கதா²வத்து²பகரண-அனுடீகா
க³ந்தா²ரம்ப⁴வண்ணனா
ஸமுதா³யே ஏகதே³ஸா அந்தோக³தா⁴தி ஸமுதா³யோ தேஸம் அதி⁴ட்டா²னபா⁴வேன வுத்தோ யதா² ‘‘ருக்கே² ஸாகா²’’தி த³ஸ்ஸேதி ‘‘கதா²ஸமுதா³யஸ்ஸா’’திஆதி³னா. தத்த² கதா²னந்தி திஸ்ஸோ கதா² வாதோ³ ஜப்போ விதண்டா³தி. தேஸு யேன பமாணதக்கேஹி பக்க²படிபக்கா²னம் பதிட்டா²பனபடிக்கே²பா ஹோந்தி, ஸோ வாதோ³. ஏகாதி⁴கரணா ஹி அஞ்ஞமஞ்ஞவிருத்³தா⁴ த⁴ம்மா பக்க²படிபக்கா² யதா² ‘‘ஹோதி ததா²க³தோ பரம் மரணா, ந ஹோதி ததா²க³தோ பரம் மரணா’’தி (தீ³. நி. 1.65). நானாதி⁴கரணா பன அஞ்ஞமஞ்ஞவிருத்³தா⁴பி பக்க²படிபக்கா² நாம ந ஹோந்தி யதா² ‘‘அனிச்சம் ரூபம், நிச்சம் நிப்³பா³ன’’ந்தி. யேன ச²லஜாதினிக்³க³ஹட்டா²னேஹி பக்க²படிபக்கா²னம் பதிட்டா²பனம் படிக்கே²பாரம்போ⁴, ஸோ ஜப்போ. ஆரம்ப⁴மத்தமேவேத்த², ந அத்த²ஸித்³தீ⁴தி த³ஸ்ஸனத்த²ம் ஆரம்ப⁴க்³க³ஹணம். யாய பன ச²லஜாதினிக்³க³ஹட்டா²னேஹி படிபக்க²படிக்கே²பாய வாயமந்தி, ஸா விதண்டா³. தத்த² அத்த²விகப்புபபத்தியா வசனவிகா⁴தோ ச²லம் யதா² ‘‘நவகம்ப³லோயம் புரிஸோ, ராஜா நோ ஸக்கீ²’’தி ஏவமாதி³. தூ³ஸனபா⁴ஸா ஜாதயோ, உத்தரபதிரூபகாதி அத்தோ². நிக்³க³ஹட்டா²னானி பரதோ ஆவி ப⁴விஸ்ஸந்தி. ஏவம் வாத³ஜப்பவிதண்ட³ப்பபே⁴தா³ஸு தீஸு கதா²ஸு இத⁴ வாத³கதா² ‘‘கதா²’’தி அதி⁴ப்பேதா. ஸா ச கோ² அவிபரீதத⁴ம்மதாய பதிட்டா²பனவஸேன, ந விக்³கா³ஹிககதா²பா⁴வேனாதி வேதி³தப்³ப³ம். மாதிகாட²பனேனேவாதி உத்³தே³ஸதே³ஸனாய ஏவ. ட²பிதஸ்ஸாதி தே³ஸிதஸ்ஸ. தே³ஸனா ஹி தே³ஸேதப்³ப³மத்த²ம் வினேய்யஸந்தானேஸு ட²பனதோ நிக்கி²பனதோ ட²பனம், நிக்கே²போதி ச வுச்சதி.
க³ந்தா²ரம்ப⁴வண்ணனா நிட்டி²தா.
நிதா³னகதா²வண்ணனா
பரினிப்³பா³னமேவ …பே… வுத்தம். அபி⁴ன்னஸபா⁴வம்பி ஹி அத்த²ம் தத³ஞ்ஞத⁴ம்மதோ விஸேஸாவபோ³த⁴னத்த²ம் அஞ்ஞம் விய கத்வா வோஹரந்தி யதா² ‘‘அத்தனோ ஸபா⁴வம் தா⁴ரேந்தீதி த⁴ம்மா’’தி (த⁴. ஸ. அட்ட². 1). ஸாதி அஸங்க²தா தா⁴து. கரணபா⁴வேன வுத்தா யதா²வுத்தஸ்ஸ உபஸமஸ்ஸ ஸாத⁴கதமபா⁴வம் ஸந்தா⁴ய. த⁴ம்மவாதீ³…பே… து³ப்³ப³லதா வுத்தா ததா²ரூபாய பஞ்ஞாய பா⁴வே தாதி³ஸானம் பக்க²பா⁴வாபா⁴வதோ. லத்³தி⁴யாதி ‘‘அத்தி² புக்³க³லோ ஸச்சிகட்ட²பரமத்தே²ன, பரிஹாயதி அரஹா அரஹத்தா’’திஆதி³லத்³தி⁴யா. ஸுத்தந்தேஹீதி தே³வதாஸம்யுத்தாதீ³ஹி. லிங்கா³கப்பபே⁴த³ம் பரதோ ஸயமேவ வக்க²தி.
பி⁴ந்தி³த்வா மூலஸங்க³ஹந்தி மூலஸங்கீ³திம் வினாஸேத்வா, பே⁴த³ம் வா கத்வா யதா² ஸா டி²தா, ததோ அஞ்ஞதா² கத்வா. ஸங்க³ஹிததோ வா அஞ்ஞத்ராதி மூலஸங்கீ³தியா ஸங்க³ஹிததோ அஞ்ஞத்ர. தேனாஹ ‘‘அஸங்க³ஹிதம் ஸுத்த’’ந்தி. நீதத்த²ம் யதா²ருதவஸேன விஞ்ஞேய்யத்த²த்தா. நேய்யத்த²ம் விபரிணாமது³க்க²தாதி³வஸேன நித்³தா⁴ரேதப்³ப³த்த²த்தா. தீஹி டா²னேஹீதி ‘‘ஸூரா ஸதிமந்தோ இத⁴ ப்³ரஹ்மசரியவாஸோ’’தி (அ. நி. 9.21) ஏவம் வுத்தேஹி தீஹி காரணேஹி. அஞ்ஞம் ஸந்தா⁴ய ப⁴ணிதந்தி ஏகம் பப்³ப³ஜ்ஜாஸங்கா²தம் ப்³ரஹ்மசரியவாஸம் ஸந்தா⁴ய ப⁴ணிதம். அஞ்ஞம் அத்த²ம் ட²பயிம்ஸூதி ஸப்³ப³ஸ்ஸபி ப்³ரஹ்மசரியவாஸஸ்ஸ வஸேன ‘‘நத்தி² தே³வேஸு ப்³ரஹ்மசரியவாஸோ’’திஆதி³கம் (கதா². 269) அஞ்ஞம் அத்த²ம் ட²பயிம்ஸு. ஸுத்தஞ்ச அஞ்ஞம் ஸந்தா⁴ய ப⁴ணிதம் ததோ அஞ்ஞம் ஸந்தா⁴ய ப⁴ணிதம் கத்வா ட²பயிம்ஸு, தஸ்ஸ அத்த²ஞ்ச அஞ்ஞம் ட²பயிம்ஸூதி ஏவமேத்த² யோஜனா வேதி³தப்³பா³. ஸுஞ்ஞதாதீ³தி ஆதி³-ஸத்³தே³ன அனிச்சதாதி³ம் ஸங்க³ண்ஹாதி.
க³ம்பீ⁴ரம் ஏகதே³ஸம் மஹாபதே³ஸபரிவாராதி³ம். ஏகச்சே ஸகலம் அபி⁴த⁴ம்மம் விஸ்ஸஜ்ஜிம்ஸு ச²ட்³ட³யிம்ஸு ஸேய்யதா²பி ஸுத்தந்திகா. தே ஹி தம் ந ஜினவசனந்தி வத³ந்தி. கதா²வத்து²ஸ்ஸ ஸவிவாத³த்தேதிஆதி³ ஹேட்டா² நிதா³னட்ட²கதா²ய ஆக³தனயம் ஸந்தா⁴ய வுத்தம். கேசி பன புக்³க³லபஞ்ஞத்தியாபி ஸவிவாத³த்தம் மஞ்ஞந்தி. ‘‘ததியஸங்கீ³திதோ புப்³பே³ பவத்தமானானம் வஸேனா’’தி இத³ம் கஸ்மா வுத்தம், நனு ததியஸங்கீ³திதோ புப்³பே³பி தம் மாதிகாரூபேன பவத்ததேவ? நித்³தே³ஸம் வா ஸந்தா⁴ய ததா² வுத்தந்தி வேதி³தப்³ப³ம். அஞ்ஞானீதி அஞ்ஞாகாரானி அபி⁴த⁴ம்மபகரணாதீ³னி அகரிம்ஸு, பவத்தந்தானிபி தானி அஞ்ஞதா² கத்வா படி²ம்ஸூதி அத்தோ². மஞ்ஜுஸிரீதி இத³ம் கஸ்மா வுத்தம். ந ஹி தம் நாமம் பிடகத்தயம் அனுவத்தந்தேஹி பி⁴க்கூ²ஹி க³ய்ஹதி? இதரேஹி க³ய்ஹமானம்பி வா ஸாஸனிகபரிஞ்ஞேஹி ந ஸாஸனாவசரம் க³ய்ஹதீதி கத்வா வுத்தம். நிகாயனாமந்தி மஹாஸங்கி⁴காதி³னிகாயனாமம், து³த்தகு³த்தாதி³வக்³க³னாமஞ்ச.
ஸங்கந்திகானம் பே⁴தோ³ ஸுத்தவாதீ³தி ஸங்கந்திகானம் அனந்தரே ஏகோ நிகாயபே⁴தோ³ ஸுத்தவாதீ³ நாம பி⁴ஜ்ஜித்த². ஸஹாதி ஏகஜ்ஜ²ம் கத்வா, க³ணியமானாதி அத்தோ².
உப்பன்னே வாதே³ ஸந்தா⁴யாதி ததியஸங்கீ³திகாலே உப்பன்னே வாதே³ ஸந்தா⁴ய. உப்பஜ்ஜனகேதி ததோ பட்டா²ய யாவ ஸத்³த⁴ம்மந்தரதா⁴னா ஏத்த²ந்தரே உப்பஜ்ஜனகே. ஸுத்தஸஹஸ்ஸாஹரணஞ்சேத்த² பரவாத³ப⁴ஞ்ஜனத்த²ஞ்ச ஸகவாத³பதிட்டா²பனத்த²ஞ்ச. ஸுத்தேகதே³ஸோபி ஹி ‘‘ஸுத்த’’ந்தி வுச்சதி ஸமுதா³யவோஹாரஸ்ஸ அவயவேஸுபி தி³ஸ்ஸனதோ யதா² ‘‘படோ த³ட்³டோ⁴, ஸமுத்³தோ³ தி³ட்டோ²’’தி ச. தே பனேத்த² ஸுத்தபதே³ஸா ‘‘அத்தி² புக்³க³லோ அத்தஹிதாய படிபன்னோ’’திஆதி³னா ஆக³தா வேதி³தப்³பா³.
நிதா³னகதா²வண்ணனா நிட்டி²தா.
மஹாவக்³கோ³
1. புக்³க³லகதா²
1. ஸுத்³த⁴ஸச்சிகட்டோ²
1. அனுலோமபச்சனீகவண்ணனா
1. ஸம்ப³ராதீ³ஹி பகப்பிதவிஜ்ஜா, ததா²பி⁴ஸங்க²தானி ஓஸதா⁴னி ச ‘‘மாயா’’தி வுச்சந்தி, இத⁴ பன மாயாய ஆஹிதவிஸேஸா அபூ⁴தஞ்ஞேய்யாகாரா அதி⁴ப்பேதாதி த³ஸ்ஸேந்தோ ‘‘மாயாய அமணிஆத³யோ மணிஆதி³ஆகாரேன தி³ஸ்ஸமானா மாயாதி வுத்தா’’தி ஆஹ. ஸச்சஞ்ஞேவ ஸச்சிகம், ஸோ ஏவ அத்தோ² அவிபரீதஸ்ஸ ஞாணஸ்ஸ விஸயபா⁴வட்டே²னாதி ஸச்சிகட்டோ². தேனாஹ ‘‘பூ⁴தட்டோ²’’தி. அவிபரீதபா⁴வதோ ஏவ பரமோ பதா⁴னோ அத்தோ²தி பரமத்தோ², ஞாணஸ்ஸ பச்சக்க²பூ⁴தோ த⁴ம்மானம் அனித்³தி³ஸிதப்³ப³ஸபா⁴வோ. தேன வுத்தம் ‘‘உத்தமத்தோ²’’தி.
அத்தீ²தி வசனஸாமஞ்ஞேனாதி ‘‘அத்தி² புக்³க³லோ அத்தஹிதாய படிபன்னோ’’திஆதீ³ஸு (அ. நி. 4.96; கதா². 22) ‘‘அத்தீ²’’தி பவத்தவசனஸாமஞ்ஞேன. அத்த²விகப்புபபத்தியா வசனவிகா⁴தோ ச²லந்தி வத³ந்தி. பதிட்ட²ம் பச்சி²ந்த³ந்தோதி ஹேதும் தூ³ஸேந்தோ, அஹேதும் கரோந்தோதி அத்தோ². ஹேது ஹி படிஞ்ஞாய பதிட்டா²பனதோ பதிட்டா², தம் பன ஹேதும் அத்த²மத்ததோ த³ஸ்ஸேந்தோ ‘‘யதி³ ஸச்சிகட்டே²னா’’திஆதி³மாஹ. பயோக³தோ பன தூ³ஸனேன ஸத்³தி⁴ம் பரதோ ஆவி ப⁴விஸ்ஸதி. ஓகாஸம் அத³த³மானோதி யதா²னுரூபம் யுத்திம் வத்தும் அவஸரம் அதே³ந்தோ. அத² வா பதிட்ட²ம் பச்சி²ந்த³ந்தோ, படிஞ்ஞம் ஏவ பரிவத்தேந்தோதி அத்தோ². உபலப்³ப⁴தி புக்³க³லோதி ஹி ஸகவாதி³ம் உத்³தி³ஸ்ஸ பரவாதி³னோ படிஞ்ஞாவ ந யுத்தா அப்பஸித்³த⁴த்தா விஸேஸிதப்³ப³ஸ்ஸ. தேனேவாஹ ‘‘அனுபலப்³ப⁴னேய்யதோ ந தவ வாதோ³ திட்ட²தீதி நிவத்தேந்தோ’’தி. ரூபஞ்ச உபலப்³ப⁴தி…பே… த³ஸ்ஸேதீதி ஏதேன பரவாதி³னா அதி⁴ப்பேதஹேதுனோ விபரீதத்த²ஸாத⁴கத்தம் த³ஸ்ஸேதி.
உபலப்³ப⁴மானம் நாம ஹோதீதி ஆகாரதோ தம்ஆகாரவந்தானம் அனஞ்ஞத்தாதி அதி⁴ப்பாயோ. அஞ்ஞதா²தி ஆகார, ஆகாரவந்தானம் பே⁴தே³. ஏதிஸ்ஸாதி ‘‘ததோ ஸோ புக்³க³லோ உபலப்³ப⁴தி ஸச்சிகட்ட²பரமட்டே²னா’’தி ஏவம் வுத்தாய து³தியபுச்சா²ய. ஏஸ விஸேஸோதி யோ யதா²வுத்தோ த்³வின்னம் புச்சா²னம் விஸயஸ்ஸ ஸபா⁴வாகாரபே⁴தோ³, ஏஸ த்³வின்னம் புச்சா²னம் விஸேஸோ. ஸபா⁴வத⁴ம்மானம் ஸாமஞ்ஞலக்க²ணேன அபி⁴ன்னானம்பி ஸலக்க²ணதோ பே⁴தோ³யேவாதி அஞ்ஞத⁴ம்மஸ்ஸ அஞ்ஞேனாகாரேன ந கதா³சிபி உபலப்³போ⁴ ப⁴வேய்ய. யதி³ ஸியா, அஞ்ஞத்தமேவ ந ஸியாதி ருப்பனாதி³ஸபச்சயாதி³ஆகாரேன அனுபலப்³ப⁴மானோபி புக்³க³லோ அத்தனோ பூ⁴தஸபா⁴வட்டே²ன உபலப்³ப⁴தேவாதி வத³ந்தம் பரவாதி³னம் பதி ‘‘யோ ஸச்சிகட்டோ²’’திஆதி³ சோத³னா அனோகாஸாதி த³ஸ்ஸேந்தோ ஆஹ ‘‘யதா² பன…பே… நிக்³க³ஹோ ச ந காதப்³போ³’’தி. தத்த² நிக்³க³ஹோதி ‘‘ஆஜானாஹி நிக்³க³ஹ’’ந்தி ஏவம் வுத்தனிக்³க³ஹோ, பராஜயாரோபனேன பரவாதி³னோ நிக்³க³ண்ஹனந்தி அத்தோ².
