2. அரியந்திகதா²வண்ணனா

357. ஸங்கா²ரே ஸந்தா⁴ய படிஜானந்தஸ்ஸாதி தி³ட்டி²யா பரிகப்பிதேன ஸத்தேன ஸுஞ்ஞே ஸங்கா²ரே ஸந்தா⁴ய ‘‘ஸுஞ்ஞதஞ்ச மனஸி கரோதீ’’தி புச்சா²ய ‘‘ஆமந்தா’’தி படிஜானந்தஸ்ஸ. த்³வின்னம் ப²ஸ்ஸானம் ஸமோதா⁴னம் கத²ம் ஆபஜ்ஜதி டா²னாடா²னபூ⁴தே ஸங்கா²ரே வுத்தனயேன ஸுஞ்ஞதம் மனஸி கரோந்தஸ்ஸாதி அதி⁴ப்பாயோ. யதா²வுத்தனயேனாதி ‘‘தி³ட்டி²யா பரிகப்பிதேன ஸத்தேன ஸுஞ்ஞா பஞ்சக்க²ந்தா⁴’’தி பகாரேன நயேன. அத² வா யதா²வுத்தனயேனாதி ‘‘டா²னாடா²னமனஸிகாரோ ஸங்கா²ராரம்மணோ, ஸுஞ்ஞதாமனஸிகாரோ நிப்³பா³னாரம்மணோ’’தி ஏவம் வுத்தனயேன. ‘‘ஸங்கா²ரே ஸந்தா⁴ய படிஜானந்தஸ்ஸா’’தி வுத்தத்தா ‘‘த்³வின்னம் ப²ஸ்ஸானம் ஸமோதா⁴னம் கத²ம் ஆபஜ்ஜதீ’’தி ஆஹ. ஸத்தஸுஞ்ஞதாய ஸுஞ்ஞத்தேபி ஸங்கா²ரானம் அஞ்ஞோவ டா²னாடா²னமனஸிகாரோ, அஞ்ஞோ ஸுஞ்ஞதாமனஸிகாரோதி யுஜ்ஜதேவ த்³வின்னம் ப²ஸ்ஸானம் ஸமோதா⁴னாபத்திசோத³னா, ஸங்கா²ரே ஸந்தா⁴ய படிஜானந்தஸ்ஸ பன கத²ம் அரியபா⁴வஸித்³தி⁴ டா²னாடா²னஞாணாதீ³னந்தி விசாரேதப்³ப³ம். கிம் வா ஏதாய யுத்திசிந்தாய. உம்மத்தகபச்சி²ஸதி³ஸோ ஹி பரவாதி³வாதோ³. அஞ்ஞேஸுபி டா²னேஸு ஈதி³ஸேஸு ஏஸேவ நயோ. ஆரோபேத்வாதி இத்தி²புரிஸாதி³ஆகாரம், ஸத்தாகாரமேவ வா அஸந்தம் ரூபாதி³உபாதா³னே ஆரோபேத்வா. அபூ⁴தாரோபனஞ்ஹேத்த² பணித³ஹனந்தி அதி⁴ப்பேதம். தேனாஹ ‘‘பரிகப்பனவஸேனா’’தி. ஸோதி யதா²வுத்தோ பணிதி⁴. ஏகஸ்மிம்பி க²ந்தே⁴.

அரியந்திகதா²வண்ணனா நிட்டி²தா.