2. பவத்திவாரவண்ணனா

186. அஞ்ஞத⁴ம்மனிஸ்ஸயேனாதி ‘‘யோ தேஸம் ரூபீனம் த⁴ம்மானம் ஆயு டி²தீ’’திஆதி³னா (த⁴. ஸ. 634) அஞ்ஞத⁴ம்மனிஸ்ஸயேன க³ஹேதப்³ப³ம். பவத்திஞ்ச க³ஹேத்வா க³தேஸு விஸ்ஸஜ்ஜனேஸு, சுதிபடிஸந்தி⁴யோ க³ஹேத்வா க³தேஸு யோஜனா ந லப்³ப⁴தீதி அதி⁴ப்பாயோ. அலப்³ப⁴மானா ச ஸுக²து³க்க²தோ³மனஸ்ஸிந்த்³ரியேஹேவ ந லப்³ப⁴தி. தம்மூலகா ச நயாதி ஸுகி²ந்த்³ரியாதி³மூலகா ச நயா. தேஹீதி ஸுகி²ந்த்³ரியாதீ³ஹி. யோஜனாதி ‘‘பவத்தே ஸுகி²ந்த்³ரியவிப்பயுத்தசித்தஸ்ஸ உப்பாத³க்க²ணே’’திஆதி³னா உப்பஜ்ஜமானேஹி யோஜனா. தம்மூலகா ச ததா²யோஜனாமூலபூ⁴தா ச நயா ஜீவிதிந்த்³ரியாதி³மூலகா ச நயா. பாகடாயேவாதி பாளிக³தியா ஏவ விஞ்ஞாயமானயோஜனத்தா ஸுவிஞ்ஞேய்யா ஏவ.

தம் வசனம். ஸோமனஸ்ஸவிரஹிதஸசக்கு²கபடிஸந்தி⁴னித³ஸ்ஸனவஸேனாதி ஸோமனஸ்ஸவிரஹிதஸசக்கு²கபடிஸந்தி⁴யேவ நித³ஸ்ஸனந்தி யோஜேதப்³ப³ம். கத²ம் பனேதம் ஜானிதப்³ப³ம் ‘‘நித³ஸ்ஸனமத்தமேதம், ந பன க³ணனபரிச்சி²ந்த³ன’’ந்தி ஆஹ ‘‘ந ஹி சதுன்னம்யேவாதி நியமோ கதோ’’தி. தம்ஸமானலக்க²ணாதி தாய ஸசக்கு²கபடிஸந்தி⁴தாய ஸமானலக்க²ணாதி பரித்தவிபாகக்³க³ஹணம். தத்த² ஸஸோமனஸ்ஸபடிஸந்தி⁴யோ ஸந்தா⁴ய உபேக்கா²படிஸந்தி⁴யோ நித³ஸ்ஸனபா⁴வேன வுத்தாதி கேசி. பரித்தவிபாகபடிஸந்தி⁴ ச குஸலவிபாகாஹேதுகபடிஸந்தி⁴ வேதி³தப்³பா³. ஸாபி ஹி ஸசக்கு²கா ஸியா. தம்ஸமானலக்க²ணாதி வா தாய உபேக்கா²ஸஹக³தாய ஸமானலக்க²ணா யதா²வுத்தஅஹேதுகபடிஸந்தி⁴ ச பஞ்சமஜ்ஜா²னபடிஸந்தி⁴ ச. யதி³ ஏவம் ‘‘சதுன்ன’’ந்தி கஸ்மா க³ணனபரிச்சே²தோ³தி ஆஹ ‘‘காமாவசரே…பே… நித³ஸ்ஸனம் கத’’ந்தி. தேனாதி உபேக்கா²ஸஹக³தமஹாவிபாகனித³ஸ்ஸனேன, யேஹி ஸமானதாய இமே நித³ஸ்ஸனபா⁴வேன வுத்தா, தே ஏகம்ஸேன தம்ஸபா⁴வா ஏவாதி அயமேத்த² அதி⁴ப்பாயோ. தேனாஹ ‘‘யதா² ஸஸோமனஸ்ஸ…பே… தோ ஹோதீ’’தி.

