3. பரிஞ்ஞாவாரவண்ணனா

435-482. லோகியஅப்³யாகதேஹீதி ப²லத⁴ம்மனிப்³பா³னவினிமுத்தேஹி அப்³யாகதேஹி. தானி உபாதா³யாதி தானி லோகியஅப்³யாகதானி உபாதா³ய. தம்ஸமானக³திகானம் மனிந்த்³ரியாதீ³னம் ‘‘ஸோ வேத³னாக்க²ந்த⁴ம் பரிஜானாதீதி? ஆமந்தா’’திஆதி³னா (யம. 1.க²ந்த⁴யமக.206) வேத³னாக்க²ந்தா⁴தீ³னம் விய பரிஞ்ஞேய்யதா வுத்தா. யஞ்ஹி பரிஜானிதப்³ப³ம், ததே³வ பரிஜானாதீதிஆதி³னா வுத்தம். ஏவமவிபரீதே அத்தே² ஸித்³தே⁴பி சோத³கோ ‘‘மிஸ்ஸகத்தா’’தி ஏத்த² லப்³ப⁴மானம் லேஸம் க³ஹேத்வா சோதே³தி ‘‘யதி³ பரிஞ்ஞேய்யமிஸ்ஸகத்தா’’திஆதி³னா. தஸ்ஸத்தோ² – யதா² இத⁴ பரிஞ்ஞேய்யமிஸ்ஸகானம் பரிஞ்ஞேய்யதா வுத்தா, ஏவமஞ்ஞத்தா²பி ஸா தேஸம் வத்தப்³பா³, ததா² பா⁴வேதப்³ப³மிஸ்ஸகானம் பா⁴வேதப்³ப³தாதி. தேனாஹ ‘‘கஸ்மா த⁴ம்மயமகே’’திஆதி³. குஸலாகுஸலேஸு பா⁴வனாபஹானாபி⁴னிவேஸோ ஹோதி, யேன வுத்தம் ‘‘ஸோ தம் அகுஸலம் பஜஹதி, குஸலம் பா⁴வேதீ’’திஆதி³. ந அப்³யாகதபா⁴வந்தி ஏகேன யதா² ப²ஸ்ஸத்³வாரதோ விய விஞ்ஞாணத்³வாரதோ குஸலாதீ³னம் உப்பத்திபரியாயோ, ஏவம் வேத³னாக்க²ந்தா⁴தீ³னம் விய ந அப்³யாகதாதீ³னம் பரிஞ்ஞேய்யதாபரியாயோதி த³ஸ்ஸேதி.

குஸலாகுஸலபா⁴வேன அக்³க³ஹிதாதி ஸமுத³யஸபா⁴வேன அக்³க³ஹிதாதி அத்தோ². குஸலாகுஸலாபீதி குஸலாகுஸலபா⁴வாபி ஸமானா. பா⁴வேதப்³ப³பஹாதப்³ப³பா⁴வேஹி வினாபி ஹோதி, யோ ந மக்³க³ஸமுத³யஸச்சபக்கி²யோ. யதா² ‘‘அனிச்சம் ரூப’’ந்தி ஏத்த² ‘‘அனிச்சமேவ ரூபம், ந நிச்ச’’ந்தி படியோகி³வினிவத்தனமேவ ஏவ-காரேன கரீயதி, ந தஸ்ஸ து³க்கா²னத்ததாத³யோ நிவாரிதா ஹோந்தி, ஏவம் ‘‘பஹாதப்³ப³மேவா’’தி ஏத்த² ஏவ-ஸத்³தே³ன படியோகி³பூ⁴தம் அப்பஹாதப்³ப³மேவ நிவத்தீயதி, ந ததோ அஞ்ஞவிஸேஸாதி த³ஸ்ஸேந்தோ ஆஹ ‘‘ஏதேன பஹாதப்³ப³மேவா’’திஆதி³. பா⁴வேதப்³ப³பா⁴வோ ஏவ தஸ்ஸ அஞ்ஞிந்த்³ரியஸ்ஸ க³ஹிதோ உக்கம்ஸக³திவிஜானனதோ. ‘‘பரதோ லிகி²தப்³ப³ம் உப்படிபாடியா லிகி²த’’ந்தி கஸ்மா வுத்தம். த்³வே புக்³க³லாதி ஹி ஆதி³ அனுலோமே ஆக³தம் உத்³த⁴டம், சக்கு²ந்த்³ரியம் ந பரிஜானாதீதிஆதி³ பன படிலோமே. தோ³மனஸ்ஸிந்த்³ரியம் ந பஜஹந்தி நாமாதி இத³ம் ‘‘நோ ச தோ³மனஸ்ஸிந்த்³ரியம் பஜஹந்தீ’’தி பாளிபத³ஸ்ஸ அத்த²வசனம். யம் பன ‘‘சக்கு²ந்த்³ரியமூலகம் அதிக்கமித்வா தோ³மனஸ்ஸிந்த்³ரியமூலகே இத³ம் வுத்த’’ந்தி வுத்தம், படிலோமே ஆக³தம் ஸந்தா⁴ய வுத்தத்தா தம் ந யுத்தம், ந தம் அட்ட²கதா²சரியா பட²மம் ஆக³தம் பத³ம் லங்கி⁴த்வா தாதி³ஸஸ்ஸேவ பச்சா² ஆக³தபத³ஸ்ஸ அத்த²வண்ணனம் கரோந்தி. பதா³னுக்கமதோ ஏவ ஹி அட்ட²கதா²யம் அத்த²வண்ணனா ஆரத்³தா⁴, பரியோஸாபிதா ச, தஸ்மா அனுபடிபாடியாவ லிகி²தம், ந உப்படிபாடியாதி த³ட்ட²ப்³ப³ம் ‘‘த்³வே புக்³க³லா’’திஆதி³கஸ்ஸ அனுலோமே ஆக³தஸ்ஸ உத்³த⁴டத்தா.