ஸ்வாயம் பன யஸ்மா தஸ்ஸ வாதா³பராத⁴ஹேதுகோ, தஸ்மா தம் த³ஸ்ஸேதும் அட்ட²கதா²யம் தோ³ஸாபராத⁴பரியாயேஹி விபா⁴விதோ. அவஜானனஞ்ஹேத்த² நிக்³க³ஹட்டா²னம். ததா² ஹி படிஞ்ஞாஹானி, படிஞ்ஞாந்தரம், படிஞ்ஞாவிரோதோ⁴, படிஞ்ஞாஸஞ்ஞாஸோ, ஹேத்வந்தரம், அத்த²ந்தரம், நிரத்த²கம், அவிஞ்ஞாதத்த²ம், அஸம்ப³ந்த⁴த்த²ம், அப்பத்தகாலம், ஊனம், அதி⁴கம், புனருத்தம், அனனுபா⁴ஸனம், அவிஞ்ஞாதம், அப்படிபா⁴, விக்கே²போ, மதானுஞ்ஞா, அனுயுஞ்ஜிதப்³ப³ஸ்ஸ உபேக்க²னம், அனனுயுஞ்ஜிதப்³ப³ஸ்ஸ அனுயோகோ³, அபஸித்³த⁴ந்தரம், ஹேத்வாபா⁴ஸா சாதி த்³வாவீஸதி நிக்³க³ஹட்டா²னானி ஞாயவாதி³னோ வத³ந்தி.
தத்த² விஸதி³ஸூதா³ஹரணத⁴ம்மானுஜானனம் பட²முதா³ஹரணே படிஞ்ஞாஹானி. படிஞ்ஞாதத்த²படிஸேதே⁴ தத³ஞ்ஞத்த²னித்³தே³ஸோ படிஞ்ஞாந்தரம். படிஞ்ஞாவிருத்³த⁴ஹேதுகித்தனம் படிஞ்ஞாவிரோதோ⁴. படிஞ்ஞாதத்தா²பனயனம் படிஞ்ஞாஸஞ்ஞாஸோ. அவிஸேஸவுத்தே ஹேதும்ஹி படிஸித்³தே⁴ விஸேஸஹேதுகத²னம் ஹேத்வந்தரம். அதி⁴கதத்தா²னுபயோகி³அத்த²கத²னம் அத்த²ந்தரம். மாதிகாபாடோ² விய அத்த²ஹீனம் நிரத்த²கம். திக்க²த்தும் வுத்தம்பி ஸக்கி²படிவாதீ³ஹி அவிதி³தம் அவிஞ்ஞாதத்த²ம். புப்³பா³பரவஸேன ஸம்ப³ந்த⁴ரஹிதம் அஸம்ப³ந்த⁴த்த²ம். அவயவவிபல்லாஸவசனம் அப்பத்தகாலம். அவயவவிகலம் ஊனம். அதி⁴கஹேதூதா³ஹரணம் அதி⁴கம். ட²பேத்வா அனுவாத³ம் ஸத்³த³த்தா²னம் புனப்புனம் வசனம் அத்தா²பன்னவசனஞ்ச புனருத்தம். பரிஸாய விதி³தஸ்ஸ தீஹி வுத்தஸ்ஸ அபச்சுதா³ஹாரோ அனனுபா⁴ஸனம். யம் வாதி³னா வுத்தம் பரிஸாய விஞ்ஞாதம் படிவாதி³னா து³விஞ்ஞாதம், தம் அவிஞ்ஞாதம். தம்வாதி³னா வத்தப்³பே³ வுத்தே பரவாதி³னோ படிவசனஸ்ஸ அனுபட்டா²னம் அப்படிபா⁴. கிச்சந்தரப்பஸங்கே³ன கதா²விச்சி²ந்த³னம் விக்கே²போ. அத்தனோ தோ³ஸானுஜானனேன பரபக்க²ஸ்ஸ தோ³ஸப்பஸஞ்ஜனம் பரமதானுஜானனம் மதானுஞ்ஞா. நிக்³க³ஹப்பத்தஸ்ஸ நிக்³க³ண்ஹனம் அனுயுஞ்ஜிதப்³ப³ஸ்ஸ உபேக்க²னம். ஸம்பத்தனிக்³க³ஹஸ்ஸ அனிக்³க³ஹட்டா²னே ச நிக்³க³ண்ஹனம் அனுயுஞ்ஜிதப்³ப³ஸ்ஸ அனுயோகோ³. ஏகம் ஸித்³த⁴ந்தமனுஜானித்வா அனியமதோ தத³ஞ்ஞஸித்³த⁴ந்தகதா²ப்பஸஞ்ஜனம் அபஸித்³த⁴ந்தரம். அஸித்³தா⁴ அனேகந்திகா விருத்³தா⁴ ச ஹேத்வாபா⁴ஸா, ஹேதுபதிரூபகாதி அத்தோ². தேஸஞ்ச கத²னம் நிக்³க³ஹட்டா²னந்தி.
இமேஸு த்³வாவீஸதியா நிக்³க³ஹட்டா²னேஸு இத³ம் படிஞ்ஞாய அபனயனதோ ஸயமேவ பச்சக்கா²னதோ படிஞ்ஞாஸஞ்ஞாஸோ நாம நிக்³க³ஹட்டா²னம். தேனேவாஹ ‘‘அவஜானனேனேவ நிக்³க³ஹம் த³ஸ்ஸேதீ’’தி. அஸித்³த⁴த்தாதி ஏதேன பச்சக்க²தோ அனுமானதோ ச புக்³க³லஸ்ஸ அனுபலப்³ப⁴மாஹ. ந ஹி ஸோ பச்சக்க²தோ உபலப்³ப⁴தி. யதி³ உபலப்³பே⁴ய்ய, விவாதோ³ ஏவ ந ஸியா, அனுமானம்பி தாதி³ஸம் நத்தி², யேன புக்³க³லம் அனுமினேய்யும். ததா² ஹி தம் ஸாஸனிகோ புக்³க³லவாதீ³ வதே³ய்ய ‘‘புக்³க³லோ உபலப்³ப⁴தி, அத்தி² புக்³க³லோ’’தி ப⁴க³வதா வுத்தத்தா ரூபவேத³னாதி³ விய. யஞ்ஹி ப⁴க³வதா ‘‘அத்தீ²’’தி யதி³ வுத்தம், தம் பரமத்த²தோ அத்தி² யதா² தம் ரூபம் வேத³னா ஸஞ்ஞா ஸங்கா²ரா விஞ்ஞாணம். யம் பன பரமத்த²தோ நத்தி², ந தம் ப⁴க³வதா ‘‘அத்தீ²’’தி வுத்தம் யதா² தம் பகதிவாதி³ஆதீ³னம் பகதிஆதீ³தி, தம் மிச்சா². ஏத்த² ஹி யதி³ வோஹாரதோ புக்³க³லஸ்ஸ அத்தி²பா⁴வோ அதி⁴ப்பேதோ, ஸித்³த⁴ம் ஸாத⁴னம், அத² பரமத்த²தோ, அஸித்³தோ⁴ ஹேது ததா² அவுத்தத்தா. விருத்³தோ⁴ ச தஸ்ஸ அனிச்சஸங்க²தபடிச்சஸமுப்பன்னாதி³பா⁴வாஸாத⁴னதோ ரூபவேத³னாதீ³ஸு ததா² தி³ட்ட²த்தாதிஆதி³னா தஸ்ஸ அஹேதுகபா⁴வஸ்ஸேவ பாகடபா⁴வதோ.
யம் பன பா³ஹிரகா புது² அஞ்ஞதித்தி²யா வத³ந்தி. அத்தே²வ ச பரமத்த²தோ அத்தா ஞாணாபி⁴தா⁴னஸ்ஸ பவத்தியா நிமித்தபா⁴வதோ ரூபாதி³ விய. அத² வா அத்தாதிரித்தபத³த்த²ந்தரோ ரூபக்க²ந்தோ⁴ க²ந்த⁴ஸபா⁴வத்தா யதா² தம் இதரக்க²ந்தா⁴. யஞ்ஹேத்த² பத³த்த²ந்தரம், ஸோ புக்³க³லோதி அதி⁴ப்பாயோ.
ஏத்த² ச புரிமஸ்ஸ ஹேதுனோ பஞ்ஞத்தியா அனேகந்திகதா அஸித்³த⁴தா ச. ந ஹி அஸதோ ஸகவாதி³னம் பதி பரமத்த²தோ ஞாணாபி⁴தா⁴னப்பவத்தியா நிமித்தபா⁴வோ ஸிஜ்ஜ²தி. வோஹாரதோ சே, தத³ஸித்³த⁴ஸாத⁴னதா ரூபாதி³ஸபா⁴வவினிமுத்தரூபோபி புக்³க³லோ ந ஹோதீதி ஏவமாதி³விருத்³த⁴த்த²தா. பச்சி²மஸ்ஸ பன ஹேதுனோ ஸாதே⁴தப்³ப³த்த²ஸாமஞ்ஞபரிக்³க³ஹே ஸித்³த⁴ஸாத⁴னதா, ரூபக்க²ந்த⁴தோ பத³த்த²ந்தரதோ பரமத்த²ந்தரபூ⁴தவேத³னாதி³ஸம்ப⁴வஸ்ஸ இச்சி²தத்தா ச. தப்³பி³ஸேஸபரிக்³க³ஹே ச ஸகவாதி³னம் பதி உதா³ஹரணாபா⁴வோ பரபரிகப்பிதஜீவபத³த்த²விரஹதோ. இதரக்க²ந்தா⁴னம் வேத³னாதி³வினிமுத்தஉப⁴யஸித்³த⁴ஜீவபத³த்த²ஸஹிதோபி ரூபக்க²ந்தோ⁴ ந ஹோதி இதரக்க²ந்தா⁴ வியாதி விருத்³த⁴த்த²தா ச.
யம் பன காணாதா³ ‘‘ஸுகா²தீ³னம் நிஸ்ஸயபா⁴வதோ’’தி அனுமானம் வத³ந்தி, தே இத³ம் வத்தப்³பா³ – கிம் ஸுகா²தீ³னம் அத்தனி படிப³த்³த⁴ம் யதோ ஸுகா²தி³னிஸ்ஸயதாய அத்தா அனுமீயதி. யதி³ உப்பாதோ³, ஏவம் ஸந்தே ஸப்³பே³பி ஸுகா²த³யோ ஏகதோ ஏவ ப⁴வேய்யும் காரணஸ்ஸ ஸன்னிஹிதபா⁴வதோ அஞ்ஞனிரபேக்க²தோ ச. அத² அஞ்ஞம்பி கிஞ்சி இந்த்³ரியாதி³காரணந்தரமபேக்கி²தப்³ப³ம், ததே³வ ஹோது காரணம், கிமஞ்ஞேன அதி³ட்ட²ஸாமத்தி²யேன பரிகப்பிதேன பயோஜனம். அத² பன தேஸம் அத்தாதீ⁴னா வுத்தீதி வதே³ய்யும், ஏவம்பி ந ஸிஜ்ஜ²தி உதா³ஹரணாபா⁴வதோ. ந ஹி ரூபாதி³வினிமுத்தோ தாதி³ஸோ கோசி ஸபா⁴வத⁴ம்மோ ஸுகா²தி³ஸன்னிஸ்ஸயபூ⁴தோ அத்தி², யதோ அத்தனோ அத்தத்த²ஸித்³தி⁴யா உதா³ஹரணம் அபதி³ஸேய்யும். இமினா நயேன அஸமாஸபதா³பி⁴தே⁴ய்யத்தாதிஆதீ³னம்பி அயுத்தத்தா நிவாரேதப்³பா³. ததா² ‘‘அஞ்ஞஸ்ஸ ஸச்சிகட்ட²ஸ்ஸ அஸித்³த⁴த்தா’’தி இமினா ச பகதிஅணுஆதீ³னம்பி பா³ஹிரபரிகப்பிதானம் அஸித்³த⁴தா வுத்தாவாதி வேதி³தப்³பா³. கத²ம் பன தேஸம் அஸித்³தீ⁴தி? பமாணேன அனுபலப்³ப⁴னதோ. ந ஹி பச்சக்க²தோ பகதி ஸித்³தா⁴ கபிலஸ்ஸபி இஸினோ தஸ்ஸ அபச்சக்க²பா⁴வஸ்ஸ காபிலேஹி அனுஞ்ஞாயமானத்தா.
யம் பன ‘‘அத்தி² பதா⁴னம் பே⁴தா³னம் அன்வயத³ஸ்ஸனதோ ஸகலகலாபமத்தம் வியா’’தி தே அனுமானம் வத³ந்தி. இமினா ஹி பே⁴தா³னம் ஸத்வாதீ³னம் விஜ்ஜமானபதா⁴னதா படிஞ்ஞாதா. ஏத்த² ச வுச்சதே – ஸகலாதீ³னம் பதா⁴னம் தப்³பி³பா⁴கே³ஹி கிம் அஞ்ஞத்தம், உதா³ஹு அனஞ்ஞந்தி, கிஞ்சேத்த² யதி³ அஞ்ஞத்தம், ஸப்³போ³ லோகோ பதா⁴னமயோதி ஸமயவிரோதோ⁴ ஸியா, ஸண்டா²னபே⁴தே³ன அஞ்ஞத்த² படிஜானனதோ ந தோ³ஸோதி சே? தம் ந, வலயகடகாதி³ஸண்டா²னபே⁴தே³பி கனகாபே⁴த³த³ஸ்ஸனதோ. ந ஹி ஸண்டா²னம் வத்து²பே⁴த³னிமித்தம் தஸ்ஸ அனுபாதா³னத்தா. யம் யஸ்ஸ பே⁴த³னிமித்தம், ந தம் தஸ்ஸ அனுபாதா³னம் யதா² ஸுவண்ணமத்திகாதி³க⁴டாதீ³னம் ஸுவண்ணக⁴டோ மத்திகாக⁴டோ கோஸேய்யபடோ கப்பாஸபடோதி ச ஸாதே⁴தப்³ப³த⁴ம்மரஹிதஞ்ச உதா³ஹரணம். ந ஹி பதா⁴னேககாரணபுப்³ப³கத்தம் ஸகலாதீ³னம் பகதிவாதி³னோ ஸித்³த⁴ம், நாபி காபிலானம் கத²ஞ்சி அஞ்ஞத்தானுஜானனதோ. அனஞ்ஞத்தே பன உதா³ஹரணாபா⁴வோ. ந ஹி ததே³வ ஸாதே⁴தப்³ப³ம் ததே³வ ச உதா³ஹரணம் யுத்தம், அன்வயத³ஸ்ஸனம்பி அஸித்³த⁴ம். ந ஹி ததே³வ தேன அன்விதம் யுஜ்ஜதி. பதா⁴னேன அன்வயத³ஸ்ஸனம்பி அஸித்³த⁴ம் பரவாதி³னோதி கு³ணஸ்ஸ பதா⁴னஸ்ஸ அனனுஜானனதோ. அத² யம் கிஞ்சி காரணம் பதா⁴னம் ‘‘பதீ⁴யதி ஏத்த² ப²ல’’ந்தி, ஏவம்பி அஸித்³த⁴மேவ காரணே ப²லஸ்ஸ அத்தி²பா⁴வானனுஜானனதோ, ஹேதுனோ ச அஸித்³த⁴னிஸ்ஸயதாபராபி⁴மதபே⁴தா³னனுஜானனதோ. அத² விஸேஸேன காரணாயத்தவுத்திதா ப²லஸ்ஸ ஸாதீ⁴யதி, ந கிஞ்சி விருத்³த⁴ம் த⁴ம்மானம் யதா²ஸகம் பச்சயேன படிச்சஸமுப்பத்தியா இச்சி²தத்தாதி.
அபிச பகதிவாதி³னோ ‘‘ஸத்வரஜதமஸங்கா²தானம் திண்ணம் கு³ணானம் ஸமபா⁴வோ பகதி, ஸா ச நிச்சா ஸத்வாதி³விஸமஸபா⁴வதோ அனிச்சதோ மஹதாதி³விகாரதோ அனஞ்ஞா’’தி படிஜானந்தி. ஸா தேஸம் வுத்தப்பகாரா பகதி ந ஸிஜ்ஜ²தி ததோ விருத்³த⁴ஸபா⁴வதோ விகாரதோ அனஞ்ஞத்தா. ந ஹி அஸ்ஸஸ்ஸ விஸாணம் தீ³க⁴ம், தஞ்ச ரஸ்ஸதோ கோ³விஸாணதோ அனஞ்ஞந்தி வுச்சமானம் ஸிஜ்ஜ²தி. கிஞ்ச பி⁴ய்யோ? திண்ணம் ஏகபா⁴வாபா⁴வதோ. ஸத்வாதி³கு³ணத்தயதோ ஹி பகதியா அனஞ்ஞத்தம் இச்ச²ந்தானம் தேஸம் ஸத்வாதீ³னம்பி பகதியா அனஞ்ஞத்தம் ஆபஜ்ஜதி, ந ச யுத்தம் திண்ணம் ஏகபா⁴வோதி. ஏவம்பி பகதி ந ஸிஜ்ஜ²தி. கத²ம்? அனேகதோ³ஸாபத்திதோ. யதி³ ஹி ப்³யத்தஸபா⁴வதோ விகாரதோ அப்³யத்தஸபா⁴வா பகதி அனஞ்ஞா, ஏவம் ஸந்தே ஹேதுமந்ததா அனிச்சதா அப்³யாபிதா ஸகிரியதா அனேகதா நிஸ்ஸிததா லிங்க³தா ஸாவயவதா பரதந்த்ரதாதி ஏவமாத³யோ அனேகே தோ³ஸா பகதியா ஆபஜ்ஜந்தி, ந ஜாதிவிகாரதோ அனஞ்ஞா படிஜானிதப்³பா³. ததா² ச ஸதி ஸமயவிரோதோ⁴தி கப்பனாமத்தம் பகதீதி அஸித்³தா⁴ ஸாதி நிட்ட²மேத்த² க³ந்தப்³ப³ம்.