நனு ச க³ப்³ப⁴ஸேய்யகேஸு அயமத்தோ² ஏகம்ஸதோ ந லப்³ப⁴தீதி ஆஸங்கம் ஸந்தா⁴யாஹ ‘‘க³ப்³ப⁴ஸேய்யகானஞ்ச…பே… த³ஸ்ஸிதா ஹோதீ’’தி. தேனாஹ ‘‘ஸசக்கு²கான’’ந்திஆதி³. தத்த² யதி³ ஸஹேதுகபடிஸந்தி⁴கானம் காமாவசரானம் நியமதோ ஸசக்கு²காதி³பா⁴வத³ஸ்ஸனம் க³ப்³ப⁴ஸேய்யகவஸேன லப்³பே⁴ய்ய, யுத்தமேதம் ஸியாதி சோத³னம் ஸந்தா⁴யாஹ ‘‘க³ப்³ப⁴ஸேய்யகேபி ஹீ’’திஆதி³. ததா² ஆயதனயமகே த³ஸ்ஸிதந்தி இத³ம் ஆயதனயமகவண்ணனாயம் அத்தனா வுத்தம் ‘‘ஏவஞ்ச கத்வா இந்த்³ரியயமகே’’திஆதி³வசனம் ஸந்தா⁴ய வுத்தம். தத்த² ஹி ஸோமனஸ்ஸிந்த்³ரியுப்பாத³ககம்மஸ்ஸ ஏகந்தேன சக்கு²ந்த்³ரியுப்பாத³னதோ க³ப்³பே⁴பி யாவ சக்கு²ந்த்³ரியுப்பத்தி, தாவ உப்பஜ்ஜமானதாய ‘‘அபி⁴னந்தி³தப்³ப³த்தா’’தி வுத்தம். ஸன்னிட்டா²னேன ஸங்க³ஹிதானந்தி ‘‘யஸ்ஸ வா பன ஸோமனஸ்ஸிந்த்³ரியம் உப்பஜ்ஜதீ’’தி ஏதேன ஸன்னிட்டா²னேன ஸங்க³ஹிதானம். இத்தீ²னம் அகா⁴னகானம் உபபஜ்ஜந்தீனந்தி ஆதீ³ஸூதி ஆதி³-ஸத்³தே³ன ‘‘இத்தீ²னம் அசக்கு²கானம் உபபஜ்ஜந்தீன’’ந்திஆதி³ம் ஸங்க³ண்ஹாதி. தே ஏவாதி க³ப்³ப⁴ஸேய்யகா ஏவ.

தம்ஸமானலக்க²ணந்தி ஸோபேக்க²அசக்கு²கபடிஸந்தி⁴பா⁴வேன ஸமானலக்க²ணம். தத்தா²தி அஹேதுகபடிஸந்தி⁴சித்தே. ஸமாதி⁴லேஸோ து³ப்³ப³லஸமாதி⁴ யோ சித்தட்டி²திமத்தோ. தஸ்மாதி யஸ்மா சித்தட்டி²தி விய து³ப்³ப³லம் வீரியம் நத்தி², யோ ‘‘வீரியலேஸோ’’தி வத்தப்³போ³, தஸ்மா, லேஸமத்தஸ்ஸபி வீரியஸ்ஸ அபா⁴வாதி அத்தோ². அஞ்ஞேஸூதி அஹேதுகபடிஸந்தி⁴சித்ததோ அஞ்ஞேஸு. கேஸுசீதி ஏகச்சேஸு. உப⁴யேனபி மனோத்³வாராவஜ்ஜனஹஸிதுப்பாத³சித்தம் வத³தி. இதா⁴தி அஹேதுகபடிஸந்தி⁴சித்தே. ஸமாதி⁴வீரியானி இந்த்³ரியப்பத்தானி ச ந ஹோந்தீதி ஸமாதி⁴கிச்சம் படிக்கி²பதி, ந ஸமாதி⁴மத்தம், ந வீரியலேஸஸ்ஸ ஸப்³பா⁴வதோதி யோஜேதப்³ப³ம். தேனேவாஹ ‘‘விஸேஸனஞ்ஹி விஸேஸிதப்³பே³ பவத்ததீ’’தி. யஸ்மிம் வீரியே ஸதி இந்த்³ரியுப்பத்தி ஸியா, ததே³வ தத்த² நத்தீ²தி அத்தோ².

