1. பண்ணத்திவாரோ
உத்³தே³ஸவாரவண்ணனா
1-9. வுத்தனயேனாதி ‘‘அவயவபதே³ஹி வுத்தோ ஏகதே³ஸோ ஸகலோ வா ஸமுதா³யபதா³னம் அத்தோ², ஸமுதா³யபதே³ஹி பன வுத்தோ ஏகந்தேன அவயவபதா³னம் அத்தோ²’’திஆதி³னா வுத்தேன நயேன. ஏதேன யதா²வுத்தஅத்த²வண்ணனானயத³ஸ்ஸனதாய ஸப்³ப³பண்ணத்திவாராதீ³ஸு யதா²ரஹம் அத்தோ² நேதப்³போ³தி த³ஸ்ஸேதி.
உத்³தே³ஸவாரவண்ணனா நிட்டி²தா.
நித்³தே³ஸவாரவண்ணனா
10-17. வாயனம் ஸவிஸயம் ப்³யாபேத்வா பவத்தனம், தயித³ம் யதா² க³ந்தா⁴யதனே லப்³ப⁴தி, ஏவம் ஸீலாதீ³ஸுபீதி பாளியம் ‘‘ஸீலக³ந்தோ⁴’’திஆதி³ வுத்தம் ‘‘ஸீலாதி³யேவ க³ந்தோ⁴’’தி கத்வா. தேனாஹ அட்ட²கதா²யம் ‘‘ஸீலக³ந்தோ⁴…பே… நாமானீ’’தி. யஸ்மா பன ஸவிஸயப்³யாபனம் தத்த² பஸடபா⁴வோ பாகடபா⁴வோ வா ஹோதி, தஸ்மா ‘‘பஸாரணட்டே²ன பாகடபா⁴வட்டே²ன வா’’தி வுத்தம். அத்தனோ வத்து²ஸ்ஸ ஸூசனம் வா வாயனம். ‘‘தே³வகாயா ஸமாக³தா (தீ³. நி. 2.332; ஸம். நி. 1.37), பண்ணத்தித⁴ம்மா’’திஆதீ³ஸு (த⁴. ஸ. து³கமாதிகா 108) ஸமூஹபஞ்ஞத்தீஸுபி காயத⁴ம்மஸத்³தா³ ஆக³தாதி ‘‘ஸஸபா⁴வ’’ந்தி விஸேஸேதி. காயவசனேன…பே… நத்தீ²தி இத³ம் ‘‘ந த⁴ம்மோ நாயதன’’ந்தி ஏத்த² த⁴ம்மஸத்³த³ஸ்ஸ வினிவத்தவிஸேஸஸப்³ப³ஸபா⁴வத⁴ம்மவாசகதம் ஸந்தா⁴ய வுத்தம், ந த⁴ம்மாயதனஸங்கா²தத⁴ம்மவிஸேஸவாசகதந்தி த³ட்ட²ப்³ப³ம்.
நித்³தே³ஸவாரவண்ணனா நிட்டி²தா.
2. பவத்திவாரவண்ணனா
18-21. ஏதஸ்மிந்தி பவத்திவாரே. புச்சா²மத்தலாபே⁴னாதி மோக⁴புச்சா²பா⁴வமாஹ. ஏகேகந்தி ‘‘யஸ்ஸ சக்கா²யதனம் உப்பஜ்ஜதி, தஸ்ஸ ஸத்³தா³யதனம் உப்பஜ்ஜதீ’’திஆதி³கம் ஏகேகம். பஞ்சாதி ‘‘யஸ்ஸ ஸத்³தா³யதனம் உப்பஜ்ஜதி, தஸ்ஸ க³ந்தா⁴யதனம் உப்பஜ்ஜதீ’’திஆதீ³னி பஞ்ச. புச்சா²மத்தலாபே⁴ன ஸங்க³ஹம் அனுஜானந்தோ ‘‘விஸ்ஸஜ்ஜனவஸேன ஹாபேதப்³பா³னீ’’தி ஆஹ. ‘‘வக்க²தி ஹீ’’திஆதி³னா யதா²வுத்தமத்த²ம் அட்ட²கதா²ய ஸமத்தே²தி.
ஸதி³ஸவிஸ்ஸஜ்ஜனந்தி ஸாமஞ்ஞவசனம் விஸேஸனிவிட்ட²மேவ ஹோதீதி தம் விஸேஸம் த³ஸ்ஸேந்தோ ‘‘புக்³க³லவாரமேவ ஸந்தா⁴ய வுத்த’’ந்தி வத்வா தஸ்ஸா பன ஸதி³ஸவிஸ்ஸஜ்ஜனதாய அப்³யாபிதத்தா யத்த² ஸதி³ஸம், தத்தா²பி விஸ்ஸஜ்ஜிதந்தி த³ஸ்ஸேந்தோ ‘‘ஓகாஸவாரே பன…பே… விஸ்ஸஜ்ஜித’’ந்தி ஆஹ. தத்த² தந்தி து³தியம். புக்³க³லவாரேபீதி யத்த² ஸதி³ஸம் விஸ்ஸஜ்ஜனம், தத்த² புக்³க³லவாரேபி விஸ்ஸஜ்ஜிதம், பகே³வ ஓகாஸவாரேதி அதி⁴ப்பாயோ. விரத்தகாமகம்மனிப்³ப³த்தஸ்ஸாதி பா⁴வனாப³லேன விரத்தோ காமோ ஏதேனாதி விரத்தகாமம், ரூபாவசரகம்மம், ததோ நிப்³ப³த்தஸ்ஸ. படிஸந்தி⁴ ஏவ பீ³ஜம் படிஸந்தி⁴பீ³ஜம், தஸ்ஸ. ‘‘ஏவம்ஸபா⁴வத்தா’’தி ஏதேன ஏகந்ததோ காமதண்ஹானிதா³னகம்மஹேதுகானி கா⁴னாதீ³னீதி த³ஸ்ஸேதி. க³ந்தா⁴த³யோ ச ந ஸந்தீதி ஸப்³பே³ன ஸப்³ப³ம் தேஸம்பி அபா⁴வம் ஸந்தா⁴ய வத³தி. தத்த² யம் வத்தப்³ப³ம், தம் ஹேட்டா² வுத்தமேவ.
‘‘ஸச்ச’’ந்தி யதா²வுத்தவஸேன க³ஹேதப்³ப³ம் சோத³கேன வுத்தமத்த²ம் ஸம்படிச்சி²த்வா புன யேனாதி⁴ப்பாயேன தானி யமகானி ஸதி³ஸவிஸ்ஸஜ்ஜனானி, தம் த³ஸ்ஸேதும் ‘‘யதா² பனா’’திஆதி³ வுத்தம். தத்ராயம் ஸங்கே²பத்தோ² – தத்த² சக்கா²யதனமூலகேஸு கா⁴னாயதனயமகேன ‘‘ஸசக்கு²கானம் அகா⁴னகானம் உபபஜ்ஜந்தான’’ந்திஆதி³னா நயேன ஜிவ்ஹாகாயாயதனயமகானி யதா² ஸதி³ஸவிஸ்ஸஜ்ஜனானி, ததா² இத⁴ கா⁴னாயதனமூலகேஸு கா⁴னாயதனயமகேன தானி ஜிவ்ஹாகாயாயதனயமகானி ‘‘யஸ்ஸ கா⁴னாயதனம் உப்பஜ்ஜதி, தஸ்ஸ ஜிவ்ஹாயதனம் உப்பஜ்ஜதீதி? ஆமந்தா’’திஆதி³னா நயேன ஸதி³ஸவிஸ்ஸஜ்ஜனானீதி. ஏவமேத்த² உப⁴யேஸம் விஸும் அஞ்ஞமஞ்ஞம் ஸதி³ஸவிஸ்ஸஜ்ஜனதாய இத³ம் வுத்தம், ந ஏகஜ்ஜ²ம் அஞ்ஞமஞ்ஞம் ஸதி³ஸவிஸ்ஸஜ்ஜனதாய. தேனாஹ ‘‘தஸ்மா தத்த² தத்தே²வ ஸதி³ஸவிஸ்ஸஜ்ஜனதா பாளிஅனாருள்ஹதாய காரண’’ந்தி. ஏவஞ்ச ஸதி சக்கா²யதனமூலக்³க³ஹணம் கிமத்தி²யந்தி ஆஹ ‘‘நித³ஸ்ஸனபா⁴வேனா’’திஆதி³. தத்த² நித³ஸ்ஸனபா⁴வேனாதி நித³ஸ்ஸனபூ⁴தானம் அஞ்ஞமஞ்ஞஸதி³ஸவிஸ்ஸஜ்ஜனதாஸங்கா²தேன நித³ஸ்ஸனபா⁴வேனேவ, ந பன தேஸம் நித³ஸ்ஸிதப்³பே³ஹி ஸப்³ப³தா² ஸதி³ஸவிஸ்ஸஜ்ஜனதாயாதி அதி⁴ப்பாயோ. ‘‘யேபு⁴ய்யதாயா’’தி வுத்தம் யேபு⁴ய்யதம் த³ஸ்ஸேதும் ‘‘தேஸு ஹீ’’திஆதி³ வுத்தம்.
ஏவந்தி இமினா ‘‘ஆமந்தா’’தி படிவசனவிஸ்ஸஜ்ஜனேன யதா²வுத்தவசனஸ்ஸேவ விஸ்ஸஜ்ஜனபா⁴வானுஜானனம் கத்தப்³ப³ந்தி இமமத்த²ம் ஆகட்³ட⁴தி. ஸாதி து³தியபுச்சா². கா⁴னாயதனயமகேனாதி சக்கா²யதனமூலகேஸு கா⁴னாயதனயமகேனேவ. தம்ஸேஸானீதி தேன கா⁴னாயதனமூலககாயாயதனயமகேன ஸத்³தி⁴ம் ஸேஸானி. ஸதி³ஸவிஸ்ஸஜ்ஜனத்தா அனாருள்ஹானீதி ஏத்த² ‘‘அனாருள்ஹானீ’’தி ஏத்தகமேவ ததா²-ஸத்³தே³ன அனுகட்³டீ⁴யதி, ந ‘‘ஸதி³ஸவிஸ்ஸஜ்ஜனத்தா’’தி த³ஸ்ஸேந்தோ ‘‘ததா²தி…பே… ஸமஞ்ஞேனா’’தி வத்வா இதா³னி ‘‘காரணஸாமஞ்ஞேனா’’தி வுத்தஸ்ஸ ஸதி³ஸவிஸ்ஸஜ்ஜனத்தஸ்ஸ தத்த² அபா⁴வம் த³ஸ்ஸேதும் ‘‘கா⁴னஜிவ்ஹாகாயாயதனானம் பனா’’திஆதி³ வுத்தம். தத்த² அக³ப்³ப⁴ஸேய்யகேஸு பவத்தமானானந்தி ஏத்தா²பி ‘‘ஸஹசாரிதாயா’’தி பத³ம் ஆனேத்வா ஸம்ப³ந்தி⁴தப்³ப³ம், ததா² ‘‘க³ப்³ப⁴ஸேய்யகேஸு ச பவத்தமானான’’ந்தி. இதரானி கா⁴னாயதனமூலகானி ஜிவ்ஹாகாயாயதனயமகானி த்³வே ந விஸ்ஸஜ்ஜீயந்தி, கா⁴னாயதனமூலகேஸு ச யமகேஸு விஸ்ஸஜ்ஜிதேஸு இதரத்³வயமூலகானி ஜிவ்ஹாகாயாயதனமூலகானி ந விஸ்ஸஜ்ஜீயந்தி அவிஸேஸத்தா அப்பவிஸேஸத்தா சாதி யோஜேதப்³ப³ம். தத்த² காயாயதனயமகே து³தியபுச்சா²வஸேன அப்பவிஸேஸோ, இதரவஸேன அவிஸேஸோ வேதி³தப்³போ³. ரூபாயதனமனாயதனேஹி ஸத்³தி⁴ந்தி இத³ம் ரூபாயதனமூலகமனாயதனவஸேன வுத்தந்தி ஆஹ ‘‘ரூபாயதன…பே… அதி⁴ப்பாயோ’’தி. தேனேவாஹ ‘‘ரூபாயதனமூலகேஸு ஹீ’’திஆதி³. யமகானந்தி ரூபாயதனமூலகக³ந்த⁴ரஸபோ²ட்ட²ப்³பா³யதனயமகானம். து³தியபுச்சா²னந்தி யதா²வுத்தயமகானம்யேவ து³தியபுச்சா²னம். வுத்தனயேனாதி ‘‘ஸரூபகானம் அசித்தகான’’ந்திஆதி³னா வுத்தேன நயேன. ஆதி³புச்சா²னந்தி தேஸம்யேவ யமகானம் பட²மபுச்சா²னம்.
ஹேட்டி²மேஹீதி இத³ம் அவிஸேஸவசனம்பி யேஸு ஸதி³ஸவிஸ்ஸஜ்ஜனதா ஸம்ப⁴வதி, தத³பேக்க²ந்தி ஆஹ ‘‘க³ந்த⁴ரஸ…பே… அத்தோ²’’தி. உத்³தி³ட்ட²த⁴ம்மேஸு உத்³தே³ஸானுரூபம் லப்³ப⁴மானவிஸேஸகத²னம் விஸ்ஸஜ்ஜனம், யோ தத்த² ந ஸப்³பே³ன ஸப்³ப³ம் உத்³தே³ஸானுரூபகு³ணேன உபலப்³ப⁴தி, தஸ்ஸ அகத²னம்பி அத்த²தோ விஸ்ஸஜ்ஜனமேவ நாம ஹோதீதி ஆஹ ‘‘அவிஸ்ஸஜ்ஜனேனேவ அலப்³ப⁴மானதாத³ஸ்ஸனேன விஸ்ஸஜ்ஜிதானி நாம ஹோந்தீ’’தி.
சக்கு²விகலஸோதவிகலா விய சக்கு²ஸோதவிகலோபி லப்³ப⁴தீதி ஸோ பன அட்ட²கதா²யம் பி-ஸத்³தே³ன ஸங்க³ஹிதோதி த³ஸ்ஸேந்தோ ‘‘ஜச்சந்த⁴ம்பி…பே… வேதி³தப்³போ³’’தி ஆஹ. பரிபுண்ணாயதனமேவ ஓபபாதிகம் ஸந்தா⁴ய வுத்தந்தி ஏத்த² அட்டா²னப்பயுத்தோ ஏவ-ஸத்³தோ³தி தஸ்ஸ டா²னம் த³ஸ்ஸேந்தோ ‘‘வுத்தமேவாதி அத்தோ²’’தி வத்வா தேன பரிபுண்ணாயதனஸ்ஸ தத்த² அனியதத்தா அபரிபுண்ணாயதனஸ்ஸபி ஸங்க³ஹோ ஸித்³தோ⁴தி த³ஸ்ஸேந்தோ ‘‘தேன ஜச்சந்த⁴ப³தி⁴ரம்பி ஸந்தா⁴ய வுத்ததா ந நிவாரிதா ஹோதீ’’தி ஆஹ.
22-254. தஸ்மிம் புக்³க³லஸ்ஸ அனாமட்ட²த்தாதி கஸ்மா வுத்தம், யாவதா ‘‘ரூபீப்³ரஹ்மலோகம் புச்ச²தீ’’தி இமினாபி ஓகாஸோயேவ ஆமட்டோ²தி. ‘‘ஆமந்தா’’தி படிஞ்ஞாய காரணவிபா⁴வனாதி⁴ப்பாயேனேவ ‘‘கஸ்மா படிஞ்ஞாத’’ந்தி சோத³னம் ஸமுட்டா²பேத்வா தம் காரணம் த³ஸ்ஸேதுகாமோ ‘‘நனூ’’திஆதி³மாஹ. க³ப்³ப⁴ஸேய்யகபா⁴வம் க³ந்த்வா பரினிப்³பா³யிஸ்ஸதீதி பச்சி²மப⁴விகம் ஸந்தா⁴யாஹ. தத³வத்த²ஸ்ஸாதி பச்சி²மப⁴வாவத்த²ஸ்ஸ. ப⁴விஸ்ஸந்தஸ்ஸாதி பா⁴வினோ. படிஞ்ஞாதப்³ப³த்தாதி ‘‘உப்பஜ்ஜிஸ்ஸதீ’’தி படிஞ்ஞாதப்³ப³த்தா.
அத² கஸ்மாதி ஏத்தா²யம் ஸங்கே²பத்தோ² – யதி³ ‘‘யஸ்ஸ ரூபாயதனம் உப்பஜ்ஜிஸ்ஸதி, தஸ்ஸ சக்கா²யதனம் உப்பஜ்ஜிஸ்ஸதீ’’தி புச்சா²யம் வுத்தேன விதி⁴னா படிஞ்ஞாதப்³ப³ம், அத² கஸ்மா அத² கேன காரணேன படிலோமே ‘‘யஸ்ஸ வா பன ரூபாயதனம் நுப்பஜ்ஜிஸ்ஸதி, தஸ்ஸ சக்கா²யதனம் நுப்பஜ்ஜிஸ்ஸதீ’’தி புச்சா²ய ‘‘ஆமந்தா’’தி படிஞ்ஞாதம், நனு இத³ம் அஞ்ஞமஞ்ஞம் விருத்³த⁴ந்தி? நனூதிஆதி³னாபி சோத³கோ தமேவ விரோத⁴ம் விபா⁴வேதி. நோ ச நுப்பஜ்ஜிஸ்ஸதி உப்பஜ்ஜிஸ்ஸதி ஏவாதி அத்தோ². ‘‘தஸ்மிம் ப⁴வே’’திஆதி³ தஸ்ஸ பரிஹாரோ. தத்த² தஸ்மிம் ப⁴வேதி யஸ்மிம் ப⁴வே ‘‘ரூபாயதனம் நுப்பஜ்ஜிஸ்ஸதீ’’தி வுத்தம் பவத்தமானத்தா, தஸ்மிம் ப⁴வே. அனாக³தபா⁴வேன அவசனதோதி பா⁴வீபா⁴வேன அவத்தப்³ப³தோ ஆரத்³து⁴ப்பாத³பா⁴வேன பவத்தமானத்தாதி அதி⁴ப்பாயோ. தேனேவாஹ ‘‘ப⁴வந்தரே ஹீ’’திஆதி³. ந பன வுச்சதீதி ஸம்ப³ந்தோ⁴. ஏவஞ்ச கத்வாதிஆதி³னா பாட²ந்தரேன யதா²வுத்தமத்த²ம் ஸமத்தே²தி.
யஸ்மிம் அத்தபா⁴வே யேஹி ஆயதனேஹி ப⁴விதப்³ப³ம், தம்தம்ஆயதனனிப்³ப³த்தககம்மேன அவஸ்ஸம்பா⁴வீஆயதனஸ்ஸ ஸத்தஸ்ஸ, ஸந்தானஸ்ஸ வா, ‘‘யஸ்ஸ வா பன ரூபாயதனம் உப்பஜ்ஜிஸ்ஸதி, தஸ்ஸ சக்கா²யதனம் உப்பஜ்ஜிஸ்ஸதீதி? ஆமந்தா, யஸ்ஸ வா பன ரூபாயதனம் நுப்பஜ்ஜிஸ்ஸதி, தஸ்ஸ சக்கா²யதனம் நுப்பஜ்ஜிஸ்ஸதீதி? ஆமந்தா’’தி ச ஏவம் பவத்தம் புச்சா²த்³வயவிஸ்ஸஜ்ஜனம் ஆயதனபடிலாப⁴ஸ்ஸ ஜாதிபா⁴வதோ ஸுட்டு² உபபன்னம் ப⁴வதி. பச்சி²மப⁴விகாத³யோதி ஏத்த² ஆதி³-ஸத்³தே³ன அரூபே உப்பஜ்ஜித்வா பரினிப்³பா³யனகா ஸங்க³ய்ஹந்தி. இத³ம்பி விஸ்ஸஜ்ஜனம். அபி⁴னந்தி³தப்³ப³த்தாதி ‘‘ஆமந்தா’’தி ஸம்படிச்சி²தப்³ப³த்தா.