பகதியா ச அஸித்³தா⁴ய தம்னிமித்தகபா⁴வேன வுச்சமானா மஹதாத³யோபி அஸித்³தா⁴ ஏவ. யதா² ச பகதி மஹதாத³யோ ச, ஏவம் இஸ்ஸரபஜாபதிபுரிஸகாலஸபா⁴வனியதியதி³ச்சா²த³யோபி. ஏதேஸு ஹி இஸ்ஸரோ தாவ ந ஸிஜ்ஜ²தி உபகாரஸ்ஸ அத³ஸ்ஸனதோ. ஸத்தானஞ்ஹி ஜாதியம் மாதாபிதூனம் பீ³ஜகே²த்தபா⁴வேன கம்மஸ்ஸ ஹீனதாதி³விபா⁴க³கரணேன, ததோ பரஞ்ச உதுஆஹாரானம் ப்³ரூஹனுபத்த²ம்ப⁴னேன, இந்த்³ரியானம் த³ஸ்ஸனாதி³கிச்சஸாத⁴னேன உபகாரோ தி³ஸ்ஸதி, ந, ஏவமிஸ்ஸரஸ்ஸ. ஹீனதாதி³விபா⁴க³கரணமிஸ்ஸரஸ்ஸாதி சே? தம் ந, அஸித்³த⁴த்தா. யதா²வுத்தோ உபகாரவிஸேஸோ இஸ்ஸரனிம்மிதோ, ந கம்முனாதி ஸாத⁴னீயமேதம். இதரத்ராபி ஸமானமேதந்தி சே? ந, கம்மதோ ப²லனியமஸித்³த⁴த்தா. ஸதி ஹி கதூபசிதே கம்மஸ்மிம் தத்த² யம் அகுஸலம், ததோ ஹீனதா, யம் குஸலம், ததோ பணீததாதி ஸித்³த⁴மேதம். இஸ்ஸரவாதி³னாபி ஹி ந ஸக்கா கம்மம் படிக்கி²பிதும்.
அபிசேதஸ்ஸ லோகவிசித்தஸ்ஸ இஸ்ஸரனிம்மானபா⁴வே ப³ஹூ தோ³ஸா ஸம்ப⁴வந்தி. கத²ம்? யதி³ ஸப்³ப³மித³ம் லோகவிசித்தம் இஸ்ஸரனிம்மிதம், ஸஹேவ வசனேன பவத்திதப்³ப³ம், ந கமேன. ந ஹி ஸன்னிஹிதகாரணானம் ப²லானம் கமேன உப்பத்தி யுத்தா, காரணந்தராபேக்கா²ய இஸ்ஸரஸ்ஸ ஸாமத்தி²யஹானி. சக்கா²தீ³னம் சக்கு²விஞ்ஞாணாதீ³ஸு காரணபா⁴வோ ந யுத்தோ. கரோதீதி ஹி காரணந்தி. இஸ்ஸரோ ஏவ ச காரகோதி ஸப்³ப³காரணானம் காரணபா⁴வஹானி. யேஹி புது²விஸேஸேஹி இஸ்ஸரோ பஸீதே³ய்ய, தேஸஞ்ச ஸயம்காரதா ஆபஜ்ஜதி, ததா² ஸப்³பே³ஸம் ஹேதுகானம் காரணபா⁴வோ. யஞ்ஜேதம் நிம்மானம், தஞ்சஸ்ஸ அத்தத³த்த²ம் வா ஸியா, பரத்த²ம் வா ஸியா. அத்தத³த்த²தாயம் அத்தனோ இஸ்ஸரபா⁴வஹானி அகதகிச்சதாய இஸிதாவஸிதாபா⁴வதோ. தேன வா நிம்மிதேன யம் அத்தனோ காதப்³ப³ம், தம் கஸ்மா ஸயமேவ ந கரோதி. பரத்த²தாயம் பன பரோ நாமேத்த² லோகோ ஏவாதி கிமத்தி²யம் தஸ்ஸ நிரயாதி³ரோகா³தி³விஸாதி³னிம்மானம். யா சஸ்ஸ இஸ்ஸரதா, ஸா ஸயம்கதா வா ஸியா பரம்கதா வா அஹேதுகா வா. தத்த² ஸயம்கதா சே, ததோ புப்³பே³ அனிஸ்ஸரபா⁴வாபத்தி. பரம்கதா சே, பச்சா²பி அனிஸ்ஸரபா⁴வாபத்தி ஸஉத்தரதா ச ஸியா. அஹேதுகா சே, ந கஸ்ஸசி அனிஸ்ஸரதாதி ஏவமிஸ்ஸரஸ்ஸபி அஸித்³தி⁴ வேதி³தப்³பா³.
யதா² ச இஸ்ஸரோ, ஏவம் பஜாபதி புரிஸோ ச. நாமமத்தமேவ ஹேத்த² விஸேஸோ. தேஹி வாதீ³ஹி பகப்பிதம் யதி³த³ம் ‘‘பஜாபதி புரிஸோ’’தி. தம்னிமித்தகம் பன லோகப்பவத்திம் இச்ச²ந்தானம் பஜாபதிவாதே³ புரிஸவாதே³ ச இஸ்ஸரவாதே³ விய தோ³ஸா அஸித்³தி⁴ ச விதா⁴தப்³பா³. யதா² சேதே இஸ்ஸராத³யோ, ஏவம் காலோபி அஸித்³தோ⁴ லக்க²ணாபா⁴வதோ. பரமத்த²தோ ஹி விஜ்ஜமானானம் த⁴ம்மானம் ஸபா⁴வஸங்கா²தம் லக்க²ணம் உபலப்³ப⁴தி. யதா² பத²வியா கதி²னதா, ந ஏவம் காலஸ்ஸ, தஸ்மா நத்தி² பரமத்த²தோ காலோதி. காலவாதீ³ பனாஹ ‘‘வத்தனாலக்க²ணோ காலோ’’தி. ஸோ வத்தப்³போ³ ‘‘கா பனாயம் வத்தனா’’தி. ஸோ ஆஹ ‘‘ஸமயமுஹுத்தாதீ³னம் பவத்தீ’’தி. தம்பி ந, ரூபாதீ³ஹி அத்த²ந்தரபா⁴வேன அனித்³தா⁴ரிதத்தா. பரமத்த²தோ ஹி அனித்³தா⁴ரிதஸபா⁴வஸ்ஸ வத்தனாலக்க²ணதாயம் ஸஸவிஸாணாதீ³னம்பி தம்லக்க²ணதா ஆபஜ்ஜேய்ய.
யம் பன வத³ந்தி காணாதா³ ‘‘அபரஸ்மிம் அபரம் யுக³பதி³ சிரம் கி²ப்பமிதி காலலிங்கா³னீதி லிங்க³ஸப்³பா⁴வதோ அத்தி² காலோ’’தி, தம் அயுத்தம் லிங்கி³னோ அனுபலப்³ப⁴மானத்தா. ஸித்³த⁴ஸம்ப³ந்தே⁴ஸு ஹி லிங்கே³ஸு லிங்க³மத்தக்³க³ஹணேன லிங்கி³னி அவபோ³தோ⁴ ப⁴வேய்ய. ந ச கேனசி அவிபரீதசேதஸா தேன லிங்கே³ன ஸஹ கதா³சி காலஸங்கா²தோ லிங்கீ³ க³ஹிதபுப்³போ³தி. அதோ ந யுத்தம் ‘‘லிங்க³ஸப்³பா⁴வதோ அத்தி² காலோ’’தி. ‘‘அபரஸ்மிம் அபர’’ந்திஆதி³கஸ்ஸ விஸேஸஸ்ஸ நிமித்தபா⁴வதோ யுத்தந்தி சே? ந, பட²மஜாததாதி³னிமித்தகத்தா தஸ்ஸ. ந ச பட²மஜாததாதி³ நாம கோசி த⁴ம்மோ அத்தி² அஞ்ஞத்ர ஸமஞ்ஞாமத்ததோதி நத்தே²வ பரமத்த²தோ காலோ. கிஞ்ச பி⁴ய்யோ, ப³ஹூனம் ஏகபா⁴வாபத்திதோ. அதீதாதி³விபா⁴கே³ன ஹி லோகஸமஞ்ஞாவஸேன ப³ஹூ காலபே⁴தா³. த்வஞ்சேதம் ஏகம் வத³ஸீதி ப³ஹூனம் ஏகபா⁴வாபா⁴வதோ நத்தே²வ பரமத்த²தோ காலோ. ததா² ஏகஸ்ஸ அனேகபா⁴வாபத்திதோ. யோ ஹி அயம் அஜ்ஜ வத்தமானகாலோ, ஸோ ஹிய்யோ அனாக³தோ அஹோஸி, ஸ்வே அதீதோ ப⁴விஸ்ஸதி. ஹிய்யோ ச வத்தமானோ அஜ்ஜ அதீதோ அஹோஸி, ததா² ஸ்வே வத்தமானோபி அபரஜ்ஜ. ந சேகஸபா⁴வஸ்ஸ அனேகஸபா⁴வதா யுத்தாதி அஸித்³தோ⁴ பரமத்த²தோ காலோ. த⁴ம்மப்பவத்திம் பன உபாதா³ய கப்பனாமத்தஸித்³தா⁴ய லோகஸமஞ்ஞாய அதீதாதி³விபா⁴க³தோ வோஹரீயதீதி வோஹாரமத்தகோதி த³ட்ட²ப்³போ³.
ஸபா⁴வனியதியதி³ச்சா²த³யோபி அஸித்³தா⁴. கிம் காரணா? லக்க²ணாபா⁴வா. ந ஹி ஸபா⁴வதோ நியதியதி³ச்சா² ஸம்ப⁴வதி. அஞ்ஞதா² ஏவம்விதோ⁴ கோசி பா⁴வோ அத்தி² சே, தேஸம் ஸபா⁴வஸங்கா²தேன லக்க²ணேன ப⁴விதப்³ப³ம், பதிட்டா²பகஹேதுனா ச ந சத்தி². கேவலம் பனேதே வாதா³ விமத்³தி³யமானா அஹேதுவாதே³ ஏவ திட்ட²ந்தி, ந சாஹேதுகம் லோகவிசித்தம் விஸேஸாபா⁴வப்பஸங்க³தோ. அஹேதுகபா⁴வே ஹி பவத்தியா ய்வாயம் நரஸுரனிரயதிரச்சா²னாதீ³ஸு இந்த்³ரியாதீ³னம் விஸேஸோ, தஸ்ஸ அபா⁴வோ ஆபஜ்ஜதி, ந சாயம் பண்டி³தேஹி இச்சி²தோ. கிஞ்ச? தி³ட்ட²பா⁴வதோ. தி³ட்டா² ஹி சக்கா²தி³தோ சக்கு²விஞ்ஞாணாதீ³னம் பீ³ஜாதி³தோ அங்குராதீ³னம் பவத்தி, தஸ்மாபி ஹேதுதோவாயம் பவத்தி. ததா² புரே பச்சா² ச அபா⁴வதோ. யதோ யதோ ஹி பச்சயஸாமக்³கி³தோ யம் யம் ப²லம் நிப்³ப³த்ததி, ததோ புப்³பே³ பச்சா² ச ந தஸ்ஸ நிப்³ப³த்தி ஸம்ப⁴வதி, கிஞ்ச ப³ஹுனா. யதி³ அஹேதுதோ பவத்தி ஸியா, அஹேதுகா பவத்தீதி இமாபி வாசா யதா²ஸகபச்சயஸமவாயதோ புரே பச்சா² ச ப⁴வேய்யும், ந ச ப⁴வந்தி அலத்³த⁴ப்பச்சயத்தா, மஜ்ஜே² ஏவ ச ப⁴வந்தி லத்³த⁴ப்பச்சயத்தா. ஏவம் ஸப்³பே³பி ஸங்க²தா த⁴ம்மாதி ந ஸிஜ்ஜ²தி அஹேதுவாதோ³. தஸ்மிஞ்ச அஸித்³தே⁴ பவத்தியா அஹேதுபா⁴வோ விய அஹேதுபரியாயவிஸேஸபூ⁴தா ஸபா⁴வனியதியதி³ச்சா²த³யோபி அஸித்³தா⁴ ஏவ ஹோந்தீதி வேதி³தப்³பா³.
யம் பன காணாதா³ ‘‘பரமாணவோ நிச்சா, தேஹி த்³விஅணுகாதி³ப²லம் நிப்³ப³த்ததி, தஞ்ச அனிச்சம், தஸ்ஸ வஸேனேதம் லோகவிசித்த’’ந்தி வத³ந்தி, தம்பி மிச்சா²பரிகப்பமத்தம். ந ஹி பரமாணவோ நாம ஸந்தி அஞ்ஞத்ர பூ⁴தஸங்கா⁴தா. ஸோ பன அனிச்சோவ, ந ச நிச்சதோ அனிச்சஸ்ஸ நிப்³ப³த்தி யுத்தா தஸ்ஸ காரணபா⁴வானுபபத்திதோ ததா² அத³ஸ்ஸனதோ ச. யதி³ ச ஸோ கஸ்ஸசி காரணபா⁴வம் க³ச்சே²ய்ய, அனிச்சோ ஏவ ஸியா விகாராபத்திதோ. ந சாயம் ஸம்ப⁴வோ அத்தி², யம் விகாரம் அனாபஜ்ஜந்தமேவ காரணம் ப²லம் நிப்³ப³த்தேய்யாதி. விகாரஞ்சே ஆபஜ்ஜதி, குதஸ்ஸ நிச்சதாவகாஸோ, தஸ்மா வுத்தப்பகாரா பரமாணவோ ஸத்தா அனிச்சா, அஞ்ஞேபி நிச்சாதி³பா⁴வேன பா³ஹிரகேஹி பரிகப்பிதா அஸித்³தா⁴ ஏவாதி வேதி³தப்³ப³ம். தேன வுத்தம் ‘‘த⁴ம்மப்பபே⁴த³தோ பன அஞ்ஞஸ்ஸ ஸச்சிகட்ட²ஸ்ஸ அஸித்³த⁴த்தா’’தி.
ஏத்தா²ஹ ‘‘யதி³ பரமத்த²தோ புக்³க³லோ ந உபலப்³ப⁴தி, ஏவம் பன புக்³க³லே அனுபலப்³ப⁴மானே அத² கஸ்மா ப⁴க³வா ‘அத்தி² புக்³க³லோ அத்தஹிதாய படிபன்னோ’தி (அ. நி. 4.95; கதா². 22), ‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மி’ந்தி (அ. நி. 4.95; கதா². 22) ச தத்த² தத்த² புக்³க³லஸ்ஸ அத்தி²பா⁴வம் பவேதே³ஸீ’’தி. வினேய்யஜ்ஜா²ஸயவஸேன. ததா² ததா² வினேதப்³பா³னஞ்ஹி புக்³க³லானம் அஜ்ஜா²ஸயவஸேன வினேய்யத³மனகுஸலோ ஸத்தா² த⁴ம்மம் தே³ஸேந்தோ லோகஸமஞ்ஞானுரூபம் தத்த² தத்த² புக்³க³லக்³க³ஹணம் கரோதி, ந பரமத்த²தோ புக்³க³லஸ்ஸ அத்தி²பா⁴வதோ.