ஏத்தா²தி ஏதஸ்மிம் பரிஞ்ஞாவாரே. ச² புக்³க³லாதி புது²ஜ்ஜனேன ஸத்³தி⁴ம் யாவ அனாகா³மிமக்³க³ட்டா² ச² புக்³க³லா. அபி⁴ந்தி³த்வா க³ஹிதோ தத்த² ப⁴ப்³பா³ப⁴ப்³பா³னம் கிச்சவிஸேஸஸ்ஸ அக்³க³ஹிதத்தா. யத்த² பன ஸதி புது²ஜ்ஜனக்³க³ஹணஸாமஞ்ஞே ப⁴ப்³பா³னம் கிச்சம் க³ஹிதம், யத்த² ச அப⁴ப்³பா³னம், தத்த² தே ஏவ பி⁴ந்தி³த்வா வுத்தா ஹோந்தீதி த³ஸ்ஸேந்தோ ‘‘யே ச புது²ஜ்ஜனா மக்³க³ம் படிலபி⁴ஸ்ஸந்தி, யே ச புது²ஜ்ஜனா மக்³க³ம் ந படிலபி⁴ஸ்ஸந்தீ’’தி ச ஆதி³மாஹ. அரஹாதி அரியோ, அயமேவ வா பாடோ². பட²மமக்³க³ப²லஸமங்கீ³தி புரிமமக்³க³ப²லஸமங்கீ³. இதரோதி அரஹா. ஏவம் புக்³க³லபே⁴த³ம் ஞத்வாதி இத⁴ புது²ஜ்ஜனோ ஸோ ச அப⁴ப்³போ³தி க³ஹிதோ, இத⁴ ப⁴ப்³போ³ இத⁴ அரியா, யே ச பட²மமக்³க³ப²லஸமங்கி³னோ யாவ அக்³க³மக்³க³ப²லஸமங்கி³னோதி ஏவம் யதா²வுத்தம் புக்³க³லவிபா⁴க³ம் ஞத்வா. தத்த² தத்தா²தி தேஸம் த்³வே புது²ஜ்ஜனா அட்ட² அரியாதி இமேஸம் யதா²வுத்தபுக்³க³லானம் பே⁴த³தோ அபே⁴த³தோ ச க³ஹணவஸேன ஆக³தே தஸ்மிம் தஸ்மிம் பாட²பதே³ஸே. ஸன்னிட்டா²னேனாதி ஸன்னிட்டா²னபத³வஸேன, நிச்ச²யவஸேனேவ வா. நித்³தா⁴ரேத்வாதி நீஹரித்வா. விஸ்ஸஜ்ஜனம் யோஜேதப்³ப³ந்தி விஸ்ஸஜ்ஜனவஸேன பவத்தபாளியா யதா²வுத்தஅத்த²த³ஸ்ஸனேன ஸம்ப³ந்த⁴தோ விபா⁴வேதப்³போ³தி.

பரிஞ்ஞாவாரவண்ணனா நிட்டி²தா.

இந்த்³ரியயமகவண்ணனா நிட்டி²தா.

யமகபகரண-அனுடீகா ஸமத்தா.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