யம் பன அகா⁴னகானம் காமாவசரம் உபபஜ்ஜந்தானந்தி வுத்தந்தி ஸம்ப³ந்தோ⁴. யஸ்ஸ விபாகோ கா⁴னாயதனுப்பத்திதோ புரேதரமேவ உபச்சி²ஜ்ஜிஸ்ஸதி, தம் கா⁴னாயதனானிப்³ப³த்தககம்மந்தி வுத்தம். கத²ம் பனீதி³ஸம் கம்மம் அத்தீ²தி விஞ்ஞாயதீதி ஆஹ ‘‘யஸ்ஸ யத்தா²’’திஆதி³. ஏவம்பி க³ப்³ப⁴ஸேய்யகோ ஏவ இத⁴ அகா⁴னகோதி அதி⁴ப்பேதோதி கத²மித³ம் விஞ்ஞாயதீதி சோத³னாய ‘‘ந ஹீ’’திஆதி³ம் வத்வா தமத்த²ம் ஸாதே⁴தும் ‘‘த⁴ம்மஹத³யவிப⁴ங்கே³’’திஆதி³ வுத்தம். அவசனத்தம்பி ஹி யதா²த⁴ம்மஸாஸனே அபி⁴த⁴ம்மே படிக்கே²போயேவாதி. இதா⁴தி இமஸ்மிம் ஆயதனயமகே. யதா²த³ஸ்ஸிதாஸூதி ‘‘யஸ்ஸ வா பன ஸோதாயதனம் நுப்பஜ்ஜிஸ்ஸதி, தஸ்ஸ சக்கா²யதனம் நுப்பஜ்ஜதி, யஸ்ஸ யத்த² கா⁴னாயதனம் ந நிருஜ்ஜ²தி, தஸ்ஸ தத்த² ரூபாயதனம் ந நிருஜ்ஜி²ஸ்ஸதீ’’தி ச த³ஸ்ஸிதப்பகாராஸு புச்சா²ஸு. ஆமந்தாதி வுத்தந்தி அத² கஸ்மா ந விஞ்ஞாயதீதி யோஜனா. ஏதாஸு புச்சா²ஸு கஸ்மா படிவசனேன விஸ்ஸஜ்ஜனம் ந கதந்தி அதி⁴ப்பாயோ. ஸன்னிட்டா²னேன க³ஹிதத்த²ஸ்ஸாதி ‘‘யஸ்ஸ வா பன ஸோதாயதனம் நுப்பஜ்ஜிஸ்ஸதி, யஸ்ஸ யத்த² கா⁴னாயதனம் ந நிருஜ்ஜி²ஸ்ஸதீ’’தி ச ஏவமாதி³கேன ஸன்னிட்டா²னபதே³ன க³ஹிதஸ்ஸ அத்த²ஸ்ஸ. ஏகதே³ஸே ஸம்ஸயத்த²ஸ்ஸ ஸம்ப⁴வேனாதி ஏகதே³ஸே ஸம்ஸயிதப்³ப³ஸ்ஸ அத்த²ஸ்ஸ ஸம்ப⁴வேன ஸன்னிட்டா²னத்த²படியோக³பூ⁴தஸம்ஸயத்த²ஸ்ஸ படிவசனஸ்ஸ அகரணதோ ‘‘ஆமந்தா’’தி படிவசனவிஸ்ஸஜ்ஜனஸ்ஸ அகத்தப்³ப³தோ அத்த²ஸ்ஸ அபி⁴ந்தி³த்வா ஏகஜ்ஜ²ம் கத்வா அவத்தப்³ப³தோ. தேனாஹ ‘‘பி⁴ந்தி³தப்³பே³ஹி ந படிவசனவிஸ்ஸஜ்ஜனம் ஹோதீ’’தி.
யதி³ ஸியாதி பி⁴ந்தி³த்வா வத்தப்³பே³பி அத்தே² யதி³ படிவசனவிஸ்ஸஜ்ஜனம் ஸியா, பரிபுண்ணவிஸ்ஸஜ்ஜனமேவ ந ஸியா அனோகாஸபா⁴வதோ பி⁴ந்தி³தப்³ப³தோ சாதி அத்தோ². ததா² ஹி ‘‘பஞ்சவோகாரே பரினிப்³ப³ந்தானம், அரூபே பச்சி²மப⁴விகானம், யே ச அரூபம் உபபஜ்ஜித்வா பரினிப்³பா³யிஸ்ஸந்தி, தேஸம் சவந்தானம் தேஸம் ஸோதாயதனஞ்ச நுப்பஜ்ஜிஸ்ஸதி, சக்கா²யதனஞ்ச நுப்பஜ்ஜதீ’’தி ச, ததா² ‘‘ரூபாவசரே பரினிப்³ப³ந்தானம், அரூபானம் தேஸம் தத்த² கா⁴னாயதனஞ்ச ந நிருஜ்ஜ²தி, ரூபாயதனஞ்ச ந நிருஜ்ஜி²ஸ்ஸதீ’’தி ச தத்த² விபா⁴க³வஸேன பவத்தோ பாட²ஸேஸோ. அத² கஸ்மாதி யதி³ அபி⁴ந்தி³தப்³பே³ படிவசனவிஸ்ஸஜ்ஜனம், ந பி⁴ந்தி³தப்³பே³, ஏவம் ஸந்தே ‘‘யஸ்ஸ வா பன ஸோமனஸ்ஸிந்த்³ரியம் உப்பஜ்ஜதி, தஸ்ஸ சக்கு²ந்த்³ரியம் உப்பஜ்ஜதீதி? ஆமந்தா’’தி இமினா படிவசனவிஸ்ஸஜ்ஜனேன க³ப்³ப⁴ஸேய்யகானம் ஸோமனஸ்ஸபடிஸந்தி⁴ நத்தீ²தி கஸ்மா ந விஞ்ஞாயதி, பி⁴ந்தி³தப்³பே³ ந படிவசனவிஸ்ஸஜ்ஜனம் ஹோதீதி ஸம்படிச்சி²தப்³ப³ந்தி? தம் ந, அஞ்ஞாய பாளியா தத³த்த²ஸ்ஸ விஞ்ஞாயமானத்தாதி த³ஸ்ஸேந்தோ ‘‘காமதா⁴துயா’’திஆதி³மாஹ.
‘‘யம் சித்தம் உப்பஜ்ஜதி, ந நிருஜ்ஜ²தி, தம் சித்தம் நிருஜ்ஜி²ஸ்ஸதி, நுப்பஜ்ஜிஸ்ஸதீதி? ஆமந்தா’’தி தஸ்ஸேவ சித்தஸ்ஸ நிரோதோ⁴ அனாக³தபா⁴வேன தஸ்ஸ உப்பாத³க்க²ணே யதா² வுத்தோ, ஏவம் தஸ்ஸேவ கம்மஜஸந்தானஸ்ஸ நிரோதோ⁴ தஸ்ஸ உப்பாதே³ அனாக³தபா⁴வேன வத்தப்³போ³. தேனேதம் த³ஸ்ஸேதி ‘‘ஏகசித்தஸ்ஸ நாம உப்பாத³க்க²ணே நிரோதோ⁴ அனாக³தபா⁴வேன வுச்சதி, கிமங்க³ம் பன ஏகஸந்தானஸ்ஸா’’தி. ஸப்³ப³த்த² ஸப்³ப³ஸ்மிம் அனாக³தவாரே. உபபஜ்ஜந்தானம் ஏவ வஸேன ஸோ நிரோதோ⁴ ததா² அனாக³தபா⁴வேன வுத்தோ, கஸ்மா பனேத்த² நிரோதோ⁴ உபபன்னானம் வஸேன ந வுத்தோதி ஆஹ ‘‘உப்பன்னானம் பனா’’திஆதி³. தஸ்ஸேவ யதா²பவத்தஸ்ஸ கம்மஜஸந்தானஸ்ஸ ஏவ. தஸ்மாதி யஸ்மா உப்பாத³க்க²ணதோ உத்³த⁴ம் நிரோதோ⁴ ஆரத்³தோ⁴ நாம ஹோதி, தஸ்மா. பே⁴தே³ ஸதிபி காலபே⁴தா³மஸனஸ்ஸ காரணே ஸதிபி. அனாக³தகாலாமஸனவஸேனேவ நிரோத⁴ஸ்ஸேவ வஸேன விஸ்ஸஜ்ஜனத்³வயம் உபபன்னமேவ யுத்தமேவ ஹோதீதி. அஞ்ஞேஸம் வஸேன நிரோத⁴ஸ்ஸேவ வத்தும் அஸக்குணேய்யத்தா ‘‘அரஹத’’ந்தி வுத்தம்.
யதி³ உபபத்திஅனந்தரம் நிரோதோ⁴ ஆரத்³தோ⁴ நாம ஹோதி, அத² கஸ்மா சுதியா நிரோத⁴வசனந்தி சோத³னம் ஸந்தா⁴யாஹ ‘‘தன்னிட்டா²னபா⁴வதோ பன சுதியா நிரோத⁴வசன’’ந்தி. தன்னிட்டா²னபா⁴வதோதி தஸ்ஸ ஸந்தானஸ்ஸ நிட்டா²னபா⁴வதோ. பவத்தேதிஆதி³ வுத்தஸ்ஸேவத்த²ஸ்ஸ பாகடகரணம். தத்த² தஸ்ஸாதி ஸந்தானஸ்ஸ. வக்க²தீதிஆதி³பி பவத்தே நிரோத⁴ம் அனாதி³யித்வா சுதினிரோத⁴ஸ்ஸேவ க³ஹிததாய காரணவசனம். தேனாதி தேன யதா²வுத்தேன பாட²ந்தரவசனேன. ஏத்தா²தி ஏதஸ்மிம் ‘‘யஸ்ஸ சக்கா²யதனம் நிருஜ்ஜி²ஸ்ஸதீ’’திஆதி³கே ஆயதனயமகே. யதி³ பவத்தே நிருத்³த⁴ஸ்ஸபி சுதியா ஏவ நிரோதோ⁴ இச்சி²தோ, ‘‘ஸசக்கு²கான’’ந்திஆதி³ கத²ந்தி ஆஹ ‘‘ஸசக்கு²கானந்திஆதீ³ஸு ச படிலத்³த⁴சக்கு²கானந்திஆதி³னா அத்தோ² விஞ்ஞாயதீ’’தி. தேதி அரூபே பச்சி²மப⁴விகா. அசக்கு²கவசனஞ்ச ஸாவஸேஸந்தி யோஜனா.
பவத்திவாரவண்ணனா நிட்டி²தா.
ஆயதனயமகவண்ணனா நிட்டி²தா.
4. தா⁴துயமகம்
1-19. ஸத்³த³தா⁴துஸம்ப³ந்தா⁴னந்தி இத³ம் யானி சக்கு²தா⁴தாதி³மூலகேஸு ஸத்³த³யமகானி, ஸப்³பா³னி ச ஸத்³த³தா⁴துமூலகானி, தானி ஸந்தா⁴ய வுத்தம். ந ஹி தானி சக்கு²விஞ்ஞாணதா⁴தாதி³ஸம்ப³ந்தா⁴னி விய சுதிபடிஸந்தி⁴வஸேன லப்³ப⁴ந்தி, ஏதேனேவ ஆயதனயமகேபி பவத்திவாரே ஸத்³த³தா⁴துஸம்ப³ந்தா⁴னம் யமகானம் அலப்³ப⁴மானதா ச வேதி³தப்³பா³.
தா⁴துயமகவண்ணனா நிட்டி²தா.
5. ஸச்சயமகம்
1. பண்ணத்திவாரவண்ணனா
10-26. ஸோதி து³க்க²ஸத்³தோ³. அஞ்ஞத்தா²தி ஸங்கா²ரது³க்க²விபரிணாமது³க்க²து³க்கா²தி⁴ட்டா²னேஸு. அஞ்ஞனிரபேக்கோ²தி ஸங்கா²ராதி³பத³ந்தரானபேக்கோ². தேனாதி அஞ்ஞனிரபேக்க²து³க்க²பத³க்³க³ஹணதோ. தஸ்மிம் து³க்க²து³க்கே² விஸயபூ⁴தே. ஏஸ து³க்க²ஸத்³தோ³ ‘‘து³க்க²ம் து³க்க²ஸச்ச’’ந்தி ஏத்த² பட²மோ து³க்க²ஸத்³தோ³. தஞ்ச து³க்க²து³க்க²ம். ‘‘து³க்க²ம் து³க்க²ஸச்ச’’ந்தி ஏத்த² து³க்க²மேவ து³க்க²ஸச்சந்தி நயித³ம் அவதா⁴ரணம் இச்சி²தப்³ப³ம், து³க்க²ம் து³க்க²ஸச்சமேவாதி பன இச்சி²தப்³ப³ந்தி ஆஹ ‘‘ஏகந்தேன து³க்க²ஸச்சமேவா’’தி. ஸச்சவிப⁴ங்கே³ வுத்தேஸு ஸமுத³யேஸு கோசி ப²லத⁴ம்மேஸு நத்தீ²தி ஸச்சவிப⁴ங்கே³ பஞ்சதா⁴ வுத்தேஸு ஸமுத³யேஸு ஏகோபி ப²லஸபா⁴வேஸு நத்தி², ப²லஸபா⁴வோ நத்தீ²தி அத்தோ². ‘‘ப²லத⁴ம்மோ நத்தீ²’’தி ச பாடோ². மக்³க³ஸத்³தோ³ ச ப²லங்கே³ஸூதி ஸாமஞ்ஞப²லங்கே³ஸு ஸம்மாதி³ட்டி²ஆதீ³ஸு ‘‘மக்³க³ங்க³ம் மக்³க³பரியாபன்ன’’ந்திஆதி³னா (விப⁴. 492, 495) ஆக³தோ மக்³க³ஸத்³தோ³ மக்³க³ப²லத்தா பவத்ததி காரணூபசாரேனாதி அதி⁴ப்பாயோ. தேனாஹ ‘‘ந மக்³க³கிச்சஸப்³பா⁴வா’’திஆதி³. தஸ்மாதி யஸ்மா ஸச்சதே³ஸனாய பப⁴வாதி³ஸபா⁴வா ஏவ த⁴ம்மா ஸமுத³யாதி³பரியாயேன வுத்தா, ந அப்பப⁴வாதி³ஸபா⁴வா, தஸ்மா. ஏத்த² ச தேபூ⁴மகத⁴ம்மானம் யதா²ரஹம் து³க்க²ஸமுத³யஸச்சந்தோக³த⁴த்தா அஸச்சஸபா⁴வே ஸபா⁴வத⁴ம்மே ச உத்³த⁴ரந்தோ ப²லத⁴ம்மே ஏவ உத்³த⁴ரி. நனு ச மக்³க³ஸம்பயுத்தாபி த⁴ம்மா அஸச்சஸபா⁴வாதி தேபி உத்³த⁴ரிதப்³பா³தி? ந, தேஸம் மக்³க³க³திகத்தா. ‘‘ப²லத⁴ம்மேஸூ’’தி ஏத்த² த⁴ம்மக்³க³ஹணேன வா ப²லஸம்பயுத்தத⁴ம்மானம் விய தேஸம்பி க³ஹணம் த³ட்ட²ப்³ப³ம்.
பத³ஸோத⁴னேன…பே… இத⁴ க³ஹிதாதி ஏதேன அஸச்சஸபா⁴வானம் த⁴ம்மானம் பகரணேன நிவத்திததம் ஆஹ. தேஸந்தி து³க்கா²தீ³னம். தப்³பி³ஸேஸனயோக³விஸேஸந்தி தேன து³க்கா²தி³விஸேஸனயோகே³ன விஸிட்ட²தம். ஸச்சவிஸேஸனபா⁴வேனேவ து³க்கா²தீ³னம் பரிஞ்ஞேய்யதாதி³பா⁴வோ ஸித்³தோ⁴தி ஆஹ ‘‘ஏகந்தஸச்சத்தா’’தி. யதா² சேத்தா²தி யதா² ஏதஸ்மிம் ஸச்சயமகே ஸுத்³த⁴ஸச்சவாரே ஸச்சவிஸேஸனபூ⁴தா ஏவ து³க்கா²த³யோ க³ஹிதா. ஏவம் க²ந்த⁴யமகாதீ³ஸுபீதி ந ஸுத்³த⁴ஸச்சவாரே ஏவ அயம் நயோ த³ஸ்ஸிதோதி அத்தோ². பத³ஸோத⁴னவாரே தம்மூலசக்கவாரே ச ‘‘ரூபம் ரூபக்க²ந்தோ⁴’’திஆதி³னா ஸமுதா³யபதா³னம்யேவ வுத்தத்தா வத்தப்³ப³மேவ நத்தீ²தி ‘‘ஸுத்³த⁴க்க²ந்தா⁴தி³வாரேஸூ’’தி வுத்தம். ததா² சேத்தா²பி ஸுத்³த⁴வாரே ஏவ அயம் நயோ த³ஸ்ஸிதோ. யதி³ ஸுத்³த⁴க்க²ந்தா⁴தி³வாரேஸு க²ந்தா⁴தி³விஸேஸனபூ⁴தானமேவ ரூபாதீ³னம் க³ஹணேன ப⁴விதப்³ப³ம், அத² கஸ்மா க²ந்தா⁴தி³விஸேஸனதோ அஞ்ஞேஸம்பி ரூபாதீ³னம் வஸேன அத்தோ² த³ஸ்ஸிதோதி சோத³னம் ஸந்தா⁴யாஹ ‘‘அட்ட²கதா²யம் பனா’’திஆதி³. புரிமோ ஏவ அத்தோ² யுத்தோ, யுத்திதோ பாடோ²வ ப³லவாதி.
பண்ணத்திவாரவண்ணனா நிட்டி²தா.
2. பவத்திவாரவண்ணனா
27-164. து³க்க²பரிஞ்ஞா யாவ து³க்க²ஸமதிக்கமனத்தா²தி ஸப்பதே³ஸம் பவத்தாபி ஸா தத³த்தா²வஹா ப⁴வேய்யாதி கஸ்ஸசி ஆஸங்கா ஸியாதி த³ஸ்ஸேந்தோ ஆஹ ‘‘அரியத்தா…பே… கத்வா வுத்த’’ந்தி. கேசி பனேத்த² ‘‘அந்திமப⁴வே டி²தத்தா’’தி காரணம் வத³ந்தி, தம் ந யுஜ்ஜதி உபபத்தியா து³க்க²விசாரத்தா, ந ச ஸப்³பே³ ஸுத்³தா⁴வாஸா அந்திமப⁴விகா உத்³த⁴ம்ஸோதவசனதோ. ‘‘யஸ்ஸ து³க்க²ஸச்சம் உப்பஜ்ஜதீ’’தி உப்பாதா³வத்தா². அவிஸேஸேன து³க்க²ஸச்சபரியாபன்னா த⁴ம்மா ஸம்ப³ந்தீ⁴பா⁴வேனேவ தம்ஸமங்கீ³ ச புக்³க³லோ வுத்தோதி த³ஸ்ஸேந்தோ ‘‘ஸப்³பே³ உபபஜ்ஜந்தா’’திஆதி³ம் வத்வா ஸ்வாயமத்தோ² யஸ்மா நிச்ச²யரூபேன க³ஹிதோ, நிச்சி²தஸ்ஸேவ ச அத்த²ஸ்ஸ விபா⁴க³த³ஸ்ஸனேன ப⁴விதப்³ப³ம், தஸ்மா ‘‘தேஸ்வேவ…பே… உபபன்னமேவா’’தி ஆஹ. தத்த² தேஸ்வேவ கேசி த³ஸ்ஸீயந்தீதி ஸம்ப³ந்தோ⁴. ஏககோட்டா²ஸுப்பத்திஸமங்கி³னோதி து³க்க²கோட்டா²ஸுப்பத்திஸமங்கி³னோ. தேஸூதி ஸன்னிட்டா²னேன க³ஹிதேஸு. மக்³க³ப²லுப்பாத³ஸமங்கீ³ஸூதி மக்³க³ப²லுப்பாத³ஸமங்கீ³னம், அயமேவ வா பாடோ².