அபிச அட்ட²ஹி காரணேஹி ப⁴க³வா புக்³க³லகத²ம் கதே²தி ஹிரோத்தப்பதீ³பனத்த²ம், கம்மஸ்ஸகதாதீ³பனத்த²ம், பச்சத்தபுரிஸகாரதீ³பனத்த²ம், ஆனந்தரியதீ³பனத்த²ம், ப்³ரஹ்மவிஹாரதீ³பனத்த²ம், புப்³பே³னிவாஸதீ³பனத்த²ம், த³க்கி²ணாவிஸுத்³தி⁴தீ³பனத்த²ம், லோகஸம்முதியா அப்பஹானத்த²ஞ்சாதி. ‘‘க²ந்தா⁴ தா⁴தூ ஆயதனானி ஹிரீயந்தி ஓத்தப்பந்தீ’’தி ஹி வுத்தே மஹாஜனோ ந ஜானாதி, ஸம்மோஹம் ஆபஜ்ஜதி, படிஸத்து வா ஹோதி ‘‘கிமித³ம் க²ந்தா⁴ தா⁴தூ ஆயதனானி ஹிரீயந்தி ஓத்தப்பந்தி நாமா’’தி. ‘‘இத்தீ² ஹிரீயதி ஓத்தப்பதி, புரிஸோ, க²த்தியோ, ப்³ராஹ்மணோ’’தி பன வுத்தே ஜானாதி, ந ஸம்மோஹம் ஆபஜ்ஜதி, ந படிஸத்து ஹோதி, தஸ்மா ப⁴க³வா ஹிரோத்தப்பதீ³பனத்த²ம் புக்³க³லகத²ம் கதே²தி. ‘‘க²ந்தா⁴ கம்மஸ்ஸகா, தா⁴துயோ ஆயதனானீ’’தி வுத்தேபி ஏஸேவ நயோ. தஸ்மா கம்மஸ்ஸகதாதீ³பனத்த²ம்பி புக்³க³லகத²ம் கதே²தி. ‘‘வேளுவனாத³யோ மஹாவிஹாரா க²ந்தே⁴ஹி காராபிதா, தா⁴தூஹி, ஆயதனேஹீ’’தி வுத்தேபி ஏஸேவ நயோ. ததா² ‘‘க²ந்தா⁴ மாதரம் ஜீவிதா வோரோபேந்தி, பிதரம், அரஹந்தம், ருஹிருப்பாத³கம்மம், ஸங்க⁴பே⁴த³கம்மம் கரோந்தி, தா⁴துயோ, ஆயதனானீ’’தி வுத்தேபி, ‘‘க²ந்தா⁴ மேத்தாயந்தி, தா⁴துயோ, ஆயதனானீ’’தி வுத்தேபி, ‘‘க²ந்தா⁴ புப்³பே³னிவாஸம் அனுஸ்ஸரந்தி, தா⁴துயோ, ஆயதனானீ’’தி வுத்தேபி ஏஸேவ நயோ. தஸ்மா ப⁴க³வா பச்சத்தபுரிஸகாரதீ³பனத்த²ம் ஆனந்தரியதீ³பனத்த²ம் ப்³ரஹ்மவிஹாரதீ³பனத்த²ம் புப்³பே³னிவாஸதீ³பனத்த²ஞ்ச புக்³க³லகத²ம் கதே²தி. ‘‘க²ந்தா⁴ தா³னம் படிக்³க³ண்ஹந்தி, தா⁴துயோ, ஆயதனானீ’’தி வுத்தேபி மஹாஜனோ ந ஜானாதி, ஸம்மோஹம் ஆபஜ்ஜதி, படிஸத்து வா ஹோதி ‘‘கிமித³ம் க²ந்தா⁴ தா⁴தூ ஆயதனானி படிக்³க³ண்ஹந்தி நாமா’’தி. ‘‘புக்³க³லோ படிக்³க³ண்ஹாதீ’’தி பன வுத்தே ஜானாதி, ந ஸம்மோஹம் ஆபஜ்ஜதி, ந படிஸத்து ஹோதி, தஸ்மா ப⁴க³வா த³க்கி²ணாவிஸுத்³தி⁴தீ³பனத்த²ம் புக்³க³லகத²ம் கதே²தி. லோகஸம்முதிஞ்ச பு³த்³தா⁴ ப⁴க³வந்தோ நப்பஜஹந்தி லோகஸமஞ்ஞாய லோகாபி⁴லாபே டி²தாயேவ த⁴ம்மம் தே³ஸேந்தி, தஸ்மா ப⁴க³வா லோகஸம்முதியா அப்பஹானத்த²ம்பி புக்³க³லகத²ம் கதே²தீதி இமேஹி அட்ட²ஹி காரணேஹி ப⁴க³வா புக்³க³லகத²ம் கதே²தி, ந பரமத்த²தோ புக்³க³லஸ்ஸ அத்தி²பா⁴வதோதி வேதி³தப்³ப³ம்.
த⁴ம்மப்பபே⁴தா³காரேனேவாதி யதா²வுத்தரூபாதி³த⁴ம்மப்பபே⁴த³தோ அஞ்ஞஸ்ஸ ஸச்சிகட்ட²ஸ்ஸ அஸித்³த⁴த்தா ரூபாதி³த⁴ம்மப்பபே⁴தா³காரேனேவ புக்³க³லஸ்ஸ உபலத்³தி⁴யா ப⁴விதப்³ப³ந்தி அத்தோ². தேன ‘‘கிம் தவ புக்³க³லோ உபலப்³ப⁴மானோ ருப்பனாகாரேன உபலப்³ப⁴தி, உதா³ஹு அனுப⁴வனஸஞ்ஜானனாபி⁴ஸங்க²ரணவிஜானனேஸு அஞ்ஞதராகாரேனா’’தி த³ஸ்ஸேதி தப்³பி³னிமுத்தஸ்ஸ ஸபா⁴வத⁴ம்மஸ்ஸ லோகே அபா⁴வதோ. அவிஸேஸவிஸேஸேஹி புக்³க³லூபலப்³ப⁴ஸ்ஸ படிஞ்ஞாபடிக்கே²பபக்கா² அனுஜானனாவஜானனபக்கா². யதி³பிமே த்³வேபி பக்கா² அனுலோமபடிலோமனயேஸு லப்³ப⁴ந்தி, ஆதி³தோ பன பட²மம் ட²பேத்வா பவத்தோ பட²மனயோ, இதரோ து³தியந்தி இமம் நேஸம் விஸேஸம் த³ஸ்ஸேந்தோ ‘‘அனுஜானனா…பே… வேதி³தப்³போ³’’தி ஆஹ. யதா²தி⁴கதாய லத்³தி⁴யா அனுலோமனதோ சேத்த² பட²மோ நயோ அனுலோமபக்கோ², தப்³பி³லோமனதோ இதரோ படிலோமபக்கோ²தி வுத்தோதி வேதி³தப்³ப³ந்தி.
தேன வத ரேதி ஏத்த² தேனாதி காரணவசனம். யேன புக்³க³லூபலப்³போ⁴ பதிட்ட²பீயதி, தேன ஹேதுனா. ஸ்வாயம் ஹேது ஸாஸனிகஸ்ஸ பா³ஹிரகஸ்ஸ ச வஸேன ஹேட்டா² த³ஸ்ஸிதோ ஏவ. ஹேதுபதிரூபகே சாயம் ஹேதுஸமஞ்ஞா பரமத்த²ஸ்ஸ அதி⁴ப்பேதத்தா. ஹேட்டா² ‘‘ஆஜானாஹி நிக்³க³ஹ’’ந்தி நிக்³க³ஹஸ்ஸ ஸஞ்ஞாபனமத்தம் கதம், தம் இதா³னி ‘‘யம் தத்த² வதே³ஸீ’’திஆதி³னா நிக³மனரூபேன மிச்சா²பா⁴வத³ஸ்ஸனேன ச விபா⁴வியமானம் பாகடபா⁴வகரணதோ ஆரோபிதம் பதிட்டா²பிதம் ஹோதீதி அட்ட²கதா²யம் ‘‘ஆரோபிதத்தா’’தி வுத்தம்.
ஏத்த² ச ‘‘புக்³க³லோ உபலப்³ப⁴தீ’’தி படிஞ்ஞாவயவோ ஸரூபேனேவ த³ஸ்ஸிதோ. ‘‘தேனா’’தி இமினா ஸாமஞ்ஞதோ ஹேதாவயவோ த³ஸ்ஸிதோ. ய்வாயம் யஸ்மா படிஞ்ஞாத⁴ம்மோ ஹுத்வா ஸதி³ஸபக்கே² விஜ்ஜமானோ, விஸதி³ஸபக்கே² அவிஜ்ஜமானோயேவ ஹேது லக்க²ணூபபன்னோ நாம ஹோதி, ந இதரோ, தஸ்மா யத்த² ஸோ விஜ்ஜதி ந விஜ்ஜதி ச, ஸோ ஸதி³ஸாஸதி³ஸபா⁴வபி⁴ன்னோ து³விதோ⁴ தி³ட்ட²ந்தாவயவோ. யதா² ரூபாதி³ உபலப்³ப⁴தி, ததா² புக்³க³லோ. யதா² ச ஸஸவிஸாணம் ந உபலப்³ப⁴தி, ந ததா² புக்³க³லோதி உபனயோ. ஸ்வாயம் ‘‘வத்தப்³பே³ கோ² புக்³க³லோ உபலப்³ப⁴தி ஸச்சிகட்ட²பரமத்தே²னா’’தி இமாய பாளியா தீ³பிதோ, யோ அட்ட²கதா²யம் ஸத்³தி⁴ம் ஹேதுதா³ஹரணேஹி ‘‘பாபனா’’தி வுத்தோ. நிக³மனம் பாளியம் ஸரூபேனேவ ஆக³தம், யா அட்ட²கதா²யம் ‘‘ரோபனா’’தி வுத்தாதி. ஏவம் போராணேன ஞாயக்கமேன ஸாத⁴னாவயவா நித்³தா⁴ரேத்வா யோஜேதப்³பா³.
இதா³னி வத்தனேன பரபக்கு²பலக்கி²தே ஹேதுதா³ஹரணே அன்வயப்³யதிரேகத³ஸ்ஸனவஸேன நித்³தா⁴ரேத்வா ஸாத⁴னபயோகோ³ யோஜேதப்³போ³. காரணம் வத்தப்³ப³ந்தி கிமேத்த² வத்தப்³ப³ம். ஹேதுதா³ஹரணேஹியேவ ஹி ஸபரபக்கா²னம் ஸாத⁴னம் தூ³ஸனம் வா, ந படிஞ்ஞாய, தஸ்ஸா ஸாதே⁴தப்³பா³தி³பா⁴வதோ. தம் பன த்³வயம் ‘‘தேன வத ரே’’திஆதி³பாளியா விபா⁴விதம். அட்ட²கதா²யம் பாபனாரோபனாஸீஸேன த³ஸ்ஸிதம். படிஞ்ஞாட²பனா பன தேஸம் விஸயத³ஸ்ஸனம் கதா²யம் தம்மூலதாயாதி வேதி³தப்³ப³ம். தேனாஹ ‘‘யம் பன வக்க²தீ’’திஆதி³. தேனேவ ச அட்ட²கதா²யம் ‘‘இத³ம் அனுலோம…பே… ஏகம் சதுக்கம் வேதி³தப்³ப³’’ந்தி வக்க²தி. ததா² சாஹ ‘‘யதா² பன தத்தா²’’திஆதி³. நிக்³க³ஹோவ விஸும் வுத்தோ, ந படிகம்மந்தி அதி⁴ப்பாயோ. விஸும் வுத்தோதி ச பாபனாரோபனாஹி அஸம்மிஸ்ஸம் கத்வா விஸும் அங்க³பா⁴வேன வுத்தோ, ந தத³ஞ்ஞதரோ விய தத³ந்தோக³த⁴பா⁴வேன வுத்தோ, நாபி ட²பனா விய அக³ணனுபக³பா⁴வேனாதி அத்தோ². யே பனாதி பத³காரே ஸந்தா⁴யாஹ. து³தியே…பே… ஆபஜ்ஜதி தத்த² நிக்³க³ஹஸ்ஸ அயதா²பூ⁴தத்தா படிகம்மஸ்ஸ ச யதா²பூ⁴தபா⁴வதோதி அதி⁴ப்பாயோ.
2. பரமத்த²தோ புக்³க³லம் நானுஜானாதி, வோஹாரதோ பன அனுஜானாதீதி ஸகவாதி³மதம் ஜானந்தேனபி பரவாதி³னா ச²லவஸேன விபா⁴க³ம் அகத்வா ‘‘புக்³க³லோ நுபலப்³ப⁴தி ஸச்சிகட்ட²பரமத்தே²னா’’தி புச்சா²ய கதாய ஸகவாதீ³ தத்த² அயம் புக்³க³லவாதீ³, இமஸ்ஸ லத்³தி⁴ படிக்கி²பிதப்³பா³தி பரமத்த²ஸச்சம் ஸந்தா⁴யாஹ ‘‘ஆமந்தா’’தி. ‘‘ந உபலப்³ப⁴தீ’’தி ஹி வுத்தம் ஹோதி. புன இதரோ ஸம்முதிஸச்சம் ஸந்தா⁴ய ‘‘யோ ஸச்சிகட்டோ²’’திஆதி³மாஹ. தஸ்ஸத்தோ² – யோ லோகவோஹாரஸித்³தோ⁴ ஸச்சிகட்டோ², ததோ ஏவ கேனசி அபடிக்கி²பிதப்³ப³தோ பரமத்த²தோ ததோ ஸோ புக்³க³லோ நுபலப்³ப⁴தீதி. புன ஸகவாதீ³ புப்³பே³ பரமத்த²ஸச்சவஸேன புக்³க³லே படிக்கி²த்தே இதா³னி ஸம்முதிஸச்சவஸேனாயம் புச்சா²தி மந்த்வா தம் அப்படிக்கி²பந்தோ ‘‘ந ஹேவம் வத்தப்³பே³’’தி ஆஹ. தேனாஹ ‘‘அத்தனா அதி⁴ப்பேதம் ஸச்சிகட்ட²மேவாதி ஸம்முதிஸச்சம் ஸந்தா⁴யாதி அதி⁴ப்பாயோ’’தி. ஏவமவட்டி²தே ‘‘யதி³ பரவாதி³னா…பே… நாரபி⁴தப்³பா³’’தி இத³ம் ந வத்தப்³ப³ம் பட²மபுச்சா²ய பரமத்த²ஸச்சஸ்ஸ ஸச்சிகட்டோ²தி அதி⁴ப்பேதத்தா. ‘‘அத² ஸகவாதி³னா…பே… ஆபஜ்ஜதீ’’தி இத³ம்பி ந வத்தப்³ப³ம் து³தியபுச்சா²ய ஸம்முதிஸச்சஸ்ஸ ஸச்சிகட்டோ²தி அதி⁴ப்பேதத்தா.
யதி³ உப⁴யம் அதி⁴ப்பேதந்தி இத³ம் யதி³ பட²மபுச்ச²ம் ஸந்தா⁴ய, தத³யுத்தம் தஸ்ஸா பரமத்த²ஸச்சஸ்ஸேவ வஸேன பவத்தத்தா. அத² து³தியபுச்ச²ம் ஸந்தா⁴ய, தஸ்ஸா ஸம்முதிஸச்சவஸேன பட²மத்த²ம் வத்வா புன மிஸ்ஸகவஸேன வத்தும் ‘‘ஸம்முதிஸச்சபரமத்த²ஸச்சானி வா ஏகதோ கத்வாபி ஏவமாஹா’’தி வுத்தத்தா தம்பி ந வத்தப்³ப³மேவ. த்³வேபி ஸச்சானீதி ஸம்முதிபரமத்த²ஸச்சானி. தேஸு பரமத்த²ஸச்சஸ்ஸேவ நிப்பரியாயேன ஸச்சிகட்ட²பரமத்த²பா⁴வோ, இதரஸ்ஸ உபசாரேன. ததா² ச வுத்தம் ‘‘மாயா மரீசி…பே… உத்தமட்டோ²’’தி. தஸ்மா ஸம்முதிஸச்சவஸேன உபலத்³தி⁴ம் இச்ச²ந்தேனபி பரமத்த²ஸச்சவஸேன அனிச்ச²னதோ ‘‘புக்³க³லோ உபலப்³ப⁴தி ஸச்சிகட்ட²பரமத்தே²னா’’திஆதி³னா அனுயோகோ³ யுத்தோ. ‘‘பதா⁴னப்பதா⁴னேஸு பதா⁴னே கிச்சஸித்³தீ⁴’’தி ஏதேனேவ ‘‘ந ச ஸச்சிகட்டே²கதே³ஸேன அனுயோகோ³’’திஆதி³ நிவத்திதஞ்ச ஹோதி ஸச்சிகட்டே²கதே³ஸபா⁴வஸ்ஸேவ அஸித்³த⁴த்தா. நாஸ்ஸ பரமத்த²ஸச்சதா அனுயுஞ்ஜிதப்³பா³தி அஸ்ஸ ஸச்சிகட்ட²ஸ்ஸ பரமத்த²ஸச்சதா பரவாதி³னா ந அனுயுஞ்ஜிதப்³பா³ ‘‘புக்³க³லோ நுபலப்³ப⁴தி ஸச்சிகட்ட²பரமத்தே²னா’’தி ஸகவாதி³னோபி ஸச்சிகட்ட²பரமத்த²தோ தஸ்ஸ இச்சி²தப்³ப³த்தாதி அதி⁴ப்பாயோ. வோஹரிதஸச்சிகட்ட²ஸ்ஸ அத்தனா அதி⁴ப்பேதஸச்சிகட்ட²தாபி யுத்தா தஸ்ஸ தேன அதி⁴ப்பேதத்தா. ஸ்வாயமத்தோ² ஹேட்டா² த³ஸ்ஸிதோயேவ. வுத்தனயோவ தோ³ஸோதி ‘‘த்³வேபி ஸச்சானீ’’திஆதி³னா அனந்தரமேவ வுத்தம் ஸந்தா⁴யாஹ. தஸ்ஸ பன அதோ³ஸபா⁴வோ த³ஸ்ஸிதோயேவ. அத² ந இதி அத² ந பூ⁴தஸபா⁴வத்தே²ன உபலப்³பே⁴ய்யாதி யோஜனா. வத்தப்³போ³தி யதே³த்த² வத்தப்³ப³ம், தம் ‘‘யோ லோகவோஹாரஸித்³தோ⁴’’திஆதி³னா வுத்தமேவ, தஸ்மா ஏத்த² ‘‘பரமத்த²தோ புக்³க³லம் நானுஜானாதீ’’திஆதி³னா அதி⁴ப்பாயமக்³க³னம் த³ட்ட²ப்³ப³ம்.
