3. பரிஞ்ஞாவாரவண்ணனா

165-170. ஏத்தே²வாதி இமஸ்மிம் ஸச்சயமகே ஏவ. அபரிஞ்ஞேய்யதாத³ஸ்ஸனத்த²ந்தி ஏத்த² அ-காரோ ந பரிஞ்ஞேய்யாபா⁴வவசனோ, நாபி பரிஞ்ஞேய்யபடிபக்க²வசனோ, அத² கோ² தத³ஞ்ஞவசனோதி யதா²ரஹம் ஸச்சேஸு லப்³ப⁴மானானம் பஹாதப்³ப³தாதீ³னம்பி த³ஸ்ஸனே ஆபன்னேயேவ ஸமயவாரோ த³ஸ்ஸனபரோ, யேஸஞ்ச ந த³ஸ்ஸனபரோ, தேஸு கேஸுசி ஸச்சேஸு லப்³ப⁴மானானம்பி கேஸஞ்சி விஸேஸானம் அயம் வாரோ ந த³ஸ்ஸனபரோதி த³ஸ்ஸேந்தோ ‘‘ஸச்சி²கரண…பே… த³ஸ்ஸனத்த²ஞ்சா’’தி ஆஹ. ஸமுத³யே பஹானபரிஞ்ஞாவ வுத்தா, ந தீரணபரிஞ்ஞாதி யுத்தம் தாவேதம் ஸமுத³யஸ்ஸபி தீரேதப்³ப³ஸபா⁴வத்தா, ‘‘து³க்கே² தீரணபரிஞ்ஞாவ வுத்தா, ந பஹானபரிஞ்ஞா’’தி இத³ம் பன கஸ்மா வுத்தம், நனு து³க்க²ம் அப்பஹாதப்³ப³மேவாதி? ஸமுத³யஸச்சவிப⁴ங்கே³ வுத்தானம் கேஸஞ்சி ஸமுத³யகோட்டா²ஸானம் து³க்க²ஸச்சே ஸங்க³ஹணதோ து³க்க²ஸமுத³யே வா அஸங்கரதோவ க³ஹேத்வா பூ⁴தகத²னமேதம் த³ட்ட²ப்³ப³ம். உப⁴யத்தா²தி து³க்கே² ஸமுத³யே ச வுத்தா. கஸ்மா? தேஸம் ஸாதா⁴ரணாதி. ஏவம் ஸாதா⁴ரணாஸாதா⁴ரணபே⁴த³பி⁴ன்னம் யதா²வுத்தம் பரிஞ்ஞாகிச்சம் புப்³ப³பா⁴கே³ நானக்க²ணே லப்³ப⁴மானம்பி மக்³க³காலே ஏகக்க²ணே ஏவ லப்³ப⁴தி ஏகஞாணகிச்சத்தாதி த³ஸ்ஸேதும் ‘‘மக்³க³ஞாணஞ்ஹீ’’திஆதி³ வுத்தம்.

பரிஞ்ஞாவாரவண்ணனா நிட்டி²தா.

ஸச்சயமகவண்ணனா நிட்டி²தா.