அபாயே ஓபபாதிகவஸேனாதி இத³ம் ஸுக³தியம் ஓபபாதிகோ விகலிந்த்³ரியோ ந ஹோதீதி கத்வா வுத்தம், ‘‘லப்³ப⁴ந்தேவ ஞாணவிப்பயுத்தான’’ந்தி பன வுத்தத்தா ‘‘து³ஹேதுகபடிஸந்தி⁴கானம் வஸேனா’’தி அட்ட²கதா²யம் வுத்தம். தேஸந்தி இத்தி²புரிஸிந்த்³ரியஸந்தானானம். இத்தி²புரிஸிந்த்³ரியானம் பன உப்பாத³னிரோதா⁴ அபி⁴ண்ஹஸோவ ஹோந்தீதி. பட²மகப்பிகாதீ³னந்தி ஏத்த² ஆதி³-ஸத்³தே³ன க³ஹிதானம் பரிவத்தமானலிங்கா³னம் வஸேன உப்பாத³னிரோத⁴க்³க³ஹணம் வேதி³தப்³ப³ம். பட²மகப்பிகானம் பன வஸேன உப்பாதோ³ ஏவ லப்³ப⁴தி. ‘‘சுதிஉபபத்திவஸேனேவ து³தியபுச்சா²ஸுபி ஸன்னிட்டா²னேஹி க³ஹணம் வேதி³தப்³ப³’’ந்தி இத³ம் உபாதி³ன்னஇந்த்³ரியேஹி நியமிதத்தா வுத்தம்.

190. ஸந்தானுப்பத்தினிரோத⁴த³ஸ்ஸனதோதி ஸந்தானவஸேன உப்பாத³னிரோதா⁴னம் தி³ஸ்ஸமானத்தா. ஏதேன ரூபஜீவிதிந்த்³ரியஸ்ஸ சக்கு²ந்த்³ரியாதி³ஸமானக³திகதம் யுத்திதோ ஸாதே⁴தி. ஆக³மதோ பன ‘‘வினா ஸோமனஸ்ஸேனா’’திஆதி³னா பரதோ ஸாதே⁴ஸ்ஸதி. சே²தோ³தி நாமம் த³ட்ட²ப்³ப³ம் ஸரூபத³ஸ்ஸனேனேவ ஸம்ஸயசே²த³னதோ.

தஸ்ஸாதி ரூபஜீவிதிந்த்³ரியஸ்ஸ. தே ச அஸஞ்ஞஸத்தா. நனு ச உப்பாதோ³வ ஜீவிதிந்த்³ரியஸ்ஸ சுதிஉபபத்திவஸேன வத்தப்³போ³, ந அனுப்பாதோ³தி ஆஹ ‘‘அனுப்பாதோ³…பே… ந பவத்தே’’தி. அயஞ்ச நயோ ந கேவலம் புரிமகோட்டா²ஸே ஏவ, அத² கோ² இதரகோட்டா²ஸேபி க³ஹிதோ ஏவாதி த³ஸ்ஸேந்தோ ‘‘பச்சி²மகோட்டா²ஸேபீ’’திஆதி³மாஹ.

‘‘உபபத்திசித்தஸ்ஸ உப்பாத³க்க²ணே’’தி கஸ்மா வுத்தந்தி யேனாதி⁴ப்பாயேன சோத³னா கதா, தமதி⁴ப்பாயம் விவரிதும் ‘‘நனு ஸுத்³தா⁴வாஸ’’ந்திஆதி³ வுத்தம். ந வத்தப்³ப³ந்தி ‘‘உபபஜ்ஜந்தான’’ந்தி ந வத்தப்³ப³ம், ‘‘உபபத்திசித்தஸ்ஸ உப்பாத³க்க²ணே’’இச்சேவ வத்தப்³ப³ந்தி அத்தோ². இதா³னி யதா² ‘‘உபபஜ்ஜந்தான’’ந்தி ந வத்தப்³ப³ம், தம் த³ஸ்ஸேதும் ‘‘யதா² ஹீ’’திஆதி³ வுத்தம். ஸோமனஸ்ஸமனிந்த்³ரியானந்தி ஸோமனஸ்ஸிந்த்³ரியமனிந்த்³ரியானம், அயமேவ வா பாடோ². ததா³தி பட²மஸ்ஸ ரூபஜீவிதிந்த்³ரியஸ்ஸ த⁴ரமானகாலே. தஸ்மாதி யஸ்மா ரூபாரூபஜீவிதிந்த்³ரியானம் அத்தே²வ காலபே⁴தோ³, உப⁴யஞ்சேத்த² ஜீவிதிந்த்³ரியபா⁴வஸாமஞ்ஞேன ஏகஜ்ஜ²ம் கத்வா க³ய்ஹதி, தஸ்மா. உப⁴யந்தி ஸோமனஸ்ஸிந்த்³ரியஜீவிதிந்த்³ரியந்தி இத³ம் உப⁴யம். உப்பாத³க்க²ணேன நித³ஸ்ஸிதந்தி ஏதேன ‘‘உபபத்திசித்தஸ்ஸ உப்பாத³க்க²ணே’’தி இத³ம் நித³ஸ்ஸனமத்தந்தி த³ஸ்ஸேதி. இதா³னி தமேவத்த²ம் உதா³ஹரணேன பாகடதரம் காதும் ‘‘யதா² ஹீ’’திஆதி³ வுத்தம். தத்த² யதா² தாதி³ஸானம் அனேகேஸம் சித்தானம் ப⁴ங்க³க்க²ணே லப்³ப⁴மானம் ததே³கதே³ஸேன ஸப்³ப³பட²மஸ்ஸ உபபத்திசித்தஸ்ஸ ப⁴ங்க³க்க²ணேன நித³ஸ்ஸிதம், ஏவமிதா⁴பி க²ணத்³வயே லப்³ப⁴மானம் ததே³கதே³ஸேன உப்பாத³க்க²ணேன நித³ஸ்ஸிதந்தி ஏவம் நித³ஸ்ஸனத்தோ² வேதி³தப்³போ³.