ஏத்த² சாதிஆதி³னா ‘‘ஸப்³பே³ஸ’’ந்திஆதி³பாளியா பிண்ட³த்த²ம் த³ஸ்ஸேதி. தத்த² ஸமுத³யஸச்சுப்பாத³வோமிஸ்ஸஸ்ஸ து³க்க²ஸச்சுப்பாத³ஸ்ஸாதி இத³ம் அனாத³ரே ஸாமிவசனம். கத்த²சி ஸமுத³யஸச்சுப்பாத³வோமிஸ்ஸேபி து³க்க²ஸச்சே தம்ரஹிதஸ்ஸ ஸமுத³யஸச்சுப்பாத³ரஹிதஸ்ஸ து³க்க²ஸச்சுப்பாத³ஸ்ஸ த³ஸ்ஸனவஸேன வுத்தந்தி யோஜனா. கேசி பன ‘‘ஸமுத³யஸச்சாவோமிஸ்ஸஸ்ஸா’’தி பட²ந்தி, தேஸம் ‘‘தம்ரஹிதஸ்ஸா’’தி இத³ம் புரிமபத³ஸ்ஸ அத்த²விவரணம் வேதி³தப்³ப³ம். தம்ஸஹிதஸ்ஸாதி ஸமுத³யஸச்சுப்பாத³ஸஹிதஸ்ஸ து³க்க²ஸச்சுப்பாத³ஸ்ஸ த³ஸ்ஸனவஸேன வுத்தந்தி யோஜனா. தேஸந்தி அஸஞ்ஞஸத்தானம், பவத்தியம் து³க்க²ஸச்சஸ்ஸ உப்பாதோ³ ‘‘பவத்தே’’திஆதி³னா வுத்தேஸு த்³வீஸுபி கோட்டா²ஸேஸு ந க³ஹிதோதி அத்தோ². படிஸந்தி⁴யம் பன தேஸம் உப்பாத³ஸ்ஸ பட²மகோட்டா²ஸேன க³ஹிததா த³ஸ்ஸிதா ஏவ. ததா² நிரோதோ⁴ சாதி யதா² அஸஞ்ஞஸத்தானம் படிஸந்தி⁴யம் து³க்க²ஸச்சஸ்ஸ உப்பாதோ³ பட²மகோட்டா²ஸேன க³ஹிதோ, பவத்தியம் பன ஸோ த்³வீஹி கோட்டா²ஸேஹி ந க³ஹிதோ, ததா² தேஸம் து³க்க²ஸச்சஸ்ஸ நிரோதோ⁴பீதி அத்தோ². ததா² ஹி ‘‘ஸப்³பே³ஸம் சவந்தானம் பவத்தே தண்ஹாவிப்பயுத்தசித்தஸ்ஸ ப⁴ங்க³க்க²ணே’’திஆதி³னா (யம. 1.ஸச்சயமக.88) நிரோத⁴வாரே பாளி பவத்தா. ஏஸேவ நயோதி ய்வாயம் ‘‘ஏத்த² சா’’திஆதி³னா ஸமுத³யஸச்சயமகே பாளியா அத்த²னயோ வுத்தோ, மக்³க³ஸச்சயமகேபி ஏஸேவ நயோ, ஏவமேவ தத்தா²பி அத்தோ² நேதப்³போ³தி அத்தோ². ததா² ஹி ‘‘ஸப்³பே³ஸம் உபபஜ்ஜந்தான’’ந்திஆதி³னா தத்த² பாளி பவத்தா.
ஏவஞ்ச ஸதீதி ஏவம் க²ணவஸேன ஓகாஸக்³க³ஹணே ஸதீதி யதா²வுத்தமத்த²ம் அனனுஜானனவஸேன பச்சாமஸதி. ஏதஸ்ஸ விஸ்ஸஜ்ஜனேதி ஏதஸ்ஸ யமகபத³ஸ்ஸ விஸ்ஸஜ்ஜனே. ‘‘அக்³க³மக்³க³ஸ்ஸ உப்பாத³க்க²ணே, அரஹந்தானம் சித்தஸ்ஸ உப்பாத³க்க²ணே, யஸ்ஸ சித்தஸ்ஸ அனந்தரா அக்³க³மக்³க³ம் படிலபி⁴ஸ்ஸந்தி, தஸ்ஸ சித்தஸ்ஸ உப்பாத³க்க²ணே, அஸஞ்ஞஸத்தம் உபபஜ்ஜந்தானம் தேஸம் தத்த² து³க்க²ஸச்சம் உப்பஜ்ஜதி, நோ ச தேஸம் தத்த² ஸமுத³யஸச்சம் உப்பஜ்ஜிஸ்ஸதீ’’தி (யம. 1.ஸச்சயமக.71) புரிமகோட்டா²ஸஸ்ஸ ஆக³தத்தா விரோதோ⁴ நத்தீ²தி ‘‘பச்சி²மகோட்டா²ஸே’’திஆதி³ வுத்தம். தத்த² தஸ்மாதி யஸ்மா ந உபபத்திசித்துப்பாத³க்க²ணோ பா⁴வினோ ஸமுத³யபச்சுப்பாத³ஸ்ஸ ஆதா⁴ரோ, அத² கோ² காமாவசராதி³ஓகாஸோ, தஸ்மா. புக்³க³லோகாஸவாரோ ஹேஸாதி யஸ்மா புக்³க³லோகாஸவாரோ ஏஸ, தஸ்மா ‘‘தேஸம் தத்தா²’’தி ஏத்த² ஓகாஸவஸேன தத்த²-ஸத்³த³ஸ்ஸ அத்தோ² வேதி³தப்³போ³. யதி³ புக்³க³லோகாஸவாரே காமாவசராதி³ஓகாஸவஸேனேவ அத்தோ² க³ஹேதப்³போ³, ந க²ணவஸேன, அத² கஸ்மா ‘‘ஸப்³பே³ஸம் உபபஜ்ஜந்தான’’ந்திஆதி³னா ஓகாஸம் அனாமஸித்வா தத்த² விஸ்ஸஜ்ஜனம் பவத்தந்தி சோத³னம் ஸந்தா⁴யாஹ ‘‘தத்த²…பே… ஸோ ஏவா’’தி. தத்த² தத்தா²தி ஓகாஸவாரே. புக்³க³லவிஸேஸத³ஸ்ஸனத்த²ந்தி புக்³க³லஸங்கா²தவிஸேஸத³ஸ்ஸனத்த²ம். யத்த² தேதி யஸ்மிம் காமாவசராதி³ஓகாஸே தே புக்³க³லா.
கேசீதி த⁴ம்மஸிரித்தே²ரம் ஸந்தா⁴யாஹ. ஸோ ஹி ‘‘பவத்தே சித்தஸ்ஸ ப⁴ங்க³க்க²ணே து³க்க²ஸச்சம் நுப்பஜ்ஜதீ’’தி ஏத்த² சித்தஜரூபமேவ அதி⁴ப்பேதம் சித்தபடிப³த்³த⁴வுத்தித்தாதி காரணம் வத³தி. அபரே ‘‘அரூபேதி இமம் புரிமாபேக்க²ம்பி ஹோதீதி தேன பவத்தம் விஸேஸேத்வா அரூபப⁴வவஸேன அயமத்தோ² வுத்தோ, தஸ்மா ‘யஸ்ஸ வா பன ஸமுத³யஸச்சம் நிருஜ்ஜ²தி, தஸ்ஸ து³க்க²ஸச்சம் உப்பஜ்ஜதீதி? நோ’திஆதீ³ஸுபி ஏவமத்தோ² வேதி³தப்³போ³’’தி வத³ந்தி. புக்³க³லோ ந சித்தம் அபேக்கி²த்வாவ க³ஹிதோதி இத³ம் சித்தஸ்ஸ அனதி⁴கதத்தா வுத்தம். யத்த² பன ஸமுத³யஸச்சஸ்ஸ உப்பாத³னிச்ச²யோ, தத்தே²வ தஸ்ஸ அனுப்பாத³னிச்ச²யேனபி ப⁴விதப்³ப³ம் சித்தேன ச வினா புக்³க³லஸ்ஸேவ அனுபலப்³ப⁴னதோதி ‘‘யஸ்ஸ ஸமுத³யஸச்சம் நுப்பஜ்ஜதீ’’தி ஏத்த² ஸமுத³யஸச்சாதா⁴ரம் சித்தம் அத்த²தோ க³ஹிதமேவாதி ஸக்கா விஞ்ஞாதும். அபிச இந்த்³ரியப³த்³தே⁴பி ந ஸப்³போ³ ரூபுப்பாதோ³ ஏகந்தேன சித்துப்பாதா³தீ⁴னோதி ஸக்கா வத்தும் சித்துப்பத்தியா வினாபி தத்த² ரூபுப்பத்தித³ஸ்ஸனதோ, தஸ்மா சித்தஜரூபமேவ சித்தஸ்ஸ உப்பாத³க்க²ணே உப்பஜ்ஜதி, ந இதரம், இதரம் பன தஸ்ஸ தீஸுபி க²ணேஸு உப்பஜ்ஜதீதி நிட்ட²மேத்த² க³ந்தப்³ப³ம். விப⁴ஜிதப்³பா³ அவிப⁴த்தா நாம நத்தீ²தி ஸியாயம் பஸங்கோ³ பட²மவாரே, து³தியவாரே பன விப⁴ஜனா ஏவ ஸாதி நாயம் பஸங்கோ³ லப்³ப⁴தி, பட²மவாரேபி வா நாயம் பஸங்கோ³. கஸ்மா? ஏஸா ஹி யமகஸ்ஸ பகதி, யதி³த³ம் யதா²லாப⁴வஸேன யோஜனா.
து³தியே சித்தே வத்தமானேதி ஏத்த² ‘‘பட²மம் ப⁴வங்க³ம், து³தியம் சித்த’’ந்தி வத³ந்தி. ப⁴வனிகந்தியா ஆவஜ்ஜனம்பி விபாகப்பவத்திதோ விஸதி³ஸத்தா ‘‘து³திய’’ந்தி வத்தும் ஸக்கா, ததோ பட்டா²ய புப்³பே³ தஸ்ஸ தத்த² ஸமுத³யஸச்சம் நுப்பஜ்ஜித்தா²தி வத்தப்³பா³தி அபரே. ப⁴வனிகந்தியா பன ஸஹஜாதம் பட²மம் சித்தம் இத⁴ து³தியம் சித்தந்தி அதி⁴ப்பேதம். ததோ புப்³பே³ பவத்தம் ஸப்³ப³ம் அப்³யாகதபா⁴வேன ஸமானஜாதிகத்தா ஏகந்தி கத்வா ததோ பட்டா²ய ஹேட்டா² தஸ்ஸ தத்த² ஸமுத³யஸச்சம் நுப்பஜ்ஜித்தே²வாதி. தேனாஹ ‘‘ஸப்³ப³ந்திமேன பரிச்சே²தே³னா’’திஆதி³. தஸ்மிந்தி து³தியே சித்தே. தேன ஸமானக³திகத்தாதி தேன யதா²வுத்தது³தியசித்தேன ச தம்ஸமங்கி³னோ வா து³க்க²ஸச்சம் உப்பஜ்ஜித்த², நோ ச ஸமுத³யஸச்சந்தி வத்தப்³ப³பா⁴வேன ஸமானக³திகத்தா. ஏவஞ்ச கத்வாதி தேன ஸமானக³திகதாய த³ஸ்ஸிதத்தா ஏவ. யதா²வுத்தாதி து³தியாகுஸலசித்ததோ புரிமஸப்³ப³சித்தஸமங்கி³னோ அக்³க³ஹிதா ஹோந்தி இதரபா⁴வாபா⁴வதோ. வுத்தமேவத்த²ம் பாட²ந்தரேன ஸமத்தே²தும் ‘‘யதா²’’திஆதி³ வுத்தம். தேதி சதுவோகாரா. வஜ்ஜேதப்³பா³தி ‘‘இதரேஸ’’ந்தி விஸேஸனேன நிவத்தேதப்³பா³. பஞ்சவோகாரா விய யதா²வுத்தா ஸுத்³தா⁴வாஸாதி து³தியசித்தக்க²ணஸமங்கி³பா⁴வேன வுத்தப்பகாரா யதா² ஸுத்³தா⁴வாஸஸங்கா²தா பஞ்சவோகாரா புப்³பே³ வுத்தா ஸந்தி, ஏவம் சதுவோகாரா புப்³பே³ வுத்தா ந ஹி ஸந்தீதி யோஜனா.
‘‘யஸ்ஸ யத்தா²’’தி புக்³க³லோகாஸா ஆதே⁴ய்யாதா⁴ரபா⁴வேன அபேக்கி²தாதி ஆஹ ‘‘புக்³க³லோகாஸா அஞ்ஞமஞ்ஞபரிச்சி²ன்னா க³ஹிதா’’தி. காமாவசரே…பே… உபபன்னாதி ஏத்த² காமாவசரே அபி⁴ஸமேதாவினோ ரூபாவசரம் உபபன்னா, ரூபாவசரே அபி⁴ஸமேதாவினோ அரூபாவசரம் உபபன்னா, வா-ஸத்³தே³ன காமாவசரே அபி⁴ஸமேதாவினோ அரூபாவசரம் உபபன்னாதி ச யோஜேதப்³ப³ம். தத்தா²தி உபபன்னோகாஸே. அபி⁴ஸமயோதி உபரிமக்³கா³பி⁴ஸமயோ யாவ உபபன்னோ ந ப⁴விஸ்ஸதி, தாவ தே தத்த² உபபன்னபுக்³க³லா ஏத்த² ஏதஸ்மிம் ‘‘அபி⁴ஸமேதாவீன’’ந்திஆதி³னா வுத்தே து³தியகோட்டா²ஸே ந க³ய்ஹந்தி புக்³க³லோகாஸானம் அஞ்ஞமஞ்ஞம் பரிச்சி²ன்னத்தா. யதி³ ஏவம் கிம் தே இமஸ்மிம் யமகே அஸங்க³ஹிதாதி ஆஹ ‘‘தே பனா’’திஆதி³. தத்த² யம் வுத்தம் ‘‘ஸமானக³திகாதி விஸும் ந த³ஸ்ஸிதா’’தி, தம் பாகடதரம் காதும் ‘‘அனபி⁴ஸமேதாவீன’’ந்திஆதி³ வுத்தம். தஸ்ஸத்தோ² – ‘‘அனபி⁴ஸமேதாவீன’’ந்தி இமினா பட²மபதே³ன க³ஹிதா ஸப்³ப³த்த² மக்³கு³ப்பத்திரஹே ஸம்பத்திப⁴வே தத்த² ஸுத்³தா⁴வாஸே யே அனபி⁴ஸமேதாவினோ, தேஸு த்³விப்பகாரேஸு ஸுத்³தா⁴வாஸா யஸ்மிம் காலே தத்த² அனபி⁴ஸமேதாவினோதி க³ஹேதப்³பா³, தத்த² நேஸம் ததா² க³ஹேதப்³ப³காலஸ்ஸ விஸேஸனத்த²ம் ‘‘ஸுத்³தா⁴வாஸானம் து³தியே சித்தே வத்தமானே’’தி வுத்தந்தி.
ஏதேனாதி ஏதேன வசனேன. வோதா³னசித்தம் நாம மக்³க³சித்தானம் அனந்தரபச்சயபூ⁴தம் சித்தம், இத⁴ பன அக்³க³மக்³க³சித்தஸ்ஸ. ததோதி யதா²வுத்தவோதா³னசித்ததோ புரிமதரசித்தஸமங்கி³னோ, அனுலோமஞாணஸம்பயுத்தசித்தஸமங்கி³னோ, அவஸிட்ட²வுட்டா²னகா³மினிவிபஸ்ஸனாசித்தாதி³ஸமங்கி³னோபி. தேனாஹ ‘‘யாவ ஸப்³ப³ந்திமதண்ஹாஸம்பயுத்தசித்தஸமங்கீ³, தாவ த³ஸ்ஸிதா’’தி.
படிஸந்தி⁴சுதிசித்தானம் ப⁴ங்கு³ப்பாத³க்க²ணா பவத்தே சித்தஸ்ஸ ப⁴ங்கு³ப்பாத³க்க²ணேஹி து³க்க²ஸச்சாதீ³னம் நுப்பாதா³தீ³ஸு ஸமானக³திகாதி கத்வா வுத்தம் ‘‘பவத்தே சித்தஸ்ஸா’’திஆதி³. தத்த² சுதிசித்தஸ்ஸபி உப்பாத³க்க²ணஸ்ஸ க³ஹணம் த³ட்ட²ப்³ப³ந்தி யோஜனா. த்³வீஸுபி கோட்டா²ஸேஸூதி ஸமுத³யஸச்சஸ்ஸ பா⁴வினோ நிரோத⁴ஸ்ஸ அப்படிக்கே²பபடிக்கே²பவஸேன பவத்தேஸு புரிமபச்சி²மகோட்டா²ஸேஸு. ந விஸேஸிதந்தி யதா²வுத்தே அப்படிக்கே²பே ச ஸதிபி விஸேஸேத்வா ந வுத்தந்தி அத்தோ². ஏகஸ்ஸபி புக்³க³லஸ்ஸ தாதி³ஸஸ்ஸ மக்³க³ஸ்ஸ ச ப²லஸ்ஸ ச ப⁴ங்க³க்க²ணஸமங்கி³னோ புரிமகோட்டா²ஸஸ்ஸேவ அப⁴ஜனதோ கோட்டா²ஸத்³வயஸம்ப⁴வாபா⁴வதோதி அத்தோ². இதா³னி தமேவத்த²ம் விவரிதும் ‘‘யஸ்ஸ து³க்க²ஸச்ச’’ந்திஆதி³ வுத்தம். கேஸஞ்சி புக்³க³லானம். நித்³தா⁴ரணே சேதம் ஸாமிவசனம். ‘‘மக்³க³ஸ்ஸ ச ப²லஸ்ஸ சா’’தி வுத்தமக்³க³ப²லானி த³ஸ்ஸேந்தோ ‘‘திண்ணம் ப²லானம் த்³வின்னஞ்ச மக்³கா³ன’’ந்தி ஆஹ. தானி பன ஹேட்டி²மானி தீணி ப²லானி மஜ்ஜே² ச த்³வே மக்³கா³ வேதி³தப்³பா³. நிரந்தரம் அனுப்பாதே³த்வாதி படிபக்க²த⁴ம்மேஹி அவோகிண்ணம் கத்வா ஸஹ விபஸ்ஸனாய மக்³க³ம் உப்பாதே³ந்தேன யா ஸாதச்சகிரியா காதப்³பா³, தம் அகத்வாதி அத்தோ². தேனாஹ ‘‘அந்தரந்தரா…பே… உப்பாதே³த்வா’’தி. ‘‘அரூபே மக்³க³ஸ்ஸ ச ப²லஸ்ஸ ச ப⁴ங்க³க்க²ணே’’தி அவிஸேஸதோ வுத்தே கத²மயம் விஸேஸோ லப்³ப⁴தீதி ஆஹ ‘‘ஸாமஞ்ஞவசனேனபீ’’திஆதி³. தேன அபவாத³விஸயபரியாயேன உபஸக்³கா³ அபி⁴னிவிஸந்தீதி லோகஸித்³தோ⁴யம் ஞாயோதி த³ஸ்ஸேதி.
பவத்திவாரவண்ணனா நிட்டி²தா.
3. பரிஞ்ஞாவாரவண்ணனா
165-170. ஏத்தே²வாதி இமஸ்மிம் ஸச்சயமகே ஏவ. அபரிஞ்ஞேய்யதாத³ஸ்ஸனத்த²ந்தி ஏத்த² அ-காரோ ந பரிஞ்ஞேய்யாபா⁴வவசனோ, நாபி பரிஞ்ஞேய்யபடிபக்க²வசனோ, அத² கோ² தத³ஞ்ஞவசனோதி யதா²ரஹம் ஸச்சேஸு லப்³ப⁴மானானம் பஹாதப்³ப³தாதீ³னம்பி த³ஸ்ஸனே ஆபன்னேயேவ ஸமயவாரோ த³ஸ்ஸனபரோ, யேஸஞ்ச ந த³ஸ்ஸனபரோ, தேஸு கேஸுசி ஸச்சேஸு லப்³ப⁴மானானம்பி கேஸஞ்சி விஸேஸானம் அயம் வாரோ ந த³ஸ்ஸனபரோதி த³ஸ்ஸேந்தோ ‘‘ஸச்சி²கரண…பே… த³ஸ்ஸனத்த²ஞ்சா’’தி ஆஹ. ஸமுத³யே பஹானபரிஞ்ஞாவ வுத்தா, ந தீரணபரிஞ்ஞாதி யுத்தம் தாவேதம் ஸமுத³யஸ்ஸபி தீரேதப்³ப³ஸபா⁴வத்தா, ‘‘து³க்கே² தீரணபரிஞ்ஞாவ வுத்தா, ந பஹானபரிஞ்ஞா’’தி இத³ம் பன கஸ்மா வுத்தம், நனு து³க்க²ம் அப்பஹாதப்³ப³மேவாதி? ஸமுத³யஸச்சவிப⁴ங்கே³ வுத்தானம் கேஸஞ்சி ஸமுத³யகோட்டா²ஸானம் து³க்க²ஸச்சே ஸங்க³ஹணதோ து³க்க²ஸமுத³யே வா அஸங்கரதோவ க³ஹேத்வா பூ⁴தகத²னமேதம் த³ட்ட²ப்³ப³ம். உப⁴யத்தா²தி து³க்கே² ஸமுத³யே ச வுத்தா. கஸ்மா? தேஸம் ஸாதா⁴ரணாதி. ஏவம் ஸாதா⁴ரணாஸாதா⁴ரணபே⁴த³பி⁴ன்னம் யதா²வுத்தம் பரிஞ்ஞாகிச்சம் புப்³ப³பா⁴கே³ நானக்க²ணே லப்³ப⁴மானம்பி மக்³க³காலே ஏகக்க²ணே ஏவ லப்³ப⁴தி ஏகஞாணகிச்சத்தாதி த³ஸ்ஸேதும் ‘‘மக்³க³ஞாணஞ்ஹீ’’திஆதி³ வுத்தம்.
