7. சித்தட்டி²திகதா²வண்ணனா

335. ஏவந்தி ‘‘ஏகசித்தம் யாவதாயுகம் திட்ட²தீ’’தி வுத்தாகாரேன. அஞ்ஞத்தா²தி அரூபப⁴வதோ அஞ்ஞஸ்மிம். ஏதேனாதி ‘‘ஏகமேவ சித்தம் ஆருப்பே திட்ட²தி, யாவதாயுகம் திட்ட²தீ’’தி ஏவம்வாதி³னா து³தியாபி அட்³ட⁴கதா² பஸ்ஸிதப்³பா³ பட²மகதா²ய சிரகாலாவட்டா²னவசனஸ்ஸ அஞ்ஞத³த்து² பா⁴வவிபா⁴வனதோதி அதி⁴ப்பாயோ. புரிமாயாதி ‘‘யாவதாயுகம் திட்ட²தீ’’தி பஞ்ஹதோ புரிமாய. தத்த² ஹி ‘‘வஸ்ஸஸதம் திட்ட²தீ’’தி புச்சா²ய ‘‘ஆமந்தா’’தி அனுஞ்ஞா கதா, பச்சி²மாயம் பன ‘‘மனுஸ்ஸானம் ஏகம் சித்தம் யாவதாயுகம் திட்ட²தீ’’தி ‘‘ந ஹேவம் வத்தப்³பே³’’தி படிக்கே²போ கதோ. அவிரோதோ⁴ விபா⁴வேதப்³போ³, யதோ தத்தே²வ அனுஞ்ஞா கதா, ந பச்சா²தி அதி⁴ப்பாயோ. வஸ்ஸஸதாதீ³தி ச ஆதி³-ஸத்³தே³ன ந கேவலம் ‘‘த்³வே வஸ்ஸஸதானீ’’தி ஏவமாதி³யேவ ஸங்க³ஹிதம், அத² கோ² ‘‘ஏகம் சித்தம் தி³வஸம் திட்ட²தீ’’தி ஏவமாதி³பீதி த³ட்ட²ப்³ப³ம். ‘‘முஹுத்தம் முஹுத்தம் உப்பஜ்ஜதீதி பஞ்ஹோ ஸகவாதி³னா புச்சி²தோ விய வுத்தோ’’தி இத³ம் விசாரேதப்³ப³ம். ‘‘முஹுத்தம் முஹுத்தம் உப்பஜ்ஜதீ’’தி பஞ்ஹோ பரவாதி³ஸ்ஸ. ‘‘உப்பாத³வயத⁴ம்மினோ’’திஆதி³ஸுத்தத்த²வஸேன படிஞ்ஞா ஸகவாதி³ஸ்ஸாதி ஹி வுத்தம்.

சித்தட்டி²திகதா²வண்ணனா நிட்டி²தா.