தேஸந்தி ஜீவிதிந்த்³ரியாதீ³னம். அஞ்ஞத்தா²தி பவத்தே. இதா⁴தி அனாக³தகாலபே⁴தே³. ந ந ஸம்ப⁴வதி உபபத்திக்க²ணஸ்ஸ விய ததோ பரம் பவத்திக்க²ணஸ்ஸபி அனாக³தகாலபா⁴வதோ. தஸ்மாதி உபபத்திதோ அஞ்ஞத்தா²பி யதா²தி⁴ப்பேதஉப்பாத³ஸம்ப⁴வதோ. அயஞ்ச அத்தோ² வாரந்தரேபி தி³ஸ்ஸதீதி த³ஸ்ஸேந்தோ ஆஹ ‘‘ஏவஞ்ச கத்வா’’திஆதி³. ந ஹீதிஆதி³னா தமேவத்த²ம் ஸமத்தே²தி. தத்த² அபி பச்சி²ம…பே… ஸந்தி⁴கஸ்ஸாதி அபி-ஸத்³தே³ன ‘‘கோ பன வாதோ³ அபச்சி²மப⁴விகஸ்ஸ ஸோமனஸ்ஸஸஹக³தபடிஸந்தி⁴கஸ்ஸா’’தி த³ஸ்ஸேதி. அபச்சி²மப⁴விகஸ்ஸ சுதிதோ பச்சா² ‘‘ஸோமனஸ்ஸிந்த்³ரியம் நிருஜ்ஜி²ஸ்ஸதீ’’தி வத்தப்³ப³மேவ நத்தீ²தி ஆஹ ‘‘சுதிதோ புப்³பே³வா’’தி. ஏத்த² ஹி பட²மபுச்சா²ஸு ஸன்னிட்டா²னத்தோ²திஆதீ³ஸு அயம் ஸங்கே²பத்தோ² – ஏத்த² ‘‘யஸ்ஸ சக்கு²ந்த்³ரியம் உப்பஜ்ஜிஸ்ஸதீ’’தி ஏவமாதீ³ஸு யமகேஸு யா பட²மபுச்சா², தாஸு ஸன்னிட்டா²னபத³ஸங்க³ஹிதோ அத்தோ². புச்சி²தப்³ப³த்த²னிஸ்ஸயோதி ‘‘தஸ்ஸ ஸோமனஸ்ஸிந்த்³ரியம் உப்பஜ்ஜிஸ்ஸதீ’’திஆதி³கஸ்ஸ புச்சி²தப்³ப³ஸ்ஸ அத்த²ஸ்ஸ நிஸ்ஸயபூ⁴தோ மாதி³ஸோவ மயா ஸதி³ஸோ ஏவ அத்தோ² உபபத்திஉப்பாதி³ந்த்³ரியவா உபபத்திக்க²ணே உப்பாதா³வத்த²இந்த்³ரியஸஹிதோ, உப⁴யுப்பாதி³ந்த்³ரியவா படிஸந்தி⁴பவத்தீஸு உப்பாதா³வத்த²இந்த்³ரியஸஹிதோ வா. படினிவத்தித்வாபி புச்சி²தப்³ப³த்த²ஸ்ஸ நிஸ்ஸயோதி ‘‘யஸ்ஸ வா பனா’’திஆதி³னா படினிவத்தித்வா புச்சி²தப்³ப³ஸ்ஸபி ஸம்ஸயத்த²ஸ்ஸ நிஸ்ஸயோதி ஏவம் இமினா விய அஜ்ஜா²ஸயேன ‘‘யஸ்ஸ வா பன ஸோமனஸ்ஸிந்த்³ரியம் உப்பஜ்ஜிஸ்ஸதீ’’திஆதீ³ஸு து³தியபுச்சா²ஸு ஸன்னிட்டா²னத்த²மேவ ஸன்னிட்டா²னபத³ஸங்க³ஹிதமேவ அத்த²ம் நியமேதி. தத்தே²வ தாஸு ஏவ புப்³பே³ வுத்தபட²மபுச்சா²ஸு ஏவ. புச்சி²தப்³ப³ம் ‘‘தஸ்ஸ ஸோமனஸ்ஸிந்த்³ரியம் உப்பஜ்ஜிஸ்ஸதீ’’திஆதீ³ஸு அனாக³தபா⁴வமத்தேன ஸரூபதோ க³ஹிதம் உப்பாத³ம் உப்பாத³ஸங்கா²தம், ‘‘தஸ்ஸ ஸோமனஸ்ஸிந்த்³ரியம் நிருஜ்ஜி²ஸ்ஸதீ’’திஆதீ³ஸு அனாக³தபா⁴வமத்தேன ஸரூபதோ க³ஹிதம் நிரோத⁴ம் வா நிரோத⁴ஸங்கா²தம் வா ஸம்ஸயத்த²ம் ந நியமேதீதி. ஏவந்தி வுத்தப்பகாரேன ஸன்னிட்டா²னத்த²ஸ்ஸ நியமோ ஹோதி, ந ஸம்ஸயத்த²ஸ்ஸ, தஸ்மா ‘‘யஸ்ஸ வா பன…பே… ஆமந்தா’’தி வுத்தம். ஏஸ நயோதி ய்வாயம் உப்பாத³வாரே விசாரோ வுத்தோ, நிரோத⁴வாரேபி ஏஸேவ நயோ. ததா² ஹி ‘‘யஸ்ஸ வா பன ஸோமனஸ்ஸிந்த்³ரியம் நிருஜ்ஜி²ஸ்ஸதி, தஸ்ஸ சக்கு²ந்த்³ரியம் நிருஜ்ஜி²ஸ்ஸதீதி? ஆமந்தா’’தி வுத்தம்.