பரிஞ்ஞாவாரவண்ணனா நிட்டி²தா.
ஸச்சயமகவண்ணனா நிட்டி²தா.
6. ஸங்கா²ரயமகம்
1. பண்ணத்திவாரவண்ணனா
1. ஸதிபி குஸலமூலாதீ³னம்பி விப⁴த்தபா⁴வே க²ந்தா⁴தி³விபா⁴கோ³ ததோ ஸாதிஸயோதி த³ஸ்ஸேந்தோ ‘‘க²ந்தா⁴த³யோ விய புப்³பே³ அவிப⁴த்தா’’தி ஆஹ. பகாரத்தோ² வா ஏத்த² ஆதி³-ஸத்³தோ³ ‘‘பூ⁴வாத³யோ’’திஆதீ³ஸு வியாதி குஸலமூலாதீ³னம்பி ஸங்க³ஹோ த³ட்ட²ப்³போ³. அவிஞ்ஞாதத்தா நிஸாமேந்தேஹி. ஹேதுஅத்தோ² வா ஏத்த² லுத்தனித்³தி³ட்டோ² அவிஞ்ஞாபிதத்தாதி அத்தோ². யதி³பி காயஸங்கா²ரானம் விகப்பத்³வயேபி ஹேதுப²லபா⁴வோயேவ இச்சி²தோ, ஸாமிவசனரூபாவிபூ⁴தோ பன அத்தே²வ அத்த²பே⁴தோ³தி த³ஸ்ஸேந்தோ ‘‘காயஸ்ஸ…பே… கத்துஅத்தே²’’தி ஆஹ. ஸோ பனாதி கத்துஅத்தோ².
2-7. ஸுத்³தி⁴கஏகேகபத³வஸேனாதி ‘‘காயோ ஸங்கா²ரோ’’திஆதீ³ஸு த்³வீஸு த்³வீஸு பதே³ஸு அஞ்ஞமஞ்ஞம் அஸம்மிஸ்ஸஏகேகபத³வஸேன. அத்தா²பா⁴வதோதி யதா²தி⁴ப்பேதத்தா²பா⁴வதோ. அஞ்ஞதா² கரஜகாயாதி³கோ அத்தோ² அத்தே²வ. தேனேவாஹ ‘‘பத³ஸோத⁴ன…பே… அவசனீயத்தா’’தி. இதா³னி தமேவ அத்தா²பா⁴வம் ப்³யதிரேகவஸேன த³ஸ்ஸேந்தோ ‘‘யதா²’’திஆதி³மாஹ. கஸ்மா பன உப⁴யத்த² ஸமானே ஸமாஸபத³பா⁴வே தத்த² அத்தோ² லப்³ப⁴தி, இத⁴ ந லப்³ப⁴தீதி? பி⁴ன்னலக்க²ணத்தா. தத்த² ஹி ரூபக்க²ந்தா⁴தி³பதா³னி ஸமானாதி⁴கரணானீதி பத³த்³வயாதி⁴ட்டா²னோ ஏகோ அத்தோ² லப்³ப⁴தி, இத⁴ பன காயஸங்கா²ராதி³பதா³னி பி⁴ன்னாதி⁴கரணானீதி ததா²ரூபோ அத்தோ² ந லப்³ப⁴தீதி. தேனாஹ ‘‘யதா²தி⁴ப்பேதத்தா²பா⁴வதோ’’தி.
விஸும் அதீ³பேத்வாதி ‘‘காயஸங்கா²ரோ’’திஆதி³னா ஸஹ வுச்சமானோபி காயஸங்கா²ரஸத்³தோ³ விஸும் விஸும் அத்தனோ அத்த²ம் அஜோதேத்வா ஏகம் அத்த²ம் யதி³ தீ³பேதீதி பரிகப்பவஸேன வத³தி. தேன காயஸங்கா²ரஸத்³தா³னம் ஸமானாதி⁴கரணதம் உல்லிங்கே³தி. ‘‘காயஸங்கா²ரஸத்³தோ³ காயஸங்கா²ரத்தே² வத்தமானோ’’தி கஸ்மா வுத்தம், ‘‘ஸங்கா²ரஸத்³தோ³ ஸங்கா²ரத்தே²வ வத்தமானோ’’தி பன வத்தப்³ப³ம் ஸியா. ஏவஞ்ஹி ஸதி க²ந்த⁴த்தே² வத்தமானோ க²ந்த⁴ஸத்³தோ³ விய ரூபஸத்³தே³ன காயஸத்³தே³ன விஸேஸிதப்³போ³தி இத³ம் வசனம் யுஜ்ஜேய்ய, காயஸங்கா²ரஸத்³தா³னம் பன ஸமானாதி⁴கரணத்தே ந கேவலம் ஸங்கா²ரஸத்³தோ³யேவ ஸங்கா²ரத்தே² வத்ததி, அத² கோ² காயஸத்³தோ³பீதி இமமத்த²ம் த³ஸ்ஸேதும் ‘‘காயஸங்கா²ரஸத்³தோ³ காயஸங்கா²ரத்தே² வத்தமானோ’’தி வுத்தம் ஸியா, காயஸத்³தே³ன ஸமானாதி⁴கரணேனாதி அதி⁴ப்பாயோ. ப்³யதி⁴கரணேன பன ஸங்கா²ரஸ்ஸ விஸேஸிதப்³ப³தா அத்தே²வாதி.
இமஸ்ஸ வாரஸ்ஸாதி ஸுத்³த⁴ஸங்கா²ரவாரஸ்ஸ. பத³ஸோத⁴னேன த³ஸ்ஸிதானந்தி ஏத்தகேவ வுச்சமானே தத்த² த³ஸ்ஸிதபா⁴வஸாமஞ்ஞேன ஸுத்³த⁴காயாதீ³னம்பி க³ஹணம் ஆபஜ்ஜேய்யாதி தம்னிவாரணத்த²ம் ‘‘யதா²தி⁴ப்பேதானமேவா’’தி ஆஹ. காயாதி³பதே³ஹி அக்³க³ஹிதத்தாதி ஸுத்³த⁴காயாதி³பதே³ஹி அக்³க³ஹிதத்தா. இத⁴ பனாதி அட்ட²கதா²யம். ஸுத்³த⁴ஸங்கா²ரவாரம் ஸந்தா⁴ய வுத்தம்பி ஸுத்³த⁴ஸங்கா²ரவாரமேவேத்த² அனனுஜானந்தோ ஸகலஸங்கா²ரயமகவிஸயந்தி ஆஹ ‘‘இத⁴ பன ஸங்கா²ரயமகே’’தி. அதி⁴ப்பேதத்த²பரிச்சாகோ³தி அஸ்ஸாஸபஸ்ஸாஸாதி³கஸ்ஸ அதி⁴ப்பேதத்த²ஸ்ஸ அக்³க³ஹணம் சேதனாகாயஅபி⁴ஸங்க²ரணஸங்கா²ராதி³ அனதி⁴ப்பேதத்த²பரிக்³க³ஹோ. யதி³ ‘‘காயோ ஸங்கா²ரோ’’திஆதி³னா ஸுத்³த⁴ஸங்கா²ரதம்மூலசக்கவாரா அத்தா²பா⁴வதோ இத⁴ ந க³ஹேதப்³பா³, அத² கஸ்மா பவத்திவாரமேவ அனாரபி⁴த்வா அஞ்ஞதா² தே³ஸனா ஆரத்³தா⁴தி ஆஹ ‘‘பத³ஸோத⁴னவாரதம்மூலசக்கவாரேஹீ’’திஆதி³. ஸம்ஸயோ ஹோதி ஸங்கா²ரஸத்³த³வசனீயதாஸாமஞ்ஞதோ காயஸங்கா²ராதி³பதா³னம் ப்³யதி⁴கரணபா⁴வதோ ச. தேனேவாஹ ‘‘அஸமானாதி⁴கரணேஹி…பே… த³ஸ்ஸிதாயா’’தி.
பண்ணத்திவாரவண்ணனா நிட்டி²தா.
2. பவத்திவாரவண்ணனா
19. ஸங்கா²ரானம் புக்³க³லானஞ்ச ஓகாஸத்தாதி ஸம்பயுத்தானம் நிஸ்ஸயபச்சயதாய, ஸங்கா²ரானம் ஸமாபஜ்ஜிதப்³ப³தாய புக்³க³லானம் ஜா²னஸ்ஸ ஓகாஸதா வேதி³தப்³பா³, பூ⁴மி பன யத³க்³கே³ன புக்³க³லானம் ஓகாஸோ, தத³க்³கே³ன ஸங்கா²ரானம்பி ஓகாஸோ. ‘‘து³தியே ஜா²னே ததியே ஜா²னே’’திஆதி³னா ஜா²னம், ‘‘காமாவசரே ரூபாவசரே’’திஆதி³னா பூ⁴மி ச விஸும் ஓகாஸபா⁴வேன க³ஹிதா. இதீதி ஹேதுஅத்தோ², யஸ்மா ஜா²னம்பி ஓகாஸபா⁴வேன க³ஹிதம், தஸ்மாதி அத்தோ². புக்³க³லவாரே ச ஓகாஸவஸேன புக்³க³லக்³க³ஹணேதி புக்³க³லவாரே ச யதா³ புக்³க³லோகாஸஸங்கா²ராதீ³னம் ஓகாஸபா⁴வேன க³ய்ஹதி, ததா³ தேஸம் த்³வின்னம் ஓகாஸானம் வஸேன க³ய்ஹனம் ஹோதீதி யத்த² ஸோ புக்³க³லோ, யஞ்ச தஸ்மிம் புக்³க³லே ஜா²னம் உபலப்³ப⁴தி, தேஸம் த்³வின்னம் பூ⁴மிஜா²னஸங்கா²தானம் ஓகாஸானம் வஸேன யதா²ரஹம் காயஸங்கா²ராதீ³னம் க³ஹணம் கத²னம் ஹோதீதி. தஸ்மாதி யஸ்மா ஏததே³வ, தஸ்மா. து³தியததியஜ்ஜா²னோகாஸவஸேனாதி து³தியததியஜ்ஜா²னஸங்கா²தஓகாஸவஸேன க³ஹிதா. கத²ம்? ‘‘வினா விதக்கவிசாரேஹி அஸ்ஸாஸபஸ்ஸாஸானம் உப்பாத³க்க²ணே’’தி ஏவம் க³ஹிதா புக்³க³லா விஸேஸேத்வா த³ஸ்ஸிதா. கேன? தேனேவ விதக்கவிசாரரஹிதஅஸ்ஸாஸபஸ்ஸாஸுப்பாத³க்க²ணேனாதி யோஜேதப்³ப³ம்.
பட²மகோட்டா²ஸே ஜா²னோகாஸவஸேன புக்³க³லத³ஸ்ஸனம் கதந்தி வுத்தம் ‘‘புன…பே… த³ஸ்ஸேதீ’’தி. பூ⁴மிஓகாஸவஸேன புக்³க³லம் த³ஸ்ஸேதீதி ஸம்ப³ந்தோ⁴. த்³விப்பகாரானந்தி ஜா²னபூ⁴மிஓகாஸபே⁴தே³ன து³விதா⁴னம். தேஸந்தி புக்³க³லானம். ‘‘பட²மம் ஜா²னம் ஸமாபன்னானம் காமாவசரான’’ந்தி ச இத³ம் நிவத்தேதப்³ப³க³ஹேதப்³ப³ஸாதா⁴ரணவசனம், தஸ்ஸ ச அவச்சே²த³கம் ‘‘அஸ்ஸாஸபஸ்ஸாஸானம் உப்பாத³க்க²ணே’’தி இத³ந்தி வுத்தம் ‘‘விஸேஸ…பே… க²ணே’’தி. தேன விஸேஸனேன. காமாவசரானம்பீதி பி-ஸத்³தோ³ ஸம்பிண்ட³னத்தோ². தேன ந கேவலம் ரூபாரூபாவசரேஸு பட²மஜ்ஜா²னம் ஸமாபன்னானம், அத² கோ² காமாவசரானம்பீதி வுத்தமேவத்த²ம் ஸம்பிண்டே³தி. கீதி³ஸானம் காமாவசரானந்தி ஆஹ ‘‘க³ப்³ப⁴க³தாதீ³ன’’ந்தி. ஆதி³-ஸத்³தே³ன உத³கனிமுக்³க³விஸஞ்ஞிபூ⁴தா ஸங்க³ஹிதா, ந மதசதுத்த²ஜ்ஜா²னஸமாபன்னனிரோத⁴ஸமாபன்னா. தே ஹி அகாமாவசரதாய விய ரூபாரூபப⁴வஸமங்கி³னோ விதக்கவிசாருப்பத்தியாவ நிவத்திதா. ஏகந்திகத்தாதி அஸ்ஸாஸபஸ்ஸாஸாபா⁴வஸ்ஸ ஏகந்திகத்தா. நித³ஸ்ஸிதாதி ரூபாரூபாவசரா நித³ஸ்ஸனபா⁴வேன வுத்தா, ந தப்³பி³ரஹிதானம் அஞ்ஞேஸம் அபா⁴வதோதி அதி⁴ப்பாயோ. பட²மஜ்ஜா²னோகாஸா அஸ்ஸாஸபஸ்ஸாஸவிரஹவிஸிட்டா²தி யோஜனா. பட²மஞ்சேத்த² பட²மஜ்ஜா²னஸமங்கீ³னம் ரூபாரூபாவசரானம் க³ஹணம், து³தியம் யதா²வுத்தக³ப்³ப⁴க³தாதீ³னம். இமினா நயேனாதி ய்வாயம் ‘‘ஸங்கா²ரானம் புக்³க³லானஞ்சா’’திஆதி³னா ஜா²னோகாஸபூ⁴மிஓகாஸவஸேன புக்³க³லவிபா⁴க³னயோ வுத்தோ, இமினா நயேன உபாயேன. ஸப்³ப³த்த² ஸப்³ப³புச்சா²ஸு.
21. ஏதஸ்மிம் பன அத்தே² ஸதீதி ய்வாயம் உப்பத்திபூ⁴மியா ஜா²னம் விஸேஸேத்வா அத்தோ² வுத்தோ, ஏதஸ்மிம் அத்தே² க³ய்ஹமானே அஞ்ஞத்த²பி உப்பத்திபூ⁴மியா ஜா²னம் விஸேஸிதப்³ப³ம் ப⁴வேய்ய, ததா² ச அனிட்ட²ம் ஆபஜ்ஜதீதி த³ஸ்ஸேந்தோ ‘‘சதுத்த²ஜ்ஜா²னே’’திஆதி³மாஹ. கிம் பன தம் அனிட்ட²ந்தி ஆஹ ‘‘பூ⁴மீனம் ஓகாஸபா⁴வஸ்ஸேவ அக்³க³ஹிததாபத்திதோ’’தி. யத்த² யத்த² ஹி ஜா²னம் க³ய்ஹதி, தத்த² தத்த² தம் உப்பத்திபூ⁴மியா விஸேஸிதப்³ப³ம் ஹோதி. ததா² ஸதி ஜா²னோகாஸோவ க³ஹிதோ ஸியா, ந பூ⁴மிஓகாஸோ கு³ணபூ⁴தத்தா. கிஞ்ச ‘‘சதுத்த²ஜ்ஜா²னே ரூபாவசரே அரூபாவசரே’’தி ஏத்த² ரூபாரூபபூ⁴மியா சதுத்த²ஜ்ஜா²னே விஸேஸியமானே ததே³கதே³ஸோவ ஓகாஸவஸேன க³ஹிதோ ஸியா, ந ஸப்³ப³ம் சதுத்த²ஜ்ஜா²னம். தேனாஹ ‘‘ஸப்³ப³சதுத்த²ஜ்ஜா²னஸ்ஸ ஓகாஸவஸேன அக்³க³ஹிததாபத்திதோ சா’’தி. ஜா²னபூ⁴மோகாஸானந்தி ஜா²னோகாஸபூ⁴மிஓகாஸானம்.
நனு ச ஜா²னபூ⁴மிஓகாஸே அஸங்கரதோ யோஜியமானே ந ஸப்³ப³ஸ்மிம் பட²மஜ்ஜா²னோகாஸே காயஸங்கா²ரோ வசீஸங்கா²ரோ ச அத்தி², ததா² ஸப்³ப³ஸ்மிம் காமாவசரோகாஸேதி சோத³னுப்பத்திம் ஸந்தா⁴ய தஸ்ஸ பரிஹாரம் வத்தும் ‘‘யதி³பீ’’திஆதி³மாஹ. தத்தா²தி பட²மஜ்ஜா²னோகாஸே காமாவசரோகாஸே ச. தம்த்³வயுப்பத்தீதி தஸ்ஸ காயவசீஸங்கா²ரத்³வயஸ்ஸ உப்பத்தி. ஓகாஸத்³வயஸ்ஸ அஸங்கரதோ க³ஹணே அயஞ்ச கு³ணோ லத்³தோ⁴ ஹோதீதி ஆஹ ‘‘விஸும்…பே… ந வத்தப்³ப³ம் ஹோதீ’’தி. தத்த² அங்க³மத்தவஸேனாதி விதக்காதி³ஜா²னங்க³மத்தவஸேன. தத்த² வத்தப்³ப³ம் அட்ட²கதா²யம் வுத்தமேவ. விதக்கரஹிதோபி விசாரோ வசீஸங்கா²ரோயேவாதி ஆஹ ‘‘அவிதக்க…பே… க³ச்ச²தீ’’தி. முத்³த⁴பூ⁴தம் து³தியஜ்ஜா²னந்தி சதுக்கனயே து³தியஜ்ஜா²னமாஹ. தஞ்ஹி ஸகலக்கோ²ப⁴கரத⁴ம்மவிக³மேன விதக்கேகங்க³ப்பஹாயிகதோ ஸாதிஸயத்தா ‘‘முத்³த⁴பூ⁴த’’ந்தி வத்தப்³ப³தம் லப⁴தி. அஸஞ்ஞஸத்தா வியாதி இத³ம் விஸதி³ஸுதா³ஹரணம் த³ட்ட²ப்³ப³ம்.
37. ஆவஜ்ஜனதோ புப்³பே³ பவத்தம் ஸப்³ப³ம் சித்தம் படிஸந்தி⁴சித்தேன ஸமானக³திகத்தா ஏகம் கத்வா வுத்தம் ‘‘பட²மதோ’’தி. தேனாஹ ‘‘அவிதக்கஅவிசாரதோ’’திஆதி³. சித்தஸங்கா²ரஸ்ஸ ஆதி³த³ஸ்ஸனத்த²ந்தி ஸுத்³தா⁴வாஸே சித்தஸங்கா²ரஸ்ஸ ஆதி³த³ஸ்ஸனத்த²ம். ததா² ‘‘வசீஸங்கா²ரஸ்ஸ ஆதி³த³ஸ்ஸனத்த²’’ந்தி ஏத்தா²பி.
பவத்திவாரவண்ணனா நிட்டி²தா.
ஸங்கா²ரயமகவண்ணனா நிட்டி²தா.
