ந த்வேவ வக்³கே³ன ஸங்கே⁴ன கம்மம் காதப்³ப³ம். கரேய்ய சே, ஆபத்தி து³க்கடஸ்ஸ.

ச²ந்த³ஹாரகோ சே, பி⁴க்க²வே, தி³ன்னே ச²ந்தே³ தத்தே²வ பக்கமதி, அஞ்ஞஸ்ஸ தா³தப்³போ³ ச²ந்தோ³. ச²ந்த³ஹாரகோ சே, பி⁴க்க²வே, தி³ன்னே ச²ந்தே³ தத்தே²வ விப்³ப⁴மதி…பே… காலம்கரோதி – ஸாமணேரோ படிஜானாதி – ஸிக்க²ம் பச்சக்கா²தகோ படிஜானாதி – அந்திமவத்து²ம் அஜ்ஜா²பன்னகோ படிஜானாதி – உம்மத்தகோ படிஜானாதி – கி²த்தசித்தோ படிஜானாதி – வேத³னாட்டோ படிஜானாதி – ஆபத்தியா அத³ஸ்ஸனே உக்கி²த்தகோ படிஜானாதி – ஆபத்தியா அப்படிகம்மே உக்கி²த்தகோ படிஜானாதி – பாபிகாய தி³ட்டி²யா அப்படினிஸ்ஸக்³கே³ உக்கி²த்தகோ படிஜானாதி – பண்ட³கோ படிஜானாதி – தே²ய்யஸம்வாஸகோ படிஜானாதி – தித்தி²யபக்கந்தகோ படிஜானாதி – திரச்சா²னக³தோ படிஜானாதி – மாதுகா⁴தகோ படிஜானாதி – பிதுகா⁴தகோ படிஜானாதி – அரஹந்தகா⁴தகோ படிஜானாதி – பி⁴க்கு²னிதூ³ஸகோ படிஜானாதி – ஸங்க⁴பே⁴த³கோ படிஜானாதி – லோஹிதுப்பாத³கோ படிஜானாதி – உப⁴தோப்³யஞ்ஜனகோ படிஜானாதி, அஞ்ஞஸ்ஸ தா³தப்³போ³ ச²ந்தோ³.

ச²ந்த³ஹாரகோ சே, பி⁴க்க²வே, தி³ன்னே ச²ந்தே³ அந்தராமக்³கே³ பக்கமதி, அனாஹடோ ஹோதி ச²ந்தோ³. ச²ந்த³ஹாரகோ சே, பி⁴க்க²வே, தி³ன்னே ச²ந்தே³ அந்தராமக்³கே³ விப்³ப⁴மதி…பே… உப⁴தோப்³யஞ்ஜனகோ படிஜானாதி, அனாஹடோ ஹோதி ச²ந்தோ³.

ச²ந்த³ஹாரகோ சே, பி⁴க்க²வே, தி³ன்னே ச²ந்தே³ ஸங்க⁴ப்பத்தோ பக்கமதி, ஆஹடோ ஹோதி ச²ந்தோ³. ச²ந்த³ஹாரகோ சே, பி⁴க்க²வே, தி³ன்னே ச²ந்தே³ ஸங்க⁴ப்பத்தோ விப்³ப⁴மதி…பே… உப⁴தோப்³யஞ்ஜனகோ படிஜானாதி, ஆஹடோ ஹோதி ச²ந்தோ³.

ச²ந்த³ஹாரகோ சே, பி⁴க்க²வே, தி³ன்னே ச²ந்தே³ ஸங்க⁴ப்பத்தோ ஸுத்தோ ந ஆரோசேதி, பமத்தோ ந ஆரோசேதி, ஸமாபன்னோ ந ஆரோசேதி, ஆஹடோ ஹோதி ச²ந்தோ³. ச²ந்த³ஹாரகஸ்ஸ அனாபத்தி.

ச²ந்த³ஹாரகோ சே, பி⁴க்க²வே, தி³ன்னே ச²ந்தே³ ஸங்க⁴ப்பத்தோ ஸஞ்சிச்ச ந ஆரோசேதி, ஆஹடோ ஹோதி ச²ந்தோ³. ச²ந்த³ஹாரகஸ்ஸ ஆபத்தி து³க்கடஸ்ஸ. அனுஜானாமி, பி⁴க்க²வே, தத³ஹுபோஸதே² பாரிஸுத்³தி⁴ம் தே³ந்தேன ச²ந்த³ம்பி தா³தும், ஸந்தி ஸங்க⁴ஸ்ஸ கரணீயந்தி.