ஏவம் அவுத்தத்தாதி உப்பாத³னிரோதா⁴னம் அனாக³தானம் ஸரூபேன அவுத்தத்தா. ந ஹி தத்த² தே ஸரூபேன வுத்தா, அத² கோ² ‘‘நுப்பஜ்ஜிஸ்ஸதீ’’தி படிக்கே²பமுகே²ன வுத்தா. தத்தா²தி அனுலோமே. ந ஏவம் யோஜேதப்³பா³ படிலோமே. தமேவ அயோஜேதப்³ப³தம் ‘‘யதா² ஹீ’’திஆதி³னா விவரதி. உப்பாத³னிரோதே⁴ அதிக்கமித்வா உப்பாத³னிரோதா⁴ ஸம்ப⁴வந்தி யோஜேதும், ததா² உப்பாத³னிரோதே⁴ அப்பத்வா உப்பாத³னிரோதா⁴ ஸம்ப⁴வந்தி யோஜேதுந்தி யோஜனா. இத³ஞ்ச த்³வயம் யதா²னுலோமே ஸம்ப⁴வதி, ந ஏவம் படிலோமே. தேனாஹ ‘‘ந ஏவம்…பே… ஸம்ப⁴வந்தீ’’தி. தத்த² காரணமாஹ ‘‘அபூ⁴தாபா⁴வஸ்ஸ…பே… ஸம்ப⁴வானுபபத்திதோ’’தி. அபூ⁴தாபா⁴வஸ்ஸாதி அபூ⁴தஸ்ஸ அபா⁴வஸ்ஸ, அபூ⁴தஸ்ஸ உப்பாத³ஸ்ஸ நிரோத⁴ஸ்ஸ ச அபா⁴வஸ்ஸாதி அதி⁴ப்பாயோ. தேனாஹ ‘‘அபூ⁴துப்பாத³னிரோதா⁴பா⁴வோ ச படிலோமே புச்சி²தோ’’தி, தஸ்மா ‘‘ஆமந்தா’’தி ச வுத்தம், ந வுத்தம் விஸ்ஸஜ்ஜனந்தி ஸம்ப³ந்தோ⁴. அஸ்ஸ விஸேஸரஹிதஸ்ஸ அபூ⁴தாபா⁴வஸ்ஸாதி இமஸ்ஸ யதா²வுத்தஸ்ஸ யதா² ரூபாபா⁴வோ வேத³னாபா⁴வோதி கோசி அபா⁴வோபி விஸேஸஸஹிதோ, ந ஏவமயந்தி விஸேஸரஹிதஸ்ஸ அபூ⁴தாபா⁴வஸ்ஸ.