7. அனுஸயயமகம்
பரிச்சே²த³பரிச்சி²ன்னுத்³தே³ஸவாரவண்ணனா
1. ‘‘அவிஜ்ஜாஸமுத³யா ரூபஸமுத³யோ, தண்ஹாஸமுத³யா ரூபஸமுத³யோ, கம்மஸமுத³யா ரூபஸமுத³யோ. லோபோ⁴ நிதா³னம் கம்மானம் ஸமுத³யாயா’’தி ச ஏவமாதி³னா குஸலமூலகுஸலாதீ³னம் பச்சயபா⁴வோ வுத்தோதி ஆஹ ‘‘பச்சயதீ³பகேன மூலயமகேனா’’தி. ‘‘ஸோ ‘அனிச்சம் ரூபம், அனிச்சம் ரூப’ந்தி யதா²பூ⁴தம் பஜானாதி. சக்கு² அனிச்சம், ரூபா அனிச்சா’’தி ச ஆதி³னா ப³ஹுலக²ந்தா⁴தி³முகே²ன அனிச்சானுபஸ்ஸனாத³யோ விஹிதாதி வுத்தம் ‘‘க²ந்தா⁴தீ³ஸு தீரணபா³ஹுல்லதோ’’தி. கிலேஸானம் ஸமுச்சி²ந்த³னதோ பரம் பஹானகிச்சம் நத்தீ²தி ஆஹ ‘‘அனுஸயபஹானந்தா பஹானபரிஞ்ஞா’’தி. யதி³பி அனுஸயேஹி ஸம்பயோக³தோ ஆரம்மணதோ வா பஹானபரிஞ்ஞா நப்பவத்ததி, அனுஸயாபா⁴வே பன ததா³ரம்போ⁴ ஏவ நத்தீ²தி கத்வா வுத்தம் ‘‘அனுஸயேஹி பஹானபரிஞ்ஞம் விபா⁴வேது’’ந்தி. அனுஸயபா⁴வேன லப்³ப⁴மானானந்தி அனுஸயபா⁴வேன விஜ்ஜமானானம், அனுஸயஸபா⁴வானந்தி அத்தோ². தீஹாகாரேஹீதி பரிச்சே²தா³தீ³ஹி தீஹி பகாரேஹி. அனுஸயேஸு க³ணனஸரூபப்பவத்திட்டா²னதோ அபோ³தி⁴தேஸு புக்³க³லோகாஸாதி³வஸேன பவத்தியமானா தப்³பி³ஸயா தே³ஸனா ந ஸுவிஞ்ஞேய்யா ஹோதீதி த³ஸ்ஸேந்தோ ஆஹ ‘‘தேஸு ததா²…பே… து³ரவபோ³த⁴த்தா’’தி.
ஏத்த² புரிமேஸூதி பது³த்³தா⁴ரோ அனந்தரஸ்ஸ விதி⁴ படிஸேதோ⁴ வாதி கத்வா ஸானுஸயவாராதி³அபேக்கோ², ந அனுஸயவாராதி³அபேக்கோ² அனுஸயவாரே பாளிவவத்தா²னஸ்ஸ பகே³வ கதத்தாதி த³ஸ்ஸேந்தோ ‘‘ஏதேஸு ஸானுஸயவாராதீ³ஸு புரிமேஸூதி அத்தோ²’’தி ஆஹ. ஸானுஸயவாராதீ³ஸு ஹி தீஸு புரிமேஸு ஓகாஸவாரே யதோ ததோதி தே³ஸனா பவத்தா, ந அனுஸயவாராதீ³ஸு. அத்த²விஸேஸாபா⁴வதோதி ‘‘காமதா⁴துயா சுதஸ்ஸா’’திஆதி³னா (யம. 2.அனுஸயயமக.302) பாளிஆக³தபத³ஸ்ஸ, ‘‘காமதா⁴தும் வா பன உபபஜ்ஜந்தஸ்ஸா’’திஆதி³னா யமகபா⁴வேன அட்ட²கதா²ஆதி³க³தபத³ஸ்ஸ ச அத்த²விஸேஸாபா⁴வதோ. கத²மயம் யமகதே³ஸனா ஸியா து³தியஸ்ஸ பத³ஸ்ஸ அபா⁴வதோதி அத்தோ². யதி³ நாயம் யமகதே³ஸனா, அத² கஸ்மா இதா⁴க³தாதி ஆஹ ‘‘புரிமவாரே ஹீ’’திஆதி³. தத்த² அனுஸயட்டா²னபரிச்சே²த³த³ஸ்ஸனந்தி அனுஸயட்டா²னதாய பரிச்சே²த³த³ஸ்ஸனம். ஏவம்பி கத²மித³ம் அனுஸயயமகம் யமகதே³ஸனாஸப்³பா⁴வதோதி ஆஹ ‘‘யமகதே³ஸனா…பே… நாமம் த³ட்ட²ப்³ப³’’ந்தி. அத்த²வஸேனாதி படிலோமத்த²வஸேன. பட²மபதே³ன ஹி வுத்தஸ்ஸ விபரிவத்தனவஸேனபி யமகதே³ஸனா ஹோதி ‘‘ரூபம் ரூபக்க²ந்தோ⁴, ரூபக்க²ந்தோ⁴ ரூப’’ந்திஆதீ³ஸு (யம. 1.க²ந்த⁴யமக.2), தத்த² பன அத்த²விஸேஸோ அத்தி², இத⁴ நத்தி², தஸ்மா ந ததா² தே³ஸனா கதாதி த³ஸ்ஸேந்தோ ஆஹ ‘‘அத்த²விஸேஸாபா⁴வதோ பன ந வுத்தா’’தி. லப்³ப⁴மானதாவஸேனாதி புச்சா²ய லப்³ப⁴மானதாவஸேன.
உப்பத்திஅரஹதம் த³ஸ்ஸேதீதி இமினா நிப்பரியாயேன அனுஸயா அனாக³தாதி த³ஸ்ஸிதம் ஹோதி யதோ தே மக்³க³வஜ்ஜா², ந ச அதீதபச்சுப்பன்னா உப்பத்திரஹாதி வுச்சந்தி உப்பன்னத்தா. யம்ஸபா⁴வா பன த⁴ம்மா அனாக³தா அனுஸயாதி வுச்சந்தி, தம்ஸபா⁴வா ஏவ தே அதீதபச்சுப்பன்னா வுத்தா. ந ஹி த⁴ம்மானம் அத்³தா⁴பே⁴தே³ன ஸபா⁴வபே⁴தோ³ அத்தி², தஸ்மா அனுஸயானம் அதீதபச்சுப்பன்னபா⁴வா பரியாயதோ லப்³ப⁴ந்தீதி அட்ட²கதா²யம் (யம. அட்ட². அனுஸயயமக 1) ‘‘அதீதோபி ஹோதீ’’திஆதி³ வுத்தம். ஏவம்பகாராதி அனுஸயப்பகாரா, காரணலாபே⁴ ஸதி உப்பஜ்ஜனாரஹாஇச்சேவ அத்தோ². ஸோ ஏவம்பகாரோ உப்பஜ்ஜனவாரே உப்பஜ்ஜதி-ஸத்³தே³ன க³ஹிதோ உப்பஜ்ஜனாரஹதாய அவிச்சி²ன்னபா⁴வதீ³பனத்த²ந்தி அதி⁴ப்பாயோ. தேனாஹ ‘‘ந க²ந்த⁴யமகாதீ³ஸு விய உப்பஜ்ஜமானதா’’தி, பச்சுப்பன்னதாதி அத்தோ². தேனேவாதிஆதி³னா யதா²வுத்தமத்த²ம் பாகடதரம் கரோதி. தத்த² நின்னானாகரணோதி நிப்³பி³ஸேஸோ. உப்பஜ்ஜனானுஸயானம் நின்னானாகரணத்தா ஏவ ஹி ‘‘ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதீ’’தி விப⁴ங்கே³ (விப⁴. 203) ஆக³தம். அனுஸயனஞ்ஹி ஏத்த² நிவிஸனந்தி அதி⁴ப்பேதம்.
இதா³னி யேன பரியாயேன அதீதபச்சுப்பன்னேஸு அனுஸயவோஹாரோ, தம் த³ஸ்ஸேதுகாமோ அனாக³தம்பி தேஹி ஸத்³தி⁴ம் ஏகஜ்ஜ²ம் கத்வா த³ஸ்ஸேந்தோ ‘‘அனுரூபம் காரணம் பன…பே… வுச்சந்தீ’’தி ஆஹ. ஏதேன பூ⁴தபுப்³ப³க³தியா அதீதபச்சுப்பன்னேஸு உப்பத்திரஹதா வேதி³தப்³பா³தி த³ஸ்ஸேதி. உப்பத்திஅரஹதா நாம கிலேஸானம் மக்³கே³ன அஸமுச்சி²ன்னதாய வேதி³தப்³பா³. ஸா ச அதீதபச்சுப்பன்னேஸுபி அத்தே²வாதி பகாரந்தரேனபி தேஸம் பரியாயதோவ அனுஸயபா⁴வம் பகாஸேதி. தேனேவாஹ ‘‘மக்³க³ஸ்ஸ பனா’’திஆதி³. தாதி³ஸானந்தி யே மக்³க³பா⁴வனாய அஸதி உப்பத்திரஹா, தாதி³ஸானம். த⁴ம்மோ ஏவ ச உப்பஜ்ஜதி, ந த⁴ம்மாகாரோதி அதி⁴ப்பாயோ. ந ஹி த⁴ம்மாகாரா அனிச்சதாத³யோ உப்பஜ்ஜந்தீதி வுச்சந்தி. யதி³ பன தே உப்பாதா³தி³ஸமங்கி³னோ ஸியும், த⁴ம்மா ஏவ ஸியும். தேன வுத்தம் ‘‘அப்பஹீனாகாரோ ச உப்பஜ்ஜதீதி வத்தும் ந யுஜ்ஜதீ’’தி.
வுத்தம்பி தா²மக³மனம் அக்³க³ஹேத்வா அப்பஹீனட்ட²மத்தமேவ க³ஹேத்வா சோத³கோ சோதே³தீதி த³ஸ்ஸேந்தோ ஆஹ ‘‘ஸத்தானுஸய…பே… ஆபஜ்ஜதீதி சே’’தி. ந ஹி தா²மக³மனே க³ஹிதே சோத³னாய ஓகாஸோ அத்தி². தேனாஹ ‘‘நாபஜ்ஜதீ’’திஆதி³. வுத்தம் அட்ட²கதா²யம், ந கேவலமட்ட²கதா²யமேவ பாட²க³தோவாயமத்தோ², தஸ்மா ஏவமேவ க³ஹேதப்³போ³தி த³ஸ்ஸேந்தோ ‘‘தா²மக³தோ…பே… யுத்த’’ந்தி வத்வா கிம் பன தம் தா²மக³மனந்தி பராஸங்கம் நிவத்தேந்தோ ‘‘தா²மக³தந்தி ச…பே… வுத்தா’’தி ஆஹ. தத்த² அஞ்ஞேஹி அஸாதா⁴ரணோதி கிலேஸவத்து²ஆதீ³னம் கிலேஸதாதி³ஸபா⁴வோ விய காமராகா³தி³தோ அஞ்ஞத்த² அலப்³ப⁴மானோ தேஸம்யேவ ஆவேணிகோ ஸபா⁴வோ, யதோ தே ப⁴வபீ³ஜம் ப⁴வமூலந்தி ச வுச்சந்தி. யஸ்மா ச தா²மக³மனம் தேஸம் அனஞ்ஞஸாதா⁴ரணோ ஸபா⁴வோ, தஸ்மா அனுஸயனந்தி வுத்தம் ஹோதீதி த³ஸ்ஸேந்தோ ‘‘தா²மக³தோதி அனுஸயஸமங்கீ³தி அத்தோ²’’தி ஆஹ.
‘‘யஸ்ஸ காமராகா³னுஸயோ அனுஸேதி, தஸ்ஸ படிகா⁴னுஸயோ அனுஸேதீதி? ஆமந்தா’’திஆதி³னா (யம. 2.அனுஸயயமக.3) அனுஸயவாரே வுத்தோ ஏவ அத்தோ² ‘‘யஸ்ஸ காமராகா³னுஸயோ உப்பஜ்ஜதி, தஸ்ஸ படிகா⁴னுஸயோ உப்பஜ்ஜதீதி? ஆமந்தா’’திஆதி³னா (யம. 2.அனுஸயயமக.300) வுத்தோதி அனுஸயனாகாரோ ஏவ உப்பஜ்ஜனவாரே உப்பஜ்ஜதி-ஸத்³தே³ன க³ஹிதோதி ‘‘உப்பஜ்ஜனவாரோ அனுஸயவாரேன நின்னானாகரணோ விப⁴த்தோ’’தி யம் வுத்தம், தத்த² விசாரம் ஆரப⁴தி ‘‘அனுஸயஉப்பஜ்ஜனவாரானம் ஸமானக³திகத்தா’’திஆதி³னா. ‘‘உப்பஜ்ஜதீ’’தி வசனம் ஸியாதி உப்பஜ்ஜனவாரே ‘‘உப்பஜ்ஜதீ’’தி வசனம் அப்பஹீனாகாரதீ³பகம் ஸியா. ததா² ச ஸதி யதா² ‘‘இமஸ்ஸ உப்பாதா³’’தி ஏத்த² இமஸ்ஸ அனிரோதா⁴தி அயமத்தோ²பி ஞாயதி, ஏவம் ‘‘உப்பஜ்ஜதீ’’தி வுத்தே அத்த²தோ ‘‘ந உப்பஜ்ஜதீ’’தி அயமத்தோ² வுத்தோ ஹோதி அப்பஹீனாகாரஸ்ஸ உப்பத்திரஹபா⁴வஸ்ஸ அனுப்பஜ்ஜமானஸபா⁴வத்தாதி சோத³னம் த³ஸ்ஸேந்தோ ‘‘உப்பஜ்ஜதீதி வசனஸ்ஸ அவுத்ததா ந ஸக்கா வத்துந்தி சே’’தி ஆஹ. வசனத்த²விஸேஸேன தம்த்³வயஸ்ஸ வுத்தத்தாதி ஏதேன த⁴ம்மனானத்தாபா⁴வேபி பத³த்த²னானத்தே²ன வாரந்தரதே³ஸனா ஹோதி யதா² ஸஹஜாதஸம்ஸட்ட²வாரேஸூதி த³ஸ்ஸேதி. அனுரூபம் காரணம் லபி⁴த்வாதிஆதி³ தமேவ வசனத்த²விஸேஸம் விபா⁴வேதும் ஆரத்³த⁴ம். உப்பத்தியோக்³க³ந்தி உப்பத்தியா யோக்³க³ம், உப்பஜ்ஜனஸபா⁴க³தந்தி அத்தோ². யதோ அனுஸயா உப்பத்திரஹாதி வுச்சந்தி, ஏகந்தேன சேததே³வ ஸம்படிச்சி²தப்³ப³ம் ‘‘யஸ்ஸ காமராகா³னுஸயோ உப்பஜ்ஜதி, தஸ்ஸ படிகா⁴னுஸயோ உப்பஜ்ஜதீதி? ஆமந்தா’’திஆதி³வசனதோ (யம. 2.அனுஸயயமக.300). ‘‘அனுஸேந்தீதி அனுஸயா’’தி ஏத்தகே வுத்தே ஸதா³ விஜ்ஜமானா நு கோ² தே அபரினிப்ப²ன்னானுஸயனட்டே²ன ‘‘அனுஸயா’’தி வுச்சந்தீதி அயமத்தோ² ஆபஜ்ஜதீதி தம்னிஸேத⁴னத்த²ம் ‘‘அனுரூபம் காரணம் லபி⁴த்வா உப்பஜ்ஜந்தீ’’தி வுத்தம். உப்பத்திஅரஹபா⁴வேன தா²மக³ததா அனுஸயட்டோ²தி யம் தேஸம் உப்பத்தியோக³வசனம் வுத்தம், தம் ஸம்மதே³வ வுத்தந்தி இமமத்த²மாஹ ‘‘அனுஸயஸத்³த³ஸ்ஸா’’திஆதி³னா. தேன வாரத்³வயதே³ஸனுப்பாதி³கா அனுஸயஸத்³த³த்த²னித்³தா⁴ரணாதி த³ஸ்ஸேதி. தம்பி ஸுவுத்தமேவ இமினா தந்திப்பமாணேனாதி இத³ம்பி ‘‘அபி⁴த⁴ம்மே தாவா’’திஆதி³னா ஆக³தம் திவித⁴மேவ தந்திம் ஸந்தா⁴யாஹாதி த³ஸ்ஸேந்தோ ஆஹ ‘‘தந்தித்தயேனபி ஹி சித்தஸம்பயுத்ததா தீ³பிதா ஹோதீ’’தி.
பரிச்சே²த³பரிச்சி²ன்னுத்³தே³ஸவாரவண்ணனா நிட்டி²தா.
உப்பத்திட்டா²னவாரவண்ணனா
2. ஏவம் ஸதீதி வேத³னானம் விஸேஸிதப்³ப³பா⁴வே காமதா⁴துயா ச விஸேஸனபா⁴வே ஸதி. காமாதா⁴துயா அனுஸயனட்டா²னதா ந வுத்தா ஹோதி அப்பதா⁴னபா⁴வதோ, பதா⁴னாப்பதா⁴னேஸு பதா⁴னே கிச்சத³ஸ்ஸனதோ, விஸேஸனபா⁴வேன சரிதப்³ப³தாய சாதி அதி⁴ப்பாயோ. ஹோது கோ தோ³ஸோதி கதா³சி வதே³ய்யாதி ஆஸங்கமானோ ஆஹ ‘‘த்³வீஸு பனா’’திஆதி³. த்³வீஸூதி நித்³தா⁴ரணே பு⁴ம்மம், ததா² ‘‘தீஸு தா⁴தூஸூ’’தி ஏத்தா²பி. தஸ்மாதி யஸ்மா தா⁴துஆதி³பே⁴தே³ன திவித⁴ம் அனுஸயட்டா²னம், தத்த² ச ரூபாரூபதா⁴தூனம் ப⁴வராக³ஸ்ஸ அனுஸயட்டா²னதா வுத்தாதி காமதா⁴துயா காமராக³ஸ்ஸ அனுஸயட்டா²னதா ஏகந்தேன வத்தப்³பா³, தஸ்மா. தீஸு தா⁴தூஸு தீஸு வேத³னாஸூதி ச நித்³தா⁴ரணே பு⁴ம்மம், காமதா⁴துயா த்³வீஸு வேத³னாஸூதி ச ஆதா⁴ரே.
த்³வீஸ்வேவாதி த்³வீஸு ஸுகோ²பேக்கா²ஸு ஏவ. ஸப்³பா³ஸு த்³வீஸூதி யாஸு காஸுசி த்³வீஸு. தேனாதி ‘‘காமராகோ³ த்³வீஸு வேத³னாஸு அனுஸேதீ’’தி வசனஸாமத்தி²யலத்³தே⁴ன விஸேஸனிச்ச²யேனேவ. ப⁴வராகா³னுஸயட்டா²னம் ரூபாரூபதா⁴துயோ தத³னுரூபா ச வேத³னா. ந ஹி த்³வீஸு வேத³னாஸு காமராகா³னுஸயோவ அனுஸேதீதி அவதா⁴ரணம் இச்சி²தம், த்³வீஸு ஏவ பன வேத³னாஸூதி இச்சி²தம். தேனேவாஹ ‘‘த்³வீஸ்வேவ அனுஸேதி, ந தீஸூ’’தி. அட்டா²னஞ்ச அனுஸயானம், கிம் தம் அபரியாபன்னம் ஸக்காயே? ஸப்³போ³ லோகுத்தரோ த⁴ம்மோ. ச-ஸத்³தே³ன படிகா⁴னுஸயட்டா²னம் ஸங்க³ண்ஹாதி. தேன வுத்தம் ‘‘யதா² சா’’திஆதி³. அஞ்ஞாதி காமராகா³னுஸயட்டா²னபூ⁴தா த்³வே வேத³னா.
