84. பக்க²க³ணனாதி³உக்³க³ஹணானுஜானனா

156. அத² கோ² ப⁴க³வா சோத³னாவத்து²ஸ்மிம் யதா²பி⁴ரந்தம் விஹரித்வா புனதே³வ ராஜக³ஹம் பச்சாக³ஞ்சி².

தேன கோ² பன ஸமயேன மனுஸ்ஸா பி⁴க்கூ² பிண்டா³ய சரந்தே புச்ச²ந்தி – ‘‘கதிமீ, ப⁴ந்தே, பக்க²ஸ்ஸா’’தி? பி⁴க்கூ² ஏவமாஹம்ஸு – ‘‘ந கோ² மயம், ஆவுஸோ, ஜானாமா’’தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘பக்க²க³ணனமத்தமம்பிமே ஸமணா ஸக்யபுத்தியா ந ஜானந்தி, கிம் பனிமே அஞ்ஞம் கிஞ்சி கல்யாணம் ஜானிஸ்ஸந்தீ’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பக்க²க³ணனம் உக்³க³ஹேதுந்தி. அத² கோ² பி⁴க்கூ²னம் ஏதத³ஹோஸி – ‘‘கேன நு கோ² பக்க²க³ணனா உக்³க³ஹேதப்³பா³’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸப்³பே³ஹேவ பக்க²க³ணனம் உக்³க³ஹேதுந்தி.

157. தேன கோ² பன ஸமயேன மனுஸ்ஸா பி⁴க்கூ² பிண்டா³ய சரந்தே புச்ச²ந்தி – ‘‘கீவதிகா, ப⁴ந்தே, பி⁴க்கூ²’’தி? பி⁴க்கூ² ஏவமாஹம்ஸு – ‘‘ந கோ² மயம், ஆவுஸோ, ஜானாமா’’தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘அஞ்ஞமஞ்ஞம்பிமே ஸமணா ஸக்யபுத்தியா ந ஜானந்தி, கிம் பனிமே அஞ்ஞம் கிஞ்சி கல்யாணம் ஜானிஸ்ஸந்தீ’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பி⁴க்கூ² க³ணேதுந்தி.

அத² கோ² பி⁴க்கூ²னம் ஏதத³ஹோஸி – ‘‘கதா³ நு கோ² பி⁴க்கூ² க³ணேதப்³பா³’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தத³ஹுபோஸதே² நாமக்³கே³ன [நாமமத்தேன (ஸ்யா.), க³ணமக்³கே³ன (க.)] க³ணேதும், ஸலாகம் வா கா³ஹேதுந்தி.

158. தேன கோ² பன ஸமயேன பி⁴க்கூ² அஜானந்தா அஜ்ஜுபோஸதோ²தி தூ³ரம் கா³மம் பிண்டா³ய சரந்தி. தே உத்³தி³ஸ்ஸமானேபி பாதிமோக்கே² ஆக³ச்ச²ந்தி, உத்³தி³ட்ட²மத்தேபி ஆக³ச்ச²ந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஆரோசேதும் ‘அஜ்ஜுபோஸதோ²’தி.

அத² கோ² பி⁴க்கூ²னம் ஏதத³ஹோஸி – ‘‘கேன நு கோ² ஆரோசேதப்³போ³’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, தே²ரேன பி⁴க்கு²னா காலவதோ ஆரோசேதுந்தி.

தேன கோ² பன ஸமயேன அஞ்ஞதரோ தே²ரோ காலவதோ நஸ்ஸரதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ப⁴த்தகாலேபி ஆரோசேதுந்தி.

ப⁴த்தகாலேபி நஸ்ஸரதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, யம் காலம் ஸரதி, தம் காலம் ஆரோசேதுந்தி.