அனுஞ்ஞேய்யமேதம் ஸியாதி ஏதம் அனுபலப்³ப⁴னம் பட²மபுச்சா²யம் விய து³தியபுச்சா²யம்பி அனுஜானிதப்³ப³ம் ஸியா. ந வா கிஞ்சி வத்தப்³ப³ந்தி அத² வா கிஞ்சி ந வத்தப்³ப³ம் ட²பனீயத்தா பஞ்ஹஸ்ஸ. ததா² ஹிஸ்ஸ ட²பனீயாகாரம் த³ஸ்ஸேந்தோ ‘‘யதா² ஹீ’’திஆதி³மாஹ. ஏத்த² ச காமம் ஸச்சத்³வயாகாரேன புக்³க³லோ நுபலப்³ப⁴தி, ஸம்முதியாகாரேன பன நுபலப்³ப⁴தீதி உபலப்³ப⁴னபா⁴வஸ்ஸ வஸேன படிக்கே²போ கதோதி அயமேத்த² அதி⁴ப்பாயோ த³ட்ட²ப்³போ³. அனுஞ்ஞாதம் படிக்கி²த்தஞ்சாதி பட²மபுச்சா²யம் அனுஞ்ஞாதம், து³தியபுச்சா²யம் படிக்கி²த்தம். ஏதம் ச²லவாத³ம் நிஸ்ஸாயாதி ஏதம் ஏகம்யேவ வத்து²ம் உத்³தி³ஸ்ஸ அனுஜானனபடிக்கி²பனாகாரம் ச²லவசனம் நிஸ்ஸாய. த்வம் நிக்³க³ஹேதப்³போ³தி யோஜனா. ஸம்ப⁴வந்தஸ்ஸ ஸாமஞ்ஞேனாதி நிக்³க³ஹட்டா²னபா⁴வேன ஸம்ப⁴வந்தஸ்ஸ அனுலோமனயேன அனுஜானனபடிக்கே²பஸ்ஸ ஸமானபா⁴வேன. அஸம்ப⁴வந்தஸ்ஸ கப்பனந்தி பச்சனீகனயேன தஸ்ஸ நிக்³க³ஹட்டா²னபா⁴வேன அஸம்ப⁴வந்தஸ்ஸ ததா² கப்பனம் ஸம்விதா⁴னம் ச²லவாதோ³ ப⁴விதும் அரஹதி. ‘‘அத்த²விகப்புபபத்தியா வசனவிகா⁴தோ ச²ல’’ந்தி வுத்தோவாயமத்தோ². தேனாதி யதா²வுத்தகப்பனம் ச²லவாதோ³தி வுத்தத்தா. வசனஸாமஞ்ஞமத்தம் கப்பிதம் ச²லம் வத³தி ஏதேனாதி ச²லவாதோ³. தேன வுத்தம் ‘‘ச²லவாத³ஸ்ஸ காரணத்தா ச²லவாதோ³’’தி. வசனஸாமஞ்ஞமத்தம் அத்த²பூ⁴தம் தத³த்த²ம் ச²லவாத³ம் நிஸ்ஸாய. ‘‘விசாரேதப்³ப³’’ந்தி வுத்தம், கிமேத்த² விசாரேதப்³ப³ம். யதி³பி பக்க²ஸ்ஸ ட²பனாமூலகம் அனுஜானனாவஜானனானம் மிச்சா²பா⁴வத³ஸ்ஸனம் தப்³பி³ஸயத்தா, பாபனாரோபனாஹி ஏவ பன ஸோ விபா⁴வீயதி, ந ட²பனாயாதி பாகடோயமத்தோ².
4-5. தேனாதி ஸகவாதி³னா. தேன நியாமேனாதி யேன நியாமேன ஸகவாதி³னா சதூஹி பாபனாரோபனாஹிஸ்ஸ நிக்³க³ஹோ கதோ, தேன நியாமேன நயேன. ஸோ நிக்³க³ஹோ து³க்கடோ அனிக்³க³ஹோயேவாதி த³ஸ்ஸேந்தோ ஆஹ ‘‘அனிக்³க³ஹபா⁴வஸ்ஸ வா உபக³மிதத்தா’’தி, பாபிதத்தாதி அத்தோ². ஏவமேவாதி யதா² ‘‘தயா மம கதோ நிக்³க³ஹோ’’திஆதி³னா அனிக்³க³ஹபா⁴வூபனயோ வுத்தோ, ஏவமேவ. ஏதஸ்ஸாதி ‘‘தேன ஹீ’’திஆதி³னா இமாய பாளியா வுத்தஸ்ஸ.
அனுலோமபச்சனீகவண்ணனா நிட்டி²தா.
2. பச்சனீகானுலோமவண்ணனா
7-10. அஞ்ஞேனாதி ஸம்முதிஸச்சபூ⁴தேன. பரஸ்ஸாதி ஸகவாதி³னோ. ஸோ ஹி பரவாதி³னா பரோ நாம ஹோதி. படிஞ்ஞாபடிக்கே²பானம் பி⁴ன்னவிஸயத்தா ‘‘அவிரோதி⁴தத்தா’’தி வுத்தம். அபி⁴ன்னாதி⁴கரணம் விய ஹி அபி⁴ன்னவிஸயமேவ விருத்³த⁴ம் நாம ஸியா, ந இதரந்தி அதி⁴ப்பாயோ. தமேவத்த²ம் விபா⁴வேதும் ‘‘ந ஹி…பே… ஆபஜ்ஜதீ’’தி ஆஹ. யதி³ ஏவம் கத²மித³ம் நிக்³க³ஹட்டா²னம் ஜாதந்தி ஆஹ ‘‘அத்தனோ பனா’’திஆதி³. தேன படிஞ்ஞாந்தரம் நாம அஞ்ஞமேவேதம் நிக்³க³ஹட்டா²னந்தி த³ஸ்ஸேதி.
பச்சனீகானுலோமவண்ணனா நிட்டி²தா.
ஸுத்³த⁴ஸச்சிகட்ட²வண்ணனா நிட்டி²தா.
2. ஓகாஸஸச்சிகட்டோ²
1. அனுலோமபச்சனீகவண்ணனா
11. ஸாமஞ்ஞேன வுத்தம் விஸேஸனிவிட்ட²ம் ஹோதீதி ஆஹ ‘‘ஸப்³ப³த்தா²தி ஸப்³ப³ஸ்மிம் ஸரீரேதி அயமத்தோ²’’தி. ஸாமஞ்ஞஜோதனா ஹி விஸேஸே அவதிட்ட²தீதி விஸேஸத்தி²னா விஸேஸோ அனுபயுஜ்ஜிதப்³போ³தி. ஏதேனாதி தே³ஸவஸேன ஸப்³ப³த்த² படிக்கே²பவசனேன.
3. காலஸச்சிகட்டோ²
1. அனுலோமபச்சனீகவண்ணனா
12. மஜ்ஜி²மஜாதிகாலேதி பச்சுப்பன்னத்தபா⁴வகாலே. அத்தபா⁴வோ ஹி இத⁴ ‘‘ஜாதீ’’தி அதி⁴ப்பேதோ. ததோ அதீதோ புரிமஜாதிகாலோ, அனாக³தோ பச்சி²மஜாதிகாலோ. இமேஸு தீஸூதி ஸப்³ப³த்த², ஸப்³ப³தா³, ஸப்³பே³ஸூதி இமேஸு தீஸு நயேஸு. பாட²ஸ்ஸ ஸம்கி²த்ததா ஸுவிஞ்ஞேய்யாதி தம் ட²பேத்வா அத்த²ஸ்ஸ ஸதி³ஸதம் விபா⁴வேந்தோ ‘‘இதா⁴பி ஹி…பே… யோஜேதப்³ப³’’ந்தி ஆஹ. ஏத்தா²பி ‘‘ந கேனசி ஸபா⁴வேன புக்³க³லோ உபலப்³ப⁴தீ’’தி அயமத்தோ² வுத்தோ ஹோதி. ந ஹி கேனசி ஸபா⁴வேன உபலப்³ப⁴மானஸ்ஸ ஸகலேகதே³ஸவினிமுத்தோ பவத்திகாலோ நாம அத்தீ²தி.
4. அவயவஸச்சிகட்டோ²
1. அனுலோமபச்சனீகவண்ணனா
13. ததியனயே ந ஸப்³பே³கத⁴ம்மவினிமுத்தம் பவத்திட்டா²னம் நாம அத்தீ²தி யோஜேதப்³ப³ம்.
ஓகாஸாதி³ஸச்சிகட்டோ²
2. பச்சனீகானுலோமவண்ணனா
14. அனுலோமபஞ்சகஸ்ஸாதிஆதி³ம்ஹி அட்ட²கதா²வசனே. புன தத்தா²தி யதா²வுத்தே அட்ட²கதா²வசனே, தேஸு வா அனுலோமபஞ்சகபச்சனீகேஸு. ஸப்³ப³த்த² புக்³க³லோ நுபலப்³ப⁴தீதிஆதி³கஸ்ஸ பாட²ப்பதே³ஸஸ்ஸ அத்தோ² ‘‘ஸரீரம் ஸந்தா⁴யா’’திஆதி³னா அட்ட²கதா²யம் வுத்தனயேன வேதி³தப்³போ³ அத்தோ². படிகம்மாதி³பாளிந்தி படிகம்மனிக்³க³ஹஉபனயனனிக³மனபாளிம். தீஸு முகே²ஸூதி ‘‘ஸப்³ப³த்தா²’’திஆதி³னா வுத்தேஸு தீஸு வாத³முகே²ஸு. பச்சனீகஸ்ஸ பாளி வுத்தாதி ஸம்ப³ந்தோ⁴. தந்தி பாளிம். ஸங்கி²பித்வா ஆக³தத்தா ஸரூபேன அவுத்தே. ஸுத்³தி⁴க…பே… வுத்தம் ஹோதி தத்த² ‘‘ஸப்³ப³த்தா²’’திஆதி³னா ஸரீராதி³னோ பராமஸனம் நத்தி², இத⁴ அத்தீ²தி அயமேவ விஸேஸோ, அஞ்ஞம் ஸமானந்தி.
ஸச்சிகட்ட²வண்ணனா நிட்டி²தா.
5. ஸுத்³தி⁴கஸம்ஸந்த³னவண்ணனா
17-27. ஸச்சிகட்ட²ஸ்ஸ, ஸச்சிகட்டே² வா ஸம்ஸந்த³னம் ஸச்சிகட்ட²ஸம்ஸந்த³னந்தி ஸமாஸத்³வயம் ப⁴வதீதி த³ஸ்ஸேந்தோ ‘‘ஸச்சிகட்ட²ஸ்ஸா’’திஆதி³மாஹ. தத்த² ஸச்சிகட்ட²ஸ்ஸ புக்³க³லஸ்ஸாதி ஸச்சிகட்ட²ஸபா⁴வஸ்ஸ பரமத்த²தோ விஜ்ஜமானஸபா⁴வஸ்ஸ புக்³க³லஸ்ஸ. ரூபாதீ³ஹி ஸத்³தி⁴ம் ஸம்ஸந்த³னந்தி ஸச்சிகட்ட²தாஸாமஞ்ஞேன ரூபாதீ³ஹி ஸமீகரணம். ஸச்சிகட்டே²தி ஸச்சிகட்ட²ஹேது, தத்த² வா தம் அதி⁴ட்டா²னம் கத்வா. ‘‘துல்யயோகே³ ஸமுச்சயோ’’தி ஸமுச்சயத்த²த்தா ஏவ ச-காரஸ்ஸ ஸச்சிகட்டே²ன உபலத்³தி⁴ஸாமஞ்ஞேன இத⁴ ரூபமாஹடந்தி தஸ்ஸ உதா³ஹடபா⁴வோ யுத்தோதி ‘‘யதா²ரூப’’ந்தி நித³ஸ்ஸனவஸேன அத்தோ² வுத்தோ, அஞ்ஞதா² இத⁴ ரூபஸ்ஸ ஆஹரணமேவ கிமத்தி²யம். ஏவம் ஸேஸத⁴ம்மேஸுபி. யா பனேத்த² அஞ்ஞத்தபுச்சா², ஸாபி நித³ஸ்ஸனத்த²ம் உபப்³ரூஹேதி அஞ்ஞத்தனிப³ந்த⁴னத்தா தஸ்ஸ. ஓபம்மஸம்ஸந்த³னே பன நித³ஸ்ஸனத்தோ² கா³ஹீயதீதி இமஸ்மிம் ஸுத்³தி⁴கஸம்ஸந்த³னே கேவலம் ஸமுச்சயவஸேனேவ அத்த²த³ஸ்ஸனம் யுத்தந்தி அதி⁴ப்பாயோ. ரூபாதீ³னி உபாதா³பஞ்ஞத்திமத்தத்தா புக்³க³லஸ்ஸ ஸோ தேஹி அஞ்ஞோ, அனஞ்ஞோ சாதி ந வத்தப்³போ³தி அயம் ஸாஸனக்கமோதி ஆஹ ‘‘ரூபாதீ³ஹி…பே… ஸமயோ’’தி. அனுஞ்ஞாயமானேதி தஸ்மிம் ஸமயே ஸுத்தே ச அப்படிக்கி²பியமானே. அயஞ்ச அத்தோ² ஸாஸனிகஸ்ஸ பரவாதி³னோ வஸேன வுத்தோதி வேதி³தப்³ப³ம்.
‘‘ஆஜானாஹி நிக்³க³ஹ’’ந்தி பாடோ² தி³ட்டோ² ப⁴விஸ்ஸதி, அஞ்ஞதா² ‘‘படிலோமபஞ்சகானி த³ஸ்ஸிதானி, படிகம்மசதுக்காதீ³னி ஸம்கி²த்தானீ’’தி ந ஸக்கா வத்துந்தி அதி⁴ப்பாயோ. சோத³னாய வினா பரவாதி³னோ படிஜானாபனம் நத்தீ²தி வுத்தம் ‘‘படிஜானாபனத்த²ந்தி…பே… சோத³னத்த²’’ந்தி. சோத³னாபுப்³ப³கஞ்ஹி தஸ்ஸ படிஜானாபனம். தேன ப²லவோஹாரேன காரணம் வுத்தந்தி த³ஸ்ஸேதி. அப்³யாகதத்தாதி அப்³யாகரணீயத்தா, ப⁴க³வதா வா ந ப்³யாகதத்தா. யதி³ ட²பனீயத்தா படிக்கி²பிதப்³ப³ந்தி இமஸ்மிம் பச்சனீகனயே ட²பனீயத்தா பஞ்ஹஸ்ஸ ஸகவாதி³னா படிக்கி²பிதப்³ப³ம். பரேனபீதி பரவாதி³னாபி ட²பனீயத்தா லத்³தி⁴மேவ நிஸ்ஸாய அனுலோமனயே படிக்கே²போ கதோதி அயமேத்த² ஸுத்³தி⁴கஸம்ஸந்த³னாய அதி⁴ப்பாயோ யுத்தோ அனுலோமேபி ரூபாதீ³ஹி அஞ்ஞத்தசோத³னாயமேவ பரவாதி³னா படிக்கே²பஸ்ஸ கதத்தாதி அதி⁴ப்பாயோ.
ஸுத்³தி⁴கஸம்ஸந்த³னவண்ணனா நிட்டி²தா.
6. ஓபம்மஸம்ஸந்த³னவண்ணனா
28-36. உபலத்³தி⁴ஸாமஞ்ஞேன அஞ்ஞத்தபுச்சா² சாதி இமினா த்³வயம்பி உத்³த⁴ரதி உபலத்³தி⁴ஸாமஞ்ஞேன அஞ்ஞத்தபுச்சா², உபலத்³தி⁴ஸாமஞ்ஞேன புச்சா² சாதி. தத்த² பச்சி²மம் ஸந்தா⁴யாஹ ‘‘த்³வின்னம் ஸமானதா’’திஆதி³. தஸ்ஸத்தோ² – த்³வின்னம் ரூபவேத³னானம் விய ரூபபுக்³க³லானம் ஸச்சிகட்டே²ன ஸமானதா தேஸம் அஞ்ஞத்தஸ்ஸ காரணம் யுத்தம் ந ஹோதி. அத² கோ²…பே… உபலப்³ப⁴னீயதாதி இத³ஞ்ச ஸம்ஸந்த³னம் விசாரேதப்³ப³ம். அயம் ஹேத்த² அதி⁴ப்பாயோ – யதி³ ஸச்சிகட்ட²ஸாமஞ்ஞேன ரூபபுக்³க³லானம் உபலத்³தி⁴ஸாமஞ்ஞம் இச்சி²தம், தேனேவ நேஸம் அஞ்ஞத்தம்பி இச்சி²தப்³ப³ம். அத² பரமத்த²வோஹாரபே⁴த³தோ தேஸம் அஞ்ஞத்தம் ந இச்சி²தம், ததோ ஏவ உபலத்³தி⁴ஸாமஞ்ஞம்பி ந இச்சி²தப்³ப³ந்தி.
37-45. உபலத்³தீ⁴தி புக்³க³லஸ்ஸ உபலத்³தி⁴ விஜ்ஜமானதா. ‘‘படிகம்மபஞ்சக’’ந்தி விஞ்ஞாயதீதி யோஜனா.
ஓபம்மஸம்ஸந்த³னவண்ணனா நிட்டி²தா.