அஞ்ஞேஸு த்³வீஹி வேத³னாஹி விப்பயுத்தேஸு. பியரூபஸாதரூபேஸூதி பியாயிதப்³ப³மது⁴ரஸபா⁴வேஸு. விஸேஸனஞ்சேதம் ரூபாதீ³னம் ஸப்³ப³த்³வாரஸப்³ப³புரிஸேஸு இட்ட²பா⁴வஸ்ஸ அனியததாய கதம். ஸாதஸந்தஸுக²கி³த்³தி⁴யாதி ஸாதஸுகே² ஸந்தஸுகே² ச கி³ஜ்ஜ²னாகாரேன அபி⁴கங்க²னாகாரேன. தத்த² ஸாதஸுக²ம் காயிகம், ஸந்தஸுக²ம் சேதஸிகம். ஸாதஸுக²ம் வா காயிகஸுக²ம், ஸந்தஸுக²ம் உபேக்கா²ஸுக²ம். ததா² சாஹு ‘‘உபேக்கா² பன ஸந்தத்தா, ஸுக²மிச்சேவ பா⁴ஸிதா’’தி (விஸுத்³தி⁴. 2.644; மஹானி. அட்ட². 27). பரித்தம் வா ஓளாரிகம் ஸுக²ம் ஸாதஸுக²ம், அனோளாரிகம் ஸந்தஸுக²ம். பரித்தக்³க³ஹணஞ்சேத்த² காமராகா³னுஸயஸ்ஸ அதி⁴ப்பேதத்தா. அஞ்ஞத்தா²தி வேத³னாஹி அஞ்ஞத்த². ஸோதி காமராகா³னுஸயோ. வேத³னாஸு அனுக³தோ ஹுத்வா ஸேதீதி வேத³னாபேக்கோ² ஏவ ஹுத்வா பவத்ததி யதா² புத்தாபேக்கா²ய தா⁴தியா அனுக்³க³ண்ஹனப்பவத்தி, ஸயனஸங்கா²தா பவத்தி ச காமராக³ஸ்ஸ நிகாமனமேவ. தேனாஹ ‘‘ஸுக²மிச்சேவ அபி⁴லபதீ’’தி. யதா² தஸ்ஸ, ஏவம் படிகா⁴னுஸயாதீ³னம்பி வுத்தனியாமேன யதா²ஸகம் கிச்சகரணமேவ து³க்க²வேத³னாதீ³ஸு அனுஸயனம் த³ட்ட²ப்³ப³ம். தேன வுத்தம் ‘‘ஏவம் படிகா⁴னுஸயோ சா’’திஆதி³. தீஸு வேத³னாஸு அனுஸயனவசனேனாதி தீஸு வேத³னாஸு யதா²ரஹம் அனுஸயனவசனேன. இட்டா²தி³பா⁴வேன க³ஹிதேஸூதி இட்டா²தீ³ஸு ஆரம்மணபகதியா வஸேன இட்டா²தி³பா⁴வேன க³ஹிதேஸு விபரீதஸஞ்ஞாய வஸேன அனிட்டா²தீ³ஸு இட்டா²தி³பா⁴வேன க³ஹிதேஸூதி யோஜனா. ந ஹி இட்டா²தி³பா⁴வேன க³ஹணம் விபரீதஸஞ்ஞா.
தத்தா²தி இட்டா²ரம்மணாதீ³ஸு. ஏத்தா²தி அனுஸயனே. காமஸ்ஸாதா³தி³வத்து²பூ⁴தானம் காமப⁴வாதீ³னந்தி காமஸ்ஸாத³ப⁴வஸ்ஸாத³வத்து²பூ⁴தானம் காமரூபாரூபப⁴வானம் க³ஹணம் வேதி³தப்³ப³ந்தி யோஜனா. தத்தா²தி வேத³னாத்தயதா⁴துத்தயேஸு. நித்³தா⁴ரணே சேதம் பு⁴ம்மம். து³க்க²படிகா⁴தோ து³க்கே² அனபி⁴ரதி. யத்த² தத்தா²தி து³க்க²வேத³னாய தம்ஸம்பயுத்தேஸு அனிட்ட²ரூபாதீ³ஸு வாதி யத்த² தத்த². மஹக்³க³தா உபாதி³ன்னக்க²ந்தா⁴ ரூபாரூபப⁴வா, அனுபாதி³ன்னக்க²ந்தா⁴ ரூபாரூபாவசரத⁴ம்மா. தத்தா²தி யதா²வுத்தேஸு மஹக்³க³தத⁴ம்மேஸு ப⁴வராகோ³இச்சேவ வேதி³தப்³போ³. தேன வுத்தம் ‘‘ரூபதா⁴துயா அரூபதா⁴துயா ஏத்த² காமராகா³னுஸயோ நானுஸேதீ’’தி. தி³ட்டா²னுஸயாதீ³னந்தி ஆதி³-ஸத்³தே³ன விசிகிச்சா²னுஸயஅவிஜ்ஜானுஸயாதீ³னம் ஸங்க³ஹோ த³ட்ட²ப்³போ³.
தா⁴துத்தயவேத³னாத்தயவினிமுத்தம் தி³ட்டா²னுஸயாதீ³னம் அனுஸயனட்டா²னம் ந வுத்தந்தி ஸுவுத்தமேதம் தி³ட்டா²னுஸயாதீ³னம் உப்பத்திட்டா²னபுச்சா²யம் ‘‘ஸப்³ப³ஸக்காயபரியாபன்னேஸு த⁴ம்மேஸு’’இச்சேவ விஸ்ஸஜ்ஜிதத்தா. காமராகோ³ பன யத்த² நானுஸேதி, தம் து³க்க²வேத³னாரூபாரூபதா⁴துவினிமுத்தம் தி³ட்டா²னுஸயாதீ³னம் அனுஸயனட்டா²னம் அத்தீ²தி த³ஸ்ஸேதும் ‘‘நனு சா’’திஆதி³ ஆரத்³த⁴ம். தத்த² தத³னுஸயனட்டா²னதோதி தஸ்ஸ காமராகா³னுஸயஸ்ஸ அனுஸயனட்டா²னதோ. அஞ்ஞா நேக்க²ம்மஸ்ஸிதஸோமனஸ்ஸுபேக்கா²ஸங்கா²தா. அயமேத்த² ஸங்கே²பத்தோ² – நேக்க²ம்மஸ்ஸிததோ³மனஸ்ஸே விய படிகா⁴னுஸயோ நேக்க²ம்மஸ்ஸிதஸோமனஸ்ஸுபேக்கா²ஸு காமராகா³னுஸயோ நானுஸேதீதி ‘‘யத்த² காமராகா³னுஸயோ நானுஸேதி, தத்த² தி³ட்டா²னுஸயோ நானுஸேதீ’’தி ஸக்கா வத்துந்தி தஸ்மா தம் உத்³த⁴ரித்வா ந வுத்தந்தி. ஹோந்தூதி தாஸம் வேத³னானம் அத்தி²தம் படிஜானித்வா உத்³த⁴ரித்வா அவசனஸ்ஸ காரணம் த³ஸ்ஸேந்தோ ஆஹ ‘‘ந பன…பே… தம் ந வுத்த’’ந்தி. தத³னுஸயனட்டா²னந்தி தேஸம் தி³ட்டா²னுஸயாதீ³னம் அனுஸயனட்டா²னம். தஸ்மாதி யஸ்மா ஸதிபி காமராகா³னுஸயனட்டா²னதோ அஞ்ஞஸ்மிம் தி³ட்டா²னுஸயாதீ³னம் அனுஸயனட்டா²னே தம் பன தா⁴துத்தயவேத³னாத்தயவினிமுத்தம் நத்தி² வேத³னாத்³வயபா⁴வதோ, தஸ்மா. தம் வேத³னாத்³வயம் ந வுத்தம் விஸும் ந உத்³த⁴டந்தி அத்தோ². தஸ்மாதி யஸ்மா ‘‘யத்த² காமராகா³த³யோ நானுஸேந்தி, தத்த² தி³ட்டி²விசிகிச்சா² நானுஸேந்தீ’’தி அயமத்தோ² ‘‘ஆமந்தா’’தி இமினா படிவசனவிஸ்ஸஜ்ஜனேன அவிபா⁴க³தோ வுத்தோதி ‘‘யத்த² காமராகா³த³யோ அனுஸேந்தி, தத்த² தி³ட்டி²விசிகிச்சா² அனுஸேந்தீ’’தி அயம்பி அத்தோ² அவிபா⁴க³தோவ லப்³ப⁴தி, தஸ்மா. அவிபா⁴க³தோ ச து³க்க²ம் படிக⁴ஸ்ஸ அனுஸயனட்டா²னந்தி தீ³பிதம் ஹோதி. தேனாஹ ‘‘அவிஸேஸேன…பே… வேதி³தப்³ப³’’ந்தி. தத்த² அவிஸேஸேனாதி கே³ஹஸ்ஸிதம் நேக்க²ம்மஸ்ஸிதந்தி விஸேஸம் அகத்வா. ஸமுதா³யவஸேன க³ஹேத்வாதி யதா²வுத்தஅவயவானம் ஸமூஹவஸேன து³க்க²ந்த்வேவ க³ஹேத்வா. ‘‘அவிஸேஸேன ஸமுதா³யவஸேன க³ஹேத்வா’’தி இமமத்த²ம் ததா²-ஸத்³தே³ன அனுகட்³ட⁴தி ‘‘த்³வீஸு வேத³னாஸூ’’தி ஏத்தா²பி கே³ஹஸ்ஸிதாதி³விபா⁴க³ஸ்ஸ அனிச்சி²தத்தா.
யதி³ ஏவம் ‘‘படிக⁴ம் தேன பஜஹதி, ந தத்த² படிகா⁴னுஸயோ அனுஸேதீ’’தி இத³ம் ஸுத்தபத³ம் கத²ந்தி சோத³னம் ஸந்தா⁴ய ‘‘அபிசா’’திஆதி³ வுத்தம். தத்தா²தி தஸ்மிம் தோ³மனஸ்ஸே, தம்ஸம்பயுத்தே வா படிகே⁴. நேக்க²ம்மஸ்ஸிதம் தோ³மனஸ்ஸந்திஆதி³னா நேய்யத்த²மித³ம் ஸுத்தம், ந நீதத்த²ந்தி த³ஸ்ஸேதி. யதா² பன ஸுத்தம் உதா³ஹடம், ததா² இத⁴ கஸ்மா ந வுத்தந்தி ஆஹ ‘‘படிகு⁴ப்பத்திரஹட்டா²னதாயா’’திஆதி³. ஏவம்பி ஸுத்தாபி⁴த⁴ம்மபாடா²னம் கத²மவிரோதோ⁴தி ஆஹ நிப்பரியாயதே³ஸனா ஹேஸா, ஸா பன பரியாயதே³ஸனாதி. ஏவஞ்ச கத்வாதி பரியாயதே³ஸனத்தா ஏவ. ராகா³னுஸயோதி காமராகா³னுஸயோ அதி⁴ப்பேதோ. யதோ ‘‘அனாகா³மிமக்³கே³ன ஸமுக்³கா⁴தனம் ஸந்தா⁴யா’’தி வுத்தம், தஸ்மா தஸ்ஸ ந மஹக்³க³தத⁴ம்மா அனுஸயனட்டா²னந்தி தம் பட²மஜ்ஜா²னஞ்ச அனாமஸித்வா ‘‘ந ஹி லோகியா…பே… நானுஸேதீதி ஸக்கா வத்து’’ந்தி வுத்தம். அவத்து²பா⁴வதோதி ஸபா⁴வேனேவ அனுப்பத்திட்டா²னத்தா. இதா⁴தி இமஸ்மிம் அனுஸயயமகே. வுத்தனயேனாதி ‘‘நேக்க²ம்மஸ்ஸிதம் தோ³மனஸ்ஸம் உப்பாதே³த்வா’’திஆதி³னா வுத்தேன நயேன. தம்படிபக்க²பா⁴வதோதி தேஸம் படிகா⁴தீ³னம் படிபக்க²ஸ்ஸ மக்³க³ஸ்ஸ ஸப்³பா⁴வதோ. ந கேவலம் மக்³க³ஸப்³பா⁴வதோ, அத² கோ² ப³லவவிபஸ்ஸனாஸப்³பா⁴வதோபீதி த³ஸ்ஸேந்தோ ஆஹ ‘‘தம்ஸமுக்³கா⁴…பே… பா⁴வதோ சா’’தி.
இதா³னி யதே³தம் தத்த² தத்த² ‘‘அனுஸயனட்டா²ன’’ந்தி வுத்தம், தம் க³ஹேதப்³ப³த⁴ம்மவஸேன வா ஸியா க³ஹணவிஸேஸேன வாதி த்³வே விகப்பா, தேஸு பட²மம் ஸந்தா⁴யாஹ ‘‘ஆரம்மணே அனுஸயனட்டா²னே ஸதீ’’தி. ரூபாதி³ஆரம்மணே அனுஸயானம் அனுஸயனட்டா²னந்தி க³ய்ஹமானே யமத்த²ம் ஸந்தா⁴ய ‘‘ந ஸக்கா வத்து’’ந்தி வுத்தம், தம் த³ஸ்ஸேதும் ‘‘து³க்கா²ய ஹீ’’திஆதி³மாஹ. யதி³ ஸியாதி யதி³ காமராகா³னுஸயோ ஸியா. ஏதஸ்ஸபீதி தி³ட்டா²னுஸயஸம்பயுத்தலோப⁴ஸ்ஸபி ‘‘ஸப்³ப³ஸக்காயபரியாபன்னேஸு த⁴ம்மேஸூ’’தி காமராக³ஸ்ஸ டா²னம் வத்தப்³ப³ம் ஸியா, ந ச வுத்தம். அத² பனாதிஆதி³ து³தியவிகப்பம் ஸந்தா⁴ய வுத்தம். அஜ்ஜா²ஸயவஸேன தம்னின்னதாயாதி அஸதிபி ஆரம்மணகரணே யத்த² காமராகா³த³யோ அஜ்ஜா²ஸயதோ நின்னா, தம் தேஸம் அனுஸயனட்டா²னம். தேன வுத்தம் ‘‘அனுக³தோ ஹுத்வா ஸேதீ’’தி. அத² பன வுத்தந்தி ஸம்ப³ந்தோ⁴. யதா²திஆதி³ யதா²வுத்தஸ்ஸ அத்த²ஸ்ஸ உதா³ஹரணவஸேன நிரூபனம். து³க்கே² படிஹஞ்ஞனவஸேனேவ பவத்ததி, நாரம்மணகரணவஸேனாதி அதி⁴ப்பாயோ. து³க்க²மேவ தஸ்ஸ அனுஸயனட்டா²னம் வுத்தந்தி அஜ்ஜா²ஸயஸ்ஸ தத்த² நின்னத்தா து³க்க²மேவ தஸ்ஸ படிக⁴ஸ்ஸ அனுஸயனட்டா²னம் வுத்தம், நாலம்பி³தம் ரூபாதி³ ஸுக²வேத³னா சாதி அதி⁴ப்பாயோ. ஏவந்தி யதா² அஞ்ஞாரம்மணஸ்ஸபி படிக⁴ஸ்ஸ அஜ்ஜா²ஸயதோ து³க்க²னின்னதாய து³க்க²மேவ அனுஸயனட்டா²னம் வுத்தம், ஏவம். து³க்கா²தீ³ஸு…பே… வுத்தந்தி ‘‘து³க்கே²ன ஸுக²ம் அதி⁴க³ந்தப்³ப³ம். நத்தி² தி³ன்ன’’ந்தி ச ஆதி³னா காயகிலமனது³க்கே² தா³னானுபா⁴வாதி³கே ச மிச்சா²பி⁴னிவேஸனவஸேன உப்பஜ்ஜமானேன தி³ட்டா²னுஸயேன ஸம்பயுத்தோ அஞ்ஞாரம்மணோபி லோபோ⁴ ‘‘ஏவம் ஸுக²ம் ப⁴விஸ்ஸதீ’’தி அஜ்ஜா²ஸயதோ ஸுகா²பி⁴ஸங்க³வஸேனேவ பவத்ததீதி ஸுகு²பேக்கா²பே⁴த³ம் ஸாதஸந்தஸுக²த்³வயமேவ அஸ்ஸ லோப⁴ஸ்ஸ அனுஸயனட்டா²னம் வுத்தம் பாளியம், ந யதா²வுத்தம் து³க்கா²தி³, தஸ்மா ப⁴வராக³…பே… ந விருஜ்ஜ²தி. ஏகஸ்மிம்யேவ சாதிஆதி³ து³தியவிகப்பம்யேவ உபப்³ரூஹனத்த²ம் வுத்தம். தத்த² ராக³ஸ்ஸ ஸுக²ஜ்ஜா²ஸயதா தம்ஸமங்கி³னோ புக்³க³லஸ்ஸ வஸேன வேதி³தப்³பா³, தன்னின்னபா⁴வேன வா சக்கு²ஸ்ஸ விஸமஜ்ஜா²ஸயதா விய. ஏஸ நயோ ஸேஸேஸுபி. தேஸம் ராக³படிகா⁴னம் நானானுஸயட்டா²னதா ஹோதி ஏகஸ்மிம்பி ஆரம்மணேதி அத்தோ².
ஏவஞ்ச கத்வாதி அஸதிபி க³ஹேதப்³ப³பே⁴தே³ க³ஹணவிஸேஸேன அனுஸயனட்டா²னஸ்ஸ பி⁴ன்னத்தா ஏவ. ‘‘யத்த²…பே… நோ’’தி வுத்தம், அஞ்ஞதா² விருஜ்ஜே²ய்ய. க³ஹேதப்³ப³பே⁴தே³ன ஹி ராக³படிகா⁴னம் அனுஸயனட்டா²னபே⁴தே³ க³ய்ஹமானே விபாகமத்தே டா²தப்³ப³ம் ஸியா, ந ச தம் யுத்தம், நபி ஸப்³பே³ஸம் புரிஸத்³வாரானம் இட்டா²னிட்ட²ம் நியதந்தி. யதி³பி யதா²வுத்தலோப⁴ஸ்ஸ வுத்தனயேன காமராகா³னுஸயதா ஸம்ப⁴வதி, யதா² பன ஸுகு²பேக்கா²ஸு இட்டா²ரம்மணே ச உப்பஜ்ஜந்தேன தோ³மனஸ்ஸேன ஸஹ பவத்தோ தோ³ஸோ து³ப்³ப³லபா⁴வேன படிகா⁴னுஸயோ ந ஹோதி, ஏவம் யதா²வுத்தலோபோ⁴பி காமராகா³னுஸயோ ந ஹோதீதி இமமத்த²ம் த³ஸ்ஸேதும் ‘‘அட்ட²கதா²யம் பனா’’திஆதி³ வுத்தம். ந படிகா⁴னுஸயோதி ஏத்த² ந-காரோ படிஸேத⁴னத்தோ², ந அஞ்ஞத்தோ², இதரத்த² பன ஸம்ப⁴வோ ஏவ நத்தீ²தி த³ஸ்ஸேந்தோ ‘‘யம் பனேத’’ந்திஆதி³மாஹ. தத்த² ‘‘ந ஹி தோ³மனஸ்ஸஸ்ஸ படிகா⁴னுஸயபா⁴வாஸங்கா அத்தீ²’’தி இமினா ந-காரஸ்ஸ அஞ்ஞத்த²தாபா⁴வத³ஸ்ஸனமுகே²ன அபா⁴வத்த²தம் ஸமத்தே²தி.
தே³ஸனா ஸம்கிண்ணா விய ப⁴வேய்யாதி ஏத்த² தே³ஸனாஸங்கரம் த³ஸ்ஸேதும் ‘‘ப⁴வராக³ஸ்ஸபி…பே… ப⁴வேய்யா’’தி வுத்தம். தஸ்ஸத்தோ² – யதா² காமராக³ஸ்ஸ காமதா⁴துயா த்³வீஸு வேத³னாஸு ஆரம்மணகரணவஸேன உப்பத்தி வுத்தா ‘‘காமராகோ³ காமதா⁴துயா த்³வீஸு வேத³னாஸு அனுஸேதீ’’தி, ஏவம் யதி³ ‘‘ப⁴வராகோ³ காமதா⁴துயா த்³வீஸு வேத³னாஸு அனுஸேதீ’’தி வுச்சேய்ய, ப⁴வராக³ஸ்ஸபி…பே… ப⁴வேய்ய. ததோ ச காமராகே³ன ஸத்³தி⁴ம் ப⁴வராக³ஸ்ஸ தே³ஸனா ஸம்கிண்ணா ப⁴வேய்ய, காமராக³தோ ச ப⁴வராக³ஸ்ஸ விஸேஸோ த³ஸ்ஸேதப்³போ³. ஸோ ச ஸஹஜாதானுஸயவஸேன ந ஸக்கா த³ஸ்ஸேதுந்தி ஆரம்மணகரணவஸேன த³ஸ்ஸேதப்³போ³. தேன வுத்தம் ‘‘தஸ்மா ஆரம்மண…பே… அதி⁴ப்பாயோ’’தி. தத்த² ஆரம்மணவிஸேஸேனாதி ரூபாரூபதா⁴துஸங்கா²தஆரம்மணவிஸேஸேன. விஸேஸத³ஸ்ஸனத்த²ந்தி காமராக³தோ ப⁴வராக³ஸ்ஸ விஸேஸத³ஸ்ஸனத்த²ம். ஏவம் தே³ஸனா கதாதி ‘‘ரூபதா⁴துயா அரூபதா⁴துயா ஏத்த² ப⁴வராகா³னுஸயோ அனுஸேதீ’’தி ஏவம் விஸயே பு⁴ம்மம் கத்வா தே³ஸனா கதா. தேனாஹ ‘‘ஸஹஜாதவேத³னாவிஸேஸாபா⁴வதோ’’தி.
