86. தி³ஸம்க³மிகாதி³வத்து²

163. தேன கோ² பன ஸமயேன ஸம்ப³ஹுலா பி⁴க்கூ² பா³லா அப்³யத்தா தி³ஸம்க³மிகா ஆசரியுபஜ்ஜா²யே ந ஆபுச்சி²ம்ஸு [ந ஆபுச்சி²ம்ஸு (க.)]. ப⁴க³வதோ ஏதமத்த²ம் ஆரோசேஸும்.

இத⁴ பன, பி⁴க்க²வே, ஸம்ப³ஹுலா பி⁴க்கூ² பா³லா அப்³யத்தா தி³ஸம்க³மிகா ஆசரியுபஜ்ஜா²யே ந ஆபுச்ச²ந்தி [ந ஆபுச்ச²ந்தி (க.)]. தே [தேஹி (க.)], பி⁴க்க²வே, ஆசரியுபஜ்ஜா²யேஹி புச்சி²தப்³பா³ – ‘‘கஹம் க³மிஸ்ஸத², கேன ஸத்³தி⁴ம் க³மிஸ்ஸதா²’’தி? தே சே, பி⁴க்க²வே, பா³லா அப்³யத்தா அஞ்ஞே பா³லே அப்³யத்தே அபதி³ஸேய்யும், ந, பி⁴க்க²வே, ஆசரியுபஜ்ஜா²யேஹி அனுஜானிதப்³பா³. அனுஜானேய்யும் சே, ஆபத்தி து³க்கடஸ்ஸ. தே ச, பி⁴க்க²வே, பா³லா அப்³யத்தா அனனுஞ்ஞாதா ஆசரியுபஜ்ஜா²யேஹி க³ச்சே²ய்யும் சே, ஆபத்தி து³க்கடஸ்ஸ.

இத⁴ பன, பி⁴க்க²வே, அஞ்ஞதரஸ்மிம் ஆவாஸே ஸம்ப³ஹுலா பி⁴க்கூ² விஹரந்தி பா³லா அப்³யத்தா. தே ந ஜானந்தி உபோஸத²ம் வா உபோஸத²கம்மம் வா, பாதிமோக்க²ம் வா பாதிமோக்கு²த்³தே³ஸம் வா. தத்த² அஞ்ஞோ பி⁴க்கு² ஆக³ச்ச²தி ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ ப்³யத்தோ மேதா⁴வீ லஜ்ஜீ குக்குச்சகோ ஸிக்கா²காமோ. தேஹி, பி⁴க்க²வே, பி⁴க்கூ²ஹி ஸோ பி⁴க்கு² ஸங்க³ஹேதப்³போ³ அனுக்³க³ஹேதப்³போ³ உபலாபேதப்³போ³ உபட்டா²பேதப்³போ³ சுண்ணேன மத்திகாய த³ந்தகட்டே²ன முகோ²த³கேன. நோ சே ஸங்க³ண்ஹேய்யும் அனுக்³க³ண்ஹேய்யும் உபலாபேய்யும் உபட்டா²பேய்யும் சுண்ணேன மத்திகாய த³ந்தகட்டே²ன முகோ²த³கேன, ஆபத்தி து³க்கடஸ்ஸ.

இத⁴ பன, பி⁴க்க²வே, அஞ்ஞதரஸ்மிம் ஆவாஸே தத³ஹுபோஸதே² ஸம்ப³ஹுலா பி⁴க்கூ² விஹரந்தி பா³லா அப்³யத்தா. தே ந ஜானந்தி உபோஸத²ம் வா உபோஸத²கம்மம் வா, பாதிமோக்க²ம் வா பாதிமோக்கு²த்³தே³ஸம் வா. தேஹி, பி⁴க்க²வே, பி⁴க்கூ²ஹி ஏகோ பி⁴க்கு² ஸாமந்தா ஆவாஸா ஸஜ்ஜுகம் பாஹேதப்³போ³ – ‘‘க³ச்சா²வுஸோ, ஸம்கி²த்தேன வா வித்தா²ரேன வா பாதிமோக்க²ம் பரியாபுணித்வா ஆக³ச்சா²’’தி. ஏவஞ்சேதம் லபே⁴த², இச்சேதம் குஸலம். நோ சே லபே⁴த², தேஹி, பி⁴க்க²வே, பி⁴க்கூ²ஹி ஸப்³பே³ஹேவ யத்த² ஜானந்தி உபோஸத²ம் வா உபோஸத²கம்மம் வா பாதிமோக்க²ம் வா பாதிமோக்கு²த்³தே³ஸம் வா, ஸோ ஆவாஸோ க³ந்தப்³போ³. நோ சே க³ச்சே²ய்யும், ஆபத்தி து³க்கடஸ்ஸ.

இத⁴ பன, பி⁴க்க²வே, அஞ்ஞதரஸ்மிம் ஆவாஸே ஸம்ப³ஹுலா பி⁴க்கூ² வஸ்ஸம் வஸந்தி பா³லா அப்³யத்தா. தே ந ஜானந்தி உபோஸத²ம் வா உபோஸத²கம்மம் வா பாதிமோக்க²ம் வா பாதிமோக்கு²த்³தே³ஸம் வா. தேஹி, பி⁴க்க²வே, பி⁴க்கூ²ஹி ஏகோ பி⁴க்கு² ஸாமந்தா ஆவாஸா ஸஜ்ஜுகம் பாஹேதப்³போ³ – ‘‘க³ச்சா²வுஸோ, ஸம்கி²த்தேன வா வித்தா²ரேன வா பாதிமோக்க²ம் பரியாபுணித்வா ஆக³ச்சா²’’தி. ஏவஞ்சேதம் லபே⁴த², இச்சேதம் குஸலம். நோ சே லபே⁴த², ஏகோ பி⁴க்கு² ஸத்தாஹகாலிகம் பாஹேதப்³போ³ – ‘‘க³ச்சா²வுஸோ, ஸம்கி²த்தேன வா வித்தா²ரேன வா பாதிமோக்க²ம் பரியாபுணித்வா ஆக³ச்சா²’’தி. ஏவஞ்சேதம் லபே⁴த², இச்சேதம் குஸலம். நோ சே லபே⁴த², ந, பி⁴க்க²வே, தேஹி பி⁴க்கூ²ஹி தஸ்மிம் ஆவாஸே வஸ்ஸம் வஸிதப்³ப³ம். வஸேய்யும் சே, ஆபத்தி து³க்கடஸ்ஸாதி.