காலந்தரயோகா³பா⁴வதோதி காலவிஸேஸயோகா³பா⁴வதோ. யாதி³ஸானந்தி யானி பூ⁴தானி ந வத்தமானானி ஸதி பச்சயே உப்பஜ்ஜனாரஹானி, தேஸம் அனாக³தானந்தி அத்தோ². உப்பாத³னிரோதா⁴பா⁴வேன புச்சி²தப்³ப³ஸ்ஸாதி ‘‘நுப்பஜ்ஜிஸ்ஸதி ந நிருஜ்ஜி²ஸ்ஸதீ’’தி ஏவம் உப்பாத³ஸ்ஸ நிரோத⁴ஸ்ஸ ச அபா⁴வேன புச்சி²தப்³ப³ஸ்ஸ அத்த²ஸ்ஸ. ஸன்னிஸ்ஸயோ நிஸ்ஸயபூ⁴தோ ஸன்னிட்டா²னேன ஸன்னிச்சி²தோ ஸன்னிட்டா²னபத³ஸங்க³ஹிதோ. ஸோ யதா²வுத்தோ அத்தோ² நிஸ்ஸயோ ஏதேஸந்தி தன்னிஸ்ஸயா. தாதி³ஸானம்யேவ அனாக³தானம்யேவ உபபத்திசுதிஉப்பாத³னிரோதா⁴னம் உபபத்திசுதிஸங்கா²தஉப்பாத³னிரோதா⁴னம் அனுப்பாதா³னிரோதா⁴னம் படிக்கே²பவஸேன. ஜீவிதாதீ³னம்பி ஜீவிதமனிந்த்³ரியாதீ³னம்பி. அனுப்பாதா³னிரோதா⁴ ஸம்ஸயபதே³ன புச்சி²தா ஹோந்தி ‘‘யஸ்ஸ ஸோமனஸ்ஸிந்த்³ரியம் நுப்பஜ்ஜிஸ்ஸதி, தஸ்ஸ ஸோமனஸ்ஸிந்த்³ரியம் ந நிருஜ்ஜி²ஸ்ஸதீ’’தி. ‘‘ஆமந்தா’’தி வுத்தம் விப⁴ஜித்வா வத்தப்³ப³ஸ்ஸ அபா⁴வதோ. தேனாஹ ‘‘ந வுத்தம்…பே… விஸ்ஸஜ்ஜன’’ந்தி.

யே ஸோபேக்க²படிஸந்தி⁴கா ப⁴விஸ்ஸந்தி ரூபலோகே, தே ஸங்க³ஹிதாதி யோஜனா. தம்ஸமானலக்க²ணதாயாதி தேன ஸோபேக்க²படிஸந்தி⁴கபா⁴வேன ஸமானலக்க²ணதாய. தம் பமாத³லிகி²தம் த⁴ம்மயமகே தாதி³ஸஸ்ஸேவ வசனஸ்ஸ அபா⁴வதோ. தத்த²பி யம் வத்தப்³ப³ம், தம் சித்தயமகே வுத்தம் ‘‘ந ஹி க²ணபச்சுப்பன்னே உப்பஜ்ஜித்தா²தி அதீதவோஹாரோ அத்தீ²’’திஆதி³னா.

பவத்திவாரவண்ணனா நிட்டி²தா.