உப்பத்திட்டா²னவாரவண்ணனா நிட்டி²தா.
மஹாவாரோ
1. அனுஸயவாரவண்ணனா
3. பவத்தாவிராமவஸேனாதி அனுஸயப்பவத்தியா அவிராமவஸேன, அவிச்சே²த³வஸேனாதி அத்தோ². கத²ம் பன குஸலாப்³யாகதசித்தக்க²ணே அனுஸயானம் பவத்தீதி ஆஹ ‘‘மக்³கே³னேவ…பே… புப்³பே³’’தி.
20. சித்தசேதஸிகானஞ்ச டா²னம் நாம சித்துப்பாதோ³தி ஆஹ ‘‘ஏகஸ்மிம் சித்துப்பாதே³’’தி. தேஸம் தேஸம் புக்³க³லானந்தி புது²ஜ்ஜனாதீ³னம் புக்³க³லானம். பகதியா ஸபா⁴வேன. ஸபா⁴வஸித்³தா⁴ ஹி து³க்கா²ய வேத³னாய காமராக³ஸ்ஸ அனனுஸயனட்டா²னதா. ஏவம் ஸேஸேஸுபி யதா²ரஹம் வத்தப்³ப³ம். வக்க²தி ஹி ‘‘பகதியா து³க்கா²தீ³னம் காமராகா³தீ³னம் அனனுஸயனட்டா²னதம் ஸந்தா⁴ய வுத்த’’ந்தி. பஹானேனாதி தஸ்ஸ தஸ்ஸ அனுஸயஸ்ஸ ஸமுச்சி²ந்த³னேன. திண்ணம் புக்³க³லானந்தி புது²ஜ்ஜனஸோதாபன்னஸகதா³கா³மீனம். த்³வின்னம் புக்³க³லானந்தி அனாகா³மிஅரஹந்தானம். ஏத்தா²தி ஏதஸ்மிம் புக்³க³லோகாஸவாரே. புரிமனயேதி ‘‘திண்ணம் புக்³க³லான’’ந்திஆதி³கே புரிமஸ்மிம் விஸ்ஸஜ்ஜனனயே. ஓகாஸந்தி உப்பத்திட்டா²னம், இத⁴ பன து³க்க²வேத³னா வேதி³தப்³பா³. பச்சி²மனயேதி ‘‘த்³வின்னம் புக்³க³லான’’ந்திஆதி³கே விஸ்ஸஜ்ஜனனயே. அனோகாஸதா அனனுஸயனட்டா²னதா.
அனுஸயவாரவண்ணனா நிட்டி²தா.
2. ஸானுஸயவாரவண்ணனா
66-131. ‘‘ஸானுஸயோ, பஜஹதி, பரிஜானாதீ’’தி புக்³க³லோ வுத்தோதி ‘‘காமராகே³ன ஸானுஸயோ, காமராக³ம் பஜஹதி, காமராக³ம் பரிஜானாதீ’’திஆதீ³ஸு அனுஸயஸமங்கி³பா⁴வேன பஹானபரிஞ்ஞாகிரியாய கத்துபா⁴வேன ச புக்³க³லோ வுத்தோ, ந த⁴ம்மோ. ப⁴வவிஸேஸேன வாதி கேவலேன ப⁴வவிஸேஸேன வா. இதரேஸூதி படிகா⁴னுஸயாதீ³ஸு. ப⁴வானுஸயவிஸேஸேன வாதி காமப⁴வாதி³ப⁴வவிஸிட்டா²னுஸயவிஸேஸேன வா. ஸானுஸயதானிரனுஸயதாதி³காதி ஏத்த² ஆதி³-ஸத்³தே³ன பஹானாபஹானபரிஞ்ஞாபரிஞ்ஞா ஸங்க³ய்ஹந்தி. நனு ச ப⁴வவிஸேஸே கேஸஞ்சி அனுஸயானம் அப்பஹானந்தி? ந தம் அனுஸயகதம், அத² கோ² பச்சயவேகல்லதோ அனோகாஸதாய சாதி நாயம் விரோதோ⁴. த்³வீஸு வேத³னாஸூதி ஸுக²உபேக்கா²ஸு வேத³னாஸு து³க்கா²ய வேத³னாய காமராகா³னுஸயேன நிரனுஸயோதி யோஜேதப்³ப³ம். இத³ம்பி நத்தி² புக்³க³லவஸேன வுச்சமானத்தா. தேனாஹ ‘‘ந ஹி புக்³க³லஸ்ஸ…பே… அனுஸயான’’ந்தி. யதி³பி புக்³க³லஸ்ஸ அனுஸயனோகாஸோ அனோகாஸோ, தஸ்ஸ பன ஸானுஸயதாதி³ஹேது ஹோதீதி த³ஸ்ஸேந்தோ ‘‘அனுஸயஸ்ஸ பனா’’திஆதி³மாஹ. நிரனுஸயதாதீ³னந்தி ஆதி³-ஸத்³தே³ன அப்பஹானாபரிஞ்ஞா ஸங்க³ண்ஹாதி. பரிஜானனம் ஸமதிக்கமனந்தி பரிஞ்ஞாவாரேபி ‘‘அபாதா³னே நிஸ்ஸக்கவசன’’ந்தி வுத்தம்.
அனுஸயனட்டா²னதோதி அனுஸயனட்டா²னஹேது. ‘‘அனனுஸயனட்டா²னதோ’’தி ஏத்தா²பி ஏஸேவ நயோ. நிமித்தாபாதா³னபா⁴வத³ஸ்ஸனத்த²ந்தி ஸானுஸயவாரே நிமித்தபா⁴வத³ஸ்ஸனத்த²ம், பஜஹனபரிஞ்ஞாவாரேஸு அபாதா³னபா⁴வத³ஸ்ஸனத்த²ஞ்சாதி யோஜேதப்³ப³ம். பஜஹதீதி ஏத்த² ‘‘ரூபதா⁴துயா அரூபதா⁴துயா ததோ மானானுஸயம் பஜஹதீ’’தி பாளிபத³ம் ஆஹரித்வா யோஜேதப்³ப³ம், ந பஜஹதீதி ஏத்த² பன ‘‘து³க்கா²ய வேத³னாய ததோ காமராகா³னுஸயம் நப்பஜஹதீ’’தி. ஏவமாதீ³ஸூதி ஆதி³-ஸத்³தே³ன பரிஞ்ஞாவாரம்பி ஸங்க³ண்ஹாதி. பு⁴ம்மனித்³தே³ஸேனேவ ஹேதுஅத்தே²னேவ நித்³தி³ட்டா²தி அத்தோ².
சதுத்த²பஞ்ஹவிஸ்ஸஜ்ஜனேனாதி ‘‘யதோ வா பன மானானுஸயேன ஸானுஸயோ, ததோ காமராகா³னுஸயேன ஸானுஸயோ’’தி ஏதஸ்ஸ பஞ்ஹஸ்ஸ விஸ்ஸஜ்ஜனேன. தத்த² ஹி ‘‘ரூபதா⁴துயா அரூபதா⁴துயா’’திஆதி³னா ஸரூபதோ அனுஸயனட்டா²னானி த³ஸ்ஸிதானி. தத³த்தே²தி தம் அனுஸயனட்டா²னத³ஸ்ஸனம் அத்தோ² ஏதஸ்ஸாதி தத³த்தோ², தஸ்மிம் தத³த்தே². ‘‘அனுஸயஸ்ஸ உப்பத்திட்டா²னத³ஸ்ஸனத்த²ம் அயம் வாரோ ஆரத்³தோ⁴’’திஆதி³னா ‘‘யதோ’’தி ஏதேன அனுஸயனட்டா²னம் வுத்தந்தி இமமத்த²ம் விபா⁴வேத்வா. பமாத³லிகி²தம் விய தி³ஸ்ஸதி உப்பன்ன-ஸத்³தே³ன வத்தமானுப்பன்னே வுச்சமானே. யதா² பன உப்பஜ்ஜனவாரே உப்பஜ்ஜதி-ஸத்³தே³ன உப்பத்தியோக³தீ³பகத்தா உப்பத்திரஹா வுச்சந்தி, ஏவமிதா⁴பி உப்பத்திஅரஹே வுச்சமானே ந கோசி விரோதோ⁴. யம் பன வக்க²தி ‘‘ந ஹி அபரியாபன்னானம் அனுஸயுப்பத்திரஹட்டா²னதா’’தி, ஸோபி ந தோ³ஸோ. யத்த² யத்த² ஹி அனுஸயா உப்பத்திரஹா, ததே³வ ஏகஜ்ஜ²ம் க³ஹேத்வா ‘‘ஸப்³ப³த்தா²’’தி வுத்தந்தி. ததே²வ தி³ஸ்ஸதீதி தம் பமாத³லிகி²தம் விய தி³ஸ்ஸதீதி அத்தோ².
யதோ உப்பன்னேன ப⁴விதப்³ப³ந்தி யதோ அனுஸயனட்டா²னதோ காமகா³ரானுஸயேன உப்பன்னேன ப⁴விதப்³ப³ம், தேன காமராகா³னுஸயேன உப்பத்திரஹட்டா²னே நிஸ்ஸக்கவசனம் கதம் ‘‘யதோ’’தி. ததா²தி ஏத்த² ததா²-ஸத்³தோ³ யதா² ‘‘யதோ உப்பன்னேனா’’தி ஏத்த² உப்பத்திரஹட்டா²னதோ அனுஸயஸ்ஸ உப்பத்திரஹதா வுத்தா, ததா² ‘‘உப்பஜ்ஜனகேனா’’தி ஏத்தா²பி ஸா ஏவ வுச்சதீதி தீ³பேதீதி ஆஹ ‘‘ஸப்³ப³த⁴ம்மேஸு…பே… ஆபன்னேனா’’தி. தத்த² ‘‘உப்பஜ்ஜனகோ’’தி வுத்தே அனுப்பஜ்ஜனகோ ந ஹோதீதி அயமத்தோ² விஞ்ஞாயதி, ததா² ச ஸதி தேன அனுப்பத்தி நிச்சி²தாதி உப்பன்னஸபா⁴வதா ச பகாஸிதா ஹோதீதி. தேனாஹ ‘‘ஸப்³ப³த⁴ம்மேஸு…பே… அபனேதீ’’தி. ‘‘யோ யதோ காமராகா³னுஸயேன நிரனுஸயோ, ஸோ ததோ மானானுஸயேன நிரனுஸயோ’’தி புச்சா²ய ‘‘யதோ ததோ’’தி ஆக³தத்தா விஸ்ஸஜ்ஜனே ‘‘ஸப்³ப³த்தா²’’தி பத³ஸ்ஸ நிஸ்ஸக்கவஸேனேவ ஸக்கா யோஜேதுந்தி த³ஸ்ஸேந்தோ ‘‘ஸப்³ப³த்தா²தி…பே… ந ந ஸம்ப⁴வதீ’’தி ஆஹ. பு⁴ம்மதோ அஞ்ஞத்தா²பி ஸத்³த³விதூ³ இச்ச²ந்தி, யதோ ஸப்³பே³ஸம் பாத³கம் ‘‘ஸப்³ப³த்த²பாத³க’’ந்தி வுச்சதி, இத⁴ பன நிஸ்ஸக்கவஸேன வேதி³தப்³ப³ம்.
ஸானுஸயவாரவண்ணனா நிட்டி²தா.
3. பஜஹனவாரவண்ணனா
132-197. அப்பஜஹனஸப்³பா⁴வாதி அப்பஹானஸ்ஸ, அப்பஹீயமானஸ்ஸ வா ஸப்³பா⁴வா. தஸ்மாதி யஸ்மா யோ காமராகா³னுஸயம் பஜஹதி, ந ஸோ மானானுஸயம் நிரவஸேஸதோ பஜஹதி, யோ ச மானானுஸயம் நிரவஸேஸதோ பஜஹதி, ந ஸோ காமராகா³னுஸயம் பஜஹதி பகே³வ பஹீனத்தா, தஸ்மா ‘‘யோ வா பன மானானுஸயம் பஜஹதி, ஸோ காமராகா³னுஸயம் பஜஹதீதி? நோ’’தி வுத்தந்தி வேதி³தப்³ப³ம். யதி³ ஏவம் பட²மபுச்சா²யம் கத²ந்தி ஆஹ ‘‘யஸ்மா பன…பே… வுத்த’’ந்தி. தத்த² பஹானகரணமத்தமேவாதி பஹானகிரியாஸம்ப⁴வமத்தமேவ, ந நிரவஸேஸப்பஹானந்தி அதி⁴ப்பாயோ. தே ட²பேத்வாதி தி³ட்டி²விசிகிச்சா²னுஸயாதீ³னம் நிரவஸேஸபஜஹனகே அட்ட²மகாதி³கே ட²பேத்வா. அவஸேஸாதி தஸ்ஸ தஸ்ஸ அனுஸயஸ்ஸ நிரவஸேஸப்பஜஹனகேஹி அவஸிட்டா². தேஸு யேஸம் ஏகச்சே அனுஸயா பஹீனா, தேபி அப்பஜஹனஸப்³பா⁴வேனேவ நப்பஜஹந்தீதி வுத்தா. ந ச யதா²விஜ்ஜமானேனாதி மக்³க³கிச்சபா⁴வேன விஜ்ஜமானப்பகாரேன பஹானேன வஜ்ஜிதா ரஹிதா ஏவ வுத்தாதி யோஜனா.
கேஸஞ்சீதி ஸோதாபன்னஸகதா³கா³மிமக்³க³ஸமங்கி³ஸகதா³கா³மீனம். புன கேஸஞ்சீதி அனாகா³மிஅக்³க³மக்³க³ஸமங்கி³அரஹந்தானம். உப⁴யந்தி காமராக³விசிகிச்சா²னுஸயத்³வயம். ஸேஸானந்தி ‘‘ஸேஸா’’தி வுத்தானம் யதா²வுத்தபுக்³க³லானம். தேஸந்தி வுத்தப்பகாரானம் த்³வின்னம் அனுஸயானம். உப⁴யாப்பஜஹனஸ்ஸாதி காமராக³விசிகிச்சா²னுஸயாப்பஜஹனஸ்ஸ. காரணம் ந ஹோதீதி யேஸம் விசிகிச்சா²னுஸயோ பஹீனோ, தேஸம் தஸ்ஸ பஹீனதா, யேஸம் யதா²வுத்தம் உப⁴யப்பஹீனம், தேஸம் தத³ப்பஜஹனஸ்ஸ காரணம் ந ஹோதீதி அத்தோ². தேனாஹ ‘‘தேஸம் பஹீனத்தா ‘நப்பஜஹந்தீ’தி ந ஸக்கா வத்து’’ந்தி. அத² பன ந தத்த² காரணம் வுத்தம், யேன காரணவசனேன யதா²வுத்ததோ³ஸாபத்தி ஸியா, கேவலம் பன ஸன்னிட்டா²னேன தேஸம் புக்³க³லானம் க³ஹிததாத³ஸ்ஸனத்த²ம் வுத்தம் ‘‘காமராகா³னுஸயஞ்ச நப்பஜஹந்தீ’’தி, ஏவம்பி புச்சி²தஸ்ஸ ஸம்ஸயத்த²ஸ்ஸ காரணம் வத்தப்³ப³ம். ததா² ச ஸதி ‘‘ஸேஸபுக்³க³லா தஸ்ஸ அனுஸயஸ்ஸ பஹீனத்தா நப்பஜஹந்தீ’’தி காரணம் வத்தப்³ப³மேவாதி சோத³னம் ஸந்தா⁴யாஹ ‘‘ந வத்தப்³ப³’’ந்திஆதி³. தத்த² ந வத்தப்³ப³ந்தி வுத்தனயேன காரணம் ந வத்தப்³ப³ம் காரணபா⁴வஸ்ஸேவ அபா⁴வதோ. ‘‘உப⁴யாப்பஜஹனஸ்ஸ காரணம் ந ஹோதீ’’தி வுத்தம், யதா² பன வத்தப்³ப³ம், தம் த³ஸ்ஸேதும் ‘‘யோ காமராகா³னுஸயம்…பே… வத்தப்³ப³த்தா’’தி ஆஹ. தேன பஹீனாப்பஹீனவஸேன காரணம் ந வத்தப்³ப³ம், பஹீனானம்யேவ பன வஸேன வத்தப்³ப³ந்தி த³ஸ்ஸேதி. ஸம்ஸயத்த²ஸங்க³ஹிதேதி ஸம்ஸயத்தே²ன பதே³ன ஸங்க³ஹிதே. ஸன்னிட்டா²னபத³ஸங்க³ஹிதம் பன பஹீயமானத்தா ‘‘நப்பஜஹதீ’’தி ந ஸக்கா வத்துந்தி.
பஜஹனவாரவண்ணனா நிட்டி²தா.
5. பஹீனவாரவண்ணனா
264-274. ப²லட்ட²வஸேனேவ தே³ஸனா ஆரத்³தா⁴, ந மக்³க³ட்ட²வஸேன, குதோ புது²ஜ்ஜனவஸேன. கஸ்மா? ப²லக்க²ணே ஹி அனுஸயா பஹீனாதி வுச்சந்தி, மக்³க³க்க²ணே பன பஹீயந்தீதி. தேனேவாஹ ‘‘மக்³க³ஸமங்கீ³னம் அக்³க³ஹிததம் தீ³பேதீ’’தி. படிலோமே ஹி புது²ஜ்ஜனவஸேனபி தே³ஸனா க³ஹிதா ‘‘யஸ்ஸ தி³ட்டா²னுஸயோ அப்பஹீனோ, தஸ்ஸ விசிகிச்சா²னுஸயோ அப்பஹீனோதி? ஆமந்தா’’திஆதி³னா. அனுஸயச்சந்தபடிபக்கே²கசித்தக்க²ணிகானந்தி அனுஸயானம் அச்சந்தம் படிபக்க²பூ⁴தஏகசித்தக்க²ணிகானம். மக்³க³ஸமங்கீ³னந்தி மக்³க³ட்டா²னம். ஏத்த² ச அனுஸயானம் அச்சந்தபடிபக்க²தாக்³க³ஹணேன உப்பத்திரஹதம் படிக்கி²பதி. ந ஹி தே அச்சந்தபடிபக்க²ஸமுப்பத்திதோ பரதோ உப்பத்திரஹா ஹோந்தி. மக்³க³ஸமங்கி³தாக்³க³ஹணேன அனுப்பத்திரஹதாபாதி³ததம் படிக்கி²பதி. ந ஹி மக்³க³க்க²ணே தே அனுப்பத்திரஹதம் ஆபாதி³தா நாம ஹோந்தி, அத² கோ² ஆபாதீ³யந்தீதி. ஏகசித்தக்க²ணிகதாக்³க³ஹணேன ஸந்தானப்³யாபாரம். தேனாஹ ‘‘ந கோசீ’’திஆதி³. தத்த² தேதி மக்³க³ஸமங்கி³னோ. ந கேவலம் பஹீனவாரேயேவ, அத² கோ² அஞ்ஞேஸுபீதி த³ஸ்ஸேந்தோ ‘‘அனுஸய…பே… க³ஹிதா’’தி ஆஹ.
