85. புப்³ப³கரணானுஜானனா

159. தேன கோ² பன ஸமயேன அஞ்ஞதரஸ்மிம் ஆவாஸே உபோஸதா²கா³ரம் உக்லாபம் ஹோதி. ஆக³ந்துகா பி⁴க்கூ² உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆவாஸிகா பி⁴க்கூ² உபோஸதா²கா³ரம் ந ஸம்மஜ்ஜிஸ்ஸந்தீ’’தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, உபோஸதா²கா³ரம் ஸம்மஜ்ஜிதுந்தி.

அத² கோ² பி⁴க்கூ²னம் ஏதத³ஹோஸி – ‘‘கேன நு கோ² உபோஸதா²கா³ரம் ஸம்மஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தே²ரேன பி⁴க்கு²னா நவம் பி⁴க்கு²ம் ஆணாபேதுந்தி.

தே²ரேன ஆணத்தா நவா பி⁴க்கூ² ந ஸம்மஜ்ஜந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, தே²ரேன ஆணத்தேன அகி³லானேன ந ஸம்மஜ்ஜிதப்³ப³ம். யோ ந ஸம்மஜ்ஜேய்ய, ஆபத்தி து³க்கடஸ்ஸாதி.

160. தேன கோ² பன ஸமயேன உபோஸதா²கா³ரே ஆஸனம் அபஞ்ஞத்தம் ஹோதி. பி⁴க்கூ² ச²மாயம் நிஸீத³ந்தி, க³த்தானிபி சீவரானிபி பம்ஸுகிதானி ஹோந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, உபோஸதா²கா³ரே ஆஸனம் பஞ்ஞபேதுந்தி.

அத² கோ² பி⁴க்கூ²னம் ஏதத³ஹோஸி – ‘‘கேன நு கோ² உபோஸதா²கா³ரே ஆஸனம் பஞ்ஞபேதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தே²ரேன பி⁴க்கு²னா நவம் பி⁴க்கு²ம் ஆணாபேதுந்தி.

தே²ரேன ஆணத்தா நவா பி⁴க்கூ² ந பஞ்ஞபேந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, தே²ரேன ஆணத்தேன அகி³லானேன ந பஞ்ஞபேதப்³ப³ம். யோ ந பஞ்ஞபேய்ய, ஆபத்தி து³க்கடஸ்ஸாதி.

161. தேன கோ² பன ஸமயேன உபோஸதா²கா³ரே பதீ³போ ந ஹோதி. பி⁴க்கூ² அந்த⁴காரே காயம்பி சீவரம்பி அக்கமந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, உபோஸதா²கா³ரே பதீ³பம் காதுந்தி.

அத² கோ² பி⁴க்கூ²னம் ஏதத³ஹோஸி – ‘‘கேன நு கோ² உபோஸதா²கா³ரே பதீ³போ காதப்³போ³’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தே²ரேன பி⁴க்கு²னா நவம் பி⁴க்கு²ம் ஆணாபேதுந்தி.

தே²ரேன ஆணத்தா நவா பி⁴க்கூ² ந பதீ³பேந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, தே²ரேன ஆணத்தேன அகி³லானேன ந பதீ³பேதப்³போ³. யோ ந பதீ³பேய்ய, ஆபத்தி து³க்கடஸ்ஸாதி.

162. தேன கோ² பன ஸமயேன அஞ்ஞதரஸ்மிம் ஆவாஸே ஆவாஸிகா பி⁴க்கூ² நேவ பானீயம் உபட்டா²பேந்தி, ந பரிபோ⁴ஜனீயம் உபட்டா²பேந்தி. ஆக³ந்துகா பி⁴க்கூ² உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆவாஸிகா பி⁴க்கூ² நேவ பானீயம் உபட்டா²பேஸ்ஸந்தி, ந பரிபோ⁴ஜனீயம் உபட்டா²பேஸ்ஸந்தீ’’தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பானீயம் பரிபோ⁴ஜனீயம் உபட்டா²பேதுந்தி.

அத² கோ² பி⁴க்கூ²னம் ஏதத³ஹோஸி – ‘‘கேன நு கோ² பானீயம் பரிபோ⁴ஜனீயம் உபட்டா²பேதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தே²ரேன பி⁴க்கு²னா நவம் பி⁴க்கு²ம் ஆணாபேதுந்தி.

தே²ரேன ஆணத்தா நவா பி⁴க்கூ² ந உபட்டா²பேந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, தே²ரேன ஆணத்தேன அகி³லானேன ந உபட்டா²பேதப்³ப³ம். யோ ந உபட்டா²பேய்ய, ஆபத்தி து³க்கடஸ்ஸாதி.