7. சதுக்கனயஸம்ஸந்த³னவண்ணனா
46-52. ஏகத⁴ம்மதோபீதி ஸத்தபஞ்ஞாஸாய ஸச்சிகட்டே²ஸு ஏகத⁴ம்மதோபி. ஏதேன ததோ ஸப்³ப³தோபி புக்³க³லஸ்ஸ அஞ்ஞத்தானனுஜானனம் த³ஸ்ஸேதி. தேனாஹ அட்ட²கதா²யம் ‘‘ஸகலம் பரமத்த²ஸச்சம் ஸந்தா⁴யா’’தி. ரூபாதி³ஏகேகத⁴ம்மவஸேன நானுயுஞ்ஜிதப்³போ³ அவயவப்³யதிரேகேன ஸமுதா³யஸ்ஸ அபா⁴வதோ. யஸ்மா பன ஸமுதா³யாவயவா பி⁴ன்னஸபா⁴வா, தஸ்மா ‘‘ஸமுதா³யதோ…பே… நிக்³க³ஹாரஹோ ஸியா’’தி பரவாதி³னோ ஆஸங்கமாஹ. ஏதம் வசனோகாஸந்தி யதி³பி ஸத்தபஞ்ஞாஸத⁴ம்மஸமுதா³யதோ புக்³க³லஸ்ஸ அஞ்ஞத்தம் ந இச்ச²தி தப்³பி³னிமுத்தஸ்ஸ ஸச்சிகட்ட²ஸ்ஸ அபா⁴வதோ, ததே³கதே³ஸதோ பனஸ்ஸ அனஞ்ஞத்தம்பி ந இச்ச²தேவ. ந ஹி ஸமுதா³யோ அவயவோ ஹோதீதி. தஸ்மா ‘‘தம் படிக்கி²பதோ கிம் நிக்³க³ஹட்டா²னந்தி வத்தும் மா லப்³பே⁴தா²’’தி த³ஸ்ஸேதும் ‘‘அயஞ்சா’’திஆதி³ வுத்தம். ரூபாதி³த⁴ம்மப்பபே⁴த³விபா⁴க³முகே²னேவ அனவஸேஸதோ புக்³க³லோதி க³ஹணாகாரத³ஸ்ஸனவஸேன பவத்தோ பட²மவிகப்போ, து³தியோ பன அவிபா⁴க³தோ பரமத்த²ஸச்சபா⁴வஸாமஞ்ஞேனாதி அயம் இமேஸம் த்³வின்னம் விகப்பானம் விஸேஸோ. இதீதி வுத்தப்பகாரபராமஸனந்தி ஆஹ ‘‘ஏவ’’ந்தி.
ஸபா⁴வவினிப்³போ⁴க³தோதி ஸபா⁴வேன வினிப்³பு⁴ஜ்ஜிதப்³ப³தோ. ஸபா⁴வபி⁴ன்னோ ஹி த⁴ம்மோ தத³ஞ்ஞத⁴ம்மதோ வினிப்³போ⁴க³ம் லப⁴தி. தேனாஹ ‘‘ரூபதோ அஞ்ஞஸபா⁴க³த்தா’’தி. ரூபவஜ்ஜேதி ரூபத⁴ம்மவஜ்ஜே. தீஸுபீதி ‘‘ரூபஸ்மிம் புக்³க³லோ, அஞ்ஞத்ர ரூபா, புக்³க³லஸ்மிம் ரூப’’ந்தி இமேஸு ஏவம் பவத்தேஸு தீஸுபி அனுயோகே³ஸு. ஸாஸனிகோ ஏவாயம் புக்³க³லவாதீ³தி கத்வா ஆஹ ‘‘ந ஹி ஸோ ஸக்காயதி³ட்டி²ம் இச்ச²தீ’’தி. ‘‘ரூபவா’’தி இமினா ரூபேன ஸகிஞ்சனதாவ ஞாபீயதி, ந ரூபாயத்தவுத்திதாதி ஆஹ ‘‘அஞ்ஞத்ர ரூபாதி ஏத்த² ச ரூபவா புக்³க³லோதி அயமத்தோ² ஸங்க³ஹிதோ’’தி.
சதுக்கனயஸம்ஸந்த³னவண்ணனா நிட்டி²தா.
நிட்டி²தா ச ஸம்ஸந்த³னகதா²வண்ணனா.
8. லக்க²ணயுத்திவண்ணனா
54. லக்க²ணயுத்திகதா²யம் ‘‘ச²லவஸேன பன வத்தப்³ப³ம் ஆஜானாஹி நிக்³க³ஹ’’ந்தி பாடோ² க³ஹேதப்³போ³.
லக்க²ணயுத்திவண்ணனா நிட்டி²தா.
9. வசனஸோத⁴னவண்ணனா
55-59. பத³த்³வயஸ்ஸ அத்த²தோ ஏகத்தேதி பத³த்³வயஸ்ஸ ஏகத்தத்தே² ஸதீதி அத்தோ². பரிகப்பவசனஞ்ஹேதம் தோ³ஸத³ஸ்ஸனத்த²ம் ‘‘ஏவம் ஸந்தே அயம் தோ³ஸோ’’தி. தயித³ம் ஏகத்தம் உபலப்³ப⁴தி ஏவாதி பச்சி²மபதா³வதா⁴ரணம் வேதி³தப்³ப³ம். ‘‘கேஹிசி புக்³க³லோ கேஹிசி ந புக்³க³லோ’’தி ப்³யபி⁴சாரத³ஸ்ஸனதோ பரேன ந ஸம்படிச்சி²தந்தி கத்வா தமேவ அஸம்படிச்சி²தத்தம் விபா⁴வேந்தோ ‘‘புக்³க³லஸ்ஸ ஹீ’’திஆதி³மாஹ. தத்த² அவிப⁴ஜிதப்³ப³தந்தி ‘‘உபலப்³ப⁴தி சா’’தி ஏவம் அவிப⁴ஜிதப்³ப³தம். விப⁴ஜிதப்³ப³தந்தி ‘‘புக்³க³லோ ச தத³ஞ்ஞஞ்ச உபலப்³ப⁴தீ’’தி ஏவம் விப⁴ஜிதப்³ப³தம். ஏதேன ‘‘புக்³க³லோ உபலப்³ப⁴தி ஏவா’’தி பச்சி²மபதா³வதா⁴ரணம் வேதி³தப்³ப³ம், ந ‘‘புக்³க³லோ ஏவ உபலப்³ப⁴தீ’’தி இமமத்த²ம் த³ஸ்ஸேதி. தம் விபா⁴க³ந்தி யதா²வுத்தம் விப⁴ஜிதப்³பா³விப⁴ஜிதப்³ப³ம் விபா⁴க³ம் வத³தோ ஸகவாதி³னோ, அஞ்ஞஸ்ஸ வா கஸ்ஸசி. ஏதஸ்ஸாதி பரவாதி³னோ. யதா²வுத்தவிபா⁴க³ந்தி ‘‘புக்³க³லோ உபலப்³ப⁴தி…பே… கேஹிசி ந புக்³க³லோ’’தி ஏவம் பாளியம் வுத்தப்பகாரம் விபா⁴க³ம். யதா²ஆபாதி³தேனாதி ‘‘புக்³க³லோ உபலப்³ப⁴தீதி பத³த்³வயஸ்ஸ அத்த²தோ ஏகத்தே’’திஆதி³னா ஆபாதி³தப்பகாரேன. ந ப⁴விதப்³ப³ந்தி யதி³பி தேன புக்³க³லோ உபலப்³ப⁴தி ஏவ வுச்சதி, உபலப்³ப⁴தீதி பன புக்³க³லோ ஏவ ந வுச்சதி, அத² கோ² அஞ்ஞோபி, தஸ்மா யதா²வுத்தேன பஸங்கே³ன ந ப⁴விதப்³ப³ம். தேனாஹ ‘‘மக்³கி³தப்³போ³ ஏத்த² அதி⁴ப்பாயோ’’தி.
60. அத்த²தோ புக்³க³லோ நத்தீ²தி வுத்தம் ஹோதி அத்தஸுஞ்ஞதாத³ஸ்ஸனேன அனத்தலக்க²ணஸ்ஸ விஹிதத்தா.
வசனஸோத⁴னவண்ணனா நிட்டி²தா.
10. பஞ்ஞத்தானுயோக³வண்ணனா
61-66. ரூபகாயாவிரஹம் ஸந்தா⁴ய ஆஹ, ந ரூபதண்ஹாஸப்³பா⁴வம். ததா² ஸதி அனேகந்திகத்தா படிக்கி²பிதப்³ப³மேவ ஸியா, ந அனுஜானிதப்³ப³ந்தி. ‘‘அத்தி²தாயா’’தி ஆஹாதி ஸம்ப³ந்தோ⁴. காமீபா⁴வஸ்ஸ அனேகந்திகத்தா கஸ்ஸசி காமதா⁴தூபபன்னஸ்ஸ காமதா⁴துயா ஆயத்தத்தாபா⁴வதோ ச கதா³சி பா⁴வஸ்ஸேவாதி யோஜனா.
67. காயானுபஸ்ஸனாயாதி காயானுபஸ்ஸனாதே³ஸனாய. ஸா ஹி காயகாயானுபஸ்ஸீனம் விபா⁴க³க்³க³ஹணஸ்ஸ காரணபூ⁴தா, காயானுபஸ்ஸனா ஏவ வா. ஏவம்லத்³தி⁴கத்தாதி அஞ்ஞோ காயோ அஞ்ஞோ புக்³க³லோதி ஏவம்லத்³தி⁴கத்தா. ஆஹச்ச பா⁴ஸிதந்தி டா²னகரணானி ஆஹந்த்வா கதி²தம், ப⁴க³வதா ஸாமம் தே³ஸிதந்தி அத்தோ².
பஞ்ஞத்தானுயோக³வண்ணனா நிட்டி²தா.
11. க³திஅனுயோக³வண்ணனா
69-72. யானிஸ்ஸ ஸுத்தானி நிஸ்ஸாய லத்³தி⁴ உப்பன்னா, தேஸம் த³ஸ்ஸனதோ பரதோ ‘‘தேன ஹி புக்³க³லோ ஸந்தா⁴வதீ’’திஆதி³னா பாளி ஆக³தா, புரதோ பன ‘‘ந வத்தப்³ப³ம் புக்³க³லோ ஸந்தா⁴வதீ’’திஆதி³னா, தஸ்மா வுத்தம் ‘‘த³ஸ்ஸேந்தோ…பே… ப⁴விதப்³ப³’’ந்தி. த³ஸ்ஸேத்வாதி வா வத்தப்³ப³ந்தி ‘‘யானிஸ்ஸ…பே… தானி த³ஸ்ஸேத்வா ‘தேன ஹி புக்³க³லோ ஸந்தா⁴வதீ’திஆதி³மாஹா’’தி வத்தப்³ப³ந்தி அத்தோ². த³ஸ்ஸேந்தோதி வா இத³ம் த³ஸ்ஸனகிரியாய ந வத்தமானதாமத்தவசனம், அத² கோ² தஸ்ஸா லக்க²ணத்த²வசனம், ஹேதுபா⁴வவசனம் வாதி ந கோசி தோ³ஸோ.
91. ஸோ வத்தப்³போ³தி ஸோ ஜீவஸரீரானம் அனஞ்ஞதாபஜ்ஜனாகாரோ வத்தப்³போ³, நத்தீ²தி அதி⁴ப்பாயோ. ‘‘ரூபீ அத்தா’’தி இமிஸ்ஸா லத்³தி⁴யா வஸேன ‘‘யேன ரூபஸங்கா²தேன அத்தனோ ஸபா⁴வபூ⁴தேன ஸரீரேன ஸத்³தி⁴ம் க³ச்ச²தீ’’தி ஏவம் பன அத்தே² ஸதி ஸோ ஆகாரோ வுத்தோ ஏவ ஹோதி, ததா² ச ஸதி ‘‘ரூபம் புக்³க³லோதி அனனுஞ்ஞாதத்தா’’தி ஏவம்பி வத்தும் ந ஸக்கா. யஸ்மா பன ‘‘இத⁴ ஸரீரனிக்கே²பா’’தி அனந்தரம் வக்க²தி, தஸ்மா ‘‘ஸோ வத்தப்³போ³’’தி வுத்தம். நிரயூபக³ஸ்ஸ புக்³க³லஸ்ஸ அந்தராப⁴வம் ந இச்ச²தீதி இத³ம் புராதனானம் அந்தராப⁴வவாதீ³னம் வஸேன வுத்தம். அது⁴னாதனா பன ‘‘உத்³த⁴ம்பாதோ³ து நாரகோ’’தி வத³ந்தா தஸ்ஸபி அந்தராப⁴வம் இச்ச²ந்தேவ, கேசி பன அஸஞ்ஞூபகா³னம். அரூபூபகா³னம் பன ஸப்³பே³பி ந இச்ச²ந்தி. தத்த² யே ‘‘ஸஞ்ஞுப்பாதா³ ச பன தே தே³வா தம்ஹா காயா சவந்தீ’’தி ஸுத்தஸ்ஸ அத்த²ம் மிச்சா² க³ஹேத்வா சுதூபபாதகாலேஸு அஸஞ்ஞீனம் ஸஞ்ஞா அத்தீ²தி அந்தராப⁴வதோவ அஸஞ்ஞூபபத்திம் இச்ச²ந்தி, தத³ஞ்ஞேஸம் வஸேன ‘‘ஸவேத³னோ…பே… படிக்கி²பதீ’’தி த³ஸ்ஸேந்தோ ‘‘யே பனா’’திஆதி³மாஹ. கே பனேவம் இச்ச²ந்தி? ஸப்³ப³த்தி²வாதீ³ஸு ஏகச்சே.
92. நேவஸஞ்ஞானாஸஞ்ஞாயதனேதி நேவஸஞ்ஞானாஸஞ்ஞாயதனே ப⁴வே, அசித்துப்பாதே³ வா ஸஞ்ஞா அத்தீ²தி இச்ச²ந்தீதி ந வத்தப்³ப³ந்தி ஸம்ப³ந்தோ⁴. யதோ ஸோ ஸஞ்ஞாப⁴வேன அஸங்க³ஹிதோ, ப⁴வந்தரபா⁴வேன ச ஸங்க³ஹிதோ.
93. இந்த⁴னுபாதா³னோ அக்³கி³ விய இந்த⁴னேன ரூபாதி³உபாதா³னோ புக்³க³லோ ரூபாதி³னா வினா நத்தீ²தி ஏத்த² அயமதி⁴ப்பாயவிபா⁴வனா – யதா² ந வினா இந்த⁴னேன அக்³கி³ பஞ்ஞாபீயதி, ந ச தம் அஞ்ஞம் இந்த⁴னதோ ஸக்கா படிஜானிதும், நாபி அனஞ்ஞம். யதி³ ஹி அஞ்ஞம் ஸியா, ந உண்ஹம் இந்த⁴னம் ஸியா, அத² அனஞ்ஞம், நித³ஹிதப்³ப³ம்யேவ தா³ஹகம் ஸியா, ஏவம் ந வினா ரூபாதீ³ஹி புக்³க³லோ பஞ்ஞாபீயதி, ந ச தேஹி அஞ்ஞோ, நாபி அனஞ்ஞோ ஸஸ்ஸதுச்சே²த³பா⁴வப்பஸங்க³தோதி பரவாதி³னோ அதி⁴ப்பாயோ. தத்த² யதி³ அக்³கி³ந்த⁴னோபமா லோகவோஹாரேன வுத்தா, அபளித்தம் கட்டா²தி³இந்த⁴னம் நித³ஹிதப்³ப³ஞ்ச, பளித்தம் பா⁴ஸுருண்ஹம் அக்³கி³தா³ஹகஞ்ச, தஞ்ச ஓஜட்ட²மகரூபம் பப³ந்த⁴வஸேன பவத்தம் அனிச்சம் ஸங்க²தம் படிச்சஸமுப்பன்னம். யதி³ ஏவம் புக்³க³லோ ரூபாதீ³ஹி அஞ்ஞோ அனிச்சோ ச ஆபன்னோ, அத² பரமத்த²தோ ச, தஸ்மிம்யேவ கட்டா²தி³ஸஞ்ஞிதே ரூபஸங்கா²தபளித்தே யம் உஸுமம் ஸோ அக்³கி³ தம்ஸஹஜாதானி தீணிபூ⁴தானி இந்த⁴னம். ஏவம்பி ஸித்³த⁴ம் லக்க²ணபே⁴த³தோ அக்³கி³ந்த⁴னானம் அஞ்ஞத்தந்தி அக்³கி³ விய இந்த⁴னதோ ரூபாதீ³ஹி அஞ்ஞோ புக்³க³லோ அனிச்சோ ச ஆபஜ்ஜதீதி.
க³திஅனுயோக³வண்ணனா நிட்டி²தா.
12. உபாதா³பஞ்ஞத்தானுயோக³வண்ணனா
97. நீலகு³ணயோக³தோ நீலோ, நீலோ ஏவ நீலகோ, தஸ்ஸ, அயம் பனஸ்ஸ நீலபஞ்ஞத்தி நீலரூபுபாதா³னாதி ஆஹ ‘‘நீலம்…பே… பஞ்ஞத்தீ’’தி. ஏவம் பன பாடே² டி²தே நீலம் உபாதா³ய நீலோதி கத²மயம் பது³த்³தா⁴ரோதி ஆஹ ‘‘நீலம் ரூபம்…பே… ஏத்த² யோ புட்டோ² நீலம் உபாதா³ய நீலோ’’தி. ஏத்தா²தி ஏதஸ்மிம் வசனே. ததா³தீ³ஸூதி ‘‘பீதம் ரூபம் உபாதா³யா’’திஆதி³கம் அட்ட²கதா²யம் ஆதி³-ஸத்³தே³ன க³ஹிதமேவ தத³த்த²த³ஸ்ஸனவஸேன க³ண்ஹாதி.
98. வுத்தந்தி ‘‘மக்³க³குஸலோ’’திஆதீ³ஸு சே²கட்ட²ம் ஸந்தா⁴ய வுத்தம். குஸலபஞ்ஞத்திம் குஸலவோஹாரம்.
112. புப்³ப³பக்க²ம் த³ஸ்ஸேத்வா உத்தரமாஹாதி பரவாதீ³ புப்³ப³பக்க²ம் த³ஸ்ஸேத்வா ஸகவாதி³ஸ்ஸ உத்தரமாஹ.