275-296. யத்த² அனுஸயோ உப்பத்திரஹோ, தத்தே²வஸ்ஸ அனுப்பத்திரஹதாபாத³னந்தி ‘‘அத்தனோ அத்தனோ ஓகாஸே ஏவ அனுப்பத்தித⁴ம்மதம் ஆபாதி³தோ’’தி ஆஹ. ததா² ஹி வுத்தம் ‘‘சக்கு²ம் லோகே பியரூபம் ஸாதரூபம், ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதீ’’தி (விப⁴. 203) வத்வா புன வுத்தம் ‘‘சக்கு²ம் லோகே பியரூபம் ஸாதரூபம், ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தீ’’தி (விப⁴. 204). தஸ்மாதி யஸ்மா ததோ³காஸத்தமேவ காமதா⁴துஆதி³ஓகாஸத்தமேவ அனுஸயானம் தீ³பேந்தி பஹீனாப்பஹீனவசனானி, தஸ்மா. அனோகாஸே தது³ப⁴யாவத்தப்³ப³தா வுத்தாதி யஸ்மா காமராக³படிகா⁴னுஸயானம் த்³வின்னம் உப்பத்திட்டா²னம், ஸோ ஏவ பஹானோகாஸோதி ஸ்வாயம் தேஸம் அஞ்ஞமஞ்ஞம் அனோகாஸோ, தஸ்மிம் அனோகாஸே தது³ப⁴யஸ்ஸ பஹானாப்பஹானஸ்ஸ நவத்தப்³ப³தா வுத்தா. காமராகா³னுஸயோகாஸே ஹி படிகா⁴னுஸயஸ்ஸ அப்பஹீனத்தா ஸோ ‘‘தத்த² பஹீனோ’’தி ந வத்தப்³போ³, அட்டி²தத்தா பன ‘‘தத்த² அப்பஹீனோ’’தி ச, தஸ்மா அனோகாஸே தது³ப⁴யாவத்தப்³ப³தா வுத்தாதி. தேன ஸத்³தி⁴ம் ஸமானோகாஸேதி தேன காமராகே³ன ஸத்³தி⁴ம் ஸமானோகாஸே. ‘‘ஸாதா⁴ரணட்டா²னே’’தி வுத்தே காமதா⁴துயம் ஸுகு²பேக்கா²ஸு பஹீனோ நாம ஹோதி, ந ஸமானகாலே பஹீனோ ததியசதுத்த²மக்³க³வஜ்ஜ²த்தா காமராக³மானானுஸயானம்.
பஹீனவாரவண்ணனா நிட்டி²தா.
7. தா⁴துவாரவண்ணனா
332-340. அப்பஹீனுப்பத்திரஹபா⁴வா இத⁴ அனுக³மனஸயனானீதி த³ஸ்ஸேந்தோ ‘‘யஸ்மிம் …பே… அத்தோ²’’தி ஆஹ. இதா⁴பி யுத்தாதி புப்³பே³ வுத்தமேவத்த²ம் பராமஸதி. ததா² ஹி வுத்தம் ‘‘காரணலாபே⁴ உப்பத்திஅரஹதம் த³ஸ்ஸேதீ’’தி (யம. மூலடீ. அனுஸயயமக 1). ச² படிஸேத⁴வசனானீதி திஸ்ஸன்னம் தா⁴தூனம் சுதூபபாதவிஸிட்டா²னம் படிஸேத⁴னவஸேன வுத்தவசனானி, ததோ ஏவ தா⁴துவிஸேஸனித்³தா⁴ரணானி ந ஹோந்தி. படிஸேதோ⁴தி ஹி இத⁴ ஸத்தாபடிஸேதோ⁴ வுத்தோதி அதி⁴ப்பாயேன வத³தி. அஞ்ஞத்தே² பன ந-காரே நாயம் தோ³ஸோ. இமம் நாம தா⁴தும். தம்மூலிகாஸூதி படிஸேத⁴மூலிகாஸு. ஏவஞ்ஹீதி ‘‘ந காமதா⁴துயா சுதஸ்ஸ காமதா⁴தும் உபபஜ்ஜந்தஸ்ஸா’’திஆதி³னா பட²மயோஜனாய ஸதி. நகாமதா⁴துஆதீ³ஸு உபபத்திகித்தனேனேவ நகாமதா⁴துஆதி³க்³க³ஹணேனபி தா⁴துவிஸேஸஸ்ஸேவ க³ஹிததாய அத்த²தோ விஞ்ஞாயமானத்தா. தேனாஹ ‘‘ந காமதா⁴து…பே… விஞ்ஞாயதீ’’தி. ப⁴ஞ்ஜிதப்³பா³தி விப⁴ஜிதப்³பா³. விபா⁴கோ³ பனேத்த² து³விதோ⁴ இச்சி²தோதி ஆஹ ‘‘த்³விதா⁴ காதப்³பா³தி அத்தோ²’’தி. புச்சா² ச விஸ்ஸஜ்ஜனானி ச புச்சா²விஸ்ஸஜ்ஜனானி. யதா² அவுத்தே ப⁴ங்கா³பா⁴வஸ்ஸ அவிஞ்ஞாதத்தா ‘‘அனுஸயா ப⁴ங்கா³ நத்தீ²’’தி வத்தப்³ப³ம், ததா² தயித³ம் ‘‘கதி அனுஸயா ப⁴ங்கா³’’தி ஏதத³பேக்க²ந்தி தத³பி வத்தப்³ப³ம். புச்சா²பேக்க²ஞ்ஹி விஸ்ஸஜ்ஜனந்தி.
தா⁴துவாரவண்ணனா நிட்டி²தா.
அனுஸயயமகவண்ணனா நிட்டி²தா.
8. சித்தயமகம்
உத்³தே³ஸவாரவண்ணனா
1-62. ஸராகா³தீ³தி ஏத்த² ஆதி³-ஸத்³தே³ன ‘‘யஸ்ஸ ஸராக³ம் சித்தம் உப்பஜ்ஜதி, ந நிருஜ்ஜ²தீ’’தி ஆரபி⁴த்வா யாவ ‘‘யஸ்ஸ அவிமுத்தம் சித்த’’ந்தி வாரோ, தாவ ஸங்க³ண்ஹாதி. குஸலாதீ³தி பன ஆதி³-ஸத்³தே³ன ‘‘யஸ்ஸ குஸலம் சித்தம் உப்பஜ்ஜதி, ந நிருஜ்ஜ²தீ’’தி ஆரபி⁴த்வா யாவ ‘‘யஸ்ஸ ஸரணம் சித்தம் உப்பஜ்ஜதி, ந நிருஜ்ஜ²தீ’’தி வாரோ, தாவ ஸங்க³ண்ஹாதி, தஸ்மா ஸராகா³தி³குஸலாதீ³ஹீதி ஸராகா³தீ³ஹி அவிமுத்தந்தேஹி, குஸலாதீ³ஹி அரணந்தேஹி பதே³ஹி மிஸ்ஸகா வாரா. ஸுத்³தி⁴காதி கேவலா யதா²வுத்தஸராகா³தீ³ஹி குஸலாதீ³ஹி ச அமிஸ்ஸகா. தயோ தயோதி புக்³க³லத⁴ம்மவஸேன தயோ தயோ மஹாவாரா. யதி³ ஏவம் கத²ம் ஸோளஸ புக்³க³லவாராதி ஆஹ ‘‘தத்த² தத்த² பன வுத்தே ஸம்பிண்டே³த்வா’’தி. தத்த² தத்த² ஸோளஸவிதே⁴ ஸராகா³தி³மிஸ்ஸகசித்தே வுத்தே புக்³க³லே ஏவ ஏகஜ்ஜ²ம் ஸம்பிண்டே³த்வா ஸங்க³ஹேத்வா ‘‘ஸோளஸ புக்³க³லவாரா’’தி வுத்தம். ‘‘த⁴ம்மபுக்³க³லத⁴ம்மவாரா’’தி ஏத்தா²பி ஏஸேவ நயோ. ந நிரந்தரம் வுத்தேதி த⁴ம்மே புக்³க³லத⁴ம்மே ச அனாமஸித்வா ஸோளஸஸுபி டா²னேஸு நிரந்தரம் புக்³க³லே ஏவ வுத்தே ஸம்பிண்டே³த்வா ஸோளஸ புக்³க³லவாரா ந வுத்தாதி அத்தோ².
ஸம்ஸக்³க³வஸேனாதி ஸம்ஸஜ்ஜனவஸேன தே³ஸனாய விமிஸ்ஸனவஸேன. அஞ்ஞதா² ஹி உப்பாத³னிரோதா⁴ பச்சுப்பன்னானாக³தகாலா ச கத²ம் ஸம்ஸஜ்ஜீயந்தி. ஸேஸானம்பி வாரானந்தி உப்பாது³ப்பன்னவாராதீ³னம். தம்தம்னாமதாதி யதா² ‘‘யஸ்ஸ சித்தம் உப்பஜ்ஜதி, தஸ்ஸ சித்தம் உப்பன்ன’’ந்திஆதி³னா உப்பாத³உப்பன்னபா⁴வாமஸனதோ உப்பாத³உப்பன்னவாரோதி நாமம் பாளிதோ ஏவ விஞ்ஞாயதி, ஏவம் ஸேஸவாரானம்பீதி ஆஹ ‘‘தம்தம்னாமதா பாளிஅனுஸாரேன வேதி³தப்³பா³’’தி.
உத்³தே³ஸவாரவண்ணனா நிட்டி²தா.
நித்³தே³ஸவாரவண்ணனா
63. ததா²ரூபஸ்ஸேவாதி பச்சி²மசித்தஸமங்கி³னோ ஏவ. தஞ்ச சித்தந்தி தஞ்ச யதா²வுத்தக்க²ணம் பச்சி²மசித்தம். ‘‘ஏவம்பகார’’ந்தி இமஸ்ஸ அத்த²ம் த³ஸ்ஸேதும் ‘‘ப⁴ங்க³க்க²ணஸமங்கி³மேவா’’தி வுத்தம் நிருஜ்ஜ²மானாகாரஸ்ஸ ‘‘ஏவம்பகார’’ந்தி வுத்தத்தா.
65-82. த்³வயமேதந்தி யம் ‘‘க²ணபச்சுப்பன்னமேவ சித்தம் உப்பாத³க்க²ணாபக³மேன உப்பஜ்ஜித்த² நாம, ததே³வ உப்பாத³க்க²ணே உப்பாத³ம் பத்தத்தா உப்பஜ்ஜித்த², அனதீதத்தா உப்பஜ்ஜதி நாமா’’தி வுத்தம், ஏதம் உப⁴யம்பி. ஏவம் ந ஸக்கா வத்துந்தி இமினா வுத்தப்பகாரேன ந ஸக்கா வத்தும், பகாரந்தரேன பன ஸக்கா வத்துந்தி அதி⁴ப்பாயோ. தத்த² ‘‘ந ஹீ’’திஆதி³னா பட²மபக்க²ம் விபா⁴வேதி. விப⁴ஜிதப்³ப³ம் ஸியாதி ‘‘ப⁴ங்க³க்க²ணே தம் சித்தம் உப்பஜ்ஜித்த², நோ ச உப்பஜ்ஜதி, உப்பாத³க்க²ணே தம் சித்தம் உப்பஜ்ஜித்த² சேவ உப்பஜ்ஜதி சா’’தி விப⁴ஜிதப்³ப³ம் ஸியா, ந ச விப⁴த்தம். ‘‘ஆமந்தா’’தி வத்தப்³ப³ம் ஸியா க²ணபச்சுப்பன்னே சித்தே வுத்தனயேன உப⁴யஸ்ஸபி லப்³ப⁴மானத்தா, ந ச வுத்தம். இதா³னி யேன பகாரேன ஸக்கா வத்தும், தம் த³ஸ்ஸேதும் ‘‘சித்தஸ்ஸ ப⁴ங்க³க்க²ணே’’திஆதி³மாஹ. புக்³க³லோ வுத்தோ, புக்³க³லவாரோ ஹேஸோதி அதி⁴ப்பாயோ. தஸ்ஸாதி புக்³க³லஸ்ஸ. ந ச கிஞ்சி சித்தம் உப்பஜ்ஜதி சித்தஸ்ஸ ப⁴ங்க³க்க²ணஸமங்கி³பா⁴வதோ. தம் பன சித்தம் உப்பஜ்ஜதி, யம் சித்தஸமங்கீ³ ஸோ புக்³க³லோதி ஏவமேத்த² அத்தோ² த³ட்ட²ப்³போ³. யதி³ அனேகசித்தவஸேனாயம் யமகதே³ஸனா பவத்தாதி சோத³னம் ஸந்தா⁴யாஹ ‘‘சித்தந்தி ஹி…பே… திட்ட²தீ’’தி. ஸன்னிட்டா²னவஸேன நியமோ வேதி³தப்³போ³, அஞ்ஞதா² ‘‘நோ ச தேஸம் சித்தம் உப்பஜ்ஜதீ’’திஆதி³னா படிஸேதோ⁴ ந யுஜ்ஜேய்யாதி அதி⁴ப்பாயோ. தாதி³ஸந்தி ததா²ரூபம், யத³வத்தோ² உப்பன்னஉப்பஜ்ஜமானதாதி³பரியாயேஹி வத்தப்³போ³ ஹோதி, தத³வத்த²ந்தி அத்தோ².
83-113. இமஸ்ஸ புக்³க³லவாரத்தாதி ‘‘யஸ்ஸ சித்தம் உப்பஜ்ஜமான’’ந்திஆதி³னயப்பவத்தஸ்ஸ இமஸ்ஸ அதிக்கந்தகாலவாரஸ்ஸ புக்³க³லவாரத்தா. புக்³க³லோ புச்சி²தோதி ‘‘யஸ்ஸ சித்தம் உப்பஜ்ஜமானம்…பே… தஸ்ஸ சித்த’’ந்தி சித்தஸமங்கி³புக்³க³லோ புச்சி²தோதி புக்³க³லஸ்ஸேவ விஸ்ஸஜ்ஜனேன ப⁴விதப்³ப³ம், இதரதா² அஞ்ஞம் புச்சி²தம் அஞ்ஞம் விஸ்ஸஜ்ஜிதம் ஸியா. ந கோசி புக்³க³லோ ந க³ஹிதோ ஸப்³ப³ஸத்தானம் அனிப்³ப³த்தசித்ததாபா⁴வதோ. தே ச பன ஸப்³பே³ புக்³க³லா. நிருஜ்ஜ²மானக்க²ணாதீதசித்தாதி நிருஜ்ஜ²மானக்க²ணா ஹுத்வா அதீதசித்தா. ததா² து³தியததியாதி யதா² பட²மபஞ்ஹோ அனவஸேஸபுக்³க³லவிஸயத்தா படிவசனேன விஸ்ஸஜ்ஜேதப்³போ³ ஸியா, ததா² ததோ ஏவ து³தியததியபஞ்ஹா ‘‘ஆமந்தா’’இச்சேவ விஸ்ஸஜ்ஜேதப்³பா³ ஸியுந்தி அத்தோ². சதுத்தோ² பன பஞ்ஹோ ஏவம் விப⁴ஜித்வா புக்³க³லவஸேனேவ விஸ்ஸஜ்ஜேதப்³போ³தி த³ஸ்ஸேந்தோ ‘‘பச்சி²மசித்தஸ்ஸா’’திஆதி³ம் வத்வா ததா² அவசனே காரணம் த³ஸ்ஸேந்தோ ‘‘சித்தவஸேன புக்³க³லவவத்தா²னதோ’’திஆதி³மாஹ. ‘‘ப⁴ங்க³க்க²ணே சித்தம் உப்பாத³க்க²ணம் வீதிக்கந்த’’ந்தி இமினா வத்தமானஸ்ஸ சித்தஸ்ஸ வஸேன புக்³க³லோ உப்பாத³க்க²ணாதீதசித்தோ, ‘‘அதீதம் சித்தம் உப்பாத³க்க²ணஞ்ச வீதிக்கந்தந்தி ப⁴ங்க³க்க²ணஞ்ச வீதிக்கந்த’’ந்தி இமினா பன அதீதஸ்ஸ சித்தஸ்ஸ வஸேன புக்³க³லோ உப்பாத³க்க²ணாதீதசித்தோ வுத்தோ.
தத்தா²தி தேஸு த்³வீஸு புக்³க³லேஸு. புரிமஸ்ஸாதி பட²மம் வுத்தஸ்ஸ ஸன்னிட்டா²னபத³ஸங்க³ஹிதஸ்ஸ சித்தம் ந ப⁴ங்க³க்க²ணம் வீதிக்கந்தம். ‘‘நோ ச ப⁴ங்க³க்க²ணம் வீதிக்கந்த’’ந்தி ஹி வுத்தம். பச்சி²மஸ்ஸ வீதிக்கந்தம் சித்தம் ப⁴ங்க³க்க²ணந்தி ஸம்ப³ந்தோ⁴. ‘‘ப⁴ங்க³க்க²ணஞ்ச வீதிக்கந்த’’ந்தி ஹி வுத்தம். ஏவமாதி³கோ புக்³க³லவிபா⁴கோ³தி து³தியபஞ்ஹாதீ³ஸு வுத்தம் ஸந்தா⁴யாஹ. தஸ்ஸ சித்தஸ்ஸ தம்தம்க²ணவீதிக்கமாவீதிக்கமத³ஸ்ஸனவஸேனாதி தஸ்ஸ தஸ்ஸ உப்பாத³க்க²ணஸ்ஸ ப⁴ங்க³க்க²ணஸ்ஸ ச யதா²ரஹம் வீதிக்கமஸ்ஸ அவீதிக்கமஸ்ஸ ச த³ஸ்ஸனவஸேன த³ஸ்ஸிதோ ஹோதி புக்³க³லவிபா⁴கோ³தி யோஜனா. இதா⁴தி இமஸ்மிம் அதிக்கந்தகாலவாரே. புக்³க³லவிஸிட்ட²ம் சித்தம் புச்சி²தம் ‘‘யஸ்ஸ சித்தம் தஸ்ஸ சித்த’’ந்தி வுத்தத்தா. யதி³பி புக்³க³லப்பதா⁴னா புச்சா² புக்³க³லவாரத்தா. அதா²பி சித்தப்பதா⁴னா புக்³க³லம் விஸேஸனபா⁴வேன க³ஹேத்வா சித்தஸ்ஸ விஸேஸிதத்தா. உப⁴யதா²பி து³தியபுச்சா²ய ‘‘ஆமந்தா’’தி வத்தப்³ப³ம் ஸியா அனவஸேஸபுக்³க³லவிஸயத்தா. ததா² பன அவத்வா ‘‘அதீதம் சித்த’’ந்தி வுத்தம், கஸ்மா நிரோத⁴க்க²ண…பே… த³ஸ்ஸனத்த²ந்தி த³ட்ட²ப்³ப³ந்தி யோஜனா. ஏஸ நயோ ‘‘ந நிருஜ்ஜ²மான’’ந்தி ஏத்தா²பீதி நிருஜ்ஜ²மானம் க²ணம் நிரோத⁴க்க²ணம் க²ணம் வீதிக்கந்தகாலம் கிம் தஸ்ஸ சித்தம் ந ஹோதீதி அத்தோ².
114-116. ஸராக³பச்சி²மசித்தஸ்ஸாதி ஸராக³சித்தேஸு பச்சி²மஸ்ஸ சித்தஸ்ஸ, ஏகஸ்ஸ புக்³க³லஸ்ஸ ராக³ஸம்பயுத்தசித்தேஸு யம் ஸப்³ப³பச்சி²மம் சித்தம், தஸ்ஸ. ஸோ பன புக்³க³லோ அனாகா³மீ வேதி³தப்³போ³. ந நிருஜ்ஜ²தி நிரோதா⁴ஸமங்கி³தாய. நிருஜ்ஜி²ஸ்ஸதி இதா³னி நிரோத⁴ம் பாபுணிஸ்ஸதி. அப்படிஸந்தி⁴கத்தா பன ததோ அஞ்ஞம் நுப்பஜ்ஜிஸ்ஸதி. இதரேஸந்தி யதா²வுத்தஸராக³பச்சி²மசித்தஸமங்கி³ம் வீதராக³சித்தஸமங்கி³ஞ்ச ட²பேத்வா அவஸேஸானம் இதரஸேக்கா²னஞ்சேவ புது²ஜ்ஜனானஞ்ச.
நித்³தே³ஸவாரவண்ணனா நிட்டி²தா.
சித்தயமகவண்ணனா நிட்டி²தா.