115. ‘‘ரூபம் ரூபவா’’திஆதி³னயப்பவத்தம் பரவாதி³வாத³ம் பி⁴ந்தி³தும் ‘‘யதா² ந நிக³ளோ நேக³ளிகோ’’திஆதி³னா ஸகவாதி³வாதோ³ ஆரத்³தோ⁴தி ஆஹ ‘‘யஸ்ஸ ரூபம் ஸோ ரூபவாதி உத்தரபக்கே² வுத்தம் வசனம் உத்³த⁴ரித்வா’’தி.
118. விஞ்ஞாணனிஸ்ஸயபா⁴வூபக³மனந்தி சக்கு²விஞ்ஞாணஸ்ஸ நிஸ்ஸயபா⁴வூபக³மனம். தயித³ம் விஸேஸனம் சக்கு²ஸ்ஸாதி இமினாவ ஸித்³த⁴ந்தி ந கதம் த³ட்ட²ப்³ப³ம்.
உபாதா³பஞ்ஞத்தானுயோக³வண்ணனா நிட்டி²தா.
13. புரிஸகாரானுயோக³வண்ணனா
123. கம்மானந்தி குஸலாகுஸலகம்மானம். தக்³க³ஹணேனேவ ஹி தம்தம்கிச்சகரணீயே கிரியானம்பி ஸங்க³ஹோ த³ட்ட²ப்³போ³. நிப்பா²த³கப்பயோஜகபா⁴வேனாதி காரககாராபகபா⁴வேன.
125. கம்மகாரகஸ்ஸ புக்³க³லஸ்ஸ யோ அஞ்ஞோ புக்³க³லோ காரகோ. தேனபீதி காரககாரகேனபி. தஸ்ஸாதி காரககாரகஸ்ஸ. அஞ்ஞந்தி அஞ்ஞம் கம்மம். ஏவந்தி இமினா வுத்தப்பகாரேன. தேஹி தேஹி காரகேஹி புக்³க³லா விய அஞ்ஞானி கம்மானி கரீயந்தீதி த³ஸ்ஸேதி. தேனாஹ ‘‘கம்மவட்டஸ்ஸ அனுபச்சே²த³ம் வத³ந்தீ’’தி. ஏவம் ஸந்தே புக்³க³லஸ்ஸ காரகோ, கம்மஸ்ஸ காரகோதி அயம் விபா⁴கோ³ இத⁴ அனாமட்டோ² ஹோதி, ததா² ச ஸதி காரகபரம்பராய வசனம் விருஜ்ஜே²ய்யாதி ஆஹ ‘‘புக்³க³லஸ்ஸ…பே… விசாரேதப்³ப³மேத’’ந்தி. தஸ்ஸ காரகந்தி புக்³க³லஸ்ஸ காரகம். இத³ஞ்சாதி ந கேவலம் புக்³க³லகாரகஸ்ஸ கம்மகாரகதாபத்தியேவ தோ³ஸோ, அத² கோ² இத³ம் கம்மகாரகதாய காரகபரம்பராபஜ்ஜனம்பி விசாரேதப்³ப³ம், ந யுஜ்ஜதீதி அத்தோ². புக்³க³லானஞ்ஹி படிபாடியா காரகபா⁴வோ காரகபரம்பரா.
170. ஏகோ அந்தோதி ‘‘கா³ஹோ’’தி ஸஸ்ஸதகா³ஹஸங்கா²தோ அந்தோதி அத்தோ².
176. ஸியா அஞ்ஞோ, ஸியா அனஞ்ஞோ, ஸியா ந வத்தப்³போ³ ‘‘அஞ்ஞோதி வா அனஞ்ஞோதி வா’’தி, ஏவம் பவத்தனிக³ண்ட²வாத³ஸதி³ஸத்தா ஸோ ஏவ ஏகோ நேவ ஸோ ஹோதி, ந அஞ்ஞோதி லத்³தி⁴மத்தம். தேனாஹ ‘‘இத³ம் பன நத்தே²வா’’தி. பரஸ்ஸ இச்சா²வஸேனேவாதி பரவாதி³னோ லத்³தி⁴வஸேனேவ. ஏகம் அனிச்ச²ந்தஸ்ஸாதி ஏகம் ‘‘ஸோ கரோதி, ஸோ படிஸம்வேதே³தீ’’தி க³ஹணம் ஸஸ்ஸததி³ட்டி²ப⁴யேன படிக்கி²பந்தஸ்ஸ இதரம் உச்சே²த³க்³க³ஹணம் ஆபன்னம். தஞ்ச படிக்கி²பந்தஸ்ஸ அஞ்ஞம் மிஸ்ஸகம் நிச்சானிச்சக்³க³ஹணம், விக்கே²பக்³க³ஹணஞ்ச ஆபன்னம். காரகவேத³கிச்சா²ய ட²த்வாதி ஸ்வேவ காரகோ வேத³கோ சாதி இமஸ்மிம் ஆதா³யே ட²த்வா. தம்தம்அனிச்சா²யாதி தஸ்ஸ தஸ்ஸ வாத³ஸ்ஸ அஸம்படிச்ச²னேன. ஆபன்னவஸேனபீதி ஆபன்னகா³ஹவஸேனபி அயம் அனுயோகோ³ வுத்தோதி யோஜனா. ஸப்³பே³ஸம் ஆபன்னத்தாதி ஹேட்டா² வுத்தனயேன ஸப்³பே³ஸம் விகப்பானம் அனுக்கமேன ஆபன்னத்தா நாயமனுயோகோ³ கதோதி யோஜனா. ஏகேகஸ்ஸேவாதி தேஸு விஸும் விஸும் ஏகேகஸ்ஸேவ ஆபன்னத்தா. தந்திவஸேன பன தே விகப்பா ஏகஜ்ஜ²ம் த³ஸ்ஸேத்வாதி அதி⁴ப்பாயோ. ஏகதோ யோஜேதப்³ப³ம் சதுன்னம்பி பஞ்ஹானம் ஏகதோ புட்ட²த்தா.
புரிஸகாரானுயோக³வண்ணனா நிட்டி²தா.
கல்யாணவக்³கோ³ நிட்டி²தோ.
14. அபி⁴ஞ்ஞானுயோக³வண்ணனா
193. விகுப்³ப³தீதி ஏத்த² இதி-ஸத்³தோ³ ஆதி³அத்தோ², பகாரத்தோ² வா. தேன ‘‘தி³ப்³பா³ய ஸோததா⁴துயா ஸத்³த³ம் ஸுணாதீ’’திஆதி³கம் ஸங்க³ண்ஹாதி. அபி⁴ஞ்ஞானுயோகோ³ த³ட்ட²ப்³போ³தி யோஜனா. தத³பி⁴ஞ்ஞாவதோதி ஆஸவக்க²யாபி⁴ஞ்ஞாவதோ. அரஹதோ ஸாத⁴னந்தி அரஹதோ ஸச்சிகட்ட²பரமத்தே²ன புக்³க³லத்தாபா⁴வஸாத⁴னம். தப்³பா⁴வஸ்ஸாதி அரஹத்தஸ்ஸ. அரஹத்ததா⁴ரானஞ்ஹி க²ந்தா⁴ நாம புக்³க³லத்தம் தஸ்ஸபி ஹோதீதி.
அபி⁴ஞ்ஞானுயோக³வண்ணனா நிட்டி²தா.
15-18. ஞாதகானுயோகா³தி³வண்ணனா
209. ததியகோடிபூ⁴தஸ்ஸாதி ததியகோடிஸபா⁴வஸ்ஸ ஸங்க²தாஸங்க²தவினிமுத்தஸபா⁴வஸ்ஸ. ஸபா⁴வஸ்ஸாதி ச ஸபா⁴வத⁴ம்மஸ்ஸ. லத்³தி⁴ம் நிகூ³ஹித்வாதி புக்³க³லோ நேவ ஸங்க²தோ, நாஸங்க²தோதி லத்³தி⁴ம் அவிபா⁴வேத்வா.
ஞாதகானுயோகா³தி³வண்ணனா நிட்டி²தா.
19. படிவேதா⁴னுயோகா³தி³வண்ணனா
218. பஜானனம் நாம ந ஹோதி நிப்³பி³தா³தீ³னம் அப்பச்சயத்தா. பரிச்சே²த³னஸமத்த²தஞ்ச த³ஸ்ஸேதீதி ஸம்ப³ந்தோ⁴.
228. ஸஹரூபபா⁴வோ ரூபேன ஸமங்கி³தா, வினாரூபபா⁴வோ ததோ வினிஸ்ஸடதாதி தது³ப⁴யம் ரூபஸ்ஸ அப்³ப⁴ந்தரக³மனம் ப³ஹினிக்க²மனஞ்ச ஹோதி. தஸ்மா தம் த்³வயம் ஸஹரூபபா⁴வவினாரூபபா⁴வானம் லக்க²ணவசனந்தி வுத்தம்.
237. ஓளாரிகோதி தூ²லோ. ஆஹிதோ அஹம் மானோ ஏத்தா²தி அத்தா, அத்தபா⁴வோ. ஸோ ஏவ யதா²ஸகம் கம்முனா படிலபி⁴தப்³ப³தோ படிலாபோ⁴. பத³த்³வயேனபி காமாவசரத்தபா⁴வோ கதி²தோ. மனோமயோ அத்தபடிலாபோ⁴ ரூபாவசரத்தபா⁴வோ. ஸோ ஹி ஜா²னமனேன நிப்³ப³த்தத்தா மனோமயோ. அரூபோ அத்தபடிலாபோ⁴தி அரூபாவசரத்தபா⁴வோ. ஸோ ஹி ரூபேன அமிஸ்ஸிதத்தா அரூபோதி ஏவமேத்த² அத்தோ² வேதி³தப்³போ³. ‘‘அத்தா’’தி பன ஜீவே லோகவோஹாரோ நிருள்ஹோ, அஸதிபி ஜீவே ததா²னிருள்ஹம் லோகவோஹாரம் க³ஹேத்வா ஸம்மாஸம்பு³த்³தா⁴பி வோஹரந்தீதி த³ஸ்ஸேந்தோ ‘‘இதி இமா லோகஸ்ஸ ஸமஞ்ஞா, யாஹி ததா²க³தோ வோஹரதீ’’தி வத்வா இதா³னி யதா² வோஹரந்தி, தம் பகாரம் விபா⁴வேந்தோ ‘‘அபராமஸ’’ந்திஆதி³மாஹ.
பச்சத்தஸாமஞ்ஞலக்க²ணவஸேனாதி கக்க²ளபு²ஸனாதி³ஸலக்க²ணவஸேன அனிச்சதாதி³ஸாமஞ்ஞலக்க²ணவஸேன ச. இமினாதி ‘‘பச்சத்தஸாமஞ்ஞலக்க²ணவஸேனா’’திஆதி³னா வுத்தேன பரமத்த²தோ புக்³க³லாபா⁴வவசனேன. இதோ புரிமாதி தத்த² தத்த² ஸகவாதி³படிக்கே²பாதி³விபா⁴வனவஸேன பவத்தா இதோ அத்த²ஸம்வண்ணனதோ புரிமா. இமினாதி வா ‘‘யதா² ரூபாத³யோ த⁴ம்மா’’திஆதி³னா அட்ட²கதா²யம் வுத்தவசனேன. யதா² சாதி ஏத்த² ச-ஸத்³தோ³ ஸமுச்சயத்தோ². தேன ஸமஞ்ஞானதிதா⁴வனம் ஸம்பிண்டே³தி. இத³ம் வுத்தம் ஹோதி – யதா² பராமாஸோ ச ந ஹோதி ஜனபத³னிருத்தியா அபி⁴னிவிஸிதப்³ப³தோ, யதா² ச ஸமஞ்ஞாதிதா⁴வனம் ந ஹோதி, ஏவம் இதோ புரிமா ச அத்த²வண்ணனா யோஜேதப்³பா³. ஸமஞ்ஞாதிதா⁴வனே ஹி ஸதி ஸப்³ப³லோகவோஹாரூபச்சே²தோ³ ஸியாதி.
தஸ்மா ஸச்சந்தி யஸ்மா தத்த² பரமத்தா²காரம் அனாரோபேத்வா ஸமஞ்ஞம் நாதிதா⁴வந்தோ கேவலம் லோகஸம்முதியாவ வோஹரதி, தஸ்மா ஸச்சம் பரேஸம் அவிஸம்வாத³னதோ. தத²காரணந்தி ததோ² அவிததோ² த⁴ம்மஸபா⁴வோ காரணம் பவத்திஹேது ஏதஸ்ஸாதி தத²காரணம், பரமத்த²வசனம், அவிபரீதத⁴ம்மஸபா⁴வவிஸயந்தி அத்தோ². தேனாஹ ‘‘த⁴ம்மானம் தத²தாய பவத்த’’ந்தி.
படிவேதா⁴னுயோகா³தி³வண்ணனா நிட்டி²தா.
புக்³க³லகதா²வண்ணனா நிட்டி²தா.
2. பரிஹானிகதா²
1. வாத³யுத்திபரிஹானிகதா²வண்ணனா
239. இத³ம் ஸுத்தந்தி இத³ம் லக்க²ணமத்தம் த³ட்ட²ப்³ப³ம். ‘‘பஞ்சிமே, பி⁴க்க²வே, த⁴ம்மா ஸமயவிமுத்தஸ்ஸ பி⁴க்கு²னோ பரிஹானாய ஸம்வத்தந்தீ’’தி (அ. நி. 5.149-150) இத³ம்பி ஹி ஸுத்தம் அனாகா³மிஆதீ³னம்யேவ பரிஹானினிஸ்ஸயோ, ந அரஹதோ. ஸமயவிமுத்தோதி அட்ட²ஸமாபத்திலாபி⁴னோ ஸேக்க²ஸ்ஸேதம் நாமம். யதா²ஹ –
‘‘கதமோ ச புக்³க³லோ ஸமயவிமுத்தோ? இதே⁴கச்சோ புக்³க³லோ காலேன காலம் ஸமயேன ஸமயம் அட்ட² விமோக்கே² காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹோந்தி. அயம் வுச்சதி புக்³க³லோ ஸமயவிமுத்தோ’’தி (பு. ப. 1).
‘‘பரிஹானித⁴ம்மோ’’தி ச புது²ஜ்ஜனோ ச ஏகச்சோ ச ஸேக்கோ² அதி⁴ப்பேதோ, ந அரஹாதி. தஸ்மாதி யஸ்மா யதா²த³ஸ்ஸிதானி ஸுத்தானி அனாகா³மிஆதீ³னம் பரிஹானிலத்³தி⁴யா நிஸ்ஸயோ, ந அரஹதோ, தஸ்மா. தம் நிஸ்ஸாய தம் அபேக்கி²த்வா யஸ்மா ‘‘அரஹதோபீ’’தி ஏத்த² அரஹதோபி பரிஹானி, கோ பன வாதோ³ அனாகா³மிஆதீ³னந்தி அயமத்தோ² லப்³ப⁴தி, தஸ்மா பி-ஸத்³த³ஸம்பிண்டி³தமத்த²ம் த³ஸ்ஸேந்தோ ‘‘அரஹதோபி…பே… யோஜேதப்³ப³’’ந்தி ஆஹ. யஸ்மா வா காமஞ்சேத்த² து³தியஸுத்தம் ஸேக்க²வஸேன ஆக³தம், பட²மததியஸுத்தானி பன அஸேக்க²வஸேனபி ஆக³தானீதி தேஸம் லத்³தி⁴, தஸ்மா ‘‘அரஹதோபீ’’தி அட்ட²கதா²யம் வுத்தம். தேனாஹ ‘‘இத³ம் ஸுத்தம் அரஹதோ’’திஆதி³.
ததியஸ்மிந்தி ‘‘ஸப்³பே³ஸஞ்ஞேவ அரஹந்தானம் பரிஹானீ’’தி ஏதஸ்மிம் பஞ்ஹே. ஸோ ஹி ‘‘ஸப்³பே³வ அரஹந்தோ’’திஆதி³னா ஆக³தேஸு ததியோ பஞ்ஹோ. தேஸந்தி முதி³ந்த்³ரியானம். ததியஸ்மிம்பீதி பி-ஸத்³தோ³ வுத்தத்த²ஸமுச்சயோ. தேன பட²மபஞ்ஹம் ஸமுச்சினோதி ‘‘தத்த²பி திக்கி²ந்த்³ரியா அதி⁴ப்பேதா’’தி.
ஸோயேவ ந பரிஹாயதீதி ஸோதாபன்னோயேவ ஸோதாபன்னபா⁴வதோ ந பரிஹாயதீதி அத்தோ². ந சேத்த² ஸகதா³கா³மிபா⁴வாபத்தியா ஸோதாபன்னபா⁴வாபக³மோ பரிஹானி ஹோதி விஸேஸாதி⁴க³மபா⁴வதோ. பத்தவிஸேஸதோ ஹி பரிஹானீதி. இதரேதி ஸகதா³கா³மிஆதி³கா. உபரிமக்³க³த்தா²யாதி உபரிமக்³க³த்தயபடிலாப⁴த்தா²ய ‘‘நியதோ’’தி வுத்தமத்த²ம் அக்³க³ஹேத்வா.
வாத³யுத்திபரிஹானிகதா²வண்ணனா நிட்டி²தா.
2. அரியபுக்³க³லஸம்ஸந்த³னபரிஹானிகதா²வண்ணனா
241. ததோதி அரஹத்ததோ. தத்தா²தி த³ஸ்ஸனமக்³க³ப²லே. வாயாமேனாதி விபஸ்ஸனுஸ்ஸாஹனேன. தத³னந்தரந்தி ஸோதாபத்திப²லானந்தரம். பட²மம் த³ஸ்ஸனமக்³க³ப²லானந்தரம் அரஹத்தம் பாபுணாதி, ததோ பரிஹீனோ புன வாயமந்தோ தத³னந்தரம் ந அரஹத்தம் பாபுணாதீதி கா ஏத்த² யுத்தீதி அதி⁴ப்பாயோ. பரவாதீ³ நாம யுத்தம்பி வத³தி அயுத்தம்பீதி கிம் தஸ்ஸ வாதே³ யுத்திக³வேஸனாயாதி பன த³ட்ட²ப்³ப³ம். அபரிஹானஸபா⁴வோ பா⁴வனாமக்³கோ³ அரியமக்³க³த்தா த³ஸ்ஸனாத³ஸ்ஸனமக்³கோ³ விய. ந சேத்த² அஸித்³த⁴தாஸங்கா லோகுத்தரமக்³க³ஸ்ஸ பரஸ்ஸபி அரியமக்³க³பா⁴வஸ்ஸ ஸித்³த⁴த்தா, நாபி லோகியமக்³கே³ன அனேகந்திகதா அரியஸத்³தே³ன விஸேஸிதத்தா. ததா² ந விருத்³த⁴தா து³தியமக்³கா³தீ³னம் பா⁴வனாமக்³க³பா⁴வஸ்ஸ ஓளாரிககிலேஸப்பஹானாதீ³னஞ்ச பரஸ்ஸபி ஆக³மதோ ஸித்³த⁴த்தா.
அரியபுக்³க³லஸம்ஸந்த³னபரிஹானிகதா²வண்ணனா நிட்டி²தா.
3. ஸுத்தஸாத⁴னபரிஹானிகதா²வண்ணனா
265. புக்³க³லபஞ்ஞத்திஅட்ட²கதா²யம் ‘‘பத்தி, பு²ஸனா’’தி ச பச்சக்க²தோ அதி⁴க³மோ அதி⁴ப்பேதோதி வுத்தம் ‘‘பத்தப்³ப³ம் வத³தீதி ஆஹ பு²ஸனாரஹ’’ந்தி.
267. கதஸன்னிட்டா²னஸ்ஸாதி இமஸ்மிம் ஸத்தாஹே மாஸே உதும்ஹி அந்தோவஸ்ஸே வா அஞ்ஞம் ஆராதே⁴ஸ்ஸாமீதி கதனிச்ச²யஸ்ஸ.
ஸுத்தஸாத⁴னபரிஹானிகதா²வண்ணனா நிட்டி²தா.
பரிஹானிகதா²வண்ணனா நிட்டி²தா.
3. ப்³ரஹ்மசரியகதா²
1. ஸுத்³த⁴ப்³ரஹ்மசரியகதா²வண்ணனா
269. ஹேட்டா²பீதி பரனிம்மிதவஸவத்திதே³வேஹி ஹேட்டா²பி. மக்³க³பா⁴வனம்பி ந இச்ச²ந்தீதி விஞ்ஞாயதி ‘‘இத⁴ ப்³ரஹ்மசரியவாஸோ’’தி இமினா ‘‘த்³வேபி ப்³ரஹ்மசரியவாஸா நத்தி² தே³வேஸூதி உபலத்³தி⁴வஸேனா’’தி வுத்தத்தா.
270. தஸ்ஸேவாதி பரவாதி³னோ ஏவ. புக்³க³லவஸேனாதி ‘‘கி³ஹீனஞ்சேவ ஏகச்சானஞ்ச தே³வான’’ந்தி ஏவம் புக்³க³லவஸேன. தஸ்ஸாதி பரவாதி³னோ. படிக்கே²போ ந யுத்தோதி ஏவம் புக்³க³லவஸேன அத்த²யோஜனா ந யுத்தாதி அதி⁴ப்பாயோ. புக்³க³லாதி⁴ட்டா²னேன பன கதாபி அத்த²வண்ணனா ஓகாஸவஸேன பரிச்சி²ஜ்ஜதீதி நாயம் தோ³ஸோ. தஸ்ஸாயம் அதி⁴ப்பாயோதி அயம் ‘‘கி³ஹீனஞ்சேவா’’திஆதி³னா வுத்தோ தஸ்ஸ பரவாதி³னோ யதி³ அதி⁴ப்பாயோ, ஏவம் ஸஞ்ஞாய பரவாதி³னோ ஸகவாதி³னா ஸமானாதா³யோதி ந நிக்³க³ஹாரஹோ ஸியா. தேனாஹ ‘‘ஸக…பே… தப்³போ³’’தி. பட²மம் பன அனுஜானித்வா பச்சா² படிக்கே²பேனேவ நிக்³க³ஹேதப்³ப³தா வேதி³தப்³பா³. கேசி ‘‘யத்த² நத்தி² பப்³ப³ஜ்ஜா, நத்தி² தத்த² ப்³ரஹ்மசரியவாஸோதி புச்சா²ய ஏகச்சானம் மனுஸ்ஸானம் மக்³க³ப்படிவேத⁴ம் ஸந்தா⁴ய பரவாதி³னோ படிக்கே²போ. யதி³பி ஸோ தே³வானம் மக்³க³ப்படிலாப⁴ம் ந இச்ச²தி, ஸம்ப⁴வந்தம் பன ஸப்³ப³ம் த³ஸ்ஸேதும் அட்ட²கதா²யம் ‘கி³ஹீன’மிச்சேவ அவத்வா ‘ஏகச்சானஞ்ச தே³வான’ந்தி வுத்த’’ந்தி வத³ந்தி, தம் ந ஸுந்த³ரம் ‘‘ஸந்தா⁴யா’’தி வுத்தத்தா, புரிமோயேவத்தோ² யுத்தோ.
ஸுத்³த⁴ப்³ரஹ்மசரியகதா²வண்ணனா நிட்டி²தா.
2. ஸம்ஸந்த³னப்³ரஹ்மசரியகதா²வண்ணனா
273. ரூபாவசரமக்³கே³னாதி ரூபாவசரஜ்ஜா²னேன. தஞ்ஹி ரூபப⁴வூபபத்தியா உபாயபா⁴வதோ மக்³கோ³தி வுத்தோ. யதா²ஹ ‘‘ரூபுபபத்தியா மக்³க³ம் பா⁴வேதீ’’தி (த⁴. ஸ. 160). இத³ந்தி இத³ம் ரூபாவசரஜ்ஜா²னம். ‘‘இத⁴விஹாயனிட்ட²ஹேதுபூ⁴தோ ரூபாவசரமக்³கோ³’’திஆதி³கம் தீ³பேந்தம் வசனம் அனாகா³மிமக்³க³ஸ்ஸ தப்³பா⁴வதீ³பகேன ‘‘இத⁴ பா⁴விதமக்³கோ³’’திஆதி³கேன கத²ம் ஸமேதீதி சோதே³த்வா யதா² ஸமேதி, தம் த³ஸ்ஸேதும் ‘‘புப்³பே³ பனா’’திஆதி³ வுத்தம். தத்த² ‘‘புப்³பே³’’தி இமினா ‘‘இத⁴ பா⁴விதமக்³கோ³’’திஆதி³கம் வத³ந்தி, இதா⁴பி பன ‘‘ரூபாவசரமக்³கே³னா’’திஆதி³கம். தத்த² அனாகா³மீ ஏவாதி அனாகா³மிப²லட்டோ² ஏவ. ஜா²னானாகா³மீதி அஸமுச்சி²ன்னஜ்ஜ²த்தஸம்யோஜனோபி ரூபப⁴வே உப்பஜ்ஜித்வா அனாவத்தித⁴ம்மமக்³க³ம் பா⁴வேத்வா தத்தே²வ பரினிப்³பா³யனதோ. அதி⁴ப்பாயோதி யதா²வுத்தோ த்³வின்னம் அட்ட²கதா²வசனானம் அவிரோத⁴தீ³பகோ அதி⁴ப்பாயோ.
இதா⁴தி காமலோகே. தத்தா²தி ப்³ரஹ்மலோகே. ஏத்த² ச பரவாதீ³ ஏவம் புச்சி²தப்³போ³ ‘‘தீஹி, பி⁴க்க²வே, டா²னேஹீ’’தி ஸுத்தம் கிம் யதா²ருதவஸேன க³ஹேதப்³ப³த்த²ம், உதா³ஹு ஸந்தா⁴யபா⁴ஸிதந்தி? தத்த² ஜானமானோ ஸந்தா⁴யபா⁴ஸிதந்தி வதே³ய்ய. அஞ்ஞதா² ‘‘பரனிம்மிதவஸவத்திதே³வே உபாதா³யா’’திஆதி³ வத்தும் ந ஸக்கா ‘‘தே³வே ச தாவதிம்ஸே’’தி வுத்தத்தா. யதா² ஹி தஸ்ஸ ‘‘ஸேய்யதா²பி தே³வேஹி தாவதிம்ஸேஹி ஸத்³தி⁴ம் மந்தேத்வா’’திஆதீ³ஸு விய ஸக்கம் தே³வராஜானம் உபாதா³ய காமாவசரதே³வேஸு தாவதிம்ஸதே³வா பாகடா பஞ்ஞாதாதி தேஸம் க³ஹணம், ந தேயேவ அதி⁴ப்பேதாதி ஸுத்தபத³ஸ்ஸ ஸந்தா⁴யபா⁴ஸிதத்த²ம் ஸம்படிச்சி²தப்³ப³ம், ஏவம் ‘‘இத⁴ ப்³ரஹ்மசரியவாஸோ’’தி ஏத்தா²பி அனவஜ்ஜஸுக²அப்³யாஸேகஸுக²னேக்க²ம்மஸுகா²தி³ஸன்னிஸ்ஸயபா⁴வேன மஹானிஸம்ஸதாய ஸாஸனே பப்³ப³ஜ்ஜா ‘‘இத⁴ ப்³ரஹ்மசரியவாஸோ’’தி இமஸ்மிம் ஸுத்தே அதி⁴ப்பேதா. ஸா ஹி உத்தரகுருகானம் தே³வானஞ்ச அனோகாஸபா⁴வதோ து³க்கரா து³ல்லபா⁴ ச. தத்த² ஸூரியபரிவத்தாதீ³ஹிபி தே³வேஸு மக்³க³படிலாபா⁴ய அத்தி²தா விபா⁴வேதப்³பா³, உத்தரகுருகானம் பன விஸேஸானதி⁴க³மபா⁴வோ உபி⁴ன்னம்பி இச்சி²தோ ஏவாதி.
ஸம்ஸந்த³னப்³ரஹ்மசரியகதா²வண்ணனா நிட்டி²தா.
ப்³ரஹ்மசரியகதா²வண்ணனா நிட்டி²தா.
3. ஓதி⁴ஸோகதா²வண்ணனா
274. ஓதி⁴ஸோதி பா⁴க³ஸோ, பா⁴கே³னாதி அத்தோ². பா⁴கோ³ நாம யஸ்மா ஏகதே³ஸோ ஹோதி, தஸ்மா ‘‘ஏகதே³ஸேன ஏகதே³ஸேனா’’தி வுத்தம். தத்த² யதி³ சதுன்னம் மக்³கா³னம் வஸேன ஸமுத³யபக்கி²கஸ்ஸ கிலேஸக³ணஸ்ஸ சதுபா⁴கே³ஹி பஹானம் ‘‘ஓதி⁴ஸோ பஹான’’ந்தி அதி⁴ப்பேதம், இச்சி²தமேவேதம் ஸகவாதி³ஸ்ஸ ‘‘திண்ணம் ஸம்யோஜனானம் பரிக்க²யா தி³ட்டி²க³தானம் பஹானாயா’’தி ச ஆதி³வசனதோ. யஸ்மா பன மக்³கோ³ சதூஸு ஸச்சேஸு நானாபி⁴ஸமயவஸேன கிச்சகரோ, ந ஏகாபி⁴ஸமயவஸேனாதி பரவாதி³னோ லத்³தி⁴, தஸ்மா யதா² ‘‘மக்³கோ³ காலேன து³க்க²ம் பரிஜானாதி, காலேன ஸமுத³யம் பஜஹதீ’’திஆதி³னா நானக்க²ணவஸேன ஸச்சேஸு பவத்ததீதி இச்சி²தோ, ஏவம் பச்சேகம்பி நானக்க²ணவஸேன பவத்தேய்ய. ததா² ஸதி து³க்கா²தீ³னம் ஏகதே³ஸஏகதே³ஸமேவ பரிஜானாதி பஜஹதீதி த³ஸ்ஸேதும் பாளியம் ‘‘ஸோதாபத்தி…பே… ஏகதே³ஸே பஜஹதீ’’திஆதி³ வுத்தம். ஸதி ஹி நானாபி⁴ஸமயே பட²மமக்³கா³தீ³ஹி பஹாதப்³பா³னம் ஸம்யோஜனத்தயாதீ³னம் து³க்க²த³ஸ்ஸனாதீ³ஹி ஏகதே³ஸஏகதே³ஸப்பஹானம் ஸியாதி ஏகதே³ஸஸோதாபத்திமக்³க³ட்டா²தி³தா, ததோ ஏவ ஏகதே³ஸஸோதாபன்னாதி³தா ச ஆபஜ்ஜதி அனந்தரப²லத்தா லோகுத்தரகுஸலானம், ந ச தம் யுத்தம். ந ஹி காலபே⁴தே³ன வினா ஸோ ஏவ ஸோதாபன்னோ, அஸோதாபன்னோ சாதி ஸக்கா விஞ்ஞாதும். தேனாஹ ‘‘ஏகதே³ஸம் ஸோதாபன்னோ, ஏகதே³ஸம் ந ஸோதாபன்னோ’’திஆதி³.
அபிசாயம் நானாபி⁴ஸமயவாதீ³ ஏவம் புச்சி²தப்³போ³ ‘‘மக்³க³ஞாணம் ஸச்சானி படிவிஜ்ஜ²ந்தம் கிம் ஆரம்மணதோ படிவிஜ்ஜ²தி, உதா³ஹு கிச்சதோ’’தி. யதி³ ஆரம்மணதோதி வதே³ய்ய, தஸ்ஸ விபஸ்ஸனாஞாணஸ்ஸ விய து³க்க²ஸமுத³யானம் அச்சந்தபரிச்சே²த³ஸமுச்சே²தா³ ந யுத்தா ததோ அனிஸ்ஸடத்தா, ததா² மக்³க³த³ஸ்ஸனம். ந ஹி ஸயமேவ அத்தானம் ஆரப்³ப⁴ பவத்ததீதி யுத்தம், மக்³க³ந்தரபரிகப்பனாயம் அனவட்டா²னம் ஆபஜ்ஜதீதி, தஸ்மா தீணி ஸச்சானி கிச்சதோ, நிரோத⁴ம் கிச்சதோ ஆரம்மணதோ ச படிவிஜ்ஜ²தீதி ஏவமஸம்மோஹதோ படிவிஜ்ஜ²ந்தஸ்ஸ மக்³க³ஞாணஸ்ஸ நத்தே²வ நானாபி⁴ஸமயோ. வுத்தஞ்ஹேதம் ‘‘யோ, பி⁴க்க²வே, து³க்க²ம் பஸ்ஸதி, து³க்க²ஸமுத³யம்பி ஸோ பஸ்ஸதீ’’திஆதி³. ந சேதம் காலந்தரத³ஸ்ஸனம் ஸந்தா⁴ய வுத்தம். ‘‘யோ நு கோ², ஆவுஸோ, து³க்க²ம் பஸ்ஸதி, து³க்க²ஸமுத³யம்பி ஸோ பஸ்ஸதி, து³க்க²னிரோத⁴ம்பி…பே… து³க்க²னிரோத⁴கா³மினிபடிபத³ம்பி ஸோ பஸ்ஸதீ’’தி (ஸம். நி. 5.1100) ஏகஸச்சத³ஸ்ஸனஸமங்கி³னோ அஞ்ஞஸச்சத³ஸ்ஸனஸமங்கி³பா⁴வவிசாரணாயம் தத³த்த²ஸாத⁴னத்த²ம் ஆயஸ்மதா க³வம்பதித்தே²ரேன ஆப⁴தத்தா பச்சேகஞ்ச ஸச்சத்தயத³ஸ்ஸனஸ்ஸ யோஜிதத்தா. அஞ்ஞதா² புரிமதி³ட்ட²ஸ்ஸ புன அத³ஸ்ஸனதோ ஸமுத³யாதி³த³ஸ்ஸனே து³க்கா²தி³த³ஸ்ஸனமயோஜனீயம் ஸியா. ந ஹி லோகுத்தரமக்³கோ³ லோகியமக்³கோ³ விய கதகாரிபா⁴வேன பவத்ததி ஸமுச்சே²த³கத்தா. ததா² யோஜனே ச ஸப்³ப³ம் த³ஸ்ஸனம் த³ஸ்ஸனந்தரபரந்தி த³ஸ்ஸனானுபரமோ ஸியா. ஏவம் ஆக³மதோ யுத்திதோ ச நானாபி⁴ஸமயஸ்ஸ அஸம்ப⁴வதோ பச்சேகம் மக்³கா³னம் ஓதி⁴ஸோ பஹானம் நத்தீ²தி நிட்ட²மேத்த² க³ந்தப்³ப³ம்.
ஓதி⁴ஸோகதா²வண்ணனா நிட்டி²தா.